Hebriuanɛ 11 - ONUGBÙ NYƐNYÃ VUVƆ

Tɛyɛyɛkɛŋa

¹ Ɔtsɔ̃nɛ tɛyɛyɛkɛŋa kɛlɛ nu sɛ yɛkɛɔŋa sɛ kɛgɛ ɔtɔ mɔ tsyɛ pɛ kidzoenu didi lɛ wɔ ahwɔ sɛ kɛ ba ba.

² Kɛnɛ kɛlɛ shu la ɖɔ kaɖɔ dzyɔgo nɛ bakakuku nɛ shu akɔ.

³ Tɛyɛyɛkɛŋa nɛabha bu nulɛesi sɛ kanɔ na ba nɛ sɛ Kpaya yɛ buiɖɛɖɔ nu, kɛlɛso kɛdɔ nɛ gɛ bu mɔ kɛ dɛ de kɛgɛ kɛ wɔɛ nɛ bulɔa mɛ.

⁴ Tɛyɛyɛkɛŋa mɛ Abɛl akɔ Kpaya kɛdɔ pupɔɛ dzyɔgo dɛ Kayɛ̃. Tɛyɛyɛkɛŋa mɛ eku awɔ̃ anasɛ kɛdɔ dzyɔgo, gɛ Kpaya aɖɔ kaɖɔ dzyɔgo denɔ yɛ kɛdɔ pupɔɛ nɛ shu. Klɛ ganɔ tɛyɛyɛkɛŋa mɛ aka ɖɔaɖɔ ko, kɛnyalɛ lɛ mɛ sɛ eti tsi pɔ.

⁵ Tɛyɛyɛkɛŋa so be feke Ɛnok nɛ kanɔanɛ mɛ, so nɛ yɛ adɛ mɔ butsi, ba dɛ mɔ yɛ, alasɛ Kpaya efeke yɛ ashɛnɔ. Alasɛ flogo tɛ ebe befeke yɛ, baɖɔ kaɖɔ dzyɔgo nɛ yɛ shu anasɛ anɔ gɛ eku Kpaya awɔ̃.

⁶ Klɛ tɛyɛyɛkɛŋa mazɛlɛ mɛ ɔtɛ bɔ na Kpaya awɔ̃ ku, alasɛ anɔnyanɔ gɛ aba ba yɛ ɔkɔ alasɛ tɛ ayɛkɛŋa sɛ alɛ klɛ abuya kɛbhɛ kɔ bagɛ ba pɛɛ yɛ gɛganɛ.

⁷ Ganɔ tɛyɛyɛkɛŋa abha Nowa, gɛ betsrɛnɔ denɔ ebui nɛ gɛ ba ka mɔ, nɛ kifu sisi bhubhui mɛ afatɛ kɛniabha opupu sɛ tɛ ebu yɛ bupa. Nɛ yɛ tɛyɛyɛkɛŋa nɛ mɛ ebu kanɔ nɛ mɛ pɔ klɛ ebe dzi balɛ kɛdɔ dzyɔgo nɛ kusi gɛ kɛ ba ganɔ tɛyɛyɛkɛŋa bha.

⁸ Nɛtɛyɛyɛkɛŋa abha Abraham, gɛ beklu yɛ sɛ tɛ avɛ ɔkɔ toli tɛ aba yɛkɛ yɛ ɔŋakɔ, atatɔ klɛ avɛ, kɛ nyalɛ lɛ mɛ sɛ etinyi ɔkɛlɛ gɛ avɛ pɔ.

⁹ Nɛ tɛyɛyɛkɛŋa ede ebhui yɛ ɔma nɛ kesukpa nɛ gɛ baɖɔlu kɔ yɛ nɛabha anasɛ efu nɛ anɔ bhlatɔ ɔma mɛ, aza bugbaesi, anasɛ gɛ Isaka anɛ Yakobo aza, gɛ bedzi banɔ gɛ ba na gɛ ba ŋa kededɔ lɛlɛ gɛ baɖɔlu kɔ alɛ.

¹⁰ Alasɛ edi akpɛ otugba kɔ ɔmagbla nɛ ɔlɛ tɛbhubhɔ kesikpɛkpɛ, gɛ ɔlɛ evudzu anɛ evubhɔ nɛ enu Kpaya.

