Hebriuanɛ 12 - ONUGBÙ NYƐNYÃ VUVƆ

Kpaya Atɛta Ye Yialɛ Batɔ

¹ Kɛlɛso, bebuimɔɖɔ gɛ la kana lɔ anasɛ ɔmunɔ gelee, nɔ kɔ lɔ bu ebui tsyɛtsyanɔ kanyãka anɛ ezizi gɛ la nyɛna lɔ nɛ tɛ̃, klɛ nɔ kɔ lɔ yɛkɔ amɛgɛganɛ kpanisi tɛ lɔ bu tisisi gɛ kɛlɛ kɔlɔ.

² Nɔ kɔ lɔ yɛkɔ bulɔ awɔ̃hu trɔ Yesu abha, yɛ lu tɛyɛyɛkɛŋa nɛesi klɛ abhɛtɛ lɛ kɛna. Gɛ enyi same nɛ gɛ alɛ otugba kɔ yɛ so, evu idzyi akpɛte amɔ butɔ nɛ butsiosi shu, klɛ ayɛ kɛ ɔlɛ kɛwɔɛ̃, klɛ ada za Kpaya kegbu nɛ kɛŋa nɛ mɛ.

³ No vu awɔ̃hũ nɛ agɛ yɛ aza kititilulɔɛ lɛlɛ nɛ nu denɔ bagɛ abhɛtɛ buzizi nɛ ɔkɔ, sɛ tɛ nɔ tɛ ganɛ awɔ̃ tɛ idzyi ebe koeyi wɔnɔɛ te.

⁴ Nɛ wɔnɔ keyu tɛta sɛ tɛ nɔ tɛ tsoku kizizi mɛ, nɔ kɔ wlãnkɛ shu ɔtɔnɔ kibe gɛ ba beyi nɔ.

⁵ Nɔ dzɛkɛ bupuɛ bui gɛ Kpaya aɖɔ kɔ nɔ anasɛ yɛ yianyɛ ana: “Mɛ yi, onugɛ Apalete nɛ atɛta wɔatɔ tɛ yɛkɔɛ lɛ sɛ kibui ko, klɛ tɛkɔ wɔ dzyi awɔlɛ onugɛ aka wɔamɛ,

⁶ alasɛ Apalete bagɛ balɛ bui adɛmɛ atɛta latɔ, klɛ atɛta anɔnyanɔ gɛ adɛmɛ sɛ yɛ yi.”

⁷ Nɔ yɛkɛ tɛgɛganɛ gɛ bulɛ batɔ tɛtɛtamɛ, Kpaya agbanɛ nɔ anasɛ yɛ yialɛ. Alasɛ eyi ɖuweɖu aka atɛ tɛta yɛ atɔ?

⁸ Onugɛ be di tsrenɛ nɛ nɔ (klɛ anɔnyanɔ ayɛkɛ batɔ tɛta), kɛlɛa lɛ onu ɔmamɛyi klɛ be di nu banuvɔ dzyɔgo.

⁹ Ɔplɛnɔ kɛnɛ, bulɔ petee anɔdzyrame baka lɛ bulɔahwɛ gɛ ba tɛta bulɔa tɔ klɛ bu kpɛ kɛtɔkpuesi kɔalɛ. Kɛdeso gɛ bu ta kpɛ kɛtɔkpuesi kɔ bulɔ ɔfufɔɛ Aka tɛ buza nɛ ɛkpa!

¹⁰ Bulɔ akalɛ batɛta bulɔa tɔ bɔɛ gɛ bamɔ sɛ abɔ, pɔ Kpaya atɛta lɔatɔ kɔ tɛpɛpɛ̃, sɛ tɛ bu ba yɛkɛ yɛ shu bhubhuianɔ.

¹¹ Butɔ tɛtɛta budu nu kɛdɔ gɛ kiku same nɛ kibelɛlɛ nɛ mɛ, pɔ kinu kɛdɔ gɛ kɛpuɛ. Kɛlɛede, nɛlɛmɛ ba babhɛtɛ ishubhubhui anɛ ishuyuyɔ kɔ bagɛ bayɛkɛ batɔ tɛta.

¹² Kɛlɛso, nɔ kpɛemi wɔnɔ ɛhwɛ nɛ gɛ gblɔdzɔ anɛ ekuisi gɛ adɛ gɛganɛ.

¹³ “Nɔ bhɛtɛ edzo nɛabha tɛ la mutɔ kɔ ɛtsrɛ,” sɛ tɛ ba nyɛnya gɛ ba taa na ga na tɛ wɔa na, pɔ tɛ balɛ banya nɛ ebeke.

Tɛtsitsrenɔ Nɛ Kpaya Mayɛkɛ Mayɛkɛ Shu

¹⁴ Nɔ kpɛemi tɛ nɔ za ishuyuyɔɛmɛ nɛ banɔ petee nɛ tɛ wɔnɔ shubhui, ishu bhuibhui mazɛlɛ mɛ anɔnyanɔ atɛ ba mɔ Apalete.

