Hebriuanɛ 10 - ONUGBÙ NYƐNYÃ VUVƆ

Kristo Ishu Tɛyɛyɛkɔtsye Butsye Tuɖukpo Ko

¹ Ɔshã kɛtɛwui ko lo nu kɔ ebui dzyɔgo gɛ la ba, ganɛ adzyɔgo nahwɛ. Alasɛ kibuinɛ so kɛtɛ ba bɛlɛmɛ sɛ, ishutsyitsye lɛlɛ gɛ babhɛtɛ kɛgɔnyɛgɔe dɛ, kɛtɛ ba kɔ bagɛ betsobunɔ busɔlɛsɔlɛ nɛ bana.

² Onugɛ kɛ ba belɛmɛ, ba ta zukɔlɔ balɛ busɔlɛ ɛyɛmɛyuyɔ? Alasɛ basɔlɛsɔlɛ nɛ shu ta bhui nɛ ɔzakɔ torikpo mɛ, klɛ ba tɛa bu shuipɔ kɔ balɛ buizizi.

³ Pɔ ishu tɛyɛyɛkɔtsye bu nu kɛgɔnyɛgɔ dɔ ebuizizi bubaka,

⁴ alasɛ kɛ tɛ ba za bububɔɛ kɔ sɛ banɛtsyɔɛeyi anɛ bepidzyaeyi dzyosu ba bu buizizi tɛ̃.

⁵ Kɛlɛso gɛ Kristo aba kanɔ nɛ mɛ, aɖɔ sɛ: “Ishutsyitsye anɛ kɛdɔkukɔ kɛ tɛ za wɔ li, pɔ ishuidzya nɔ bala kɔ mɛ,

⁶ nɛ kɛdɔpupɔɛ kukɔ anɛ kibuizizi kɛdɔ kukɔ kɛ tɛ ku nɔ awɔ̃.

⁷ Kɛlɛ ɛɖɔ sɛ, ‘Mɛ na—ba ŋlɔmɛ denɔ mɛ shu nɛ ɛshãkeplukpa nɛ mɛ sɛ— Eba sɛ tɛ ɛba bhɛtɛ wɔ tɛpɛpɛɛ O Kpaya.’ ”

⁸ Oputɔnɔ aɖɔ sɛ, “Ishutsyitsye anɛ kɛdɔkukɔ, kɛdɔpupɔɛ kukɔ anɛ buzizi dɔkukɔ kɛ tɛ za wɔ li, pɛnɔ kɛ dɛku nɔ awɔ̃ nɛ alɛ” (kɛlɛlɛmɛ sɛ ɔshã nɛ bisi denɔ balɛ ahwɛmɛ tɛ ba bhɛtɛ).

⁹ Kɛlɛ aɖɔ sɛ, “Mɛ na nɛ, ɛba sɛ tɛ eba bhɛtɛ wɔ tɛtɛtrɔ.” Ayɛkɔ kɛtutɔpu eluɛ wã tɛ ayɛkɔ kɛbhla nɛ elu kɛlɛ ɔzakɔ.

¹⁰ Klɛ nɛ kɛtɛtrɔɛ lɛlɛ nɛabha, bakɔ lɔ shu bhui ɔganɔ Yesu Kristo yɛ shu tysitsye trukpo ko abha.

¹¹ Kiwui nyɛwuiede kpayazakɔanɔ kanyaka alɔ klɛ awa yɛ sɔlɛ axwɛ, awa klɛ azawa akɔ ishutsyitsye lɛlɛ, gɛ ba tɛbe bu buizizi nɛ atɛ̃.

¹² Pɔ gɛ kpayazakɔanɔ ayɛkɔ kɛdɔ akɔ kibenyɛbe ishutsyitsye tirikpo kɔ buizizi, ada za Kpaya kɛŋahwɛ apɛ nɛ mɛ.

