Luka 16 - ONUGBÙ NYƐNYÃ VUVƆ

Kɛkpalɛ Denɔ Bushɛ Anɔ Gɛ Alɛ Kɛdɔnu

¹ Yesu etsre yɛ badɔkpasɛ nɛ asɛ: “Ehueyi lete teli aza, anɔ nɛ gɛ edi yɛ kɛdɔ nɛabha, bɛ bhui yɛ nu asɛ efutsu yɛ dɔnyɛdɔ.

² Kɛlɛso eklu yɛ amɛna yɛ ɔbha klɛ ebisi asɛ, ‘Kibuiɖueɖu nɛɛ mɛ nu nɛ wɔ shu? Kɔ mɛ tɛtɛdanɛ nɛ kɛxwɛ nɛ shu, alasɛ ɔtɛɔza axwɛ nɛ nu.’

³ Anɔ nɛ gɛ edi axwɛ nɛabha aɖɔ nɛ ishu mɛ asɛ, ‘Kide mɛ ɛba bhɛtɛ ɔtsyɔ nɛ? Mɛ apalete nɛ àyɛkɛ kɛxwɛ nɛ mahwɛ. Ɛdɛ gɛganɛ gɛ ɛba tsu ozi klɛ kɛwɔ̃ɛ kumɛ sɛ tɛ ɛzɛ bisi dɔ—

⁴ Inyi kɛdɔnɔ gɛ ɛba bhɛtɛ, onugɛ kɛxwɛ nɛ koeyi nɛ mahwɛ, gɛ banɔ ba ba yɛkɛ mɛ akpɛ balɛ bapa nɛ mɛ.’

⁵ “Kɛlɛso eklu bagɛ ba dɔbhɛ nɛ yɛ apalete nɛ shu terikpo terikpo amɛna. Ebisi atɛtɔpu asɛ, ‘Ehoetashɛ̃ bhɛ wɔ dɔ nɛ mɛ apalete nɛ shu?’

⁶ Aɖɔ sɛ “ ‘Olivɛ bubɔ epuli kɛfɔɛfɔ tiasɔɛ bhɛ mɛ dɔ. “Agɛ yalɛ kɛxwɛnɛnu etsre yɛ asɛ, ‘Yɛkɔ wɔ kɛbhɛ keplukpa, za kesi zia tɛ otsyinɛ lɛ tɛ kidzi kɛfɔɛfɔ tɛalɛ̃.’

⁷ “Ɔkɛlɛ ebisi abhla asɛ, ‘Klɛ ehoetashɛ̃ kɛbhɛ wɔ dɔ?’ Ebulɛnu asɛ, “ ‘Nikpe ɛkpɛ̀tɛ̀ kɛkpã tirikpo kɛlɛ bhɛ mɛ dɔ. “Etsre yɛ asɛ ‘Yɛkɔ wɔ kɛbhɛ keplukpa tɛ otsyinɛ lɛ tɛ kidzi kɛfɔɛfɔ tɛasɔɛ.’

⁸ Apalete nɛ akpɛ axwɛdɛ zizi nɛabha alasɛ awaɛxwɛ nɛ bushɛ. Kanɔa nɛ mɛ banɔ be nyi saŋhwɛ̃ kibuititi gɛ bayɛkɔ aganɛ ishu nɔ dɛ amɛ bhubhui mɛ banɔ.

⁹ Itsre nɔ sɛ nɔ yɛkɔ kanɔɛmɛ ehoeyi tɛ nɔ mɔ ɛbhɛya kɔ shu, sɛ tɛ onugɛ kɛvama, ba ba yɛkɔ nɔ akpɛ ɔzakɔ mabeke.”

¹⁰ “Agɛ yɛ abha lɛ yɛkɛŋa nɛ kɛdɔ bhliyi mɛ ba bayɛkɛ yɛ kabhaŋa nɛ kɛgbɛagba mɛ tsyɛ, klɛ agɛ batɛ bayɛkɛ yɛ abhaŋa nɛ kibhliyi mɛ batɛ bayɛkɛ yɛabha ŋa nɛ kɛgbɛgbla mɛ tsyɛ.

¹¹ So onugɛ ba dɛ yɛkɛ wɔ abhaŋa nɛ kanɔɛmɛ ehoeyi abha didi, anɛ yɛ aba yɛkɛ wɔ abhaŋa nɛ ehoeyi gbɛagba?

¹² Klɛ onugɛ ba dɛ yɛkɛ wɔ abhaŋa nɛ anɔ teli dɔ abha didi, ane yɛ aba kɔ wɔnahwɛ dɔ?

¹³ “Axwɛdɛ kanyaka atɛ bana kɛxwɛ dɛ kɔ bapalete tiabha. Kɛba dzi sɛ aba dɛmɛ terikpoɛ bui klɛ atɛba dɛmɛ abhla nɛ bui pɛnɔ. aba yɛkɔ ishu ɔkɔ terikpo klɛ aba tsyina kede kpɛ abhla. Ɔtɛ bɔ na kɛxwɛ dɛ kɔ edi tabha Kpaya anɛ Kɔba.”

¹⁴ Farisianɛ, gɛ ba dɛmɛ kɔba ebui, benu ebuianɛ petee klɛ bakpɛ onugbuesi kɔ Yesu.

