Galatianɛ 3 - ONUGBÙ NYƐNYÃ VUVƆ

Tɛyɛyɛkɛŋa Pɛnɔ Ɔshãbha Bhɛbhɛtɛ

¹ Wunɔ Galatianɛ bagã! Ane yɛ atã nɔ? Flogo wunɔ aŋɔhu alɛlɛ bakasɛ wee asɛ ba kpla Yesu Kristo asɔ.

² Ɛpɛɛ sɛ tɛ ɛkpasɛ kibui tirikpo ko denɔ wɔnɔ kɔ: Nɔ yɛkɛ Ɔfufɔɛ ganɔ ɔshã abha bhɛbhɛtɛ, pɛnɔ kibui yɛyɛkɛŋa gɛ nɔ nu?

³ Bagã koŋ nɔ nu? Gɛ nɔ kpɛesi nɛ Ɔfufɔɛ beke, ɔtsɔlɛ nɔ wlãnkɛ sɛ tɛ nɔ yɛ kɔ wunɔ bhɛ ganɔ Anɔdzyrame dɔ bhɛbhɛtɛ?

⁴ Ɔtɛ mɔ butɔ gelee gɛ kɛdɔnyɛdɔ malɛ mɛ—onugɛ kɛgbɛagba kɛ dɛ dzi kɛdɔnyɛdɔ?

⁵ Bukɔ Kpaya akɔ nɔ Ɔfufɔɛ klɛ abhɛtɛ kibuiyinanɔ nɛ wɔnɔɛ shi alasɛ nɔ bhɛtɛ ɔtrɔ ɛshã nɛabha, ɔdɔgɔsɛ alasɛ nɔ yɛkɛŋa nɛ kibui nɛ gɛ nɔ nu nɛabha?

⁶ Nɔ dii Abraham: “Ayɛkɛ Kpaya abhaŋa, klɛ kɛ nu yɛ otugba vɛvɛ kɔ yɛ anasɛ kɛdzyɔgo bhɛbhɛtɛ bakɔɛ.”

⁷ Nɔ nuliesi, ɔtsɔlɛ, sɛ bagɛ bayɛkɛŋa balɛ nu Abraham yɛ yialɛ

⁸ Kpaya kɛplukpa kamɔ ɖɔ sɛ Kpaya ebe butsya kɔ bagɛ bedinu Yuɖanɛ ɔganɔ tɛyɛyɛkɛŋa abha, klɛ eputɔ aɖɔ kibui dzyɔgo kɔ Abraham: “Ba bayula amadi petee aganɔ wɔabha.”

⁹ So bagɛ bayɛkɛŋa bayula lɛ aplɛnɔ Abraham, tɛyɛyɛkɛŋa anɔ.

¹⁰ Banɔ petee gɛ ba nyɛna ɔshã nɛ mɛ evunɔ ba kpasɛ kibuiɖɛɖɔ kpɛ anɔesi, alasɛ ba ŋlɔmɛ elu asɛ: “Baɖɔɛ buikpɛ anɔnyanɔ gɛ ata bhɛtɛ ebui petee gɛ ba ŋlɔmɛ akpɛ Ɔshã Keplukpa nɛ mɛ.”

¹¹ Kɛlɛmɛ bhui sɛ bedi bu anɔnyanɔ butsya nɛ Kpaya amɛ nɛ ɔshã nɛ shu, alasɛ, “Anɔnɛna aba za nɛkpã ganɔ tɛyɛyɛkɛŋa mɛ.”

¹² Ɔshã nɛ lɔ ma tɛyɛyɛkɛŋa mɛ, nɛ kɛlɛmaza lɛmɛ, “Anɔ nɛ gɛ abhɛtɛ ebuianɛ aba za nɛ kpã nɛ lɛ.”

¹³ Kristo ebu lɔ denɔ kibuiɖɛɖɔ kpɛ anɔ nɛ ɔshã nɛ mɛ gɛ lɔ mɛna kibuiɖɛɖɔ kpɛ anɔ kɔ lɔ, alasɛ ba ŋlɔmɛ elu asɛ: “Kibuiɖɛɖɔ kpɛ anɔ kɛ nu anɔnyanɔ gɛ ba kpɛ kihuioli kɔ yɛ nɛ osi shu.”

¹⁴ Ebu lɔ nɛ kɛlɛmɛ sɛ tɛ tɛyuyula gɛ akɔ Abraham bu ba ba bagɛ bedinu Yuɖanɛ nɛ abha ɔganɔ Kristo Yesu abha, sɛ tɛ nɛ tɛyɛyɛkɛŋa mɛ bu ba yɛkɛ Ɔfufɔɛ mɛ dɔ gɛ baɖɔ lu kɔ lɔ.

