Efesoanɛ 1 - ONUGBÙ NYƐNYÃ VUVƆ

¹ Mɛ Paolo, Kristo Yesu anɔkpɛkpɛ ganɔ Kpaya tɛpɛpɛɛ mɛ. Kɔ kpayabanɔ nɛ̀ Efesosɛ, bagɛ tɛyɛkɛŋa lɛ balɛ ahwɛ nɛ Kristo Yesu mɛ:

² Kɛdɔkukɔ anɛ ishuyuyɔ kɔ nɔ denɔ Kpaya bulɔ Aka anɛ Apalete Yesu Kristo kɔ.

Ɔfufɔɛmɛ Tɛyuyula Nɛ́ Kristo Mɛ

³ Kabhakpɛkpɛ kɔ Kpaya anɛ Aka kɔ bulɔ Apalete Yesu Kristo, gɛ ayula lɔ nɛ owũsiseanɔ nɛ mɛ nɛ̀ ɔfufɔɛ nyɔ fufɔɛmɛ yuyula nɛ Kristo mɛ.

⁴ Alasɛ eklu lɔ nɛ yɛ mɛ flogo gɛ babhɛtɛ kanɔ sɛ tɛ bulɔ shu bhui klɛ tɛ buzizi tɛza lɔ shu nɛ yɛ amɛ. Nɛ tɛdɛdɛmɛ mɛ

⁵ eti klu lɔ sɛ bu nu anasɛ yɛ beyi ganɔ Yeesu Kristo abha nɛ yɛ tɛpɛpɛɛ nɛ́ yɛnahwɛ shui mɛ—

⁶ tɛ bu kpɛ yɛ ishubhubhui ɛyɛmɛyuyɔ, gɛ ashɛnahwɛ akɔ lɔ bububɔɛ nɛ yɛ Yi gɛ adɛmɛ yɛ bui.

⁷ Nɛ yɛ mɛ bu mɔ tɛbhubhuiyɛkɛ ganɔ yɛ dzyosu nɛ mɛ, ebuikpã tsyitsye, anɛ Kpaya kedziŋɛŋa kɛdɔkukɔ mɛ

⁸ sɛ akɔ lɔ kibuinyinyi nɛ kibuiesinunu gelee dɛ.

⁹ Klɛ akɔ lɔ ti yɛ tɛpɛpɛɛ ebuikpukpu anɛ yɛ tɛpɛpɛɛ dzyɔgo gɛ abhɛtɛlu nɛ Kristo mɛ,

¹⁰ tɛ aba yɛkɔ kpɛ tɛbhɛtɛmɛ nɛ kibelɛlɛmɛ gɛ na kɔ kɛlɛ tɛbhɛbhɛtɛ—tɛ amɛna ebui petee gɛ la lɛ owũsise anɛ̀ kesukpa gɛ kɛxogo nɛ kɛtɔkpu tirikpoesi, Kristo kura tsyɛ.

¹¹ Nɛ yɛ mɛ be klu lɔ tsyɛ, be klu lɔ nɛ ebui bhɛbhɛtɛ nɛ nu gɛ kɛwaɛxwɛ nɛ kɛkanyaka mɛ nɛ yɛ tɛtɛtrɔ nɛabha,

¹² sɛ tɛ bulɔ gɛ putɔ yɛ kɔ bulɔ kidzoenudidi trɔ Kristo abha, bu badzi bagɛ ba bakpɛ yɛ kabha vɛvɛ nɛabha.

¹³ Klɛ wɔnɔ tsyɛ be klu nɔ akpɛ Kristo mɛ kibe lɛlɛ nɛ gɛ nɔ nu kibui gbɛagba, kibui dzyɔgo kɔ nɔ tɛbhubhuiyɛkɛ. Tɛyɛyɛkɛŋa kede, bakpɛ nɔ susu nɛ yɛ mɛ nɛ̀ kɛklãgbu tɛtɛtrɔ, tɛ nɔ yɛkɛ Ɔfufɔɛ Dzyɔgo ɖuɖɔlu,

¹⁴ gɛ lɔ nu ahwɛ tɛtrɔ tɛbɛbala kededɔŋɛŋa kɔ lɔ ɔdɔtɔnɔ tɛbhubhuiyɛkɛ kɔ bagɛ balɛ nu Kpaya ayɛ—tɛ ba kpɛ yɛ kabhaŋɛŋa nɛ kabha.

Ahwɛhuhu Anɛ Kpayakuklu

¹⁵ Alasɛ kibui nɛ so, denɔ kibelɛlɛ gɛ wɔnu ɛnɔ tɛyɛyɛkɛŋa nɛ Apalete Yesu abha klɛ wɔnɔ tɛtɛdɛdɛmɛnanɔ kɔ kpayabanɔ petee,

¹⁶ ɛka zukɔlɔ ahwɛhuhu nɛ wɔnɔɛ tɔkpu, ɛbaka wɔnɔɛ bui nɛ kpayakuklu mɛ.

¹⁷ Itsri lɛabha bisi sɛ bulɔ Apalete Yesu Kristo Kpaya, ishubhubhui Aka akɔ nɔ Ɔfufɔɛ kibuinyinyi anɛ tibubukasɛ, sɛ tɛ nɔ tii yɛ ɔdɛ ana.

¹⁸ Ɛka klukpaya tsyɛ sɛ wɔnɔ idzyi aŋɔhu la danɛ sɛ tɛ nɔ tii kidzoenudidi kɔ kɛ gɛ lɛ so gɛ eklu nɔ, yɛ kededɔŋɛŋa nɛ shu bhubhui nɛ kpayabanɔ nɛ mɛ,

¹⁹ klɛ nɛ yɛ kemi gbɛgbla gɛ kadɛ sɔnɔ kanyaka kɔ lɔ bagɛ buyɛkɛŋa. Kemi alɛlɛ nɛ lɛ anasɛ yɛ bupu gɛganɛ kɛxwɛ wuwa,

²⁰ gɛ ayɛkɔ kpɛ Kristo mɛ nɛ kibelɛlɛ gɛ anyɛmɛ yɛ edenɔ betsitsi nɛ shi klɛ akɔ yɛ edzu kesi nɛ yɛ kɛŋa kapɛ nɛ mɛ nɛ owũsise kanɔ mɛ

²¹ nɛ gɛ kaɖamadɛ ɔshã anɛ kabhaŋɛŋa, kɛmi anɛ ɔzakɔ, anɛ kinyi kanyaka gɛ baba na kɔ, ganɛ ɔtsɔ̃nɛ kanɔ anɛmɛ tite pɔ nɛ kagɛ ka tɛba nɛ tsyɛ mɛ.

²² Klɛ Kpaya ayɛkɔ kɛdɔnyɛd ɔ akpɛ yɛesi klɛ ebui yɛ asɛ tɛ edzi kɛtɔkpu kɔ kɛdɔnyɛdɔ kɔ busɔlɛha,

²³ gɛ kɛnu yɛ ishuidzya, yɛnahwɛ kana gɛ amɔ kɛdɔnyɛdɔ nɛ kidzonyɛdzoa bha.