Hebriuanɛ 5 - ONUGBÙ NYƐNYÃ VUVƆ

¹ Kpayazakɔanɔ ɖɛɖama kanyaka be bu yɛ denɔ banɔɛ shi klɛ be klu yɛ akɔ sɛ tɛ aza balɛ nu nɛ ebui nɛ gɛ la kpɛ ɔkɔ nɛ Kpaya shu, tɛ ba bhɛtɛ ɛyɛmɛyuyɔ anɛ ɛshu yɛyɛkɔtsye nɛ buzizi tɔkpu.

² Adɔfɔɔ̃ nɛ bagɛ tinyibui nyɛbui nɛ bagɛ ba lɛla kidzo, nɛ kibe lɛlɛ gɛ yɛnahwɛ adɛ gɛganɛ.

³ Kɛnɛ nɛ so gɛ alasɛ tɛ ayɛkɔ shu akɔ nɛ yɛnahwɛ ebuizizi nɛ tɔkpu.

⁴ Anɔnyanɔ atɛyɛkɔ otugbavɛvɛ atrɔ shu, alasɛ tɛ Kpaya yɛ klu yɛ, anasɛ gɛ Aaron aza.

⁵ So Kristo tsyɛ adɛ yɛkɔ atrɔ shu nɛ kabhɛŋɛŋa mɛ sɛ tɛ edzi kpayazakɔanɔ ɖɛɖama. Pɔ Kpaya etsre asɛ, “Wɔ nu me Yi, obo nɛ idzi wɔaka.”

⁶ Klɛ aɖɔ nɛ ɔzakɔ bhlatɔ, “Wɔ onu kpayazakɔanɔ ɔvɛnɔ faã, nɛ Meltsizɛdɛk tɛtɛtrɔ nɛ nu.”

⁷ Nɛ Yesu ɛkpã zɛza nɛ kesukpa nɛabha be, ayɛkɔ kpayakuklu anɛ tɛbibisi anɛ ogugu gɛganɛ anɛ ɛwɔ̃mɛ kɔ anɔ nɛ gɛ ebe bu yɛ denɔ butsi mɛ, klɛ be nu lɛ akɔ yɛ alasɛ nɛ́ yɛ́ ishu zhizhinɔ kɛtɔkpuesi kpɛkpɛ so.

⁸ Kɛlɛlɛmɛ sɛ edzi eyi, akpasɛ batɔtɛta denɔ yɛ butɔ gɛ atɔ nɛ mɛ

⁹ klɛ ba za bhɛtɛ yɛ mɔmɔ, ebe dzi anɔ gɛ yɛabha ba ga gɛ ba mɔ tɛbhubhuiɔyɛkɛ mabeke mabeke kɔ balɛ petee gɛ ba ta yɛ atɔ

¹⁰ klɛ Kpaya ebuaɖɔ sɛ edzi kpayazakɔanɔ ɖama nɛ Meltsizɛdɛk tɛ tɛtrɔ nɛ nu.

Ɔshãkpɛkpɛ Nɛ Oboedɛdɔ Shu

¹¹ Ebui gelee alɛ bulɔahwɛ gɛ bu baɖɔ nɛ kibui nɛ shu, pɔ kɛgɛganɛ sɛ tɛ bu builɛesi alasɛ nɔ tɔ kpasɛ dɔ.

¹² Kɛgbɛagba, nɛ kibe nɛmɛ alasɛ tɛ nɔ dzi badɔkasɛ, alasɛ tɛ nɔ pɛɛ anɔ tɛ etsodzi akasɛ nɔ kesikpɛkpɛ kɛgbɛagba kɔ Kpaya ebui ɔwulɔ vɛnɔ petee. Bumɔni bulɛ bɔ kɔ nɔ, ganɛ kɛŋɛŋa gɛganɛ!

¹³ Anɔnyanɔ gɛ etsri bumɔni abha, ekenu anɛvɔ, etinyi kibuinyɛbui denɔ kɛdzyɔgo bhɛbhɛtɛ shu.

¹⁴ Pɔ kɛŋɛŋa gɛganɛ lɛ kɔ beshishe, nɛ kɛlɛ tɛyɛŋa mɛ babhɛtɛ shu asɛ tɛ be ti ɔtɔgɛga nɛ kɛdyɔgo nɛ kizizi.