¹⁵ Nɔ di lɛ sɛ anɔnyanɔ adɛ shɛ̃ lɔ Kpaya ɛyɛmɛyuyɔ klɛ sɛ osiogu kɛtɛkɛtɛ lɔ tɛ dɔ she tɛ lɔ kpɛ butɔ anɛ tɛ lɔ zi be gelee.

¹⁶ No di klɛ ɔkɔ sɛ anɔnyanɔ atɛ bhɛtɛ azhuzhɔlɛbui, ɔdɔgɔsɛ ansɛ Esao gɛ eti nyi Kpaya, yɛ gɛ nɛ kɛŋɛŋa tirikpo shu so pɛ adɛ yɛ ɔŋakɔ ansɛ eyianyɛ shishe ana.

¹⁷ Kɛlɛede, anasɛ gɛ no nyi, kibe lɛ gɛ apɛasɛ tɛ ayɛkɛ tɛyuyulaɛ nɛ, ba dɛ dɛmɛ akɔ yɛ lɛ. Ada na kɛtɔkpu mɛ tsɛtsrakɛ kanyaka mɛna, kɛnya za kɛlɛ mɛ sɛ ebi iyuyo akpɛ lɛ pɔ.

¹⁸ Nɔ kɔ ba butu shu gɛ nɔ bɔ na bulɛ hunɔ klɛ bu dzi tã nɛ kifu, kɔ otumu, kibhuku anɛ kɛlɛ gɛganɛ,

¹⁹ kɔ kaxũlɛ̃ olimɛ ɔdɔgɔsɛ kɔ oli tolim gɛ ɔɖɔ ebui gɛ bagɛ be nu alɛ ba kɔkɛtɔkpu asɛ ba taa fla ɖɔ kibuinyɛbui ɔyɛkɔ dɛa na tsre alɛ,

²⁰ alasɛ batɛ bana ɛshã ge bakpɛɛ kɔalɛ nɛ bha bhɛtɛ: “Onugɛ aga kuratsyɛ ehunɔ butu alasɛ tɛ behui kɛklãgbu.”

²¹ Kɛdɔ nɛ gɛ amɔ kɛ kuifu tsutsɔmɔ sɛ Mose aɖɔ sɛ, “Ishuku nɛ kɛfu.”

²² Pɔ nɔ ba Zayɔnɛ Butu nɛabha, nɛ owũsise Yerusalɛm, ɛkpã Kpaya ɔma gbɛgbla nɛ mɛ. Nɔ bo ku kpayaxwɛdɛ akpã akɛpã gɛ bexogo nɛ́ same,

²³ kɔ beyi tɛtɔpu busɔlɛɔha, gɛ balɛ enyi ba ŋlɔmɛ lu owũsise. Nɔ ba Kpaya kɔ, gɛ enu ebhuiklu kɔ banɔ petee, kɔ banɔ dzyɔgo nɛ ɔfufɔɛ gɛ bana,

²⁴ kɔ Yesu eboevu nɛ onugbunyɛnya vuvɔ anɛ mɛ anɛ kɔ dzyosu hihle gɛ aɖɔ kibui dzyɔgo dɛ Abɛl dzyosu.

²⁵ Nɔ di lɛ ɔkɔ sɛ nɔ tɛshɛnahwɛ agɛ aɖɔaɖɔ nɛ shu. Onugɛ be di si ashɛ̃ nɛ kɛbelɛlɛ gɛ be gbe anɔ nɛ gɛ etsrenɛ alɛ nɛ kesukpa nɛabha, kɛlɛ bu ba zhiesi, onugɛ bulɔ tsyɛ bu shɛ̃ lɔ anɔ nɛ gɛ etsrenɔ lɔ denɔ owũsise?

²⁶ Nɛ kibelɛlɛ yɛ ogugu nɛ ɔhwanɔ kesukpa, pɔ ɔtsɔ̃nɛ atɛ ɖɔlu asɛ, “Buplɛnɔ trukpo nɛ kesukpa nɛ ko ɛba hwanɔ pɔ owũsise nɛ tsyɛ.”

²⁷ Ebui “buɖɔ trukpo plɛnɔ” kɛwɔɛ̃ kɛ gɛ hwa nɛ tɛbubu—kɛlɛ nu sɛ, kɛ gɛ ba bhɛtɛ— sɛ tɛ kɛgɛ ba tɛ ba hwa nɛ ɔkɛlɛ tɛwuwɔ.

²⁸ Kɛlɛso gɛ kɛ nu sɛ bu yɛkɔ bukusiɔŋakɔ gɛ batɛ ba hwanɔ, nɔ kɔ lɔ huahwɛ, klɛ so nɔ kpɛ kɛtɔkpuesi kɔ Kpaya nɛ tɛdɛdɛmɛ mɛ nɛ kifusisi nɛ awɔ̃gɔganɔ,

²⁹ alasɛ bulɔ “Kpaya kifu gɛ kɛ puɛ dɔ enu.”