Galatianɛ 1 - ONUGBÙ NYƐNYÃ VUVƆ

¹ Mɛ Paulo anɔkpɛkpɛ, ganɛ denɔ banɔ kɔ ɔdɔgɔsɛ anɔ ɔkɔ, pɔ Yesu Kristo anɛ Aka Kpaya, gɛ anyɛmɛ yɛ denɔ betsitsi nɛ shi—

² anɛ badzya nɛ petee aplɛnɔ mɛ, Kɔ basɔlɛɔha nɛ Galatia:

³ Ɛyamyuyɔ nɛ ishuyuyɔ kɔ nɔ denɔ Kpaya bulɔ Aka anɛ Apalete Yesu Kristo kɔ,

⁴ agɛ ayɛkɔ yɛnahwɛshu akɔ kɔ bulɔ ebuizizi tɔkpu sɛ tɛ ebu lɔ denɔ ɔtsɔ̃nɛ kanɔ zizia nɛ mɛ, anɛ́ bulɔ Kpaya anɛ̀ Aka nɛ́ tɛpɛpɛɛ nu,

⁵ yɛ kabhakpɛkpɛ lɛ denɔ ɔtsɔ̃ nɛ ɔyɛkɔ ɔvɛnɔ. Tɛkɛbɛlɛmɛ.

Ganɛ Kibui Dzyɔgo Bhlatɔ

⁶ Kɛbhɛtɛ mɛ bi sɛ ɔtsɔ̃tsiɔ̃ nɔ tɛ shɛ̃nahwɛ agɛ ye klu nɔ nɛ́ Kristo ɛyamyuyɔ nɛabha klɛ nɔ tsyina tɔ kibui dzyɔgo bhlatɔ—

⁷ gɛ kɛgbɛagba kɛdɛ nu kibui dzyɔgo nɛ ɔkɔnyɔkɔ. Kibuinɛ nu banɔ teli balɛ tii nɔ akpɛ tɛfufutsu mɛ klɛ ba wlãnkɛ sɛ tɛ betsyina Kristo kibui dzyɔgo.

⁸ Pɔ edzi bulɔ tsyɛ ɔdɔgɔsɛ kpayaxwɛdɛ ede owũsise aɖɔ kibui dzyɔgo bhlatɔ dɛ kɛgɛ bu ɖɔ tsre nɔ, kɔ le bu yɛ kɛpɔ mabeke mabeke!

⁹ Anasɛ gɛ bu tɛ ɖɔ, kɛlɛso ɔtsɔnɛ ɛkaɖɔ: Onugɛ anɔ teli aɖɔ kibui dzyɔgo bhlatɔ ɔdɛ kɛgɛ nɔ yɛkɛ, kɔ le bui yɛ pɔ mabeke mabekemɛ!

¹⁰ Ɔtsɔ̃nɛ ɛwlãnkɛ sɛ ɛmɔ ahwɛ tɛtrɔ denɔ banɔ kɔ pɛnɔ Kpaya kɔ? Pɛnɔ ɛwlãkɛ sɛ tɛ ɛku banɔ awɔ̃? Onugɛ ɛka wlãnkɛ sɛ tɛ ɛku banɔ awɔ̃, ɛtɛba dzi Kristo axwɛwa.

Kpaya Eklu Paolo

¹¹ Badzya, ɛpɛɛ sɛ no ti sɛ, kibui dzyɔgo nɛ shu gɛ ɛɖɔaɖɔ denɔ ganɛ kɛdɔ gɛ anɔ abhɛtɛ.

¹² Ɛdɛyɛkɛ lɛ denɔ anɔnyanɔ kɔ, ɔdɔgɔsɛ bakasɛ mɛ lɛ, pɔ nɛɛ, ɛyɛkɛ lɛ ganɔ Yesu Kristo kibui bubukasɛ nɛ mɛ.

¹³ Alasɛ nɔ tɛ nu mɛ ɛkpã gɛ lɛ ɛza mahwɛ bafla nɛ dɔ nɛ́ Yuɖasɔlɛ nɛ mɛ, kana gɛ ɛkpatɔnɔ Kpaya busɔlɛɔha gɛganɛ klɛ ɛwlãkɛ sɛ tɛ ɛzi ɔlɛ.

¹⁴ Ɛvɛ otugba nɛ Yuɖasɔlɛ dɛ Yuɖanɛ gelee gɛ bulɔ nɛ balɛ lɛ agɔ terikpo mɛ klɛ ɛza kemi gɛganɛ nɛ makalɛ begu nɛabha.

¹⁵ Pɔ kibe lɛ gɛ Kpaya, agɛ ebu mɛ ɔtɔ elu denɔ mɛ tɛmumɔ mɛ klɛ eklu mɛ ganɔ yɛ ɛyamyuyɔ mɛ, ki ku yɛ awɔ̃

¹⁶ sɛ tɛ ebu yɛ Eyianyɛ nɛ akasɛ nɛ̀ mɛmɛ sɛ tɛ ɛba ɖɔ yɛ bui nɛ bagɛ be dinu Yuɖanɛ shi, ɛdɛ da bisi anɔnyanɔ nu,

¹⁷ ɔdɔgɔsɛ ɛwu vɛ Yerusalɛm sɛ tɛ ɛda mɔ bagɛ bedzi banɔkpɛkpɛ flogo pɛ ɛba dzi, pɔ ɛda tsoku Arebia kitsoku tili klɛ kɛlɛ de mɛ pɛ itsodzi vɛ Damaskosɛ.

¹⁸ Kɛlɛ nɛ agɔ tata ede, ɛwu vɛ Yerusalɛm sɛ tɛ bulɔ nɛ Petro da ti aglɔ klɛ ɛza yɛ ɔbha ewui lɔfɔnɛteti.

¹⁹ Ɛdɛ nu banɔkpɛkpɛ bhlatɔ nɛ ɔmayɛ kanyaka—Yakobo ko, Apalete nɛ yadzya.

²⁰ Ɛtrɔɛ kɛklãgbu nɛ lɛabha ba nɛ Kpaya amɛ sɛ kibui nɛ gɛ ɛŋlɔmɛ kɔ nɔ kɛdɛ nu otro.

²¹ Kɛlɛede ɛvɛ Siria anɛ̀ Silisia.

²² Mɛ nahwɛ ɛdɛdzi anɔtiti kɔ busɔlɛha nɛ Yuɖea gɛ ba lɛ Kristo mɛ.

²³ Be nu bunubhubhui ko: “Anɔ nɛ gɛ akpatɔnɔ lɔ tsyã yɛ ɔtsɔ̃nɛ yɛ aɖɔ tɛyɛyɛkɛŋa nɛ bui gɛ atɛ bhɛtɛ edi sɛ tɛ ezidɔ.”

²⁴ Klɛ bakpɛ Kpaya nɛabha alasɛ mɛ so.