Koloseanɛ 1 - ONUGBÙ NYƐNYÃ VUVƆ

¹ Paolo, Kristo Yesu anɔkpɛkpɛ nɛ́ Kpaya tɛ pɛpɛɛ nu, nɛ Timotio bulɔ adzya,

² Kɔ banɔnɛna nɛ badzya nɛ gɛ bayɛkɛŋa nɛ Kristo mɛ nɛ Kolose: Ɛyɛmɛyɛyɔ anɛ ishuyɛyɔ kɔ nɔ denɔ bulɔ Aka Kpaya ɔkɔ.

Ahwɛhuhu Nɛ Kpayakuklu

³ Kibenyɛbe buhu Kpaya ahwɛ, Aka kɔ bulɔ Apalete Yesu Kristo ki be gɛ bu klukpaya kɔ nɔ,

⁴ alasɛ bu nu wɔnɔ tɛyɛyɛkɛŋa nɛ Yesu Kristo mɛ anɛ̀ tɛdɛdɛmɛ gɛ nɔ kɔ kpayabanɔ petee—

⁵ tɛyɛyɛkɛŋa anɛ̀ tɛdɛdɛmɛnɔ gɛ ki koeyi denɔ kidzoenudidi gɛ ba bala lu kɔ nɔ nɛ owũsise klɛ kɛ lɛ sɛ wɔnɔ no ti nu kibuigba nɛ dɔ, gɛ nu kibui dzyɔgo

⁶ gɛ kɛ ba kɔ nɔ. Nɛ kanɔ petee mɛ kibui dzyɔgoɛ nɛ kiyu eyuyu klɛ kishe, anasɛ gɛ kɛbhɛtɛ nɛ wɔnɔɛ shi, dɛnɔ kiwui nɛ gɛ no nui lɛ klɛ nɛ nu Kpaya eshutukubui didi nɛ kɛlɛ gbam petee.

⁷ Nɔ kpasɛ lɛ denɔ Epafrasɛ, bulɔ ɔhayɛ axwɛdɛ, gɛ enu Kristo axwɛwa gɛ ayɛkɛaŋa nɛ bulɔ nu,

⁸ agɛ yɛ eke tsre lɔ wɔ tɛɖuɖɔ kɔ lɔ nɛ Ɔfufɔɛ nɛm.

⁹ Kibui nɛ so, denɔ kiwuili gɛ bu nu wɔɛ dɔ, bu ka zukɔlɔ kpayaklu nɛ́ wɔɛ tɔkpu sɛ Kpaya ebe yuku wɔ nɛ yɛ tɛpɛpɛɛ ganɔ ɔfufɔɛ mɛ kibuinyinyi anɛ kibuiesi nunu.

¹⁰ Klɛ bu klukpaya sɛ tɛ nɔ za nɛ ɛkpã nɛ Apalete tɛpɛpɛɛ klɛ tɛ kiku yɛ awɔ̃ nɛ́ kidzonyɛdzo abha, tɛ kɛmɛna tɛyuyu anɛ kɛxwɛwɛwa dzyɔgo, tɛ bu zɛ she nɛ́ Kpaya kibui titi mɛ,

¹¹ akɔ lɔ tɛgɛganɛ nɛ̀ yɛ kemi petee anɛ́ yɛ kabhaŋɛŋa sɛ tɛ nɔ bɔ yɛkɛ kɛxwɛwɛwa gbɛgbla, nɛ ishu bububɔ anɛ̀ samemumɔ

¹² ahwɛhuhu kɔ Aka, gɛ abhɛtɛ nɔ nɔna tɛ nɔ yɛkɛ kpayabanɔ kededɔ nɛ́ kifu tɛtã bukusiŋakɔ.

¹³ Alasɛ ebhulɔayɛkɛ denɔ otumu ɔzakɔ klɛ amɛna lɔ aba kpɛ nɛ Eyi bukusiɔŋakɔ gɛ adɛmɛnɔ,

¹⁴ yɛ mɛ bu mɔ tɛbhubhuiyɛkɛ, ebuikpã tsyitsye.

Kristo Tɛtitri

¹⁵ Kristo yɛ tɛzɛzamɛ nu Kpaya gɛ ba ta mɔ, eyi tɛtɔpu kɔ kɛdɔ bhɛbhɛtɛ kanyaka.

¹⁶ Alasɛ ganɔ yɛabha, labhɛtɛ kɛdɔnyɛdɔ: kɛdɔ nɛ gɛ lɛ owũsise anɛ kesukpa abha, kɛgɛ wɔɛ̃ anɛ kɛgɛ kɛ tɛɛ wɔɛ̃, onu sɛ bugbu, ɔdɔgɔsɛ kemi, bagɛ baŋɛabha, kabhaŋɛŋa, kɛdɔ nɛ petee yɛ abha lɛ klɛ kɛ nu yɛ dɔ.

