Axwɛwɛwa 5 - ONUGBÙ NYƐNYÃ VUVƆ

Ananiasɛ Anɛ Safira

¹ Ɔtsɔ̃ nɛɛ anyɛ teli gɛ be klua sɛ Ananias, yɛ anɛ yɛedzini Safira, balɛ tsyɛa ba dɛ balɛ kɛdɔ zɛza anɔahwɛ tili.

² Nɛ yɛedzini nɛ tititi mɛ nɛɛ Ananiasɛ ebu ehoeyi nɛ teli elu kɔ ishu, klɛ ayɛkɔ gɔgɔɛ nɛ aba kpɛ ahwɛ kɔ Yesu banɔkpɛkpɛ.

³ Ɔklɛ Petro asɛ, “Ananiasɛ, kɛlɛɛ lɛ za pɛ abosam ayɛkɛ wɔ idzyim ana pɛ kɛlɛ sɛ tɛ ohu otro tsre Ɔfufɔɛ Dzyɔgo pɛ ɔyɛkɔ ehoeyi nɛ gɛ ɔdɛ kesukpa nɛ teli ɔbala kɔ ishu?

⁴ Kesukpa nɛ ke di nu wɔayɛ flogo pɛ ɔdɛa lɛ dza? Klɛ gɛ ɔdɛa lɛ kalɛ ehoeyi nɛ edi dzi wɔayɛ dza? Kide gɛ kɔ sɛ ɔbhɛtɛ kibui nɛ di? Anɛ banɔ ɔwɛɛ Kpaya wɔ wɛɛ.”

⁵ Kibe lɛ gɛ Ananias enu ebui bibisia nɛ ko, klɛ awɔlɛ adɔ klɛ etsi. Klɛ kifu ku anɔnyanɔɛ di gɛ enu kibui nɛ gɛ dzyɔ.

⁶ Ɔkɛlɛ banyɛsɔ nɛ be koeyi aba, ba ba nya yɛ akpɛ kɛpɔtɛm, klɛ be tuku yɛ ada vubɔ.

⁷ Aba za ansɛ ɛɖa tɛtae de yɛedzini nɛ tsyɛ ebe ku, nɛ kibe lɛ gɛ etinyi kibuinɔ nɛ gɛ vɛa bha denɔ yɛenyine nɛ shu.

⁸ Petro ebisi yɛ asɛ, “Tsrem, kedzia nɛ wɔnɔ nɛ wenyine nɔ dɛ kesukpa nɛ dza?” Adzɛ na sɛ, “Ee,” “kedzi nɛ nɛa lɛ.”

⁹ Petro ebisi yɛ asɛ, “Kɛlɛ lɛ baza sɛ tɛ nɔ dɛmɛ ɔsɛ obo feke Apalete nɛ Ɔfufɔɛ nɛ odi? Di! Banɔ nɛ ga da vubɔ wenyine nɛ butsrukpɔ nɛ lie dunu, klɛ be be feke wɔ tsyɛ ebu eyinɔ.”

¹⁰ Kɛlɛ mɛ ko adzɛ nɛ tsyɛ awɔlɛ adɔ nɛ yɛ otugba klɛ etsi. Ɔkɛlɛ banyɛsɔ na ba mɔɛ gɛ etsi eli, klɛ be feke yɛ ebu eyinɔ ada vubɔ nɛ yɛenyine nɛ ɔbha.

¹¹ Kifu piim ku anɔnyanɔ nɛ busɔlɛha nɛm nɛgɛ enu ebui nɛ ga ba kɛlɛ mɛ.

Yesu Banɔkpɛkpɛ Nɛ Beke Banɔ Gelee Banya

¹² Yesu banɔkpɛkpɛ na ba bhɛtɛ ebui nɛ kɛdɔmumɔ gelee gɛ la bhɛtɛ banɔɛ bi. Klɛ baga yɛkɛ kibui nɛa bha aŋa petee be xogo nɛ Salomo Kagba nɛesi.

¹³ Anɔnyanɔ adɛ mɔ kidzo pɛ aba na balɛ kishi tsoku, kɛ nya za pɔ sɛ banɔ na yɛkɔ tili nɛ balɛ kibui flogo.

¹⁴ Pɔ kɛ za kɛlɛm sɛ, banyɛ anɛ badzɛ gelee ba ba yɛkɛ Apalete nɛa bha aŋa klɛ ba yɛkɔa lɛ ata plɛnɔ balɛ tɛkɛkla nɛm.

