Hebriuanɛ 7 - ONUGBÙ NYƐNYÃ VUVƆ

Mɛltsyizɛdɛk Kpayazakɔanɔ

¹ Mɛltsyizɛdɛk anyanɛ edzi ekusi nɛ Kpayazakɔanɔ nɛ kɔ Kpaya Ɖɛɖamadɛ nɛ Salɛm. Atsyanɔ Abraham gɛ edetẽ bekusi klɛ ayula yɛ,

² klɛ Abraham akɔ yɛ kɛdɔnyɛdɔ kapɛ tierikpo nɛ kɛfɔɛ mɛ. Tɛtɔpu, yɛ nyi nɛesi kɛlɛ dzi “adzyɔgo ekusi”, kɛlɛede tsyɛ, “Salɛm ekusi” kɛlɛesi kɛlɛ nu “ishuyuyɔ ekusi.”

³ Aka nɛ eni maza lɛ mɛ, ɔkɔ maɖɔmaɖɔ, kiwuiesi kpɛkpɛ pɛnɔ ɛkpã beke kɔ, anasɛ Kpaya Yeyi klɛ edzi kpayazakɔanɔ ɔvɛnɔ mabeke mabeke.

⁴ Nɔ di kidzi nɛ gɛ edzi anɔ gbɛgbla: Abraham akashishe kuratsyɛ akɔ yɛ dɔ kapɛ terikpo nɛ kɛfɔɛmɛ gɛ ayɛkɔ edenɔ keyu ɔtakɔ!

⁵ Ɔtsɔnɛ ɔshã no bisi sɛ bagɛ be de Lewi oku nɛ mɛ be dzi anɔnɛna tɛ ba za yɛkɛ kapɛzɛzɛ nɛ kɛfɔm denɔ banɔ nɛ ahwɛ gɛ kɛnu sɛ, balɛadzyalɛ—kɛnya lɛ kɛlɛm sɛ balɛadzyalɛ nɛ nye de Abraham oku nem pɔ.

⁶ Anɔa nɛ, gɛ edide Lewi tɛmumɔɛ mɛ, tsyɛ ayɛkɛ dɔ kɛfɔ kapɛ nɛ Abraham ahwɛ klɛ ayula kɔɛ yɛ gɛ bakpɛ bunuwã kɔ.

⁷ Kibui tsɛtsrakɛ mɛlɛmɛ sɛ anɔ gbɛgbla yɛa yula anɔ bhliyi.

⁸ Nɛ kapɛ tierikpo, banɔ nɛ gɛ letsi bala yɛkɛ kɛdɔ kapɛ lɔfɔ, pɔ nɛ kapɛ bhla, agɛ yɛ baɖɔ sɛ alɛ nɛ ɛkpã.

⁹ Anɔ teli kuratsyɛ aba ɖɔ sɛ Lewi, gɛ ayɛkɛ dɔ kɛfɔ kapɛ, abuya kɛdɔ lɔfɔ kapɛ nɛ aganɔ Abraham abha,

¹⁰ alasɛ gɛ Mɛltsyizɛdɛk atsyanɔ Abraham nɛɛ, ba kamɔ Lewi aka kpasɛ yɛakashishe kayesi.

Yesu Anasɛ Mɛltsyizɛdɛk

¹¹ Onugɛ ba ba mɔ denɔ tɛnɛna Lewianɛ kpayamɛzɛza nɛ (alasɛ ganɔ kɛɛ nɛ nɛa bha la yɛkɔ ɔshã nɛ akɔ banɔ), kideso gɛ kɛ kabisi sɛ ba pɛɛ kpayazakɔanɔ sɛ afla ba—nɛ Mɛltsyizɛdɛk tɛ zɛza mɛ nu, pɛ kɛdɛ nu sɛ Aaron tɛ zɛza mɛ?

¹² Alasɛ ɔkɛlɛ gɛtɛ tsyitsyina ba nɛ kpayazakɔanɔ mɛ, kɛlalɛ ɔlɛ ɔshã nɛ tsyɛ tɛ lɔ tsyina.

¹³ Anɔ nɛ shu gɛ ba ɖɔ ebuianɛ denɔ ede kɛpatsu bhlatɔɛ mɛ, klɛ anɔnyanɔ edide kɛpatsu lɛlɛ mɛ gɛ eti gu bugu nɛ busɔlɛvumo nɛabha di.

