Galatianɛ 5 - ONUGBÙ NYƐNYÃ VUVƆ

Ishuahwɛzɛza Nɛ Kristo Mɛ

¹ Ishuahwɛzɛza so gɛ Kristo ebe bhulɔayɛkɛ. Nɔ za ishu mɛ gɛganɛ, nɛ kɛlɛede, klɛ nɔ tɔ kɔ sɛ ba fla ba trɔ nɔ anɔdzidzi ɔkpakasi kituku.

² Tatɔ nɛ mɛ ebui! Mɛ, Paolo, ɛtsre nɔ sɛ onugɛ nɔkɔ lebhui bunyɛnyɛ kɔnɔ, Kristo etibedzi kɛdɔ dzyɔgo kɔ nɔ di.

³ Ɛka ɖɔ tsre anyɛ nyanyɛ gɛ akɔ sɛ be bhui bunyɛnyɛ kɔ yɛ nahwɛ kɛlɛ kɔ yɛ sɛ tɛ abhɛtɛ atrɔ ɔshã nɛ petee abha.

⁴ Wɔnɔ bagɛ nɔ wlãkɛ sɛ tɛ nɔ dzi badzyɔgo nɛ ɔshã nɛ mɛ nɔ bhui shu obu nɛ Kristo shu, nɔ wɔlɛ okoeyi nɛ kɛdɔkukɔ shu.

⁵ Pɔ nɛ tɛyɛyɛkɛŋa abha bupo ganɔ Ɔfufɔɛ kɛdzyɔgo bhɛbhɛtɛ kɛlɛ bu didzoenu kɔ.

⁶ Alasɛ nɛ Kristo Yesu mɛ bebhui bunyɛnyɛ kɔ wɔ pɛnɔ bedi bhui bunyɛnyɛ kɔ wɔ kɛdi nu kibuinyɛbui. Kɛlɛ tirikpo gɛ klu bui kɛlɛ nu tɛyɛyɛkɛŋa gɛ kɛ waɛxwɛ ganɔ tɛdɛdɛmɛ abha.

⁷ Nɔ kpaza kibui dzyɔgoe de. Ane gɛ abe bhui wɔnɔɛshi klɛ adzrɔ nɛ nɔ sɛ nɔ tɔtatɔ kɛgbɛagba?

⁸ Tɛwuwɔɛ nɛ di kidide agɛ yɛ klu wɔ nɔ kɔ.

⁹ “Bunayekedɔ bhliyi bu lɛ yeke mawɔɛ gelee.”

¹⁰ Ɛyɛkɛ Apalete nɛabhaŋa sɛ nɔ tɛ bɔ bu amɛ akpɛ ɔkɔ bhlatɔ. Agɛ ye atɛ̃ nɔ akpɛ tɛfufutsumɛ, aba mɔ batɔ tɛtɛta nɛ ɔkɔnyɔkɔ gɛ aba za.

¹¹ Madzyalɛ, onugɛ ɛka ɖɔ bunyɛnyɛ bhubhui bui, kideso gɛ ba ka kpatɔnɔ mɛ? Nɛ kɛlɛmɛ buzizi bhɛbhɛtɛ nɛ butsiosi shu ba zukɔlɔ.

¹² Kɔ bagɛ ba wlãkɛ bui, ɛpɛɛ sɛ ba ga kidzo nɛabha vɛ faã klɛ bata tsrɔ balɛnahwɛ shu!

¹³ Wɔnɔ, madzyalɛ, be klu sɛ tɛ nɔ za ishuahwɛ. Pɔ nɔ tɛ yɛkɔ wɔnɔ shu ahwɛzɛza ɔzɔ bhɛtɛ ebuizizi, kɛlɛ ɔzakɔ nɔ dɛ axwɛ kɔ ɔhaglɔɛ nɛ tɛdɛdɛmɛ nɛ anɔ.

¹⁴ Ɔshã petee kibui tirikpo gɛ lɛ ɖɔ kɛlɛ nu sɛ: “Dɛmɛ wɔ haglɔɛ bui anasɛ gɛ ɔdɛmɛ wɔ nahwɛ shu bui.”

¹⁵ Onugɛ nɔ tsri liabha onemi klɛ nɔ kpɛ aglɔ apɔ, nɔ dimɔ odinuana nɔ zii aglɔ.

Ɛkpã Ganɔ Ɔfufɔɛ Nɛabha

¹⁶ Kɛlɛso ɛɖɔ sɛ, za nɛkpã ganɔ Ɔfufɔɛ nɛabha, klɛ ɔtɛ bɔ kpɛ kanɔɛmɛ ebui kpã pɛpɛɛ same.

¹⁷ Alasɛ anɔdzyrame tɛzɛzamɛ ebui kpã pɛpɛɛ la lɔ kititi nɛ Ɔfufɔɛ nɛ shu, klɛ Ɔfufɔɛ mɛ yɛ na lɔ kititi nɛ tɛzɛza ebui kpã nɛ shu. La lɔɛtiti nɛ agblɔ shu, so tɛ nɔ tɛ bhɛtɛ kɛgɛ ɔpɛɛ sɛ tɛ ɔbhɛtɛ.

¹⁸ Pɔ onugɛ Ɔfufɔɛ nɛ lɔ gbanɛ nɔ, nɔ ma ɔshã nɛesi.

¹⁹ Ɛkpã kpãmɛ zɛza ebui bhɛbhɛtɛ la wɔɛ̃ wee: aglɔɛbui bhɛbhɛtɛ, ishu mabhui mabhui ɛkpãzizi zɛza anɛ ishukpɛkpɛ butsɔ,

²⁰ obudi busɔlɛ sɔlɛ nɛ anɔtɛtã, anɔgugu, eblapɛpɛɛ, kabhawuwlãnkɛ, ekplitɛta tɛtɛtrɔ kɔ shu terikpo mazamaza ɔtɔbubu,

²¹ anɛ kawɔ̃kpɛ, tɛbubuku, samezizi mumɔ anɛ ebuibhltɔ bhɛbhɛtɛ nɛ̀ alɛlɛ nɛɛ di. Ɛkpɛ nɔ ɔshã, anasɛ gɛ ɛtɛkpɛ nɔ bafla, sɛ bagɛ ba za ɛkpãɛ nidi ba tɛba mɔ ɔzakɔ nɛ Kpaya kusi ɔŋa kɔ.

²² Pɔ Ɔfufɔɛ nɛ eyuyu ɔlɛ nu tɛdɛdɛmɛ nɛ anɔ, same, ishuyuyɔ, tɛdɛdɔfɔ̃, ɛyɛmɛyɛyɔ, kɛdzyɔgo bhɛbhɛtɛ tɛyɛyɛkɛŋa,

²³ ishu nyɛnyɛna anɛ ishua bhaŋɛŋa. Ɔshã dɛ lɔɛtiti nɛ ebuianɛ di shu.

²⁴ Bagɛ benu Kristo Yesu ayɛ ba tɛ kpla buzizi ɛkpã nɛ asɔ nɛ ɛlɛ tɛpɛpɛɛ.

²⁵ Gɛ Ɔfufɔɛ nɔ kɔ sɛ bulɛ nɛkpã, nɔ kɔ lɔ bu ɔtsrɛ plɛnɔ Ɔfufɔɛ.

²⁶ Nɔ tɔ kɔ lɔ ku shu awɔ̃, bunuhukpɛkpɛ anɛ aglɔ awɔ̃kpɛkpɛ.