Koloseanɛ 4 - ONUGBÙ NYƐNYÃ VUVƆ

¹ Bapalete, nɔ kɔ wɔnɔ banɔ dzidzi nɛ kɛgɛ nu kɛdzyɔgo kɛlɛ lɛ pɛɛ̃, alasɛ nɔ nyi sɛ wũnɔ tsyɛ Apalete teli alɛ wɔnɔahwɛ nɛ owũsise.

Kɛdɔkɛkasɛ Vɛnɔ Otugba

² Yɛkɔ kpayakuklu ɔkpɛ kɛxwɛ, awɔ̃zɛza anɛ̀ ahwɛhuhu.

³ Klɛ nɔ klukpaya nɛ bulɔ tsyɛ, tɔkpu, sɛ tɛ Kpaya adanɛ opupu kɔ bulɔ ebui ɖɛɖɔ, tɛ bɔɖɔ Kristo ebui kpukpu, alasɛ kɛlɛ so gɛ ba kpɛ mɛ buɖɛ.

⁴ Nɔ klukpaya sɛ ɛba ɖɔ ebui tɛ alɛ mɛ ebhui anasɛ gɛ ɛbana.

⁵ No ti kibui nɛ kidzo nɛa bha gɛ nɔ̀ bhɛtɛ ebui nɛ ɔvɛnɔ bagɛ ba dɛyɛkɛŋa, nɔ bhɛtɛ ɔtrɔ kidzoenu didi kanyaka abha.

⁶ Kɔ wɔnɔɛ kibuiɖɛɖɔ kanyaka yuku nɔ nɛ ɛyɛmɛyuyɔ, gɛ ba kpɛ lɛ bumɔɛ, sɛ tɛ nɔ ti kana gɛ no bo bu kibui nu nɛ anɔnyanɔ.

Tɛsɛsɛnɔ Gugɔɛ

⁷ Taɛtsyikus ebe tsre nɔ ebuiɖuɖɔ petee denɔ mɛ shu. Enu adzya mumɔ, ayɛyɛkɛŋa axwɛwa anɔ anɛ̀ ɔha axwɛdɛ nɛ́ Apalete nɛ mɛ.

⁸ Ɛsɛsɛ nɔ yɛ sɛ tɛ kɛ tsɔ kɔ nɔ tɛ no ti denɔ bulɔ ebui nɛ gɛ lavɛabha klɛ tɛ akpɛ wɔnɔ idzyi mɛ.

⁹ Aaba plɛnɔ Onesimusɛ, bulɔ adzya mumɔa gɛ enu wũnɔ mayɛ teli. Ba be tsre nɔ ebui nɛ gɛ lavɛabha nɛ ɔkɛnɛ.

¹⁰ Mɛ ɔhayɛ evuza Aristakusɛ asɛsɛ nɔ tɛsɛsɛnɔ, kana Marko abhɛtɛ, Barnaba yɛa kɛdzyayi. (Nɔ tɛ yɛkɛ odu denɔ yɛ shu, onugɛ aba wɔnɔ kɔ, nɔ yɛkɛ yɛ mɔmɔ.)

¹¹ Yesu, gɛ beklu asɛ Yustus, yɛ tsyɛ asɛnɛ nɔ asɛsɛ. Balɛ ko balɛ nu Yuɖanɛ gɛ ba lɛ mɛ baxwɛwa glɔ kɔ Kpaya bukusiɔŋakɔ, klɛ ba kɔ mɛ ishu mɛ dɔ.

¹² Epafra, gɛ enu wɔnɔmɛayɛ teli nɛ Yesu Kristo axwɛdɛ, asɛnɛ nɔ asɛsɛ. Awlãnkɛ eklukpaya kibenyɛbe nɛ wɔnɔɛ tɔkpu, sɛ tɛ nɔ za gɛganɛ nɛ́ Kpaya tɛpɛpɛɛ petee mɛ, nɔ she tɛ nɔ bhɛtɛ yɛ ebui tɛ la na.

¹³ Ɛba na yɛede za sɛ enu axwɛwuwa gɛganɛ kɔ nɔ anɛ̀ kɔ ba gɛ ba lɛ Laodisia anɛ Hierapolis.

¹⁴ Bulɔ ɔbhɛa mumɔ Luka, awani, nɛ Demasɛ asɛnɛ nɔ asɛsɛ.

¹⁵ Kɔ mɛ tɛsɛsɛnɔ badzya nɛ Laodisia, klɛ kɔ Nimfa anɛ busɔlɛɔha nɛ yɛ bupa nɛ mɛ.

¹⁶ Keplukpa anɛ tɛkɛklae de kɔ nɔ, no di lɛ ɔkɔ sɛ ba kla kalɛ tsyɛ nɛ Laodikeanɛ busɔlɛɔha nɛ mɛ klɛ tɛ nɔ dɔ tsodzi ɔkla denɔ Laodikea nɛ nɔ kɔ.

¹⁷ Tsre Arkipu: “Di kɛlɛ ɔkɔ sɛ nɔ wa kɛxwɛ nɛ gɛ nɔ yɛ kɛ nɛ Apalete nɛ mɛ beke.”

¹⁸ Mɛ, Paolo, ɛŋlɔmɛ tɛsɛsɛnɔɛ nɛ mɛnahwɛ ɔhwɛ. Nɔ baka mɛ buɖɛ kpɛkpɛ. Ɛyamyuyɔ za plɛnɛ nɔ.