Efesoanɛ 4 - ONUGBÙ NYƐNYÃ VUVƆ

Terikpo Bhɛbhɛtɛ Nɛ Kristo Shuidzya

¹ Anasɛ evuza kɔ Apalete, ɔkɛlɛ, ɛpɛɛ denɔ wɔnɔ kɔ sɛ tɛ nɔ za nɛ ɛkpã gɛ sɔnɔ tɛkuklu nɛ gɛ nɔ tɛ yɛkɛ.

² No vu ishu tɛ nɔ dɔfɔ̃ɔ petee, nɔ dzi banɔ yɛyɔ, nɔ bhɛtɛ terikpo nɛ ɔhaglɔ tɛdɛdɛmɛ nɔ mɛ.

³ Ga kidzonyɛdzo abha tɛ ɔbhɛtɛ terikpo nɛ̀ Ɔfufɔɛ ɔganɛ ishuyuyɔ nyɛnya mɛ.

⁴ Ishuidzya tirikpo anɛ Ɔfufɔɛ torikpo—anasɛ gɛ beklu nɔ kɔ kidzoenudidi tirikpo gɛ be klu nɔ—

⁵ Apalete terikpo, tɛyɛyɛkɛŋa tirikpo, bunikpɛkpɛ turukpo,

⁶ Kpaya terikpo, nɛ Aka kɔ lɔ petee, gɛ enu kɛtɔkpu kɔ lɔ petee klɛ ganɔ bulɔ petee abha nɛ kɛlɛ petee mɛ.

⁷ Pɔ kɔ bulɔ anɔnyanɔ ɛyamyuyɔ gɛ bakɔ anasɛ gɛ Kristo akɔɛ lɛ.

⁸ Kɛlɛso gɛ kɛ ɖɔ sɛ: “Gɛ ɛwu avɛ kabha, agbanɔ bagɛ bevu akpɛ buvu aplɛnɔ shu klɛ akɔ banɔ kɛdɔkukɔ.”

⁹ (Kide “yɛ avɛ kabha” nɛ kasɛ edinu sɛ yɛ tsyɛ ezhi aba kesi tsyɛ, gɛ nu kesukpaɛ abha?

¹⁰ Yɛ gɛ ezhi ba yɛ enu agɛ ewu avɛ kabha dɛ owũsise petee, sɛ tɛ atsya kanɔ nɛ ɔkɔnyɔkɔ.)

¹¹ Yɛ nu agɛ akɔ be teli sɛ be dzi banɔkpɛkpɛ, be teli be dzi batɔnu, be teli bedzi bagɛ ba ɖɔ kibui dzyɔgo, klɛ be teli be dzi kpayaɔzakɔanɔ, anɛ badɔkasɛ,

¹² tɛ ewũse Kpaya banɔ kɔ kɛxwɔɛ gɛ ba bawa, so tɛ ba bhɔ trɔ Kristo Ishuidzya ebui nɛabha

¹³ ɔdɔtɔnɔ kibelɛ gɛ bulɔ petee ba bhɛtɛ terikpo nɛ tɛyɛyɛkɛŋa anɛ Kpaya ye Yianyɛ tɛtiti klɛ tɛ bu ba she, pɛ bu ba mɔ Kristo mɛ zɛza kedzyidzyi nɛna.

¹⁴ Kɛlɛ bu tɛa dzi banɛvɔ, gɛ kɛlɛɛ ba wanya vɛnɔ kede anɛ otugba klɛ kɛdɔkɛkasɛ kɛlɛɛ ba fu lɔ vɛnɔ ɔkɛ̃ anɛ mɛna ɔkɛ̃ ganɔ banɔ anɔwuwɔɛ anɛ bushɛ edzo bhɛbhɛtɛ mɛ.

¹⁵ Kɛlɛmazɛlɛ mɛ, kɛgbɛagba tɛɖɔɖɔ anɛ tɛdɛdɛmɛnɔm, bulɔ nɛ kɛbuinyɛbui mɛ bu ba she nɛ yɛ mɛ gɛ enu Kɛtɔkpu, yɛ nu Kristo.

¹⁶ Denɔ yɛ mɛ ishuidzya petee, xogo klɛ lɛ nyana aglɔ nɛ tɛzɛ, klɛ lɛ bhɔ ishu trɔ nɛ tɛdɛdɛmɛ mɛ, anasɛ gɛ kapɛ nyɛapɛ wa yɛ shu axwɛ.