¹¹ Tɛyɛyɛkɛŋa kɔ sɛ Abraham, eshe pɔ tsyɛ—klɛ Sara yɛnahwɛ ada mɔ eyi— bakɔ yɛ ebe dzi eyiaka alasɛ amɔ yɛ asɛ tɛyɛyɛkɛŋa lɛ yɛ ahwɛ gɛ batrɔlu kɔ yɛ.

¹² Kɛlɛso denɔ anyɛ terikpoa nɛabha, gɛ avɛ otsi kɔ beke, nɛ mɛ yɛ beshui ne bekpe anasɛ awɔ̃ɛwɔɛ̃ nɛ owũsise nɛ balɛ maklamakla anasɛ aƒu anyɛ̃sɛ̃.

¹³ Ba nɔanɛ petee ba kalɛ nɛkpa nɛ tɛyɛyɛkɛŋa mɛ gɛ be tsi. Ba dɛ yɛkɛ kɛdɔ nɛ gɛ be di kidzoenu kɔ; bumɔa lɛ ko klɛ ba kɔa lɛ wɔnɔga nɛ odzidzekɔ. Klɛ ba dɛmɛ sɛ be nu befu klɛ be di de kesukpa nɛabha.

¹⁴ Banɔ nɛ gɛ ba ɖɔ ebuianɛ akasasɛ ba pɛɛ balɛ nahwɛ oma.

¹⁵ Ɔtɔsɛ bu bu kɛtɔkpui mɛ nɛ ɔmanɛ mɛ gɛ ba shɛ̃ nɛ shu, nalo ba ta mɔɛdzo etsodzi avɛ ɔkɛlɛ gɛ bede.

¹⁶ Kɛlɛ mazalɛmɛ, bedidzo nu kɔ ɔma dzyɔgo—owũsise ɔyɛ. Kɛlɛso kɛwɔɛ̃ ti ku Kpaya sɛ tɛ beklu yɛ asɛ balɛ Kpaya, alasɛ eŋuse ɔma gbɛgbla elu kɔalɛ.

¹⁷ Tɛyɛyɛkɛŋa so Abraham, kɛbelɛlɛ gɛ Kpaya efekɛ yɛ edi, ayɛkɔ Isaka kɔ anasɛ kɛdɔ pupɔɛ. Yɛ gɛ ayɛkɛ tɛtutrɔlu apɛɛ asɛ apuɛ yɛ terikpo klɛ enu eyi terikpo,

¹⁸ nɛ kɛlɛede tsyɛ Kpaya etsre yɛ asɛ, “Ganɔ Isaka abha wɔ beshui nɛ be koeyi.”

¹⁹ Abraham avɛ shuimɛ sɛ Kpaya abana bekpu anyɛmɛ, klɛ nɛ kaɖɔ gbɛagba mɛ, etsodzi ayɛkɛ Isaka anasɛ anɔ gɛ anyɛmɛ denɔ bekpu mɛ.

²⁰ Nɛ tɛyɛyɛkɛŋa mɛ Isaaka ayula Yakobo anɛ Esao sɛ tɛ ba bedzi kɛdɔ kiwuiligo.

²¹ Tɛyɛyɛkɛŋa so Yakobo gɛ etsi, akpaplɛnɔ yɛ osivuvu klɛ eklu Kpaya gɛ ayula Yosɛfu yɛ yianyɛ nyɛanyɛ.

²² Tɛyɛyɛkɛŋa kɔsɛ gɛ Yosɛfu butsi nɛ tsuba, aɖɔaɖɔ denɔ Izraɛlanɛ tɛ shɛ̃shɛ̃ nɛ Egipte klɛ aɖɔ tsrɛ alɛ kɛdɔnɔ nɛ gɛ ba babhɛtɛ nɛ yɛ axwa.

²³ Tɛyɛyɛkɛŋa kɔ sɛ Mose gɛ ba mɔɛ yɛ beke, yɛeni anɛ yɛaka bekpui yɛ woele tɛata, alasɛ ba mɔ sɛ ganɛ anuvɔ tite ko enu, klɛ be di si ekusi nɛ ɔshã nɛ gɛ akpɛ nɛ fu.

²⁴ Tɛyɛyɛkɛŋa kɔ sɛ gɛ Mose ebe shɛ, ada dɛmɛ sɛ tɛ ba ɖɔ sɛ enu Farawo yɛ yiadzɛ ye yi.

²⁵ Apɛɛ asɛ tɛ amɔ butɔ nɛ Kpaya yɛ banɔ dɛ sɛ tɛ amɔ same nɛ buzizi mɛ nɛ libe kplita ko.

