Hebriuanɛ 8 - ONUGBÙ NYƐNYÃ VUVƆ

Kpayazakɔanɔ Kɔ Onugbunyɛnya Vuvɔ

¹ Kibui nɛ kɛkpã gɛ buɖɔ nɛ kɛlɛ nu kɛnɛ: kpayazakɔanɔ ɖɛɖama nɛɛ di alɛ bulɔ ahwɛ, gɛ aza kegbu nɛabha nɛ Otugbavɛvɛ Aka nɛ ɔbha nɛ owũsise,

² klɛ yɛ awaɛxwɛ nɛ obhubhuikɔ, kɛgbɛagba kagba gɛ Apalete nahwɛ edzu, ganɛ Anɔdzyrame yɛ dzu.

³ Kpayazakɔanɔ ɖɛɖama kanyaka be klu yɛ sɛ tɛ akɔ kɛdɔ tɛbha ɛyɛmɛyuyɔ anɛ kɛdɔ pupɔɛ, klɛ so kɛ ba dzia awɔ̃hu dzɛdza bui kɔ kɛnɛ tsyɛ tɛyɛkɛ kɛdɔtili tɛ apɔɛ.

⁴ Onugɛ ataza kesukpa nɛabha, agɛ te dzi kpayazakɔanɔ, alasɛ banɔ alɛ gɛ ba kɔɛdɔ gɛ pɔɛ gɛ ɔshã nɔ ɖɔ lu.

⁵ Kɛ xwɛ gɛ bawa nɛ kagba nɛ mɛ kɛ nu kɛdɔ gɛ kiyi dɔ nɛ kɛtɔwui nɛ gɛ kɛ lɛ owũsise. Kɛlɛ so gɛ Mose asɛ dzu kagba, ba kpɛ yɛ ɔshã sɛ: “Di sɛ ɔbhɛtɛ kɛkanyaka kɛsɔnɔ kɛgɛ bakasɛ wɔ nɛ butu nɛabha.”

⁶ Pɔ Yesu yɛ kɛxwɛwɛwa gɛ ayɛkɛ balɛ yɛ anasɛ onugbunyɛnya gɛ enu eboevu kɔ kɛ kuku tirikpo, klɛ be dzu ɔlɛesi nɛ kɛdzyɔgodɛ nɛabha gɛ baɖɔlu nɛ shu.

⁷ Alasɛ onugɛ kɛdɔnyɛdɔ dɛ zi nɛ onugbunyɛnya tutɔpu lɛlɛ nɛ shu, ɔkɔnyɔkɔ tɛɔ za gɛ ba ba nya ɔbhlatɔ.

⁸ Pɔ Kpaya amɔ kizizi nɛ banɔ nɛ shu klɛ aɖɔ sɛ: “Kɛbe ba, Apalete nɛ ebuaɖɔ, kibeɖuweɖu ɛba bhɛtɛ onugbunyɛnya vuvɔ nɛ Izraɛl bupa klɛ nɛ Yuɖa bupa.

⁹ Kɛtɛ badzi anasɛ onugbunyɛnya ɛbhɛtɛ nɛ balɛ akashishealɛ kibelɛlɛ gɛ ɛnyɛna balɛ ahwɛ gɛ ɛgbanɔ alɛ koeyi nɛ Egipte, alasɛ ba dɛ za tɛyɛyɛkɛŋa dzyɔgoe abha kɔ mɛ onugbunyɛnya, klɛ mɛ tsodzi nɛ balɛede, Apalete yɛaɖɔ.

¹⁰ Kɛnɛ kɛlɛ nu onugbunyɛnya gɛ ɛba nya nɛ Izraɛl bupa nɛ kibe lɛlɛ nɛede, Apalete nɛ yɛ aɖɔ. Ɛba yɛkɔ mɛ ɛshã kpɛ balɛ kɛtɔkpui mɛ klɛ ɛba ŋlɔmɛ lɛ trɔ balɛ idzyi mɛ. Ɛba dzi balɛ Kpaya, klɛ ba be dzi mɛ banɔ.

¹¹ Kɛ tɛa balɛmɛ sɛ anɔ aba kasɛ yɛ ɔhaglɔɛ dɔ, pɛnɔ anɔ yɛ adzya, ‘Ti Apalete,’ alasɛ balɛ petee ba be ti mɛ, denɔ ebhliyi nɛabha ɔdɔtɔnɔ agbɛgbladɛ.

¹² Alasɛ ɛba yɛkɔ balɛ kɛtɔkpui mɛ gɛganɛ ebui tsye alɛ klɛ ɛtɛia baka balɛ ebuizizi nɛ di.”

¹³ Gɛ be klu onugbunyɛnya anɛ “ɔvuvɔ,” atɛ bhɛtɛ ɔtɛtɔpu lɔdzi okuku, klɛ lɔ gɛ lɔ ti she dzi okuku kiwũi tɛbadze lɔbɔ lɛla.