Hebriuanɛ 9 - ONUGBÙ NYƐNYÃ VUVƆ

Kesukpɛabha Kagbaesi Busɔlɛ

¹ Ɔtsɔ̃nɛ ɛshã lɛkɔ onugbunyɛnya tɛtɔpu ɛshã za kana gɛ ba ba ga nɛ busɔlɛ anɛ nɛ kesukpɛabha obhubhuikɔ nɛ tsyɛ.

² Bedzu kagba. Nɛ ka lɛ buvu tɛtɔpu nɛ mɛ kanɛgbɛsi za, ɔkplɔ̃ anɛ busɔlɛ gbɛ̃gbɛvu, ɔkɛlɛ bee klu asɛ Ɔzakɔ Dzyɔgo.

³ Nɛ buvumɛmɛma kɛpɔtɛ bhla nɛede buvu tuli za gɛ be klu asɛ Ɔzakɔ Dzyɔgo Ɖɛɖamadɛ,

⁴ gɛ sɛkani busɔlɛvumokpo kɔ kɛdɔ huhuhu anɛ sɛka dzɛdzã onugbunyɛnya otsyokpo. Otsyokpoɔ nɛɛ sɛkadzɛdzã mana ketsukpu akpasɛ ɔlɛ mɛ, Aaron yɛ ovusi gɛ lɔ ta awlakpa, anɛ onugbunyɛnya aklãgbu atɛ nɛabha gɛ ba ŋlɔmɛ ɛshã na trɔ nɛ akpasɛ.

⁵ Nɛ otsyokpo adanɛ mɛ ɔkɛlɛ kerobim Ishudɛdanɛ, gɛ kumu tɛtsɛtsrakɛ adɛda. Pɔ bu tɛ ba na kaɖɔ ɖɔ denɔ ebuianɛ shu ɔtsyɔnɛ.

⁶ Kibelɛlɛ gɛ be lu kɛdɔnyɛdɔ ɛzakɔ anasɛ kɛnɛ nɛdi, kpayazakɔanɔ etsoku ziazia nɛ buvu tɛtɔpu tɛ avɛ balɛ kɛxwɛ nɛabha.

⁷ Pɔ kpayazakɔanɔ ɖɛɖamadɛ ko yɛ ba vɛ ovuede nɛ mɛ klɛ bu dɛ trukpo nɛ kɛgɔ tirikpom, klɛ kɛ ma sɛ eti vunɔ dzyosu, gɛ ayɛkɔ akɔ kɔ yɛnahwɛshu nɛ banɔ kɔ ebuizizi gɛ ba bhɛtɛ nɛ matimati mɛ.

⁸ Ɔfufɔɛ Dzyɔgo nɔ kasɛ sɛ ba dɛdanɛ dzo sɛ tɛ be tsoku Ishudɛdanɛ Ɔzakɔ Ɖɛɖamadɛ kibelɛlɛ nɛ mɛ gɛ kagba tutɔpu ka ke dzi titi.

⁹ Kɛnɛ kɛlɛnu kibui kpɛkpasɛ nɛ kibe nɛ mɛ, gɛ ɛyɛmɛyuyɔ anɛ bugu gugu nɛ vɛabha tsyɛ kɛtɛ bhɛtɛ sɛ kpayazakɔanɔ nɛ temɛ tɛdɔ kɔ kɛxwɛ wuwa.

¹⁰ Kɛlɛ kɛdɔ ŋɛŋa anɛ kɛwũwɔ̃ɛ anɛ buni bubalɛesi edidedi ko lɛ nu—kede ɛshãbha bhɛbhɛtɛ ɛlɛ vɛabha ɔdɔtɔnɔ kibe nɛ gɛ ɛshãvuvɔ ba ba.

Kristo Dzyosu

¹¹ Gɛ Kristo aba anasɛ kpayazakɔanɔ ɖɛɖama kɔ ebui dzyɔgo nɛ gɛ ala lɛ ɔkɛnɛ, aga kagba gbɛgbladɛ klɛ aŋaedzi, kadɛ nu sɛ anɔ yɛabhɛtɛ alɛ, kɛlɛesi kɛlɛ nu sɛ, anɛ ne di de kanɔanɛ kapɛnyapɛ.

¹² Editsoku nɛ bepidzya anɛ banɛtsyɔɛeyi dzyosu, pɔ butsoku trukpo ko etsoku Ɔzakɔ Dzyɔgo Ɖɛɖamadɛ ganɔ yɛ nahwɛ dzyosua bha, kɛlɛmɛ ayɛkɛ tɛ bhubhuiyɛkɛ mabeke kɔ lɔ.

¹³ Bepidzya anɛ banɛŋtsyɔɛnye dzyosu anɛ banɛtsyɔɛeyi pupɔɛ butɔ gɛ bawanya balɛ bagɛ balɛ shu dɛbhui sɛ tɛ ba yɛ kɔ plu alɛshu tɛ balɛshu bhui.

