Filipianɛ 1 - ONUGBÙ NYƐNYÃ VUVƆ

¹ Mɛ Paolo anɛ Timotio, Kristo Yesu baxwɛwa. Kɔ Kpayabanɔ nɛ petee gɛ balɛ Kristo Yesu mɛ nɛ́ Filipi, ɔyɛkɔ plɛnɔ bagɛ be di axwɛ nɛa bha anɛ baxwɛwa:

² Ɛyamɛyuyɔ anɛ ishuyuyɔ nɛ kɔ nɔ dɛnɔ Kpaya bulɔ Aka anɛ Apalete Yesu Kristo ɔkɔ.

Ahwɛhuhu Anɛ Kpayakuklu

³ Ɛhu mɛ Kpaya ahwɛ kibenyɛbe gɛ ɛbaka wɔnɔɛ bui.

⁴ Nɛ mɛ kpayakuklu kanyaka kɔ wɔnɔ petee mɛ, ikulu yɛ kibenyɛbe nɛ same

⁵ alasɛ nɛ wɔnɔ terikpo bhɛbhɛtɛ anɛ kibui dzyɔgo denɔ kiwui tɛtɔpu ɔbɔ nanɔ ɔtsɔ̃,

⁶ idzyigɛganɛ alɛ mɛ ahwɛ sɛ, agɛ yakpɛ kɛxwɛ dzyɔgoe nɛesi nɛ wɔnɔ mɛ aba vɛ kɛlɛa bha ɔdɔtɔnɔ kɛlɛ obekekɔ nɛ Kristo Yesu kiwi nɛabha.

⁷ Kɛ na kɔ mɛ sɛ tɛ ɛmɔɛlɛ ana nɛ wɔnɔ petee shu, alasɛ nɔ kpasɛ mɛ idzyim; alasɛ onugɛ bakpɛ mɛ buɖɛ ɔdɔgɔsɛ ɛwlãnkɛ klɛ mɛ trɔahwɛ nɛ kibui dzyɔgo nɛa bha, wɔnɔ petee nɔ bɔ mɔ Kpaya ɛyamyuyɔ nɛ́ mɛ.

⁸ Kpaya ya ba na ɖɔ kana gɛ ɛbaka nɔɛ bui nɛ Kristo Yesu tɛɖuɖɔ nɛ.

⁹ Klɛ kɛnɛ kɛlɛ nu mɛ kpayakuklu: sɛ wɔnɔ tɛɖuɖɔ nɛ yuku gbɛgba tsodzini gbɛgba anɛ́ kɛbuititi anɛ̀ ishumdzudzu vɛvɛ,

¹⁰ sɛ tɛ nɔ bɔ na kɛdzyɔgo nɛ ɔmɔobu gɛ kɛpɛ dɛ gɛ tɛtsitsrenɔ tɛ ba za ɔdɔtɔnɔ Kristo kiwi nɛa bha,

¹¹ gɛ ki yuku nɛ tɛzɛza dzyɔgo eyuyu gɛ aba ganɔ Yesu Kristo abha— kɔ ishubhubhui anɛ Kpaya kabhakpɛkpɛ.

Paulo Buɖɛm Zɛza Nɛ Kpɛ Kibuidzyɔgo Nɛ Otugba

¹² Ɔtsɔ̃ nɛɛ badzya mɔ, ɛpɛɛ sɛ tɛ no ti sɛ kibui nɛ gɛ ba mɛabha nɛ kpɛ kibui dzyɔgo nɛ otugba.

¹³ Nɛ kɛlɛ mɛ nɛɛ, kɛlɛ mɛ ba bhui ɔganɔ bukusiupa bepupo petee abha klɛ kɔ anɔnyanɔ gɛ alɛ sɛ tɛ bá kpɛ mɛ buɖɛ nɛ Kristo kɛtɔkpu.

¹⁴ Alasɛ mɛ buɖɛ gɛ ba kpɛ mɛ, badzya gelee anɛ Apalete nɛ mɛ ba kpɛ balɛemi sɛ tɛ baɖɔ Kpaya bui anɛ kemi kpɛkpɛdɛ anɛ̀ kifu masimasi.

¹⁵ Kɛ nu kibui gbɛagba sɛ beteli ba ɖɔ Kristo bui nɛ kabha wuwlãnkɛ nɛ̀ ebla pɛpɛɛ mɛ, pɔ babhlatɔ kide koeyi nɛ tɛpɛpɛɛ dzyɔgoe mɛ.

¹⁶ Ba gugɔɛ ba bhɛtɛ lɛ nɛ tɛdɛdɛmɛ mɛ, gɛ benyi sɛ be lu mɛ nɛ ɔkɛnɛ sɛ tɛ ɛwlãnkɛ kibui dzyɔgo nɛ tɔkpu.

