Axwɛwɛwa 4 - ONUGBÙ NYƐNYÃ VUVƆ

Petro Anɛ Yohanɛsɛ Nɛ Bebhuiklu Nɛ Amɛ

¹ Kpayabanɔ nɛ busɔlɛvu nɛ epupoaka nɛ Sarusianɛ na ba tɔnɔ Petro anɛ Yohanɛsɛ nɛ kibe lɛ nɛ gɛ ba za ɖɔ kaɖɔ etsre banɔɛza.

² Kɛ kpɛ balɛ bunuhu tsutsɔmɔ tsɔmɔ alasɛ banɔkpɛkpɛ na za kasɛ banɔ nɛ kɛdɔ klɛ baa ɖɔ nɛ Yesu kinyim tɛnyɛnyɛmɛ denɔ butsi mɛ.

³ Be vu Petro nɛ Yohanɛsɛ, klɛ gɛ keli ti bele so nɛɛ, ba yɛkɔa lɛ ada kpɛ buvu kɔ keli zɛza.

⁴ Pɔ banɔ gelee gɛ be nu kibui nɛɛ ba yɛkɛ aŋa, klɛ banɔ nɛ tɛkpikpem ba vɛ otugba dananɔ ansɛ akpã teti.

⁵ Nɛ keli zɛza nɛm nɛɛ baga ŋɛabha, beshishe anɛ ɛshãdɔkasɛ na ba tsya nɛ Yerusalɛm.

⁶ Annasɛ gɛ enu kpayanɔgbla na za ɔkɛlɛ, klɛ kana Kayafasɛ, Yohanɛsɛ, Alɛxanda anɛ banɔ gɔgɔɛ denɔ kpayanɔgbla nɛ yeshopoalɛm.

⁷ Ba gbanɔ Petro anɛ Yohanɛsɛ amɛna balɛ amɛ klɛ ba kpa lɛ ebui bisi asɛ: “Ganɔ kemi ɔdɔgɔsɛ ane kinyim nɔ bhɛtɛ kibui nɛ?”

⁸ Ɔkɛlɛ Petro, gɛ eyuku nɛ Ɔfufɔɛ Dzyɔgo, nɛ etsre balɛ asɛ, “Beshishe nɛ bagɛ baŋɛabha mɔ!

⁹ Onu gɛ bee klu lɔ obo na se bisi ebui nɛ bulɔ ɛyampɛpɛ nɛ gɛ bu bu kasɛ kɛkpata nɛ kana gɛ kɛga pɛ yɛ bunya nɛ beke nɛɛ,

¹⁰ klɛalɛ no ti kibui, wɔnɔ nɛ Izraɛlanɛ nɛ petee ɔsɛ, Yesu Kristo Nazarɛtɛ eyi, gɛ nɔ kplasɔ flogo pɛ Kpaya aba nyɛmɛ yɛ edenɔ betsitsi nɛ shi, yɛ kinyim anyɛa nɛ gɛ eli wɔnɔ amɛ nɛ aga pɛ eebeke banya.

¹¹ Yɛ enu “ ‘kɛklãgbu nɛ gɛ wɔnɔ bevudzu nɛ ba shɛnahwɛ atɛ̃, pɛ kɛ ba dzi kidriɔxãkɔɛ klãgbu.’

¹² Ba tɛ ba mɔ okoeyikɔ nɛ anɔnyanɔm, alasɛ kinyinyɛnyi va ma owũsise nɛesi gɛ ba yɛkɔ kɔ banɔdzyrame gɛ kɛlɛ shu la ba ga pɛ be be bua lɛ.”

¹³ Gɛ banɔ na mɔ kemi nɛ di ga kpasɛ Petro anɛ Yohanɛsɛ mɛ klɛ be vu awɔ̃hũ sɛ ba dɛ dɛ́ adɛdɛ kanyaka tsyɛ, benu banɔ tite ko nɛɛ kɛbhɛtɛ balɛ bi klɛ ba kpɛ balɛ kɛxawũ sɛ benu banɔ gɛ ba za nɛ Yesu.

