Galatianɛ 4 - ONUGBÙ NYƐNYÃ VUVƆ

¹ Kibui nɛ gɛ ɛɖɔ kɛlɛ nu sɛ anasɛ agɛ aba ŋa yɛaka dɔ ɛnu anuvɔ, adɛ gatɔ nɛ anɔdzidzi shu, kɛlɛlɛmɛ sɛ yɛ bevu petee enu yɛayɛ.

² Alɛ anɔesi klɛ be diabha ɔdɔtɔnɔ kibe gɛ yɛaka atrɔ kɔ yɛ nɛ na.

³ Kɛlɛso bulɔ tsyɛ, gɛ bu dzi banuvɔ, bu dzi banɔdzidzi nɛ kanɔanɛmɛ ebui nɛesi.

⁴ Pɔ gɛ kibe nɛ na mɔmɔ, Kpaya asɛsɛ yɛ Eyianyɛ, gɛ adzɛ amɔ, ba mɔ yɛ nɛ ɔshã nɛesi,

⁵ sɛ tɛ ebhuayɛkɛ bagɛ balɛ ɔshã nɛesi, tɛ bu ba yɛkɛ tɛnɛna dzyɔgo beyi.

⁶ Alasɛ bu nu beyi, Kpaya akpɛ yɛ Yi anɛ Ɔfufɔɛ nɛ bulɔ idzyi mɛ, Ɔfufɔɛ nɛ gɛ lɔ kpɛ ogugu sɛ “Aka, ma Ka.”

⁷ Kɛlɛso ɔtɛkonu anɔdzidzi, pɔ eyi, klɛ ɔtsɔ̃nɛ gɛ odzi eyianyɛ, Kpaya abhɛtɛ wɔ tsyɛ yɛ kededɔ aŋɛŋa.

Galatianɛ Bui Nyɛna Paolo

⁸ Kibe gɛ bafla, gɛ nɔ dɛ ti Kpaya, nɔ dzi banɔdzidzi kɔ bagɛ nɛ ɔdzyɔkɔ bedinu bakpaya.

⁹ Pɔ ɔtsyɔnɛ gɛ nɔ nyi Kpaya— pɛnɔ Kpaya yenyi nɔ—kɛlɛ kɛdzi sɛ nɔ tsyina kede kpɛ bagɛ ba ma kemi anɛ bagɛ ku eshutukubui ɛkpãzɛza? Nɔ pɛɛ sɛ tɛ nɔ flodzi banɔ dzidzi kɔalɛ?

¹⁰ Nɔ tsyinadi ewui gɛganɛ teli, wɔele teli, ebe teli nɛ agɔ teli gɛ nɔ gu begu!

¹¹ Isifu kɔ nɔ, sɛ kɛbadzi sɛ ɛzi kibe nɛ wɔnɔ shu.

¹² Ɛkpɛtɔkpuesi kɔ nɔ, badzya, nɔ za anasɛ mɛ, alasɛ ɛlɛ anasɛ wɔnɔ. Nɔ dɛbhɛtɛ mɛ kizizi.

¹³ Anasɛ gɛ nɔ nyi, mɛ bunya nɛ so pɛ iputɔ ɖɔ kibui dzyɔgo tsre nɔ.

¹⁴ Kɛlɛlɛmɛ tsyɛ sɛ mɛ bunya nɛ so bedi simɛ nyɛnyɛ̃ ɔdɔgɔsɛ nɔ plɛmɛ. Kɛlɛmazɛlɛmɛ, nɔ yɛkɛmɛ anasɛ onugɛ ɛnu Kpaya axwɛdɛ, anasɛ onugɛ ɛnu Kristo Yesu yɛnahwɛ.

¹⁵ Kide kɛlɛba nɛ wɔnɔ same petee gɛ nɔ mɔ nɛ shu? Ɛba na ɖɔ sɛ, onugɛ nɔ bɔ bhɛtɛ ana, nɔ tɔkpa wɔnɔ aŋɔhu nɔbu klɛ nɔ tɔ kɔ alɛ ɔkɔ mɛ.

¹⁶ Ɛdzi anɔ kpã ɔtsɔnɛ kɔ nɔ alasɛ ɛɖɔ ɛbui gbɛagba tsre nɔ so?

¹⁷ Banɔ alɛlɛ ba pɛɛ asɛ tɛ baŋa wɔnɔ abha, pɔ ganɛ kɛdzyɔgoɛ mɛ. Kɛ gɛ ba pɛɛ kɛlɛ nu sɛ tɛ ba pɔ nɔ nɛ bulɔɛ shi, so tɛ nɔ yɛkɛ balɛ abhaŋa.