¹⁵ Yesu etsre alɛ sɛ, “wunɔ nu banɔ nɛ gɛ nɔ bu shu tsya nɛ banɔ amɛ, pɔ Kpaya enyi wunɔ dzyi mɛ. Kɛdɔnɔ gɛ bayɛkɔ sɛ kinu kɛdɔ gbɛgbla nɛ banɔ amɛ, ki di yi kɛdɔnyɛdɔ nɛ Kpaya amɛ.

Kɛdɔkɛkasɛ Pɛplɛnɔ

¹⁶ “Ɛshã anɛ Bebuiɖɔlu nɛ ebui ba ɖɔ alɛ ɔdɔtɔnɔ Yohanɛsɛ be. Denɔ kɛbelɛlɛ, ba ɖɔ kɛbui dzyɔgo denɔ Kpaya kusiɔŋakɔ nɛ shu, klɛ anɔnyanɔ wlãkɛ yɛ dzo sɛ tɛ etsoku lɛ mɛ.

¹⁷ Kɛ ba za bubɔɛ kɔ owũsise anɛ kesukpa tɛ kalɛla dɛ sɛ kɛdɔ ŋuŋlɔmɛ bhliyi tɛ kɛwɔlɛ koeyi nɛ Ɔshã nɛ mɛ.

¹⁸ “Anɔnyanɔ gɛ ashɛ̃nahwɛ yɛedzini shu klɛ ada gbanɔ adzɛ bhlatɔ adɛ ɔmamɛ, klɛ anyɛ nɔ nɛ gɛ agbanɔ adzyɛ gɛ anyɛ atsyɛnahwɛ yɛ shu adɛ ɔmamɛ.

Ehuelete Anɛ Lazaro

¹⁹ “Ehueyi elete teli aza gɛ enyumu kɛdɔ dzyɔgo dzɛdzã nɛ kɛfrɛrɛ klɛ aza ɛkpã ŋɛŋa ɖɛɖama bha kɛbenyɛbe.

²⁰ Nɛ yɛ kedunu adɔbisi teli gɛ beklu yɛ asɛ Lazaro gɛ bà yɛkɔ lu ɔkɛlɛ, klɛ apɔ aza yɛ shu

²¹ klɛ apɛɛ asɛ tɛ aŋa kɛdɔ nɛ gɛ kɛwɔlɛ nɛ ehuelete dɔ nɛ ɔŋa kɔ. Bukudzɔgɛ kuratsyɛ bulɛ ba mini yɛ apɔ nɛ mɛ.

²² “Kɛbe na gɛ adɔbisi netsi, klɛ baxwɛdɛ ne feke yɛ avɛnɔ Abraham ɔbha. Ehueyi elete nɛ tsyɛ tsi klɛ bavubɔ yɛ.

²³ Nɛ kifu nɛ mɛ gɛ ehueyi elete ne amɔ butɔ, edi kabha klɛ amɔ Abraham nɛ ɔdzidze kɔ gɛ Lazaro alɛ yɛ wã.

²⁴ So eklu yɛ, ‘Aka Abraham, di mɛ eshutukubui tɛ ɔkpɛ Lazaro tɛ akpɛ kɛwɔɛ nɛ onugbu nɛ buni mɛ klɛ tɛ ayɔ mɛ kɛnɛkɛ abha, alasɛ ɛmɔ butɔ nɛ kifui nɛ mɛ.’

²⁵ “Pɔ Abraham ebuilɛnu asɛ, ‘Eyi, baka sɛ nɛ wɔ ɛkpã za bɛ ɔyɛkɛ wɔɛ dɔ dzyɔgo, nɛ lɛ be Lazaro ayɛkɛ dɔ zizi, pɔ ɔtsɔ̃ nɛ yɛ shu yɔ nɛ ɔkɛ̃ nɛ klɛ wɔ mɔ butɔ.

²⁶ Klɛ kɛnɛ petee ede, nɛ bulɔ nɛ wɔɛ shi ozi gbɛgbla toli bhui bulɔ nɛ wɔɛ shi, sɛ tɛ bagɛ ba pɛɛ sɛ tɛ ba zɛ odenɔ ɔkɛnɛ aba wunɔ bha atɛ ba na, pɛnɔ anɔ aba na tsɔkɛ denɔ wunɔ ɔbha aba bulɔ ɔbha.

²⁷ Ehuelete nɛ ebushunu sɛ, ‘Kɛlalɛ ɛkpɛ kɛtɔkpuesi kɔ wɔ, aka, kpɛ Lazaro nɛ mɛ aka bupa nɛ mɛ,

²⁸ alasɛ badzya tieti ba lɛ mɛ ahwɛ. Kɔ yɛ akpɛ balɛ ɔshã, sɛ tɛ balɛ tsyɛ batɛ ba ba butɔ ɔzakɔ nɛ.’

²⁹ “Abraham ebuilɛnu asɛ, ‘Mose anɛ Atɔnu, ba lɛ balɛ ahwɛ, kɔ lɛ ata tɔ nɛ alɛ.’

³⁰ Aɖɔ sɛ, “ ‘Ao, aka Abraham, pɔ onugɛ anɔteli ede bekpuimɛ avɛ balɛ ɔbha, ba be tsyina kitemɛ.’

³¹ “Abraham etsre yɛ asɛ, ‘Onugɛ ba dɛ tatɔ Mose anɛ Atɔnu, kɛtɛ ba ku balɛ awɔ̃ onugɛ anɔteli alɔ ede bekpuimɛ aba kuratsyɛ.’ ”