¹⁴ Pɔ kɛdɔnyɛdɔ dɛ za banɔ nahwɛ gɛ ba ba bhɛtɛ, alasɛ kɛkpata nɛ gɛ be beke kɛlɛ bunya nɛ tsyɛ li kititi nɛ balɛ ɔbha nɛ ɔklɛ.

¹⁵ So bakɔ Petro anɛ Yohanɛsɛ ashɛ̃ nɛ bebhuiklu nɛ ɔbha tɛ bamɔ kɛtɔkpu mɛ bu.

¹⁶ “Be bisi asɛ, kide lɔ ba bhɛtɛ nɛ banyɛa?” “Banɔnyanɔ nɛ Yerusalɛm be nyi asɛ banɔa na tɛ bhɛtɛ kibui yiyinɔanɔ gɛ ga ɔtɔ, klɛ bu tɛ ba na kɛlɛ ɔtro kɔ.

¹⁷ Pɔ tɛ bu dzrɔ ebuia nɛ tɛ la yulɔ yi nɛ banɔɛ shi, klɛ alasɛ tɛ bu kpɛ ɔshã kɔ banɔa tɛ ba yulɔ kibuinyɛbui ɖɔ tsre anɔnyanɔ nɛ kinyi nɛm.”

¹⁸ Klɛ, be ze klua lɛ amɛna ozakɔ klɛ ba kpɛ oshã kɔa lɛ asɛ ba taa bhɛtɛ kaɖɔɖuɖɔ anɛ kɛdɔ kɛkasɛ petee nɛ Yesu kinyim.

¹⁹ Pɔ Petro anɛ Yohanɛsɛ be bu klɛ nu etsrea lɛ asɛ, “wɔnɔ nahwɛ no klu kebhui nɛ ɔkɔ shu sɛ nɛ pɔ nɛ Kpaya amɛ kɛbɔ sɛ tɛ ba ta nɔa tɔ ɔyɛkɔdɛ Kpaya.

²⁰ Alasɛ kɛdɔnɔ nɛ gɛ bu mɔ pɛ bu nu bɔ tɛ ba na klɛ shui bui ɖuɖɔ zɛkɔyɛlɔ.”

²¹ Nɛ kifu kpɛkpa lɛ vɛnɔ otugbae de ba shɛnahwɛ balɛ shu sɛ ba ga vɛ. Ba dɛ na tɛtɛtrɔ kanyaka bhɛtɛ asɛ ba tɛta lɛ atɔ, alasɛ banɔ nɛ petee za kpɛ Kpaya nɛa bha nɛ kɛgɛ ba kɛlɛm nɛ shu so.

²² Alasɛ anɔ nɛ gɛ yɛ bunya nɛ tɛbibeke nɛ bhɛtɛ bi nɛ atɛ yɛkɛ aflanɔ agɔ afɛtalɛ̃.

Bagɛ Bayɛkɛaŋa Nɛ Kpayakuklu

²³ Nɛ balɛ shu shɛshɛ̃nahwɛ mɛ beke, Petro anɛ Yohanɛsɛ etsodzi ashɛ̃ avɛ balɛ ɔkɔayɛ nɛ ɔbha klɛ ba da vɛ ebui nɛ gɛ kpayanɔgbla anɛ beshishe nɛ tsrea lɛ nɛ peteem akɔa lɛ.

²⁴ Gɛ banɔ nɛ nu kibui nɛɛ, balɛ peteea kpɛ ketsu ebu balɛ ilim eyinɔ nɛ Kpaya kuklum. Baɖɔ sɛ, “Kabhaŋɛŋa Apalete,” “wɔ bhɛtɛ owũsise anɛ kesukpa anɛ aƒu, anɛ kɛdɔnyɛdɔ gɛ kpasɛa lɛm.