Ɔshã Nɛ Kibuiɖɛɖɔlu

¹⁵ Badzya mɔ, nɔ kɔmɛ yɛkɔ kibui bhɛbhɛtɛ kasɛ denɔ kiwuinyɛwui ɛkpã zɛza mɛ. Anasɛ gɛ anɔnyanɔ atɛ ba yɛkɔ elu yɛ wã pɛnɔ aplɛnɔ Anɔdzyrame onugbunyɛnya gɛ batrɔ lu nɛ shu, so kana lɛ lɛ nɛ kɛnɛ nɛ shu.

¹⁶ Ba ɖɔ ebui tɛtrɔlu etsre Abraham anɛ yɛ beshui. Kɛdɔ ŋuŋlɔmɛ lu dɛ ɖɔ sɛ “klɛ kɔ beshui,” kɛlenu sɛ banɔ gelee, pɔ “klɛ kɔ wɔ shu,” kɛliesi kɛlɛnu anɔ terikpo, gɛ enu Kristo.

¹⁷ Kɛgɛ ɛɖɔ kɛlɛ nu sɛ: Ɔshã, bakpɛɔ lɛ agɔ kɛfɔɛfɔ tɛalɛ̃ nɛ afata (430) oputɔnɔ, adɛ yɛkɔ tɛnyɛnya elu kɛwã kibelɛlɛ gɛ Kpaya anya ɔlɛ klɛ gɛ ashɛnahwɛ ebui tɛtrɔlu nɛ shu.

¹⁸ Alasɛ onugɛ kɛdedɔŋɛŋa dɛ ɔshã nɛ mɛ, kɛlalɛ kɛ dadzi kibuitɛtrɔlu, pɔ nɛ Kpaya ɛyamyuyɔ mɛ ayɛkɔlɛ akɔ Abraham ɔganɔ kibuitɛtrɔlu mɛ.

¹⁹ Kɛlalɛ, kide so gɛ ɔshã nɔ lɛ? Bayɛkɔ ɔlɛ aplɛnɔ alasɛ ebuikpã bhɛbhɛtɛ ɔdɔtɔnɔ Eshui nɛ gɛ yɛ tɛtɛtrɔlu bui baɖɔ aba. Ba kpɛ ɔshã nɛesi aganɔ baxwɛdɛ nɛabha nɛ agɛ alɛ kishi.

²⁰ Kishitɛbhanɔ, pɔ, ama kɔ kapɛ tierikpo, pɔ Kpaya enu terikpo.

²¹ Ɔshã nɛ, kɛlɛso, lɔlɔɛtiti nɛ Kpaya tɛtrɔlu nɛ shu? Kɛmɛlɛmɛ ana! Alasɛ onugɛ bakɔ ɔshã sɛ tɛ babhɛtɛ ɔlɛabha tɛ ba mɔ ɛkpã, kɛlalɛ kibuidzyɔgo bhɛbhɛtɛ ba ba ganɔ ɔshã nɛabha

²² Pɔ Tɛŋuŋlɔmɛ anɛ buɖɔ sɛ ba kpɛ kanɔ petee nu kizizi evuza, sɛ tɛ kɛ gɛ ba trɔlu, ba yɛkɛ lɛ akɔ aganɔ Yesu Kristo tɛyɛyɛkɛŋa abha, ba bayɛkɛ akɔ bagɛ bayɛkɛŋa.

²³ Flogo gɛ tɛyɛyɛkɛŋa nɛ ba ba, be tivu lɔ akpɛ buvu nɛ ɔshã nɛ nu, ba davu akpɛ lɔ ɔdɔtɔnɔ kibe gɛ be bu tɛyɛyɛkɛŋa akasɛ.

²⁴ Kɛlɛso ba kpɛ ɔshã sɛ tɛ lɔza bulɔ nu tɛ lɔ gbanɛ lɔ vɛnɔ wɔnɔ Kristo ɔkɔ tɛ be bhutsya anɛ tɛyɛyɛkɛŋa abha.

²⁵ Ɔtsɔ̃nɛ gɛ tɛyɛyɛkɛŋa ba, bu va ma ɔshã gbɛgbanɔ nɛesi.

Kpaya Yɛ Yialɛ

²⁶ Ɛnɔ petee Kpaya ye yialɛ nɔ nu ɔganɔ tɛyɛyɛkɛŋa nɛ Kristo Yesu abha,

²⁷ alasɛ wɔnɔ petee gɛ ba kpɛ buni kɔ nɛ Kristo mɛ wɔnɔ nahwɛ nɔ nyumu Kristo.

²⁸ Yuɖanɛ ɔdɔgɔsɛ Grikianɛ avama, anɔdzidzi ɔdɔgɔsɛ agɛ alɛ ɛshuahwɛ avama, anyɛ ɔdɔgɔsɛ adzyɛ avama, alasɛ wɔnɔ petee nɔ nu anɔ terikpo nɛ Kristo Yesu mɛ.

²⁹ Onugɛ onu Kristo ayɛ, kɛlalɛ onu Abraham eshui, nɛ bagɛ ba baŋa yɛ ɔzakɔ nɛ kɛ tɛtrɔlu nɛ shu.