Luka 13 - ONUGBÙ NYƐNYÃ VUVƆ

Tsyinɛtemɛ Pɛnɔ Otsi

¹ Ɔtsɔnɛ banɔ teli baza ɔkɛlɛ nɛ ɔɖɔ nɛmɛ gɛ betsre Yesu edenɔ Galelianɛ gɛ ba lɛ dzyosu Pilato ayɛkɔ abaka balɛ dɔ pupɔɛ.

² Yesu ebulɛnu asɛ, “Nɔ yɛkɛŋa sɛ Galelia banɔa nɛ batsɔmɔ adɛ Galelianɛ gɔgɔɛ alasɛ ba mɔ butɔɛ nɛ di?

³ Itsre nɔ sɛ, ao! Pɔ odunu sɛ nɔ tsyinɛtemɛ, wunɔ petee tsyɛ nɔ bɔ tsi.”

⁴ Pɛnɔ banɔ lɔfɔnɛtɛasɔɛ gɛ buvu ɔɖɛɖamakɔ nɛ tsrabu alɛ gɛ betsi nɛ Siloamɛ—nɔ yɛkɔ sɛ ba baŋaɛpɔ gelee dɛ bagugɔɛ gɛ ba lɛ Yerusalɛm?

⁵ Itsre nɔ sɛ, ao! Pɔ odunu sɛ nɔ tsyinaɛtemɛ wunɔ petee tsyɛ nɔ bɔ tsi.”

⁶ Kɛle Yesu akpɛ kɛkpalɛ nɛ asɛ: “Anɔ teli kabhɔ osi ɔza yɛ ahwɛ, edzu nɛ yɛ vãyɛ̃ buyɛ mɛ, klɛ avɛ sɛ tɛ ede di sɛ aba mɔ eyuyu nɛ ɔlɛ dza, pɔ adɛ mɔ akanyaka.

⁷ So etsre anɔ nɛ gɛ edi vaĩn buya nɛabha asɛ, ‘Agɔ tata na nɛ gɛ ɛ̀ba sɛ tɛ ɛba pɛɛ eyuyu nɛ kabhɔ osiɔnɛ abha klɛ ɛtɛmɔ akanyaka. Tẽ ɔlɛ ohuesi! Kɛde so gɛ lɔ zi kesukpa?’

⁸ Anyɛ na ɖɔ sɛ, ‘Apalete,’ shɛnahwɛ ɔlɛ shu lu kɔ kɛgɔ zɛzɛ́ bhlatɔ, klɛ ɛba tsu ɔlɛ shu kana klɛ ɛba kpɛ ɔlɛ wa.

⁹ Onugɛ lɔ yu kɛgɔ gɛ kɛtɛba, abɔ! Onugɛ lo di yu klɛ tɛ otẽ ɔlɛ ɔtɛ̃.’ ”

Bakɔ Kɛkpata Adzɛ Teli Alɔ Aga Nɛ Kimonewui Abha

¹⁰ Nɛ Kimoenewui tili abha Yesu akàsɛ dɔ nɛ oxogokɔvu tirikpo tuli mɛ,

¹¹ klɛ adzɛ teli aza ɔkɛlɛ gɛ ɔfufɔɛkpã kpɛ yɛ kɛkpata agɔ lɔfɔnɛtasɔɛ. Axãku klɛ atɛ bana lɔ adzɔ kura.

¹² Gɛ Yesu amɔɛ yɛ, eklu yɛ amɛna otugba klɛ aɖɔ tsre yɛ asɛ, “Adzɛ, be bule wɔ nɛ wɔ bunya nɛ mɛ.”

¹³ Ɔkɛlɛ atrɔ ɛhwɛ nɛ yɛ abha, klɛ tsɛ̃ɔ ko adzyɔ yɛ ɔhwɛ klɛ akpɛ Kpaya nyi nɛabha.

¹⁴ Ishuimɛ pɔɛ anyɛ nɛgɛ edi oxogokɔvu nɛabha, alasɛ Yesu ebeke bunya nɛ Kimuenewui nɛ abha, klɛ aɖɔ tsre banɔ nɛ asɛ, “Ewui tehlo alalɛ kɔ kɛxwɛwɛwa. So ba tɛ bɛkɛ bunya nɛ ewuialɛ nɛabha, anɛ nɛ́ Kimoenewui nɛabha.”

¹⁵ Apalete ebushunu akɔ yɛ asɛ, “Wunɔ betroni! Wunɔ mayɛ kanyaka nɛ Kimoenewui abha ebe bule yɛ nɛntsyɔɛ pɛnɔ kitukuaga nɛ yɛ ohuimɛ klɛ agbanɛ yɛ avɛnɔ sɛ tɛ ada kɔ yɛ buni?

¹⁶ Kɛlɛalɛ kideso gɛ adzɛ anɛ, gɛ enu Abraham ye yi, gɛ Satana anya yɛ agɔ dzidze lɔfɔnɛtasɔɛ, gɛ ba tɛ bule yɛ xũ nɛ Kimoenewui abha?”

¹⁷ Gɛ aɖɔ kibui nɛ, kɛwɔ̃ɛ ku yɛ kititilɛlɔ petee, pɔ banɔ na mɔ same nɛ ebuiyinɔanɔ petee gɛ abhɛtɛ nɛ shu.

Akpalɛ Denɔ Ɔyurɔpɔɛeyi Anɛ Bunayekedɔ shu

¹⁸ Ɔkɛlɛ Yesu ebisi asɛ, “Kɛlɛ Kpaya bukusiɔŋakɔ nɛ dzi? Kɛde ɛba yɛkɔ sɔnɔ lɛ?

