Koloseanɛ 2 - ONUGBÙ NYƐNYÃ VUVƆ

¹ Ɛpɛɛ sɛ tɛ nɔ ti kana gɛ ɛwlãkɛ kɔ nɔ klɛ nɛ̀ bagɛ ba lɛ Laodikɛa, anɛ̀ kɔ bagɛ ba ka tsyanɛ mɛnahwɛ edi.

² Mɛ tɛbhɛtɛ kɛ lɛ nu sɛ tɛ ba kpɛ balɛ idzyi kemi nɛ̀ tɛ ba kpɛ alɛ ketsu nɛ́ tɛdɛdɛmɛ mɛ, sɛ tɛ ba yɛkɛ ehueyi mumɔ gelee nɛ kibuiesi nunu nɛna, nɛ kɛlɛmɛ tɛ ba beti Kpaya ebukpukpu, be klu sɛ Kristo,

³ nɛ kɛlɛ mɛ le kpu kibuinyinyi anɛ̀ kibuititi petee ɔbalakɔ.

⁴ Itsre nɔ kibui nɛ sɛ tɛ anɔnyanɔ atɛ ba wɔɛ nɔ nɛ̀ onugbu-tsyɛmɛtsyɛmɛ bui wuwlãnkɛ.

⁵ Alasɛ kɛlɛlɛmɛ sɛ ɛma wɔnɔ bha nɛ ishuidzya mɛ, ɛlɛ plɛnɛnɔ nɛ́ ɔfufɔɛ mɛ klɛ ɛpɛɛ sɛ tɛ ɛmɔ kana gɛ nɔ nyɛna shu klɛ nɛ kana gɛ wɔnɔ tɛyɛyɛkɛŋa lɛ gɛganɛ nɛ Kristo mɛ.

Ishuahwɛzɛza Denɔ Anɔdzyrame Ɛshã Ɔganɔ Ɛkpãzɛza Nɛ Kristo Mɛ

⁶ Kɛlɛso anasɛ gɛ nɔ yɛkɛ Kristo Yesu anasɛ Apalete, nɔ vɛ kɛlɛ abha tɛ nɔ za nɛ́ yɛ mɛ,

⁷ nɔ kpɛgu klɛ tɛ nɔ bhɔ ɔtrɔ nɛ yɛ mɛ, tɛ nɔ gɛganɛ nɛ́ tɛyɛyɛkɛŋa mɛ anasɛ gɛ ba kasɛ nɔ, klɛ tɛ nɔ yuku ɔgbɛgba nɛ̀ ahwɛhuhu.

⁸ Nɔ di kɛlɛ ɔkɔ sɛ anɔnyanɔ adɛ vu nɔ aganɔ kidzo kɔklɔ̃ nɛ tɛwɛwɔɛ dɔnyinyi, gɛ kɛlɛ anɔdzyrame begu nɛ̀ kanɔ nɛmɛ ebui bhɛbhɛtɛ ɔyɛkɔdɛ Kristo abha.

⁹ Alasɛ nɛ Kristo mɛ tɛnɛna petee nɛ́ Kpaya shuidzya tɛzɛza mɛ,

¹⁰ klɛ batɛ kɔ nɔ tɛnɛna nɛ́ Kristo mɛ, gɛ yɛ enu kɛtɔkpu kɔ kemi anɛ̀ kabhaŋɛŋa kanyaka.

¹¹ Nɛ yɛ mɛ wɔnɔ tsyɛ be bhui bunyɛnyɛ kɔ nɔ, nɛ sɛ tɛ be bu buzizi bhɛbhɛtɛ nɛ atɛ̃, anɛ bunyɛnyɛ bhubhui nɛ banɔ ahwɛ pɔ nɛ bunyɛnyɛ̃ bhubhui gɛ Kristo abhɛtɛ,

¹² gɛ batɛ vubɔ nɔ nɛ̀ yɛ anɛ́ bunikpɛkpɛ mɛ klɛ ba nyɛmɛ nɔ nɛ yɛ ɔganɔ wɔnɔ tɛyɛyɛkɛŋa anɛ́ Kpaya kemi, agɛ anyɛmɛ yɛ edenɔ bekpui mɛ.

