Efesoanɛ 5 - ONUGBÙ NYƐNYÃ VUVƆ

¹ Nɔ za anasɛ Kpaya, kɛlɛso gɛ adɛmɛ nɔɛ bui anasɛ yɛ yialɛ

² klɛ nɔ za nɛ kpã nɛ anɔɛbui dɛdɛmɛ mɛ, anasɛ gɛ Kristo adɛmɛ bulɔɛ bui klɛ ayɛkɔ ishu akɔ nɛ bulɔɛ tɔkpu anasɛ kɛdɔ lɛlɔ̃ huhu gɛ ayɛkɔ etsye Kpaya.

³ Pɔ nɛ wɔnɔmɛ nɔ tɛ kɔ lɛ nu aglɔbui bhɛbhɛtɛ kuratsyɛ nɛ wɔnɔ shu, ɔdɔgɔsɛ ɛkpãzizi dinyɛdi, ɔdɔgɔsɛ kɛdɔ gbɛgbla pɛpɛɛ, alasɛ anɛ le nu kɛdɔ kpã kɔ Kpaya yɛ shubhubhui banɔ.

⁴ Pɛnɔ obushuolu kɔ, agã ebui ɖɛɖɔ, pɛnɔ ɔyɔzizi gɛ la tɛ ba mɔ ɔzakɔ, pɔ nɔ za ahwɛhuhu abha.

⁵ Alasɛ nɛ kibui nɛ shu nɔ bɔ yɛkɛŋa sɛ: Ebui manamana, ebui mabhuimabhui, kɛdɔ gbɛgbla pɛpɛɛ anɔ— anɔa nɛdi enu obudi elete—atɛ ba mɔ ɔŋakɔ nɛ Kristo anɛ Kpaya bukusi ɔŋa kɔ.

⁶ Nɔ tɛ kɔ anɔnyanɔ awɔɛ nɔ nɛ ebui gɛ lama kibuinyɛbui mɛ, alasɛ kɛlɛso ebuia nɛdi shu Kpaya oblo ɔba nɛ bagɛ ba ta tatɔ nɛ abha.

⁷ Kɛlɛso nɔ tɔ kpɛ ɔha nɛ alɛ.

⁸ Alasɛ kibe tili nɔ tɛ dzi otumu, pɔ ɔtsɔnɛ nɔ tã anasɛ kifu nɛ Apalete nɛ mɛ. Nɔ za anasɛ kifu mɛ beyi

⁹ (alasɛ eyuyu yɛ kifu kɛnu kɛdzyɔgo bhɛbhɛtɛ, ɛkpãdzyɔgo zɛza anɛ̀ kɛgbɛagba)

¹⁰ klɛ nɔ pɛɛ kɛdɔnɔ gɛ kɛ ku Apalete nɛ awɔ̃.

¹¹ Nɔ tɛ bhɛtɛ kɛdɔnyɛdɔ nɛ̀ otumu mɛ mayumayu ebui bhɛbhɛtɛ, pɔ nɔ bu alɛ ɔdzyɛra.

¹² Alasɛ kɛ nu kɛwɔɛ̃ tsyɛ sɛ tɛ baɖɔaɖɔ denɔ kɛgɛ batɔmata elete ba bhɛtɛ nɛ tɛkpukpuimɛ.

¹³ Pɔ kɛdɔnyɛdɔ gɛ kifu tsri lɛabha kɛ ba wɔɛ̃,

¹⁴ alasɛ kifu kɛlɛ kɔ kɛdɔnyɛdɔ kɛ wɔɛ̃. Kana so gɛ kɛ ɖɔ sɛ: “Nyɛmɛ, O anɔ gɛ adɔ tra, lɔ koeyi nɛ betsitsi nɛ shi, klɛ Kristo aba tã atrɔ wɔa bha.”

¹⁵ Di wɔshu abha mɔmɔ, ɔkɛlɛ, kana gɛ ɔlɛ nɛ ɛkpã—ganɛ ansɛ agɛ etetii pɔ anasɛ agɛ etii,

¹⁶ wa kidzo didi kanyaka xwɛ, alasɛ ewui alɛlɛ enu ezizi.

¹⁷ Kɛlɛso nɔ tɔ dɔ gã, pɔ nɔ nu kibui nɛesi gɛ Apalete tɛpɛpɛɛ nɛ lɛ.