¹³ Denɔ kibe lɛlɛ epo yɛ ba gɛ ba ta pɛɛ yɛ bui sɛ tɛ le be edzi yɛ butsrɔkpɔegbu,

¹⁴ alasɛ nɛ ishuyɛyɛkɔtsye tirikpo mɛ abhɛtɛ lɛ kɛna kɔ bagɛ ba bhɛtɛ sɛ tɛ ba lɛ shu bhui ɔvɛnɔ mabeke mabeke.

¹⁵ Ɔfufɔɛ Dzyɔgo nɛ tsyɛ lɔɖɔ tsre lɔ nɛ kɛnɛ nɛ shu. Putɔ aɖɔ sɛ:

¹⁶ “Kɛnɛ kɛlɛ nu onugbunyɛnya gɛ ɛba bhɛtɛ na lɛ nɛ kibelɛlɛ nɛede Apalete nɛ yɛ aɖɔ. Eba yɛkɔ mɛ ɛshã kpɛ balɛ idzyimɛ klɛ ɛba ŋlɔmɛ lɛ kpɛ balɛ kɛpɔkpui mɛ.”

¹⁷ Kɛlɛ aplɛnɔ sɛ: “Balɛ ebuizizi anɛ ɛshã kesi matamata bhɛbhɛtɛ ɛtɛa baka lɛ di.”

¹⁸ Klɛ ɔkɛlɛ gɛ ba yɛkɔ anɛ nɛ tsye, ebuizizi ishutsyitsye tɛaza kɔ buzizi bhɛbhɛtɛ. Tɛkuklu Kɔ Kemikpɛkpɛ

Tɛkuklu Kɔ Kemikpɛkpɛ

¹⁹ Kɛlɛso, madzyalɛ mɔ, denɔ kibe gɛ kɛ kpɛ lɔemi sɛ bu tsoku Obhubhui Kɔ Ɖɛɖamadɛ nɛ Yesu dzyosu nɛ mɛ,

²⁰ ganɔ ɛkpã vuvɔ nɛ ɛlɛ tɛzɛza mɛ nɛ danɛ dzo ganɔ kedunuipɔtɛ nɛ gɛ nu yɛ ishuidzya nɛa bha,

²¹ klɛ gɛ kɛlɛ sɛ kpayazakɛanɔ gbla alɛ bulɔ ahwɛ gɛ edi Kpaya bupa nɛabha,

²² nɔ kɔlɔ tsobunɔ Kpaya nɛ idzyi dzyɔgo anɛ́ tɛyɛyɛkɛŋa petee, nɛ kibe lɛ mɛ gɛ ba wanya kɛdɔnɔ nɛ gɛ ba pulu bulɔ idzyi nɛ bu nɛ kɛpɔŋɛŋa kɛtɔkpum bhɛbhɛtɛ anɛ bulɔ ishuidzya nɛ tɛpupulu nɛ buni gɛ bhui.

²³ Nɔ kɔlɔ nyɛna gɛganɛ kɛdzoenudidi gɛ bubu ɖɔ, alasɛ agɛ atɛɖɔlu enu ayɛyɛkɛŋa.

²⁴ Klɛ nɔ kɔ lɔ di kɛgɛ buba bhɛtɛ kɔ agulɔ kɔ ishudɛdɛmɛ anɛ adzyɔgo bhɛbhɛtɛ.

²⁵ Nɔ tɛ kɔ lɔ zukɔlɔ kɛtɔkputsyɛtsya kɔ dɛ, anasɛ gɛ banɔ teli ba yɛkɔ trɔ shu gɛ ba bhɛtɛ, pɔ nɔ kɔlɔ kpɛ agulɔ kemi—klɛ petee ɔyɛkɔ dɛana anasɛ gɛ nɔ mɔ Kelizɛza nɛ gɛ aba.