¹⁸ Kɛbɔ sɛ tɛ ɔza kemi, onugɛ kɛnu sɛ nɛ kɛdzyɔgo shu, klɛ kɛlɛ sɛ tɛ ɔza na kibenyɛbe klɛ kɛdɛ nu sɛ onugɛ ɛlɛ wɔnɔ bha nɛ ko.

¹⁹ Me yialɛ mumɔa, kɔ ane mɛ ɛkalɛ butɔ gɛ amɔ nɛ ɔmɔkɔ ɔdɔtɔnɔ kibe gɛ Kristo yɛ tɛzɛza ba ba wɔnɔɛ mɛ,

²⁰ kɛna gɛ ɛta pɛɛ sɛ tɛ ɛza nɔbha ɔtsɔnɛ klɛ tɛ ɛtsyina mɛ kaɖɔɖuɖɔ kpɛ wɔnɔ kɔ, alasɛ ifutsu nɛ wɔnɔ shu!

Haga Anɛ Sara

²¹ Tsre mɛ, wɔnɔ gɛ nɔ pɛɛ sɛ tɛ nɔ za ɔshã nɛesi, nɔ tinyi kɛdɔnɔ nɛ gɛ ɔshã nɔ ɖɔ?

²² Alasɛ lɔ ŋlɔmɛ sɛ beyianyɛ tɛabha za Abraham ahwɛ, terikpo nu adzɛ dzidzi yɛ yi klɛ abhla enu adzɛ ishuahwɛzɛza yi.

²³ Yɛ yianyɛ nɛ gɛ enu adzyɛ dzidzi na yɛ bamɔ yɛ nɛ eyi mumɔ dzo nɛabha, pɔ ye yi gɛ enu adzyɛ ishuahwɛzɛza na yɛ bamɔ yɛ nɛ kidzoenudidi nu.

²⁴ Kɛdɔɛnɛ ba ba yikɔ alɛ sɛ lɛ nu tɛabha, alasɛ badzɛ balɛ onugbunyɛnya tɛbha. Onugbu nyɛnya torikpolɔ de Butu Sina klɛ bamɔ beyi gɛ ba be dzi bedzidzi: Kɛnɛ kɛlɛ nu Haga.

²⁵ Ɔtsɔ̃nɛ Haga yalɛ Butu Sinai nɛ nyimɛ nɛ Arebia klɛ kɛga yɛabha bedzi ɔtsɔ̃nɛ ɔma gbɛgbla Yerusalɛm, alasɛ yɛ akpasɛ bedzidzi nɛ mɛ anɛ yɛ beyi.

²⁶ Pɔ Yerusalɛm gɛ lɔ lɛ kabha lɔ lɛ ishuahwɛ, klɛ lɔ nu bulɛ eni.

²⁷ Alasɛ ba ŋlɔmɛ asɛ, “Mɔ same, O adzɛ gɛ atamɔ eyi, gɛ beyi ma yɛ ahwɛ, flakoeyi tɛ ɔkpɛ ogugu, tɛ obiyo gɛganɛ, wɔ gɛ ɛya katã wɔ di, alasɛ adzɛ gɛ ba shɛ̃nahwɛ yɛ shu yɛyialɛ nɛ kpe adɛ agɛ anyɛ alɛ lɛ ahwɛ.”

²⁸ Ɔtsɔ̃ nɛ wɔnɔ, badzya, anasɛ Isaka, nɔ nu beyi gɛ bedidzoenu kɔ.

²⁹ Kibe lɛlɛ eyianyɛ gɛ bamɔ nɛ anɔ tɛmumɔ kidzoabha akpatɔnɔ eyianyɛ nɛ gɛ bamɔ nɛ Ɔfufɔɛ kemi mɛ. Kana lɛ lɛ ɔtsɔ̃nɛ.

³⁰ Pɔ kide Ɔfufɔɛ nɛ ɖɔ? “Shɛnahwɛ adzɛ dzidzi nɛ ye yianyɛ nɛ shu, alasɛ adzɛ dzidzi eyianyɛ nɛ adzɛ ishuahwɛzɛza eyianyɛ batɛ ba yɛɛ aka kededɔŋɛŋa nɛ aglɔɛ shi.”

³¹ Kɛlɛso, badzya, bu dɛ nu adzɛ dzidzi yɛ yialɛ, pɔ adzɛ ishuahwɛzɛza ye yialɛ.