¹⁸ Nɔ tɔ wɔɛ̃ bulu tɛ nɔ buku, gɛ bu gbanɔ anɔ vɛnɔ ebuizizi bhɛbhɛtɛ mɛ. Kɛlɛɔzakɔ, kɔ Ɔfufɔɛ oyuku wɔ shu mɛ.

¹⁹ Ɖɔaɖɔ kɔ ɔhaglɔ nɛ ɛdzɛ, busɔlɛ ɛdzɛ anɛ ɔfufɔɛmɛ ɛdzɛ. Nɔ zha ɛdzɛ klɛ tɛ nɔ wɔ denɔ wɔnɔ idzyim kɔ Apalete,

²⁰ kibenyɛbe zo hu Kpaya Aka nahwɛ kɔ kɛkanyaka, anɛ bulɔ Apalete Yesu Kristo yɛ nyi mɛ.

²¹ Zhinɔ shu kɔ ɔhaglɔ nɛ Kristo yɛ nyi kpɛkpɛ abha so.

Banyɛdzini Anɛ Badzɛenyine

²² Badzɛ, nɔ zhinɔ shu kɔ wɔnɔ nyine alɛ anasɛ gɛ nɔ zhinɔ shu kɔ Apalete.

²³ Alasɛ adzɛenyine yɛ nu kɛtɔkpu kɔ yɛedzini anasɛ gɛ Kristo enu kɛtɔkpu kɔ busɔlɛɔha, yɛ ishuidzya, gɛ enu Ebhubhuiayɛkɛ.

²⁴ Ɔtsɔnɛ anasɛ gɛ busɔlɛɔha nɛ zhinɔ shu kɔ Kristo, kanake banyɛdzini be bezhinɔ shu kɔ balɛ nyine alɛ nɛ kɛdɔnyɛdɔ mɛ.

²⁵ Badzɛenyine, nɔ dɛmɛ wɔnɔedzini alɛ bui, anasɛ gɛ Kristo adɛmɛ busɔlɛha nɛ bui klɛ ayɛkɔ yɛnahwɛ shu akɔ nɛ ɛlɛ tɔkpu

²⁶ tɛ akɔ ɛlɛshu bhui, eplu ɛlɛshu nɛ buni tɛwuwlu ɔganɔ kibui nɛabha,

²⁷ klɛ tɛ ayɛkɔ yɛ akɔ yɛnahwɛ anasɛ busɔlɛɔha gɛ ɔpudi, gɛ kibo ɔdɔgɔsɛ tɛlɛlayɛ ɔdɔgɔsɛ kɛpɔ bubu kɔ anɔ bhlatɔ kanyaka shu, pɔ ishubhui anɛ kɛpɔ maŋa maŋa.

²⁸ Nɛ kidzo lɛlɛ nɛabha, badzɛenyine alasɛ tɛ ba dɛmɛ balɛ dzini alɛ bui anasɛ balɛnahwɛ shuidzya. Anɔ nɛ gɛ adɛmɛ yɛedzini bui adɛmɛ yɛnahwɛ shui bui.

²⁹ Alɛ petee de, anɔnyanɔ etigu yɛnahwɛ shu, pɔ aŋɛdɔ klɛ ewũse shu, anasɛ gɛ Kristo abhɛtɛ kɔ busɔlɛha—

³⁰ alasɛ bunu banɔ terikpo nɛ yɛ shuidzya mɛ.

³¹ “Alasɛ nɛ kibui nɛ shu so anyɛ aba shɛ alɔ yɛaka anɛ yɛeni ada bhɛtɛ terikpo nɛ yɛedzini, klɛ balɛ tɛabha nɛ be dzi ishuidzya tirikpo.”

³² Kɛnɛ kinu kibui kpukpu dzudzu—pɔ ɛɖɔaɖɔ denɔ Kristo anɛ busɔlɛɔha nɛ shu.

³³ Nɛ kɛlɛmɛ, wɔnɔ anɔnyanɔ tsyɛ alasɛ tɛ adɛmɛ yɛedzini bui anasɛ gɛ adɛmɛ yɛnahwɛ shui bui, klɛ alasɛ yedzini ezhinɔ shu kɔ ye nyine.