¹⁵ Nɛ kɛlɛ mɛ, banɔ betuku balɛ banyɛnya amɛna ebe lu kidzo nɛa bha klɛ ba yɛkɔ elu babati anɛ iputsoa bha sɛ tɛ onu gɛ Petro asa fla tɛ yɛ buyi nɛ tite xũ ga balɛa bha fla.

¹⁶ Banɔɛza tsyɛ xogo denɔ ɛma nɛ gɛ lɛ kana Yerusalɛm nɛm, ba gbanɔ balɛ banyɛnya nɛ gɛ ɛfufɔɛkpã nɛ kpɛ bunuhu na mɛna klɛ balɛ petee banya nɛ beke.

Ba Kpatɔnɔ Banɔkpɛkpɛ

¹⁷ Ɔkɛlɛ kpayanɔgbla anɛ yɛ ɔhayɛalɛ, gɛ bakpasɛ Sarusianɛ ɔha nɛm, ne yuku nɛ kawɔ̃kpɛ.

¹⁸ Be vu Banɔkpɛkpɛ klɛ la yɛkɔ akpɛ ɔma buvu.

¹⁹ Pɔ nɛ elishi nɛ mɛ Apalete nɛ axwɛdɛ aba danɛ buvu nɛ budunu klɛ ebua lɛ eyinɔ.

²⁰ Axwɛdɛ nɛ etsrea lɛ asɛ, “Nɔ vɛ, nɔ dɔ za busɔlɛvu kɛma nɛm,” “tɛ nɔ dɔ ɖɔ ɛkpã vuvɔɛ nɛ kibui petee otsre banɔ.”

²¹ Nɛ keli zɛza nɛ mɛ, ansɛ gɛ be tsrea lɛ, be de tsoku busolɛvu nɛm klɛ ba kpa banɔ kɛdɔ kasɛ. Gɛ kpayanɔgbla anɛ yɛ ɔhayɛalɛ nɛ be ku, be klu Busɔlɛebhuiklu nɛ exogo, nɛ Izraɛlanɛ beshishe nɛ balɛ tɛxuxogom petee, klɛ ba yɛkɔalɛ sɛsɛ buvuɔkpɛkɔ kɔ banɔkpɛkpɛ.

²² Pɔ gɛ bede ku buvuɔkpɛkɔ nɛɛ, bagɛ balɛ nu bebhuiklu na dɛ mɔa lɛ nɛ ɔkɛlɛ. So be tsodzi avɛ ede tsre baga kpa lɛ,

²³ “Bu da mɔ buvu nɛ lu da mɔɔ mɔ, bepupo tsyɛ zhiedzi budunu, pɔ gɛ bu danɛ lɛ, bu dɛ mɔanɔnyanɔ ya kpasɛ bɔlɛm.”

²⁴ Gɛ busɔlɛvu nɛ epupoaka anɛ kpayanɔgbla nɛ nu kibui nɛɛ be shuku, klɛ la nyɔnɛawɔ̃ nɛ kɛgɛ ba de kibui nɛm koeyi.

²⁵ Ɔklɛ anɔ teli ede aba ɖɔ asɛ, “No di! Banɔ nɛ gɛ no vu ɔkpɛ buvu nɛ balɛ li bɔsɔlɛvu nɛ shu edzi akasɛ banɔ nɛ dɔa.”

²⁶ Nɛ kɛlɛ shu, evupoaka anɛ yɛ baxwɛwa na vɛ klɛ bada gbanɔ banɔkpɛkpɛ nɛ amɛna. Ba dɛ yɛkɔ kanya na lɛ, alasɛ be si kifu asɛ banɔ ne be hua lɛ aklãgbu.

²⁷ Gɛ ba gbanɔ banɔkpɛkpɛ nɛ amɛna, bakɔ sɛ ba wɛ̃ nɛ busɔlɛebhuiklu nɛ amɛ sɛ tɛ kpayanɔgbla nɛ bisi alɛ igbe.

²⁸ Anɔgbla nɛ etsre alɛ asɛ, “Bu kpɛ wɔnɔ ɔshã gɛganɛɛ sɛ nɔ tɛ kasɛ kɛdɔ nɛ kinyi nɛm.” “Pɔ no yuku Yerusalɛm nɛ wɔnɔ kɛdɔ kɛkasɛ, klɛ nɔ pɛ sɛ tɛ no bu lɔɛ pɔ nɛ anyɛa nɛ dzyosu kɛtɔkpu!”