Ɛkpãzɛza Anasɛ Amɛbhubhui Mɛ Banuvɔ

¹⁷ So itsre nɔ kibui nɛ, klɛ ɛkatrɔ kɛlɛabha sɛ nɛ Apalete nɛ mɛ, sɛ nɔ tɔ za nɛkpã anasɛ bagɛ bɛdinu Yuɖanɛ na za, nɛ balɛ kibuiesi manumanu.

¹⁸ Balɛ kibuiesi nunu dɔ otumu klɛ be bu ɔtɔ denɔ Kpaya tɛzɛza shu alasɛ kibui matimati nɛ gɛ kɛlɛ balɛ mɛ gɛ kide balɛ idzyi gɛganɛ shu.

¹⁹ Gɛ balɛla balɛ kɛwɔɛ̃ bui titi beke, bakɔ balɛ nahwɛ ebuikpã bhɛbhɛtɛ, so sɛ tɛ babhɛtɛ kizizinyɛzizi, nɛ kɛlɛabha betsri gɛ be zi atrɔ.

²⁰ Wɔnɔ, nɛ kɛnɛ nɛ mɛ, nɔ dɛ ba bo ti Kristo nɛ kidzoe nɛɛ di aba.

²¹ Kɛgbɛagba nɔ nu yɛ bui klɛ bakasɛ nɔ kibui gbɛagba nɛ gɛ kɛlɛ Yesu mɛ.

²² Bakasɛ ɛkpã kuku gɛ nɔ za bafla tɛ nɔshɛnahwɛ ɛkuku nɛ shu, gɛ butsutsɔmɔ wɔɛ nɔ kpɛ buzizi mɛ,

²³ tɛ ba bhɛtɛ alɛ avuvɔnɛ nɛ wɔnɔ atɔkpui mɛ ebui bhɛbhɛtɛ,

²⁴ klɛ tɛ nɔ kpɛ ɛkpã vuvɔ, gɛ ba bhɛtɛ tɛ kiyi Kpaya nɛ kɛgbɛagba anɛ ɛkpãdzyɔgo zɛza anɛ ishubhubhui.

²⁵ Kɛlɛso anɔnyanɔ alasɛ tɛ nɔ yulɔ ɛkpã zizi nɛ di za klɛ tɛ nɔ ɖɔ ebui gbɛagba etsre yɛ ɔhaglɔ, alasɛ bulɔ petee bunu banɔɛza tirikpo.

²⁶ “Nɛ wɔnɔ oblo mumɔ mɛ nɔ tɛ bhɛtɛ kizizi”: Nɔ tɛ mɔ oblo ɔdɔtɔnɔ kiwui dudɔ mɛ,

²⁷ klɛ tɛ kɔ ɔfufɔɛkpã lɔ ŋa nɔabha tɛ lɔ feke nɔ di.

²⁸ Anɔ nɛ gɛ ezuru ete zuru, pɔ awa kɛxwɛ, ayɛkɔ yɛ ɛhwɛ aza bhɛtɛ kɛdɔ dzyɔgo tili nɔ, tɛ amɔ kɛdɔ tili tɛ aba ya kɔ anɔ nɛ gɛ apɛɛ dɔ.

²⁹ Nɔ tɛ kɔ kaɖɔ tsutsɔmɔ kanyaka ke koeyi nɛ wɔnɔ inugbu mɛ, pɔ ka gɛ ko ka ba plɛnɔ tɛbhubhɔ trɔ kɔ bagugɔɛ kɔ balɛ dɔ pɛpɛɛ, tɛ kɛ ba pɛ̃ kɔ ba gɛ ba tatɔ.

³⁰ Nɔtɛ bhɛtɛ kɛdɔ gɛ kɛba puɛ Kpaya Ɔfufɔɛ dzyɔgo, ɔlɛ laba kɔ kpɛ nɔ susu nɛ kiwui nɛabha gɛ ba bebhui nɔ yɛkɛ.

³¹ No bu ishu mɛ pupɔɛ petee, budugudugu anɛ oblo, kadapɛkpɛ anɛ anɔ shu zizi, ɔyɛkɔ plɛnɔ buzizi nyɛzizi.

³² Kɔ wɔnɔ ɛyɛmɛ yɔ nɛ eshutukubui didi kɔ ɔhaglɔ, yɛkɔ wɔhaglɔ ebui otsye, anasɛ nɛ Kristoɛ mɛ Kpaya ayɛkɔ tsye nɔ.