Efesoanɛ 2 - ONUGBÙ NYƐNYÃ VUVƆ

Babhɛtɛ Yɛ Azanɛkpã Nɛ Kristo Mɛ

¹ Wɔnɔ xwũ nɛɛ, nɔti tsi nɛ wɔnɔ buzizi nɛ ebuikpã bhɛbhɛtɛ mɛ,

² nɛ gɛ nɔ za kanɔ mɛ ebui nɛede klɛ agɛ aŋa bukusi nɛ kɛlɛmɛ, ɔfufɔɛ nɛ gɛ lɔ waɛxwɛ ɔtsɔ̃nɛ nɛ́ bagɛ ba ta ta tɔ nɛ mɛ.

³ Bulɔ petee tsyɛ bu tɛza balɛ shi nɛ kibe tili, klɛ bu kpɛ bulɔ buzizi ɛkpã tɛpɛpɛɛ nɛabha klɛ bu lɛ kɛlɛ tɛpɛpɛede nɛ bulɔ atɔkpuimɛ. Anasɛ bagugɔɛ, nɛ tɛmumɔe mɛ bulɛ kɔ butɔ.

⁴ Pɔ nɛ yɛ tɛdɛdɛmɛnɔ gbla kɔ lɔ so, Kpaya, gɛ eyuku nɛ eshutukubui didi so,

⁵ abhɛtɛ lɔ bu lɛ nɛ ɛkpã nɛ̀ Kristo nɛ kibe lɛ mɛ gɛ bu tsi nɛ bulɔ buzizi nɛ mɛ tsyɛ—ganɔ ɛyamyuyɔ mɛ le bu nɔ.

⁶ Klɛ Kpaya efeke lɔ nɛ Kristo klɛ ayɛkɔ lɔ edzu yɛ ɔbha nɛ owũsiseanɔ nɛ mɛ nɛ Kristo Yesu mɛ,

⁷ sɛ tɛ nɛ agɔ nɛ gɛ la ba nɛ mɛ tɛ ebe bu kɛsɔnɔ nɛ gɛ adɛsɔnɔ anɔnyanɔ akasɛ asɛ tɛmumɔ gɛ kɛ baa aba kasɛ kedziŋɛŋa gɛ kadɛ sɔnɔ yɛ dɔkukɔ, ebukasɛ nɛ yɛ ɛyɛmɛyɛyɔ kɔ lɔ nɛ Kristo Yesu mɛ.

⁸ Alasɛ ganɔ ɛyamyuyɔ mɛ be bhui nɔ ayɛkɛ, nɛ tɛyɛyɛkɛŋa mɛ—klɛ kɛnɛ kɛ di de wɔnɔ nahwɛ ɔkɔ, kɛ nu Kpaya kɛdɔ gɛ akɔ—

⁹ ganɛ kɛxwɔɛ wuwaɛ mɛ, kɛlɛso anɔnyanɔ atɛ bana ishu feke.

¹⁰ Alasɛ bu nu Kpaya axwɛwɛwaɛdɔ, nɛ Kristo Yesu mɛ abhɛtɛ lɔ sɛ bu waɛxwɛ dzyɔgo gɛ Kpaya eti putɔ abhɛtɛ kɔ lɔ sɛ tɛ bu bhɛtɛ.

Terikpo Zɛza Nɛ Kristoɛmɛ

¹¹ Kɛlɛso, baka sɛ kibelɛlɛ wɔnɔ agɛ bamɔnɔ gɛ bedinu Yuɖanɛ klɛ be klu sɛ “bunyɛnyɛ mabhuimabhui” Yuɖanɛ beklu balɛnahwɛ asɛ “bunyɛnyɛ bhubhui” (kɛlɛ la bebhui ishuidzya nɛ ahwɛ)—

¹² bakasɛ kibelɛlɛ nɔza ɔtɔ nɛ Kristo shu, ba dɛ kla nɔ kpɛ Izraɛlanɛ nɛ shi anɛ befu kɔ onugbu nyɛnya kibuiɖɔlu, nɛ kidzoenudidi mazamaza, anɛ Kpaya kanɔa nɛ mɛ mazamaza.

¹³ Pɔ ɔtsɔ̃ nɛ Kristo Yesu mɛ wɔnɔa gɛ kibe tili gɛ nɔ za odzroɖokɔ bagbanɛ nɔ amɛna ɔganɔ Kristo dzyosu nɛ mɛ.

¹⁴ Alasɛ yɛnahwɛ yɛ nu bulɔ ishuyuyɔ, gɛ abhɛtɛ tɛbha gɛ kidzi tirikpo klɛ ayɛ buka, ebla tsɛtsa buka,

¹⁵ ayɛkɔ yɛ ishuidzya ebu ɛshã ɛlɛ tɛkpɛkpɛ anɛ ɛlɛabha bhɛbhɛtɛ. Yɛ tɛtɛtrɔ kɛlɛ dzi sɛ tɛ abhɛtɛ nɛ yɛnahwɛ mɛ anɔ vuvɔ terikpo denɔ balɛ tɛabha mɛ, sɛ abhɛtɛ ishuyuyɔ,

¹⁶ klɛ nɛ ishuidzya tirikpoe nɛ mɛ abhɛtɛ balɛ tɛabha terikpo kɔ Kpaya ɔganɔ butsi nɛ butsiosi shu, nɛ kɛlɛmɛ eyi balɛ ebla pɛpɛɛ.

¹⁷ Aba klɛ aɖɔaɖɔ nɛ ishuyuyɔ shu kɔ nɔ bagɛ baza odzroɖokɔ anɛ ishuyuyɔ kɔ wɔnɔagɛ nɔ tsobunɔ.

¹⁸ Alasɛ ganɛ yɛabha bulɔ edi tabha bumɔ kidzo vɛ Aka nɔ kɔ nɛ̀ Ɔfufɔɛ torikpo.

¹⁹ So nɛ no di nu efu nɛ̀ ɔkɔbhlatɔ anɔ, pɔ nɔ nu kesukpa terikpo abha ayɛ nɛ Kpaya banɔ nɛ̀ Kpaya bupaɛmɛ anɔ terikpo,

²⁰ ba bhɔ banɔkpɛkpɛ anɛ batɔnu atrɔ kesikpɛkpɛ nɛ Kristo Yesu yɛnahwɛ anasɛ ɔtsyakɔ kɛklãgbu ekusi.

²¹ Nɛ yɛ mɛ bedzu buvu nɛ petee atsya klɛ befeke lɛ tɛ bu badzi bubhubhui busɔlɛvu nɛ Apalete nɛ mɛ.

²² Klɛ nɛ yɛ mɛ wɔnɔ tsyɛ ba bhɔ nɔ exogo tɛ nɔ bɔ dzi ɔzakɔ nɛ ɔkɛlɛ gɛ Kpaya alɛ nɛ yɛ Ɔfufɔɛ.