¹⁷ Alɛ flogo gɛ kɛdɔnyɛdɔ ba lɛ, klɛ nɛ yɛ mɛ be xogo kɛdɔnyɛdɔ.

¹⁸ Klɛ yɛ nu kɛtɔkpu kɔ ishuidzya, busɔlɛɔha, yɛ nu kesikpɛkpɛ anɛ̀ eyi tɛtɔpu gɛ akpasɛ denɔ bekpu mɛ, sɛ tɛ nɛ kɛkanyaka mɛ aba yɛkɛ agbɛgbladɛ.

¹⁹ Alasɛ kɛ ku Kpaya awɔ̃ sɛ tɛ ayɛkɔ yɛ shu petee aba za yɛ mɛ,

²⁰ klɛ ɔganɔ yɛabha tɛ abhɛtɛ terikpo nɛ kɛdɔnyɛdɔ kɔ yɛnahwɛ, kinu kesukpa abha dɔ pɛnɔ kɛdɔ nɛ́ owũsise, gɛ kɛ bhɛtɛ ishuyuyɔ ganɔ yɛ dzyosu abha, gɛ abalɛesi nɛ́ butsiosi nɛ shu.

²¹ Nɛ kibe tili gɛ nɔ za odzidze kɔ denɔ Kpaya ɔbha klɛ nɔ dzi banɔ gɛ ba dɛ pɛɛ yɛ bui nɛ wɔnɔ atɔkpu mɛ alasɛ wɔnɔ ebuikpã bhɛbhɛtɛ so.

²² Pɔ ɔtsɔ̃nɛ abhɛtɛ terikpo nɛ nɔ nɛ́ Kristo ishuidzya nahwɛ ɔganɔ butsi tɛ akɔ nɔ shu bhui nɛ yɛ amɛ, kɛpɔ mabumabu klɛ tɛ batɛ mɔ kizizi nɛ wɔnɔ shu—

²³ onugɛ nɔ za wɔnɔ tɛyɛyɛkɛŋa abha, nɔ kpɛ kɛdɔesi nɛ́ tɛgɛganɛ, nɔ ti koeyi nɛ kidzoenudidi gɛ nɔ nyana nɛ kibui dzyɔgo nɛ mɛ. Kɛnɛ kɛlɛ nu kibui dzyɔgo gɛ nɔ nu klɛ kidzi kɛgɛ ba ɖɔ kɔ kɛdɔnyɛdɔ gɛ kɛ lɛ owũsise nɛesi, klɛ Mɛ, Paolo, ɛba dzi axwɛdɛ.

Paulo Kɛxwɛwɛwa Kɔ Busɔlɛɔha

²⁴ Ɔtsɔ̃nɛ ɛmɔ same nɛ́ butɔ gɛ ɛtɔ kɔ nɔ, klɛ iti nɛ mɛ ishuidzya mɛ gɛ kɛ ka gbaede kɔ Kristo yɛ butɔ mumɔ kɔ yɛ shudzya, gɛ kɛ nu busɔlɛɔha.

²⁵ Ɛba dzi kɛlɛ axwɛdɛ ganɔ Kpaya ahwɛ tɛtɛtrɔ abha gɛ akɔ mɛ tɛ ɛyɛkɔ Kpaya kibui kɔ nɔ nɛ kɛlɛ tɛkpikpe mɛ—

²⁶ ebuiyinɔanɔ gɛ bayɛkɔ ekpu nɛ kibe dzidze mɛ nɛ̀ tɛmumɔɛ, pɔ ɔtsɔ̃nɛ be bu akasɛ kpayabanɔ.

²⁷ Kɔ ba gɛ Kpaya eklu tɛ akɔ balɛmɛ Bagɛdinu Yuɖanɛ tii kabhaŋɛŋa ehueyi yɛ ebuikpukpu gɛ kɛ nu Kristo nɛ wɔnɔɛ mɛ, kidzoenu didi kabhaŋɛŋa.

²⁸ Bu ɖɔ yɛ kibui kana, butsrenɔ klɛ bukasɛ anɔnyanɔ kɛdɔ nɛ kibuinyinyi petee mɛ, sɛ tɛ bu ba kɔ anɔnyanɔ tɛ edzi adzyɔgo nɛ Kristo mɛ.

²⁹ Kɔ kɛnɛ obekekɔ ɛwaɛxwɛ, ɛwlãnkɛ nɛ yɛ kemikpɛkpɛ, gɛ kɛwa kemi shuixwɛ gɛganɛ nɛ mɛ mɛ.