¹⁴ Kɛlɛ kɛ zɛ ba za dɛana sɛ, Kristo dzyosu gɛ ganɔ Ɔfufɔɛ gɛ oti beke nɛa bha ayɛkɔ yɛnahwɛ shu gɛ kɛpɔ ma kɛlɛ shu kɔ Kpaya, pɛ kɛ plu bulɔ atɔkpu nɛ mɛ anɛ ebui nɛ gɛ akpɛ anɔ nɛ butsi mɛ, sɛ tɛ bu dɛ kɛxwɛ kɔ ɛkpã Kpaya!

¹⁵ Kɛnɛ so gɛ Kristo ayɛkɔ onugbunyɛnya vuvɔ evuboe, sɛ tɛ bagɛ beklu bayɛkɛ ɔfufɔɛ mɛ kɛdɔ nɛ gɛ ba ɖɔ—ɔtsɔnɛ gɛ etsi anasɛ kɛbhɛ bubuya sɛ tɛ ebualɛ nɛ ebuizizi gɛ babhɛtɛ nɛ onugbunyɛnya tɛtɔpu nɛesi.

¹⁶ Nɛ kededɔŋɛŋa keplukpa sɛ te kawa kɛxwɔɛ, kɛlɛsɛ anɔ nɛ gɛ atɛ tsi ba trɔ ahwɛ nɛ yɛ bu tsi nɛabha,

¹⁷ alasɛ flogo tɛ kawaɛxwɔɛ anɔ nɛ tsi, ka tɛ wɛxwɛ onugɛ anɔ nɛ alɛ nɛ kpã.

¹⁸ Kɛlɛso onugbunyɛnya tɛtɔpu kuratsyɛ dzyosu la yɛ kɔ nya lɛ nɔ.

¹⁹ Kɛbelɛlɛ gɛ Mose ayɛkɔ yɛ tɛgbɛgbanɔ ɛshãnyɛshã akɔ yɛ banɔ petee beke, ayɛkɔ nɛtsyɔɛeyi dzyosu anɛ buni, tɛka dzɛdzã anɛ hisopu trɛwã klɛ ayɛkɔ awanya ɔshã kɛplukpa nɛ banɔ petee abha.

²⁰ Aɖɔ sɛ, “Kɛnɛ kɛlɛ nu onugbunyɛnya dzyosu, gɛ Kpaya akpɛ kɔ nɔ na nɛ tɛ nɔyɛkɛ.”

²¹ Kɛ dzo lɛlɛ nɛabha ke, awanya dzyosu anɛ kagba anɛ kɛdɔnyɛdɔ gɛ ba yɛkɔ egu bugu nɛ nɔ.

²² Kɛgbɛagba nɛ, ɔshã ɔlɛ nu sɛ kɛdɔnyɛdɔ kule bayɛkɔ dzyosu epluɛ lɛ nɔ, klɛ onugɛ ba dɛ balɛ dzyosu nɛesi tɛtsyitsye tɛ ba za.

²³ Kɛza lɛmɛ fɔɔ̃ sɛ, begu beguanɛ tɛ bayɛkɔ plu ebui gɛ leyi owũsise ebui nɛ shu, pɔ owũsise begu nahwɛ ba pãndɛ kesukpa bha yɛ.

²⁴ Alasɛ Kristo adɛ tsoku kagba nɛ mɛ gɛ anɔdzyrame dzu gɛ enu kagba dzyɔgo nɛ buyi, etsoku owũsise nahwɛ avɛ sɛ tɛ ɔtsɔ̃nɛ ada wɔɛ̃ nɛ Kpaya amɛ kɔ lɔ.

²⁵ Pɛnɔ etsoku owũsise sɛ tɛ ayɛkɔ yɛshu akɔ bubhla bhla, anasɛ gɛ kpayaɔzakɔanɔ ɖɛɖama ne tsoku Obhubhui Kɔ Ɖɛɖamadɛ kɛgɔ nyɛgɔ nɛ dzyosu gɛ edi nu yɛnahwɛ ayɛ.

²⁶ Kɛlɛalɛ Kristo agɛ ta mɔ butɔ ebe gelee odenɔ kanɔ kesikpɛkpɛ. Pɔ ɔtsɔnɛ aba bu ba tirikpo kɔ lɔ petee nɛ kanɔ bibeke ewia nɛ mɛ tɛ ayɛkɔ yɛshu egu bugu tɛ ebu ezizi nɛ atɛ̃.

²⁷ Anasɛ gɛ babhɛtɛ lɛ sɛ anɔdzyrame bu tɛ trukpo ko etsi, nɛ kɛlɛede beklu kebhui nɛ yɛ,

²⁸ so Kristo akɔ yɛ be yi yɛ bu yi trukpo sɛ tɛ ebu banɔ gelee ebuizizi nalɛ shu, klɛ azia ba bubhla, ganɛ sɛ tɛ aba bhɛtɛ kibuinyɛbui denɔ ebuizizi shu, pɔ amɛna ishu bhubhuiyɛkɛ kɔ bagɛ be po yɛ.