Filipianɛ 3 - ONUGBÙ NYƐNYÃ VUVƆ

Idzyigɛganɛ Ama Ishuidzya Mɛ

¹ Gɔgɔɛ nɛɛ, madzyalɛ mɔ, nɔ mɔ same nɛ Apalete nɛ mɛ! Ganɛ butɔ lɛ nu kɔ mɛ sɛ tɛ ɛfla ŋlɔmɛ kɛdɔɛ lɛlɛ nɛ ke kɔ nɔ, alasɛ kɛ nu ishupupo kɔ nɔ.

² Nɔ dimɔ nɛ bukudzɔgɛ lɛlɛ nɛ shu, banɔ alɛlɛ gɛ ba bhɛtɛ ebui kpã, bagɛ baa vɔ ishuidzya.

³ Alasɛ bulɔ nu bunyɛnyɛ bhubhui, bulɔ gɛ nu bunyɛnyɛ bhubhui, bulɔ bagɛ kpɛtɔkpuesi kɔ Kpaya Ɔfufɔɛ, gɛ bu kpasɛ Kristo Yesu ishubhubhui nɛ mɛ, klɛ bulɔ idzyigɛganɛ ama ishuidzya nɛ mɛ—

⁴ kɛnya lɛ kɛlɛ mɛ sɛ mɛnahwɛ kɛgɛ kɛlɛ so pɛ ɛyɛkɛŋa nɛ lɛ. Onugɛ anɔteli tsyɛ ayɛkɔ asɛ ebui alɛ yɛahwɛ so aba yɛkɔ idzyigɛganɛ akpɛ ishuidzya nɛ mɛ, ebui aka lɛ mahwɛ adɛa na:

⁵ bebhui bunyɛnyɛ nɛ kiwui suɔɛmɛ nɛabha, nɛ Izraɛl banɔ nɛ mɛ, enu Bendzyamɛnɛ, Hebriueyi nahwɛ nahwɛ, nɛ ɔshã nɛ nu, enu Farisieyi,

⁶ nɛ kemi kpɛkpɛ mɛ, kititilulɔ nɛ busɔlɛɔha nɛ shu; nɛ tɛnɛna nɛ ɔshã nɛ nu, kizizi ma.

⁷ Pɔ kɛkanyaka gɛ dzi mɛ tɛmumɔtrɔ nɛɛ ɛyɛkɔɛ lɛ ɔtsɔ̃ nɛ sɛ ɛdɛmɔ kɛdɔnyɛdɔ akpɛ Kristo so.

⁸ Kɛ gɛ kɛ kalɛ dɛana, ɛyɛkɔɛ lɛ sɛ kɛdɔnyɛdɔ lɛla ɔyɛkɔsɔnɔ bugbɛgbla nɛ gɛ flɛdzo nɛ makagbla Kristo Yesu gɛ yɛ so pɛ ɛlɛla kɛdɔnyɛdɔ. Idi lɛ sɛ kinu kibo, sɛ tɛ ɛmɔ Kristo

⁹ klɛ tɛ ba mɔ mɛ nɛ yɛmɛ, tɛzɛzam dzyɔgo dɛ nu mɛyɛ gɛ kide ɔshã nɛ mɛ, pɔ kide Kristo tɛyɛkɛŋa nɛa bha nɛm— tɛzɛzam dzyɔgo nɛ gɛ de Kpaya ɔkɔ gɛ kɛlɛ nu kɛdzyɔgo denɔ Kpaya kɔ klɛ kide tɛyɛyɛkɛŋa nɛ ɔkɔ.

¹⁰ Ɛpɛɛ sɛ tɛ iti Kristo anɛ̀ yɛ tɛnyɛnyɛmɛ kemi anɛ ketsukpɛkpɛ nɛ yɛ butɔ nɛm tɛmɛma, idzi ansɛ yɛ nɛ butsi mɛ, anɛ terikpo bhɛbhɛtɛ anɛ yɛ butɔ yɛyɛkɛ, kɛbadzi anasɛ yɛ anɛ́ yɛ butsi mɛ,

¹¹ klɛ so, kɛlɛmɛ sɛ, tɛ ɛbamɔ tɛnyɛnyɛmɛ denɔ bekpui mɛ.

Tɛkpɛkpatɔnɔ Kabhaŋɛŋa

¹² Gnɛ sɛ ɛtɛ mɔ kɛdɔɛnɛ petee, ɔdɔgɔsɛ ba tɛ bhɛtɛ mɛ mɔmɔ, pɔ itsri liabha fɔɔ̃ sɛ tɛ ɛnyɛna lɛ vunɔ kɔ kana gɛ Kristo Yesu anyɛna mɛ evunɔ.

¹³ Madzyalɛ, mɛnahwɛ ɛdɛ yɛkɔɛlɛ sɛ ɛtɛ ŋa kɛlɛabha. Pɔ kɛdɔ tirikpo gɛ ɛbhɛtɛ: Ɛdzɛkɛ kɛgɛ lɛ mɛede klɛ kɛgɛ lɛ mɛ otugba nɛ ko mɛ kɛka,

¹⁴ Ɛwlãkɛ vɛnɔ sɛ tɛ ɛŋɛabha sɛ tɛ ɛyɛkɛ kabhaŋɛŋa kɛdɔ gɛ Kpaya eklu mɛ aganɔ owũsise mɛ nɛ Kristo Yesu mɛ.

¹⁵ Bulɔ petee gɛ bushe nɛ ɔfufɔɛ mɛ nɔ yɛkɔ kɛtɔkpui nɛ mɛ di tirikpo. Klɛ onugɛ nɛ kibui tili shu nɔ mɔ ɔtɔgɛga, kɛlɛlɛ nɛ tsyɛ Kpaya aba danɛ lɛmɛ kɔ nɔ.

¹⁶ Nɔ kɔ lɔ za liabha ko kɔ kɛgɛ bu tɛ za tsã.

¹⁷ Madzyalɛ, nɔ plɛnɔ bagugɔɛ tɛ nɔ za mɛ ebui bhɛbhɛtɛkasɛ nɛede, nɔ kpɛ susu ba gɛ balɛ nɛ kpã anasɛ tɛzɛza nɛ gɛ bu kɔ nɔ.

¹⁸ Alasɛ, anasɛ gɛ ɛganɔ tsre nɔ bafla klɛ ɔtsɔ̃ nɛɛ ɛkaa tsre nɔ nɛ ɛwɔ̃mɛ sɛ, be gelee ba lɛ anasɛ balɔ kititi nɛ Kristo butsiosi nɛ shu.

¹⁹ Balɛ tɛyɛyɛkɛ mɛna nu kɛdɔzizi, balɛ kpaya ye nu balɛ evu, klɛ balɛ ishubhubhui nɛ nu kɛwɔɛ̃. Balɛ atɔkpu nɛm alɛ kesukpɛa bha dɔ nɛ shu.

²⁰ Pɔ bulɔ kepi ka lɛ owũsise. Klɛ bu po gɛganɛ Ayɛyɛkɛkɔ kɔlɔ denɔ ɔkɛlɛ, Apalete Yesu Kristo,

²¹ agɛ ganɔ yɛ kemi nɛabha klɛ aba gbanɔ kɛdɔnyɛdɔ aba kpɛ yɛ kabhaŋɛŋa kesi, gɛ kɛba tsyina bulɔ shuidzya gblɔdzɔ sɛ tɛ lɛ ba za ansɛ yɛ ishuidzya gɛ ɛlɛ ishubhubhui mɛ.