¹⁴ Kɛkasɛ mɔmɔ sɛ Yuɖanɛ mɛ bulɔ Apalete nɛ adzyɔ de, klɛ nɛ kɛlɛ shu Mose adɛɖɔ kibuinyɛbui denɔ kpayazakɔanɔ ŋɛŋa shu.

¹⁵ Klɛ kɛgɛ buɖɔ kɛlɛ mɛ bhui dɛ onugɛ kpayazakɔanɔ anasɛ Mɛltsyizɛdɛk ebe koeyi,

¹⁶ Anɔanɛ gɛ ebe dzi kpayazakɔanɔ ganɛ yɛ tɛmumɔɛmɛ dɔ pɔ nɛ kemi nɛ gɛ ka kɔ ɛkpã gɛ lɛ tɛ ba bekedi.

¹⁷ Alasɛ ebuaɖɔ sɛ: “Wɔ onu kpayazakɔanɔ ɔvɛnɔ faã, anasɛ Mɛltsyizɛdɛk ana,”

¹⁸ Bebu tɛtɛtrɔ putɔ nɛlu kɛwã alasɛ lɛ gblɔdzɔ klɛ lɛvama kibuinyɛbui mɛ

¹⁹ (kɛlɛ ɔshã nɔdɔ bɔza kibuinyɛbui mɛ), klɛ ba bakasɛ kidyo dzyɔgo tili, gɛ kɛkɔ lotsobunɔ Kpaya.

²⁰ Klɛ batanɛdɔ nɛ alɛ abha! Bagugɔɛ ba dɛ tanɛdɔ akpɛalɛ gɛ ba be dzi kpayazakɔanɔ,

²¹ pɔ yɛ ebedzi kpayazakɔanɔ gɛ batanɛdɔ akpɛ nɛ kibelɛlɛ gɛ Kpaya ɖɔ tsre yɛ asɛ: “Apalete atanɔ klɛ atɛ batsrakɛ yɛ tɔkpui mɛ bui: ‘Wɔ onu kpayazakɔanɔ faã.’ ”

²² Nɛ kɛdɔ tɛtanɔ nɛ so Yesu ebedzi anɔ gɛ azakede kɔ onugbunyɛnya dzyɔgo anɛ.

²³ Ɔtsɔnɛ kpayazakɔanɔ gelee baza gɛ butsi kɔ sɛ ba dɛ vɛ ba lɛ kɛxwɛ nɛabha,

²⁴ pɔ alasɛ Yesu alɛ nɛ ɛkpã ɔyɛkɔvɛnɔ, so nɛ kpayazakɔanɔ mɛ zɛza lɔlɛ yɛ ahwɛ ɔyɛkɔ vɛnɔ.

²⁵ Kɛlɛso aba za yɛkɛ kɔ bagɛ balɛ petee gɛ ba ba Kpaya kɔ aganɔ yɛabha, alasɛ alɛ kibenyɛbe sɛ tɛ evuboe kɔ alɛ.

²⁶ Kpayazakɔanɔ ɖɛɖama nɛdi atsyanɔ bulɔ kɛdɔ pɛpɛɛ—agɛ yɛ shu bhui, kɛpɔ ma yɛ shu, ana, alɛ ɔtɔ nɛ banɔ zizi shi, klɛ bakpɛ yɛ nɛabha adɔ flanɔ owũsise.

²⁷ Gɛ eti dzi anasɛ kpayazakɔanɔ ɖɛɖama bhlatɔ, kɛdɛ kɔ sɛ aza pɔɛ dɔ kiwui nyɛwui, putɔnɔ kɔ yɛnahwɛshu buzizi, klɛ nɛlɛede kɔ banɔ ebuikpã. Apɔɛ dɔ akɔ balɛ buzizi turikpo kɔ alɛ petee kibe lɛlɛ nɛ gɛ ayɛkɔ ishu akɔ.

²⁸ Ɔshã nɛ bu banɔ anasɛ kpayazakɔanɔ ɖɛɖama gɛ batsra, pɔ kɛdɔ tɛtanɔ gɛ kɛba nɛ ɔshã nɛede, lɔklu Eyi, gɛ babhɛtɛ yɛ ana ɔvɛnɔ mabekem.