Axwɛwɛwa 6 - ONUGBÙ NYƐNYÃ VUVƆ

Bapɛplɛnɔ Tiegene Nɛ Tɛkuklu

¹ Nɛ kibe lɛ nɛm gɛ badɔkpasɛ ne be kpe, Griki Yuɖanɛ gɛ ba kpasɛ balɛ shi nɛ bhui Hebriu Yuɖanɛ nɛ nu alasɛ balɛ bagɛ betsianyɛ nɛɛ ba shɛ̃nahwɛ balɛ kiwinyɛwi kɛdɔŋɛŋa kukɔ shu.

² So nɛɛ Balɔfɔntiabha ne xogo badɔkpasɛ nɛ petee klɛ be tsrea lɛ sɛ, “Kɛ tɛ ba pɛɛ̃ kɔ lɔ sɛ tɛ bu shɛnahwɛ Kpayabui nɛ shu tɛ bu da zɛ di kɛŋɛŋa mɛma ɔkɔ.

³ Badzya mɔ, nɔ bu banɔ tiegene denɔ wɔnɔm gɛ benu banɔ gɛ be yuku nɛ Ɔfufɔɛ anɛ kibuititi. Bu ba yɛkɔ kɛdɔŋɛŋa mɛma nɛ kpɛ balɛ ahwɛ

⁴ tɛ bulɔ bu yɛkɔ ishu kɔ Kpaya kuklu anɛ yɛ kibui nɛ tɛɖuɖɔ.”

⁵ Tɛtɛtrɔɛ nɛ ku banɔɛha nɛ petee awɔ̃. Be bu Stefano, gɛ enu anyɛ teli gɛ eyuku nɛ Ɔfufɔɛ Dzyɔgo anɛ tɛyɛyɛkɛŋa, ɔplɛnɔ Flipo, Prokorusɛ, Nikanɔ, Timɔnɛ, Parmenasɛ, anɛ Nikolasɛ gɛ ede Antiɔkɛ, pɛ ebe tsyina edzi Yuɖaɔha mɛ anɔ.

⁶ Ba yɛkɔ banɔ bubu na kpɛ ahwɛ kɔ banɔkpɛkpɛ, gɛ be klukpaya klɛ batrɔ ahwɛ nɛ balɛa bha.

⁷ So nɛɛ Kpayɛbui nɛ ba nɛ. Badɔkpasɛ nɛ tikpikpe nɛ mɛ ba wu kabha nɛ Yerusalɛm zia zia, klɛ kpayanɔ gelee aba ta tɔ nɛ tɛyɛyɛkɛŋa.

Be vu Stefano

⁸ Ɔtsɔ̃ Stefano, edzi anɔ teli gɛ eyuku nɛ Kpaya ɛyamyuyɔ anɛ kemi, abhɛtɛ ebui yiyinɔanɔ gbɛgbla anɛ ebui gɛ abhɛtɛ bi kɛdɔmumɔ nɛ banɔɛ shi.

⁹ Kititi lulɔ ba ba, pɔ, denɔ banɔ nɛ gɛ be nu ishuahwɛ zɛzanɔ oxogokɔvu nɛm ɔkɔ (ansɛ gɛ beklua lɛ) Yuɖanɛ ge de Sirene anɛ Alɛksandrɛa ɔkɔ plɛnɔ Silisia anɛ Asia amadi nɛm. Banɔa na ba kpa ebui wɛlãkɛ nɛ Stefano,

¹⁰ pɔ ba dɛ na kititi lɔ nɛ yɛ kibuititi nɛ shu ɔdɔgɔsɛ yɛ Ɔfufɔɛ nɛ gɛ ɔlɛa bha aga pɛ aɖɔ kaɖɔ.

¹¹ Klɛ nɛ tɛkpukpu mɛ bada wɛɛ banɔ teli asɛ bada ɖɔ sɛ, “Bu da nu Stefano gɛ edzia ɖɔ ebusoebui nɛ Mose shu anɛ Kpaya shu.”

¹² So be de feke banɔ nɛ beshishe anɛ ɛshãdɔkasɛ nɛ idzyi edzu. Be vu Stefano klɛ la yɛkɔɛ mɛna bebhuiklu nɛ amɛ.

¹³ Itro ebuimɔɖɔ teli la gbanɔ amɛna pɛ ba ba ɖɔa ɖɔ, “Anya nɛ aka zukɔlɔ kititi lulɔ kaɖɔ ɖɔ nɛ ɔnɛnakɔ dzyɔgo anɛ kititi lulɔ nɛ ɔshã nɛ shu edi.

¹⁴ Alasɛ bunu gɛ aɖɔ sɛ Yesu Nazarɛtɛ eyia nɛ aba yɛ ɔkɛ̃ klɛ ebe tsyina Mose begu nɛ petee gɛ ashɛ̃nahwɛ elu kɔ lɔ.”

¹⁵ Banɔ nɛ petee ge dzi kebhui nɛ mɛ nee di Stefano amɛ nɛm kpraraara, klɛ bamɔ sɛ yɛ amɛ nɛmɛ aawɔɛ ansɛ Kpaya axwɛdɛ amɛ.