¹⁹ Edzi anasɛ ɔyurɔpɔɛeyi, gɛ anyɛ teli ayɛkɔ klɛ aɖa nɛ yɛ bukaɛ mɛ. Lɔ she klɛ lɔbɔ dzi osi, klɛ kɛlɛmɛ buzhuɔɛ bu dɔ nɛ ɛlɛ ɛshɛ̃ abha.”

²⁰ Yesu eze bisi asɛ, “Kɛde mɛ ɛba yɛkɔ Kpaya bukisiɔŋakɔ nɛ sɔnɔ?

²¹ Bu dzi anasɛ bunayekedɔ gɛ adzɛ teli ayɛkɔ akpɛ buna gelee mɛ ɔdɔtɔnɔ kibɛ lɛlɛ nɛ gɛ buba yiku buna nɛ mɛ.”

Kedunu Shɔɛshɔɛ

²² Ɔkɛlɛ Yesu aga ɛma gbɛgbla anɛ ibhliyi nɛ mɛ, klɛ akasɛ dɔ gɛ ayɛkɔ yɛ kɛdzo gɛga nɛ avɛ Yerusalem.

²³ Anɔ teli ebisi yɛ asɛ, “Apalete, banɔ bhli ko ba bayɛkɛ kɔ?” Aɖɔ etsrea lɛ asɛ,

²⁴ “Bhɛtɛ kɛkanyaka tɛ otsoku ganɔ kedunu shɔɛshɔɛ, alasɛ be gelee, itsre nɔ sɛ, ba ba pɛɛ asɛ tɛ betsoku klɛ batɛ ba na.

²⁵ Kibelɛlɛ gɛ buvu elete alɔ klɛ ada kedunu, nɔ bɔ lɔ kititi nɛ ɔtɔ nɔ zɔ bho opupu klɛ nɔ bɔ zɔ kpɛtɔkpuesi sɛ, ‘Apalete, danɛ buvu nɛ ɔkɔ lɔ.’ “Pɔ ebe tsre nɔ sɛ, ‘Ɛtɛ nyi nɔ ɔdɔgɔsɛ ɔkɛlɛ gɛ nɔ de.’

²⁶ “Ɔkɛlɛ nɔ bɔ ɖɔ sɛ, ‘Bu ŋaɛ dɔ klɛ buwɔɛ̃ dɔ nɛ wɔ, klɛ ɔkasɛ dɔ nɛ bulɔ edzo nɛabha.’

²⁷ “Pɔ ebe builɛ nu asɛ, ‘Ɛtɛ nyi nɔ pɛnɔ ɔkɛlɛ gɛ nɔ de. Nɔ fla nɛ mɔ bha, wunɔ petee ebui kpã bhɛbhɛtɛ elete!’

²⁸ “Ɔkɛlɛɔlɛ iyuyo nɛ eletɛtã ba za ɔkɛlɛ, kibenɔ gɛ nɔ mɔ Abraham, Isaka anɛ Yakobo anɛ batɔnu petee anɛ Kpaya bukusiɔŋakɔ nɛ mɛ, pɔ wunɔnɛhwɛ ba be bunɔ atɛ̃.

²⁹ Banɔ ba bede kiwui ɔyɛkɔ nɛ kiwui ɔdɔkɔ, owuwu anɛ ozhizhi aba, klɛ ba bayɛkɛ balɛ ɛzakɔ nɛ kiwui ŋɛŋa nɛ mɛ nɛ́ Kpaya bukusiɔŋakɔ nɛ mɛ.

³⁰ Nɛlɛmɛ ɔkɛlɛ nɛ bagɛ balɛ nu bagɔgɔɛ ba bedzi batutɔpu, klɛ batutɔpu ba bedzi bagugɔɛ.”

Yesu Yɛ Tɛbibikɔ Yerusalɛm

³¹ Nɛ kɛbelɛlɛ nɛ mɛ Farisianɛ teli ba ba Yesu ɔbha klɛ be tsre yɛ asɛ, “Shɛ nɛ ɔkɛnɛ tɛ ɔvɛ ɔkɔbhlatɔ tsyɛ. Heroɖesɛ apɛɛ asɛ tɛ eyi wɔ.”

³² Ebulɛnu asɛ, “Vɛ tɛ ɔdɔ tsre ayakpaɛmɛ kakudzogɛ alɛ nɛ sɛ, ‘Ɛba kɛka ɛfufɔɛ kpã bu klɛ eba bekɛ banɔ banya obo anɛ kivu, klɛ nɛ kiwui tramɛ nɛabha ɛba wa mɛ xwɛ beke.’

³³ Nɛ kɛkanyaka mɛ, ɛba za lɛabha ɛzɛ vɛ obo, kivu nɛ kivuede— alasɛ kɛgbɛagba mɛ, atɔnu kanyaka gɛ aba na tsi gɛ ekoeyi nɛ Yɛrusalɛm!

³⁴ “O Yerusalɛm, Yerusalɛm, wɔ gɛ ɔyi bebuiɖɔlu klɛ nɔ hu aklãgbu bagɛ ba sɛsɛnɔ, atɛ tashɛ̃ ɛba gba wunɔ yialɛ nɛ xogo, anasɛ gɛ ɔkukɔni lɔ kumu yɛ yialɛ nɛ ɔlɛ buglebe mɛ, pɔ kɛtɛ ku nɔ awɔ̃!

³⁵ Di, wunɔ bupa bulɛ ba shɛ̃ lɔ elu kɔ akpɛkpa. Itsre nɔ sɛ, nɔ tɛɔ mɔ mɛ ɔdɔtɔnɔ kibelɛlɛ gɛ nɔ ɖɔ sɛ, ‘Bayula anɔ nɛ gɛ aba nɛ Apalete nɛ nyi mɛ.’ ”