Efesoanɛ 3 - ONUGBÙ NYƐNYÃ VUVƆ

Paolo Ebuiɖɔ Kɔ Bagɛ Bedinu Yuɖanɛ

¹ Kibui nɛ so Mɛ, Paulo, anɔ gɛ bakpɛ buvu nɛ Kristo Yesu kɛtɔkpu kɔ wɔnɔa gɛ no di nu Yuɖanɛ.

² Kɛlɛlɛmɛ sɛ nɔ tɛ nu ebui bhɛbhɛtɛ denɔ Kpaya ɛyamyuyɔ gɛ akɔ mɛ kɔ nɔ,

³ kɛlɛ nu, kibui kpukpu gɛ akɔ mɛ tii ganɔ tɛbubukasɛ, anasɛ gɛ ɛtɛ ŋlɔmɛ kplita kɔ nɔ.

⁴ Nɛ kɛnɛ tɛkɛkla, kɛlɛ, nɔ bɔ na mɛ bui nɛesi nu denɔ Kristo kibuikpukpu nɛ shu,

⁵ gɛ ba dɛ kɔ banɔ nɛ tii nɛ tɛmumɔ bhlatɔɛ anasɛ ɔtsɔnɛ gɛ be bukasɛ aganɔ Kpaya bakpɛkpɛ shubhubhui nɛ batɔnu nɛabha.

⁶ Kibui kpukpuinɛ kɛlɛ nu sɛ ganɔ kibui dzyɔgoe nɛ mɛ ba gɛ be di nu Yuɖanɛ tsyɛ ba baŋa kidedɔ nɛ̀ Izraɛlanɛ, ɔhamanɛ xuxogo tirikpo, klɛ bɛ xogonɛ ishuidzya nɛ mɛ ayɛkɛ kɛ gɛ aɖɔlu nɛ Kristo Yesu mɛ.

⁷ Ɛba dzi axwɛdɛ kɔ kibui dzyɔgoe gɛ bakɔ ganɔ Kpaya ɛyamyuyɔ gɛ akɔ mɛ ɔganɔ yɛ bupu kɛxwɛwɛwae mɛ.

⁸ Kɛlɛ anasɛ enu ebhliyi dɛ Kpaya banɔ bhliyi, yɛ kɛdɔ kuku ba kɔ mɛ: sɛ tɛ ɛɖɔ kibui dzyɔgo nɛ kɔ bagɛ bedinu Yuɖanɛ Kristo kedziŋɛŋa gɛ ɔtɛ bɔ pɛɛɔ mɔ,

⁹ klɛ tɛ akɔ anianɔ amɔ wee kibui kpukpuɛnɛ bhɛbhɛtɛ, kɔ kibe gɛ kɛ bafla gɛ bekpu nɛ Kpaya mɛ, agɛ abhɛtɛ kɛdɔ nɛ petee.

¹⁰ Yɛ tɛpɛpɛɛ kɛlɛ dzi sɛ ɔtsɔnɛ, ganɔ busɔlɛha nɛabha, be bu Kpaya kibuinyinyi gelee ba kɔalɛ tii kɔ bagɛ baŋakabha anɛ kemielete nɛ́ owũsise kanɔ mɛ,

¹¹ nɛ yɛ tɛtɛtrɔ mabeke gɛ abhɛtɛ elu kibe lɛlɛ gɛ ke lɛ Kristo Yesu bulɔ Apalete nɛ mɛ.

¹² Nɛ yɛ mɛ klɛ ɔganɔ tɛyɛyɛkɛŋa nɛ yɛabha bɔ bana Kpaya tsobunɔ nɛ́ ishuahwɛzɛza anɛ kabhaŋɛŋa.

¹³ Kɛlɛso, ibisi denɔ wɔnɔ kɔ sɛ, nɔ tɛkɔ idzyi ekoeyi nɛ wɔnɔɛ kite mɛ alasɛ butɔ nɛ gɛ ɛtɔ nɛ wɔnɔɛ tɔkpu, kɛ nu wɔnɔ tɛkpɛkpɛ nɛabha.

Kpaya Kuklu Kɔ Efesɛanɛ

¹⁴ Kibuinɛ so ɛkpla ekuisiesi nɛ Aka nɛ amɛ,

¹⁵ denɔ agɛ yɛ kɔ yɛ bupa petee nɛ owũsise anɛ kesukpa gɛ bebu yɛ kɛnyi nɛ denɔ.

¹⁶ Iklukpaya sɛ nɛ yɛ kedziŋɛŋa ishubhubhui nɛ mɛ akɔ wɔ bugɛganɛ plɛnɔ kemi ganɔ yɛ ɔfufɔɛ nɛ mɛ nɛ kɛmɛ,

¹⁷ sɛ tɛ Kristo aba za wɔnɔ idzyi mɛ ganɔ tɛyɛyɛkɛŋa abha. Klɛ ibisi sɛ wɔnɔ, nɔ kpɛ igu nɛ anɔ tɛtɛdzuesi mɛ nɛ tɛdɛdɛmɛ nɛ anɔ mɛ,

¹⁸ aba mɔ kɛmi, ɔplɛnɔ nɛ kpayabanɔ petee, tɛ be ti kana gɛ kɛnɛ anɛ kɛdzɛ anɛ kɛlɛ tɛɖɛɖama anɛ tɛdzudzu nɛ̀ gɛ lɛ Kristo tɛdɛdɛmɛ nɛ anɔ,

¹⁹ klɛ tɛ nɔ tii yɛ anɔɛbui tɛdɛdɛmɛ gɛ kɛdɔ fla tititi—tɛ be yuku nɔ kɔ tɛsɛsɔnɔ Kpaya tɛyuyuku petee.

²⁰ Ɔtsɔ̃nɛ kɔ yɛ gɛ abana kɛdɔ bhɛtɛ tɛsɛsɔnɔ dɛ kɛgɛ kɛlɛ petee bu bisi ɔdɔgɔsɛ bɔ bhɛtɛ kɛtɔkpu mɛ, nɛ yɛ kemi nɛ gɛ kɛwa kɛxwɛ nɛ bulɔ mɛ,

²¹ kɔ yɛ kɛlɛ nu busɔlɛha kabhaŋɛŋa anɛ busɔlɛɔha nɛ̀ Kristo Yesu mɛ ganɔ tɛmumɔ petee mɛ, denɔ ɔtsɔ̃ nɛ ɔyɛkɔ vɛnɔ! Tɛlɛbɛlɛmɛ.