²⁶ Adɛmɛ kɛwɔɛ̃ gɛ ba ba kpɛɛ yɛ nɛ Kristo tɔkpu dɛ kisiredɔ gɛ aba mɔ nɛ Egipte, alasɛ edi kɛdɔ gɛ aba mɔ nɛ otugba.

²⁷ Tɛyɛyɛkɛŋa so ashɛ̃ nɛ Egipte, ekusi nɛ obulo odi ku yɛ kifu, alasɛ anyɛna agɛ ata mɔ gɛganɛ anasɛ bumɔ yɛamɔ yɛ.

²⁸ Tɛyɛyɛkɛŋa so elu Tɛfɛflawui klɛ awãnya dzyosu nɛ bevu ipupu nɛ shi, sɛ tɛ butsi tɛ ba yi Izraɛl be yi tɛtɔpu.

²⁹ Tɛyɛyɛkɛŋa so banɔ nɛ aga Aƒu Dzɛdzã nɛ mɛ ekoeyi anasɛ kesukpɛa kpɛkpãkɔ la ga, pɔ gɛ Egipteanɛ apɛɛ sɛ tɛ ba ga fla, keni nɛ vualɛ.

³⁰ Tɛyɛyɛkɛŋa so Yeriko edri nɛ akpa, nɛ kibelɛlɛ gɛ Izraɛlanɛ aga akana alɛ nɛ ewui tegene mɛ.

³¹ Tɛyɛyɛkɔŋa kɔ sɛ kedunuzɛza Rahab be di yi yɛ nɛ bagɛ ba dɛ tatɔ, alasɛ ayɛkɛ befu gɛ bayɛkɔ awɔ̃hu apɛɛ ebui.

³² Klɛ kibui ɖuweɖu mɛ zɛa ɖɔ? Kibe ma mahwɛ gɛ ɛbaɖɔaɖɔ denɔ Gideon, Samson, Yefata, Daviti, Samuɛl anɛ batɔnu,

³³ bagɛ ba ganɔ tɛyɛyɛkɛŋa abha gɛ ba ŋa bekusi gɛ ba taa buyu nɛabha, babhɛtɛ atrɔ ɔshã dzyɔgo abha klɛ ba mɔ kɛdɔ gɛ ba ɖɔ elu kɔa lɛ, balɛ ada badzyata nɛ inugbu,

³⁴ balɛ eni efu gɛ latã gɛganɛ klɛ besi nɛ kɛpamɛ nu, balɛ shuimɛ yɛyɔ badzi tɛgɛganɛ, gɛ ba ba wɔe keyu tɛtɛta mɛ gɛ bakɛka befu nɛ gɛ bata buyu.

³⁵ Badzɛ bayɛkɛ balɛ betsitsi, gɛ baza ba nyɛmɛ alɛ amɛna kanɔ mɛ. Beteli ba kpalɛ butɔ klɛ ba dɛ dɛmɛ sɛ tɛ ba shɛ̃nahwɛ balɛ shu sɛ tɛ ba bamɔ tɛnyɛnyɛmɛ.

³⁶ Beteli ba kpɛalɛ tsɔ klɛ betu beteli, beteli tsyɛ bakpalɛ buɖɛ klɛ bakpɛalɛ buvu.

³⁷ Be hu alɛ aklãgbu, bayɛɛ alɛ mɛ akpɛ bupɛ tubha nɛ kapamɛ be yialɛ nɛ bupamɛ. Ba gafla nɛ ibhoshieplukpa anɛ bepidzyaplukpa mɛ, ba tɔ, ba kpatɔnɔ alɛ, klɛ ba vɔa lɛ—

³⁸ kanɔanɛ mɛadɛ pɛɛ̃ kɔ alɛ. Ba nyɔ afla nɛ ayakpa mɛ nɛ betum, anɛ bukanaɛzi mɛ anɛ kesukpa izi mɛ.

³⁹ Ba lɛ petee beku balɛawɔ̃ nɛ tɛyɛyɛkɛŋa nɛ shu, tsyɛ balɛ akanyaka adɛ yɛkɛ kɛgɛ baɖɔ lu kɔ alɛ.

⁴⁰ Kpaya atrɔ kibui dzyɔgodɛ tili elu kɔlɔ sɛ tɛ baza plɛnɔ lɔ tɛ ba babhɛtɛ alɛ tɛ ba na.