Hebriuanɛ 13 - ONUGBÙ NYƐNYÃ VUVƆ

Tɛfifekɛ Gugɔɛ

¹ Nɔ za tɛdɛdɛmɛnɔ nɛ ɔhaglɔ anasɛ badzya ana.

² Nɔ tɛ shɛnahwɛ bɛfu yɛyɛkɛ shu lu, alasɛ nɛ kɛlɛ mɛ banɔ tɛli bayɛkɛ kpayaxwɛdɛ nɛ matimati mɛ.

³ Nɔ baka bagɛ ba kpɛ bevu anasɛ wɔnɔ na lɛ bakpɛ buvu, ganɛ bagɛ ba tɛ bhɛtɛ alɛ mɔmɔ anasɛ wɔnɔnahwɛ ba kpɛ butɔ ana.

⁴ Anɔnyanɔ alasɛ tɛ ayɛkɛ adzɛ gbɛgbanɔ akpɛ lɛ mɛ, klɛ tɛ aglɔ zɛzanɔɛ mɛ bhui, alasɛ Kpaya ebe kluebhui nɛ bagɛ abhɛtɛ aglɔbui anɛ azhuzhɔlɛbui.

⁵ Nɔ bu kɔba dɛdɛmɛnɔ ebui nɛ wɔnɔ ɛkpã nɛ mɛ klɛ nɔ kɔ kɛgɛ lɛ wɔnɔahwɛ nɛ ku nɔ awɔ̃, alasɛ Kpaya aɖɔ asɛ, “Ɛtɛ ba shɛnahwɛ wɔnɔ shu di, ɛtɛ ba shɛ̃ lɔ nɔ di.”

⁶ Kɛlɛso bu ɖɔ nɛ kabha yɛyɛkɛŋa sɛ, “Apalete yɛ nu mɛ apɛplɛnɔ, kifu tɛba ku mɛ. Kide anɔ aba bhɛtɛ mɛ?”

⁷ Nɔ baka wɔnɔ otugbanɔ gɛ aɖɔ Kpaya ebhui nɛ etsre nɔ. No vu awɔ̃hu nɛ balɛ ɛkpã gɛ baza nɛ shu tɛ nɔ kpasɛ balɛ tɛyɛyɛkɛŋa.

⁸ Yesu Kristo terikpo alɛ nɛ ko enu kivu gɛ ba fla anɛ kibenyɛbe.

⁹ Nɔ tɛkɔ kɛdɔ kɛkasɛ bhlatɔ dinyɛdi kɛ gbanɛ nɔ koeyi nɛ kidzo dzyɔgo nɛabha. Kɛbɔ sɛ tɛ kɛdɔkukɔ kpɛ lɔ idzyi kemi, anɛ kibenyɛbe dɔ ŋɛŋa gɛ kɛdɛ plɛnɔ bagɛ baŋa lɛ.

¹⁰ Busɔlɛvumokpo ɔlɛ bulɔ ahwɛ gɛ bagɛ ba wa kɛxwɛ nɛ ɔlɛ ɔzakɔ nɛ ba dɛ mɔɛ dzo aŋa kɛdɔ nɔ ɔkɛlɛ.

¹¹ Kpayazakɔanɔ gbla yɛ ayɛkɔ baga dzyosu avɛnɔ Ɔzakɔ Dzyɔgo Ɖɛɖamadɛ anasɛ kɛbhɛ bubuya nɛ buzizi kɛtɔkpu, pɔ ayɛ kɔ baga ishuidzya nɛ ada puɛ nɛ ɔzakɔ nɛede.

¹² Klɛ so Yesu tsyɛ amɔ butɔ nɛ ɔmagbla nɛ kedunu sɛ tɛ abhɛtɛ banɔ tɛ balɛ shu bbui ganɔ yɛ nahwɛ dzyosu nɛ mɛ.

¹³ Kɛlɛso nɔ kɔ lɔ vɛ yɛ ɔkɔ nɛ kamade, tɛ bumɔ butsɔ nɛ gɛ amɔ.

¹⁴ So ɔkɛnɛ ɔma ma bulɔahwɛ gɛ bu ba za vɛnɔ faã, pɔ bu di kidzoe nu kɔ ɔma gɛ lɔ tɛ ba.

¹⁵ Kɛlɛso, ga Yesu abha, tɛ bu kɔ Kpaya kɛdɔ gɛ nu kɛdɔ pupɔɛ kɔ yɛabhaŋɛŋa—eyuyu ɛnugbu nɛ gɛ lɛ bu yɛ kinyi nɛ akasɛ.

¹⁶ Klɛ tɛ dzɛkɛ kɛdɔ dzyɔgo bhɛbhɛtɛ shu lu klɛ tɛ ɔkɔ wɔhaglɔɛ dɔ, alasɛ buguɛ nɛdi bulɛ ku Kpaya awɔ̃.

¹⁷ Nɔ ta tɔ nɛ bagɛ alɛ nɔ nu tɛ nɔ zhinɔ shu kɔ alɛ kabhaŋɛŋa. Be di nɔabha anasɛ banɔ gɛ ba bebhui nɔ nu. Nɔ ta lɛ batɔ sɛ tɛ same eku balɛ axwɛwuwa, ganɛ tɛ kɛdzi kituku kɔ alɛ, alasɛ kɛtɛ baplɛnɛ nɔ.

¹⁸ Nɔ klukpaya nɛ bulɔɛ tɔkpu. Bu yɛkɛŋa sɛ bulɔɛ tɔkpui mɛ bhui klɛ bu pɛɛ sɛ tɛ bu za nɛ ɛkpã dzyɔgo nɛ kidzonyɛdzoe mɛ.

¹⁹ Mɛ ibisi denɔ wɔnɔ ahwɛmɛ sɛ tɛ nɔ klukpaya awla kɔ mɛ ba wɔnɔ bha zɛa.

Kpayakuklu Gugɔɛ

²⁰ Kɔ ishuyuyɔ Kpaya, gɛ ɔganɛ dzyosu onugbunyɛnya mabeke agɛ anyɛmɛ bulɔ Apalete Yesu, ibhoshi Agbɛgbanɔ gbɛgbla,

²¹ akɔ nɔ kɛdɔ dzyɔgo nyɛdɔdzyɔgo kɔ yɛ tɛpɛpɛɛ, klɛ tɛ awaɛxwɛ nɛ bulɔ mɛ kɛgɛ ku yɛ awɔ̃, ɔganɔ Yesu Kristo abha, kɔ yɛ ishubhubhui mɛ denɔ mabeke ɔvɛnɔ mabeke mɛ. Tɛlɛbɛlɛmɛ.

Ebui Gɔgɔɛ

²² Ma dzyalɛ, ɛkpɛtɔkpuesi kɔ nɔ tɛ nɔ bhɛtɛ trɔ mɛ kaɖɔɖuɖɔ abha, alasɛ keplukpa kplita ko mɛ ŋlɔmɛ kɔ nɔ.

²³ Ɛpɛɛ sɛ tɛ nɔ ti sɛ ba shɛ̃nahwɛ bulɔ adzya Timotio shu nɛ buvu. Onugɛ ebe ku mɛ ɔbha zia, blɔnɛ yɛ ba ba bu ba di nɔ.

²⁴ Sɛnɛ bagɛ balɛ nɔ nu petee anɛ Kpaya banɔ petee. Bagɛ de Italia aba ba sɛnɛ nɔ.

²⁵ Ɛyamɛyuyɔ za plɛnɔ wɔnɔ petee.