²⁹ Petro anɛ banɔkpɛkpɛ gɔgɔɛ nɛ bu klɛ nu asɛ, “Alasɛ tɛ bu ta Kpaya tɔ ɔyɛkɔdɛ banɔdzyrame!

³⁰ Bulɔa kalɛ Kpaya nɛ feke Yesu ebu nɛ bekpui shi, anɔ nɛ gɛ no yi ganɔ yɛ tɛkpɛkplasɔ nɛ osi shu.

³¹ Kpaya eti bu yɛ ede dzu yɛ kɛŋam ansɛ Ekusieyi anɛ Ayɛyɛkɛkɔanɔ gɛ aba kɔ kitem tsyitsyina anɛ buzizi tɛyɛyɛkɔ tsye Izraɛlanɛ.

³² Bu nu bebuimɔɖɔ kɔ ebuia nɛ petee, nɛ Ɔfufɔɛ Dzyɔgo nɛ gɛ Kpaya ashɛ̃nahwɛ akɔ banɔ nɛ ga ta yɛ batɔ.”

³³ Kibe lɛ gɛ be nu kibui nɛɛ, ba mɔ oblo tsutsɔmɔ tsɔmɔ klɛ ba pɛa sɛ tɛ be yia lɛ.

³⁴ Pɔ Farisieyi teli gɛ beklua sɛ Gamaliɛl, gɛ enu ɔshãdɔkasɛ, gɛ anɔnyanɔ ebu, na lɔ kititi nɛ busɔlɛebhuiklu namɛ klɛ akɔ ɔshã sɛ ba gbanɔ banɔ nɛ eyinɔ kide bɔɛyi.

³⁵ Ɛklɛa ɖɔ kaɖɔ etsre banɔ na sɛ, “Izraɛlanɛ mɔ, no lu awɔ̃ nɛ kɛdɔnɔ nɛ gɛ nɔ pɛɔ sɛ tɛ nɔ bhɛtɛ nɛ banɔa.

³⁶ Nɛ kibe tili gɛ ba fla nɛ mɛ Teuɖas aba, sɛ enu anɔ teli, klɛ banɔ ansɛ kɛfɔɛfɔ ɛzakɔ tɛlɛ aza yɛede. Be be yi yɛ, klɛ baga za yɛede nɛ peteea pɔɛehle, klɛ alɛlɛ nɛ petee le de be dzi kɛdɔnyɛdɔ.

³⁷ Anyɛa lɛ nɛede nɛɛ, Yuɖas gɛ nu Galelia eyi teli nɛ aba wɛ̃ nɛ banɔ kɛkla be klɛ eputɔ nɛ banɔɛha kɔ kititi lulɔ. Yɛ tsyɛ be yi yɛ, klɛ banɔ nɛ ga za yɛede nɛ petee ba pɔɛehle.

³⁸ So nɛ kibui nɛ mɛ, ɛyɛkɔ lu wɔnɔa mɛ sɛ, nɔ shɛnahwɛ banɔa nɛ shu olu! Nɔ kɔ la gavɛ! Alasɛ onu gɛ balɛ ebui bhɛbhɛtɛ ne de anɔdzyrame ɔkɔ, klɛ la tɛ dɔ.

³⁹ Pɔ onu gɛ le de Kpaya ɔkɔ, klɛ nɔ tɛ bɔ na banɔa nɛ dzrɔnɔ, nɔ bɔbɔ mɔ sɛ Kpaya ko nɔ gɔnɛ nɔ.”

⁴⁰ Anyɛ nɛ kaɖɔ na wa kɛxwɛ nɛ balɛ shu. Be klu banɔkpɛkpɛ nɛ amɛna klɛ le tua lɛ nɛ eshi. Klɛ la kpɛa lɛ ɔshã sɛ ba ta ɖɔaɖɔ nɛ Yesu kinyim, klɛ la shɛnahwɛ balɛ shu pɛ ba shɛ.

⁴¹ Banɔkpɛkpɛ na shɛ nɛ Bebhuiklu nɛ amɛ nɛ same mumɔ sɛ ba kla lɛ asɛ bana kɔ butsɔ kpɛkpɛ nɛ Kinyi nɛ tɔkpu.

⁴² Kiwi nyɛ wi di ko, nɛ busɔlɛvu nɛ kɛma mɛ, denɔ bupa mɛ ɔvɛnɔ bupa mɛ, ba dɛ zukɔlɔ kɛdɔ nu kasɛ, ba vɛ kibui dzyɔgo nɛ tɛɖuɖɔa bha sɛ Yesu yɛ nu Kristo.