²⁶ Onugɛ ɔfɔmɛ bu tsri lɛabha bhɛtɛ ebuizizi nɛ kɛbelɛlɛ nɛ gɛ bu tɛ́ yɛkɛ kibui gbɛagba buititi, kɛlalɛ butsyitsye kanyaka ma gɛ bu ba bu buizizi atɛ̃,

²⁷ pɔ kifusisi kɔ kɛpɔbubu anɛ kifu tɛtã gbɛgbla gɛ kɛba tãnyɛ̃ bagɛ ba ta pɛɛ Kpaya bui ko.

²⁸ Anɔnyanɔ gɛ adɛ bhɛtɛ atrɔ Mose ɔshã nɛabha etsi eshutukubui madimadi onu gɛ ba mɔ ebuimɔɖɔ tɛabha anɛ tɛata gɛ aɖɔaɖɔ nɛ yɛ shu.

²⁹ Kɛlɛ lɛ nu anɔ teli etiti ɔtsɛrɛ nɛ Kpaya yɛ Yi abha, gɛ amɔ onugbunyɛnya dzyosu gɛ lɔ plu yɛ shu anasɛ kɛdɔ gɛ kɛlɛ shu dɛbhui, gɛ akula ɛyɛmɛyuyɔ anɔ Ɔfufɔɛ kideso gɛ bata tɛta yɛ batɔ gɛganɛ?

³⁰ Alasɛ bu nyi anɔ nɛ gɛ aɖɔ sɛ, “Mɛ yɛ kɛlɛ nu sɛ tɛ ɛwa buwule, ɛba tsodzi buya kɛbhɛ,” nɛ kɛlɛabha vɛvɛ, “Apalete ebe klu kebhui nɛ yɛ banɔ.”

³¹ Kinu kifusisi bui sɛ tɛ ɔdɔ wɔlɛku ɛkpã Kpaya ahwɛ.

³² Nɔ baka ewui nɛ gɛ la ba fla gɛ nɔ yɛkɛ Kpaya yɛ bui nɛ beke, gɛ nɔ za wɔnɔ ɔzakɔ nɛ tɛwɛ̃wlãnkɛ gɛganɛ anɛ ebuiamɛ mumɔ mɛ.

³³ Ebe teli mɛ nɛ oxogokɔ bakula nɔ klɛ bayɛkɔ ebui nɛ wɔnɔ shu, ewui bhlatɔabha nɔ za bagɛ balɛ abhɛtɛ ebuianɛdi shi.

³⁴ Eshutukubui kunɔ nɛ bagɛ bakpɛvu klɛ onugɛ ba yɛkɛ kɛdɔ gɛ kɛlɛ wɔnɔahwɛ nɔ yɛkɛ lɛ nɛ same, alasɛ wɔnɔ nahwɛ nɔ nyi sɛ kɛdɔ gɛ kɛbaza ɔvɛnɔ fãã lɛ wɔnɔahwɛ.

³⁵ Kɛlɛso nɔtɛ yɛkɔ wɔnɔ kemikpɛkpɛ ɔtɛ̃, nɔ bɔ yɛkɛ kɛlɛ nɛ bhɛ gbɛgbla.

³⁶ Kɛlɛ sɛ tɛ nɔ dɔ fɔɔ̃ tɛ nɔ bhɛtɛ Kpaya tɛpɛpɛɛ klɛ tɛ nɔ yɛkɛ kɛgɛ baɖɔlu kɔ nɔ.

³⁷ Agɔɛ bɔɛ kibe tɛbadze, “Agɛ yɛ ába abá ba klɛ atɛ ba gba kide.

³⁸ Pɔ mɛ anɔnɛna aba za nɛ ɛkpã ganɔ tɛyɛyɛkɛŋa abha. Klɛ onugɛ etsodzi ɔvɛ kede, same etibeku mɛ nɛ yɛ.”

³⁹ Pɔ bu dɛ nu bagɛ be tsodzi aba kide klɛ ba lɛla, pɔ bagɛ ba yɛkɛŋa klɛ be bhuialɛ ayɛkɛ.