¹⁷ Ba tutɔpu baɖɔ Kristo bui nɛ balɛ nahwɛshu bui pɛpɛɛ̃, anɛ kɛdzyɔgoe mɛ, pɔ ba pɛasɛ tɛ ba pɛɛ bui kɔ mɛ nɛ kibelɛlɛ gɛ ɛlɛ buɖɛ mɛ.

¹⁸ Pɔ kide lɛ bhɛtɛ? Kɛ gɛ lɛ gɛganɛ kɛlɛ nɛ kidzonyɛdzo abha, kɛba dzi sɛ, otro pɛnɔ kɛgbɛagba, baɖɔ Kristo bui. Klɛ kɛnɛ nɛ so ɛmɔ same. Eè, klɛ ɛbavɛ liabha zɛmɔ same,

¹⁹ alasɛ ɛnyi sɛ ganɔ wɔnɔ kpayakuklu abha nɛ Yesu Kristo Ɔfufɔɛ tɛpɛplɛnɔ, kibui nɛ gɛ ba mɛabha nɛɛ kɛ ba tsyina dzi mɛ tɛbubu.

²⁰ Ɛpɛɛ gɛganɛ klɛ idi kidzoenu sɛ kɛwɔɛ̃ tɛ baku mɛ nɛ kidzonyɛdzo abha, pɔ ɛba za kitekpɛkpɛ abha gelee sɛ tɛ ɔtsɔ̃ nɛɛ anasɛ gɛ Kristo aba nyɛmɛ nɛ mɛ mɛ kibenyɛbe, onu sɛ ɛkpã mɛ ɔdɔgɔsɛ butsi mɛ tsyɛ.

²¹ Kɔ mɛ, tɛ ɛza nɛ kpã nɛ kɛlɛ nu Kristo klɛ tɛ itsi tsyɛ kinu kɛdzyɔgo.

²² Onugɛ ɛba za kɛlɛabha zanɛ kpã nɛ ishuidzya mɛ, kɛnɛ kɛ ba dzi kɛxwɛwɛwa eyuyu kɔ mɛ. Pɔ kiɖueɖu ɛba yɛkɔ? Iti nyi!

²³ Ɛwɔ kɛdɔ tɛbha nɛ shi: Ɛpɛɛ sɛ tɛ ɛshɛ klɛ tɛ ɛvɛ da za Kristo ɔbha, gɛ kɛlɛ lɛ nɛ pɛ̃ kɔ mɛ dɛ;

²⁴ pɔ kɛlɛ gɛganɛ kɔ nɔ dɛ sɛ ɛwɔ ishuidzya nɛ mɛ.

²⁵ Nɛ kɛlɛabha yɛyɛkɛŋa mɛ, inyi sɛ ɛba wɔ wɔnɔ bha, klɛ ɛba vɛ kɛ lɛabha nɛ wɔnɔ petee kɔ wɔnɔ otugbavɛvɛ anɛ̀ same anɛ́ tɛyɛyɛkɛŋa nɛ mɛ,

²⁶ sɛ tɛ ganɔ mɛ wɔnɔ bha zɛza bubhla nɛɛ wɔnɔ same nɛ́ Kristo Yesu mɛ nɛ ba yukugbɛgba akpɛ mɛ so.

²⁷ Kibuinyɛbui gɛ kɛ baa, nɔ nyɛna wɔnɔ shu nɛ Kristo kibui dzyɔgo nɛ tɛzɛzam. Kɛlɛede, kɛba dzi sɛ ɛba pɛ ɛba mɔ nɔ ɔdɔgɔsɛ ɛba nu wɔnɔɛ dɔ nɛ mɛede, eba ti sɛ nɔ lɛ gɛganɛ nɛ ɔfufɔɛ torikpo mɛ, ɔwlãnkɛ ansɛ anɔ terikpo kɔ kibui dzyɔgo nɛabha yɛyɛkɛŋa

²⁸ kifu masimasi maza kɛlɛ mɛ nɛ kidzonyɛdzo abha anɛ bagɛ ba lɔɛ titi nɛ wɔnɔ shu. Kɛ nɛ kɛlɛ nu kɛdɔmumɔ kɔ alɛ sɛ ba be zi alɛ, pɔ sɛ ba be bhui nɔ ayɛkɛ—klɛ Kpaya aba kɔ nɔ ŋa kabha.

²⁹ Alasɛ ba tɛ trɔ ahwɛ nɛ lɛabha kɔ nɔ nɛ Kristoe nyi mɛ ganɛ sɛ tɛ nɔ yɛkɛ yɛabhaŋa tite ko pɔ tɛ nɔ mɔ butɔ nɛ yɛ tɔkpu,

³⁰ kibe lɛlɛ gɛ nɔ kɔ vɛ tɛwũwlãnkɛ lɛlɛ nɛabha nɔ mɔ ɛza kɛlɛa bha klɛ ɔtsɔ̃nɛ nɔ zɔ nu sɛ ɛka tsiri lɛabha.