²⁵ Ganɔ Ɔfufɔɛ Dzyɔgo nɛ mɛ ɔɖɔ kaɖɔ ɔganɔ wɔ axwɛdɛ gɛ enu bulɔ aka Davitia bha sɛ, “ ‘Kide so pɛ amadi na hwa pɛ banɔa nya nɛ aglɔ shu nɛ kɛlɛm?

²⁶ Kesukpɛa bha bekusi nɛ ayɛkɔ balɛ ɛzakɔ klɛ baga ŋɛabha ne xogo alɔ kititi nɛ Apalete nɛ shu nɛ Agɛ ba srabɔa kɔ.’

²⁷ Nɛ kɛlɛ mɛ Heroɖesɛ anɛ Pontio Pilato aba bhɛtɛ terikpo nɛ bagɛ be di nu Yuɖanɛ anɛ Izraɛlanɛ nɛ ɔmagbla nɛm sɛ tɛ ba bhɛtɛ kititilulɔ nɛ wɔ axwɛdɛ Yesu nɛ gɛ yɛshu kebhui, gɛ ɔsrabɔ kɔ.

²⁸ Ba bhɛtɛ kɛgɛ wɔ kemi nɛ tɛpɛpɛ nɛ tɛ trɔ lu kukuuku sɛ kɛ ba kɛlɛ mɛ.

²⁹ Ɔtsɔ̃ nɛɛ, Apalete, di balɛ kifu nɛ gɛ baa kpɛ alɛ tɛ ɔkɔ sɛ wɔ baxwɛdɛ nɛ ba ɖɔ wɔɛ bui nɛ kitekpɛkpɛ gbla.

³⁰ Bu wɔ ɔhwɛ oyinɔ tɛ obeke banya tɛ ɔbhɛtɛ ebuimumɔ anɛ yiyinɔanɔ nɛ agɛ abhɛtɛbi nɛ ɔganɔ Yesu wɔ axwɛdɛ gɛ yɛshu bhui nɛ kinyim.”

³¹ Gɛ be klu Kpaya beke, ɔkɛlɛ gɛ be xogo nɛ ɔhwa. Klɛ balɛ petee yuku nɛ Ɔfufɔɛ Dzyɔgo klɛ be bu Kpaya kibui nɛ aɖɔ nɛ kifu masimasi.

Bagɛayɛkɛaŋa Nɛ Ba Ma Kɛnɔmdɔ

³² Bagɛayɛkɛaŋa nɛ petee ba za nɛ idzyi anɛ kɛtɔkpum tirikpo. Anɔnyanɔ edi klu kɛnɔmɛdɔ kanyaka sɛ yɛnahwɛ yɛ, pɔ ba ma kɛdɔnyɛdɔ gɛ za balɛ ahwɛ nɛ ɔhaglɔ.

³³ Nɛ kemi kpɛkpɛ gbla nɛɛ banɔkpɛkpɛ nɛ avɛ Apalete Yesu tɛnyɛnyɛmɛ tɛbubuɖɔa bha, klɛ ɛyamyuyɔ gelee ɔza balɛ peteea bha.

³⁴ Anɔnyanɔ adɛ za balɛ shi gɛ kɛdɔnyɛdɔ zhã yɛ. Alasɛ denɔ kibem ɔvɛnɔ kibem nɛɛ bagɛ busukpa ɔdɔgɔsɛ bapa aza balɛ ahwɛ na dɛ alɛ, ba yɛkɔ kɔba

³⁵ klɛ ba yɛkɔ ebe lu banɔkpɛkpɛ nɛ etem, klɛ ba ma yɛ akɔ anɔnyanɔ gɛ azhã.

³⁶ Yosɛfu gɛ enu Levaɛtɛ eyi denɔ Siprɔsɛ, gɛ banɔkpɛkpɛ nɛ klua sɛ Banabasɛ (kɛlɛesi nu sɛ Eyi gɛ akɔ Kemi),

³⁷ adɛ yɛ nahwɛ kesukpa klɛ ayɛkɔ kɔba nɛ aba kpɛ ahwɛ kɔ banɔkpɛkpɛ.