¹³ Kibenɔ gɛ nɔ tsi nɛ wɔnɔ ebuizizi mɛ klɛ nɛ́ bunyɛnyɛ mabhuimabhui nɛ́ wɔnɔ ebuizizi bhɛbhɛtɛ, Kpaya abhɛtɛ nɔ lɛ nɛ ɛkpã anɛ̀ Kristo. Yɛ ya yɛkɔ bulɔ ebuizizi petee etsye,

¹⁴ gɛ atɛ tsa odi akpɛ kɛdɔ ŋuŋlɔmɛ ɔshã, anɛ́ ɛlɛ abha tɛtɛtrɔ, gɛ kɛlɔɛ titi nɛ bulɔ shu klɛ kɛ dɛ za lɔ li, ayɛkɔɛ lɛ ashɛnɔ, ada kpla lɛ nɛ butsiosi shu.

¹⁵ Klɛ gɛ atɛyɛkɛ kemi anɛ̀ kabhaŋɛŋa nɛ balɛ ahwɛ, abhɛtɛ alɛ ba vɛ kede sɛ tɛ anɔnyanɔ amɔ yɛ kabhaŋɛŋa nɛ balɛabha nɛ butsiosi shu.

¹⁶ Kɛlɛso nɔ tɛ kɔ anɔnyanɔ ebu kɛpɔ kɔ nɔ nɛ kɛ gɛ nɔ ŋa ɔdɔgɔsɛ kɛgɛ nɔ wɔɛ̃, ɔdɔgɔsɛ busɔlɛ kiwuiŋɛŋa, Woele Vuvɔɛ wuiŋɛŋa pɛnɔ Tɛmumoene wui.

¹⁷ Ganɛ alɛ enu kɛtɔwui ebui gɛ la ba ba, kɛgbɛagba, nɛlɛmɛ ba mɔɛ lɛ nɛ Kristo mɛ.

¹⁸ Nɔ tɛ kɔ anɔnyanɔ gɛ akasɛ ishu sɛ yɛ adɛ klɛ nɛ busɔlɛsɔlɛ kɔ kpaya baxwɛdɛ kɔsɛ ɔdɛŋa abha. Anɔa nɛɛ di avɛ ebui gbɛgbla ɔɖɔ kɔ denɔ agɛ amɔ, klɛ yɛ ɔfufɔɛ maza tɔkpuimɛ kɔ yɛ efekeshu nɛ ebui bhɛbhɛtɛ.

¹⁹ Apɔ nɛ Kɛtɔkpu nɛ shu, denɔ agɛ yɛ shu ishuidzya nɛ petee kɛ kpa plɛnɔ klɛ tɛzɛ anɛ kɛdzya nɛ nyɛna xogo, pɛ kɛɛ she ansɛ gɛ Kpaya abhɛtɛ ɛlɛ asɛ kishe.

²⁰ Kɛbelɛlɛ gɛ otsi nɛ Kristo kɔ kanɔɛmɛ dɔ bhɛbhɛtɛ, kideso, anasɛ kɛlɛlɛmɛ sɛ nɔ kɔ nu ka lɛ ayɛ, ɔyɛkɔ wɔ shu kpɛ ɔlɛ ɛshã nɛesi:

²¹ “Tɛ nyɛna ebuianɛ! Tɛ mini! Tɛ hunɔ!”?

²² Aanɛ nɛ petee ala sɛ tɛ le zi nɛ alɛ shu kɛxwɛwɛwa mɛ, alasɛ ba bhɔa lɛ atrɔ anɔdzyrame ɛshã anɛ̀ kɛdɔkɛkasɛ abha.

²³ Eshã nɛdi kɛgbɛagba lɛ wɔɛ̃ nɛ kibuinyinyi, plɛnɔ balɛ nahwɛ tɛsusɔlɛ nɛ gɛ ba yɛkɔ atrɔ shu, balɛ itro ishu kpɛkpɛesi anɛ butɔ kpɛkpɛ ishuidzya, pɔ lɛ di nu kɛdɔ gɛ kɛ ba dzu ahwɛ ishuidzya nɛ tɛpɛpɛɛ abha.