Hebriuanɛ 1 - ONUGBÙ NYƐNYÃ VUVƆ

Eyianyɛ Avɛ Otugbadɛ Kpaya Baxwɛdɛ

¹ Nɛ kibe gɛ kɛbafla Kpaya aɖɔaɖɔ kɔ bulɔ bakashishe ganɔ atɔnu abha nɛ kibe gelee anɛ edzo gelee mɛ,

² pɔ nɛ ewui gugɔɛa nɛ mɛ aɖɔaɖɔ aganɔ yɛ Yi nɛabha kɔ lɔ, gɛ yɛ eklu akɔ kɛdɔnyɛdɔ, nɛ yɛabha aga gɛ abhɛtɛ kanɔ.

³ Eyi yɛ nu kɛfutɛtã kɔ Kpaya otugbavɛvɛ klɛ ayɛkɔ Kpaya tɛzɛzɛmɛ, abhɛtɛ kɛdɔnyɛdɔ nɛ yɛ bupu kibui ɖuɖɔɛ mɛ. Gɛ akɔ ebuizizi tipuplu beke, ada za Ɔgbɛgblakɔ kɛŋamɛ nɛ owũsise.

⁴ Kɛlɛso ebedzi agbɛgbladɛ kɔ Kpaya baxwɛdɛ anasɛ gɛ kinyi gɛ ayɛkɛ gɛ kɛlɛ otugba dɛ balia yɛ.

⁵ Alasɛ kɔ baxwɛdɛ ɖueɖu Kpaya eti tsre di sɛ, “Wɔ nu me Yi, obo nɛ idzi wɔ Aka”? Pɛnɔ ɔyɛkɔ plɛnɔ, “ɛba dzi yɛ Aka, klɛ ebe dzi me Yi”?

⁶ Klɛ ɔyɛkɔ plɛnɔ, gɛ Kpaya amɛna yɛyi tɛtɔpu nɛ kanɔ nɛ mɛ, aɖɔ sɛ, “Nɔ kɔ Kpaya baxwɛdɛ petee ba dɛ axwɛ kɔ yɛ.”

⁷ Nɛ kaɖɔɖuɖɔ denɔ baxwɛdɛ nɛ shu aɖɔ sɛ, “Abhɛtɛ Kpaya baxwɛdɛ sɛ tɛ bedzi kɛlɛɛ, yɛ bagɛ ba dɛ axwɛ benu kifu ɛmɔɛ̃.”

⁸ Pɔ denɔ yɛ Yi nɛ shu aɖɔ sɛ, “Wɔ bukusiɔŋakɔ, O Kpaya, bu ba za mabeke nɛ mabeke, klɛ kɛdzyɔgo bhɛbhɛtɛ ba dzi osivuvu nɛ wɔ bukusiɔŋakɔ.

⁹ Ɔdɛmɛ kɛdɔ dzyɔgo bhɛbhɛtɛ klɛ ɔdɛpɛɛ kɛtɔkpu mɛ gɛganɛ, kɛlɛso Kpaya, wɔnɔ Kpaya, akɔ nɔ nɛ otugba same dɛ anɛ bubɔ sɛsra ɛnɔabha nɛ same mɛ,”

¹⁰ Aza ɖɔ sɛ, “Nɛ kesikpɛkpɛ, O Apalete, wɔ bhɛtɛ kesukpa, klɛ owũsise lɛ nu wɔ ahwɛ dɔ bhɛbhɛtɛ.

¹¹ Alɛ petee la bezi, pɔ wɔnɔ nɔ bɔza, ba bedzi ekuku anasɛ apɔtɛ.

¹² Nɔ bɔkalɛ olu anasɛ apɔtɛ, anasɛ apɔtɛ nɔ bɔtsrakɛ alɛ. Pɔ kanako nɔ bɔza, klɛ wɔnɔ agɔ le ti be beke.”

¹³ Kpaya baxwɛdɛ ɖuweɖu Kpaya etsre asɛ, “Za mɛ kɛŋahwɛ nɛ mɛ ɔdɔtɔnɔ kibe gɛ ɛba bhɛtɛ bagɛ bata pɛɛ wɔɛ bui katsrɛkpɔegbu kɔ wɔ butsrɛkpɔ.”

¹⁴ Kpayaxwɛdɛ ganɛ bukpɛ la kpɛ alɛ sɛ tɛ ba dɛ axwɛ nɛ ɔfufɔɛ kɔ bagɛ ba ba mɔ tɛyɛyɛkɛ kɔ?