Axwɛwɛwa 27 - ONUGBÙ NYƐNYÃ VUVƆ

Ba Yɛkɔ Paolo Asɛsɛ Roma

¹ Kibe lɛ gɛ ba trɔa sɛ bɔba za kenia bha vɛ Italia, Paolo nɛ bevuza nɛ teli ba yɛkɔa lɛ akpɛ ahwɛ kɔ behudugbani aka teli gɛ be klua sɛ Yuliusɛ, gɛ edi behudugbani nɛ gɛ epo Romanɛ Ekusigbla nɛ ɔmayɛ teli.

² Buku kenia bha opupugbla gɛ lo de Adramitiɔm pɛ lɔ bala kɔ aƒu shu ɛdzrɔkɔ nɛ Asia kɛdɔ nɛm tɛvɛvɛ, klɛ lɔ shɛ. Aristatsyusɛ gɛ enu Makedonian eyi teli gɛ ede Tɛsalonika tsyɛ aza blɔɛ shi.

³ Keli zɛzam nɛɛ bu da dzrɔ nɛ Sidɔnɛ; klɛ Yuliɔsɛ, nɛ yɛ ɛyamyuyɔ mɛ kɔ Paolo, akɔ yɛ kidzo sɛ avɛ tɛ ada mɔ yɛ ɛbhia lɛ tɛ kɛgɛ kɛlɛ apɛɛ tɛ ba bhɛtɛ akɔ yɛ.

⁴ Denɔ ɔkɛlɛ bu zɛ vɛ aƒu abha kidzo gɛga nɛa bha klɛ bu da fla vɛ Siprɔsɛ owuwu akpɛ kɛlɛ nɛ anɔ titi so.

⁵ Kibe lɛ gɛ bu za keni nɛa bha fla nɛ aƒu wee nɛa bha nɛ Silisia anɛ Pamfilia ogbigbe nɛ shu nɛɛ, bu da dzrɔ nɛ Mira anɛ Lisia.

⁶ Ɔkɛlɛ behudugbani aka nɛ gɛ agbanɔ alɛ nɛ amɔ Alɛksandranɛ keniabha opupugbla toli lɔ vɛ Italia, klɛ ayɛkɔ lɔ akpɛ ɔlɛm.

⁷ Opupu nɛ ɔdɔ fɔ̃ɔ nɛ kidzo gɛga nɛm ewi gelee klɛ kɛ gɛganɛ flogo pɛ bu ku Snidusɛ. Gɛ kɛlɛɛ nɛ dɛ kɔ lɔɛ dzo lɔ na blɔɛ dzo nɛ tɔnɔ so, bu da ga koeyi nɛ Krete kenimokpo nɛa bha, gɛ ke dzuamɛ nɛ Salmɔnɛ.

⁸ Bu ga aƒu nɛ tɔ nɛ butɔ klɛ bu ba ku ɔkɔ toli gɛ be klua sɛ Ɔdzrɔkɔ Dzyɔgo, gɛ obunɔ Lasɛa ɔma.

⁹ Kibe gelee tɛ zi, klɛ kenia bha kidzo gɛga nɛ da trɔ anɔa bha alasɛ ɔtsɔ̃ nɛɛ onugbu nyɛnya nɛ ɔtɛ fla. Kɛlɛ so nɛɛ Paolo akɔ le ti asɛ,

¹⁰ “Banyɛ mɔ, ɛmɔ sɛ blɔ kidzo gɛga nɛ ba ba dzi bunuhu klɛ kɛ ba mɛna agbaŋɛŋa pim kɔ kenia bha opupu anɛ ɔlɛ mɛ etuku, anɛ bulɔ ɛkpã.”

¹¹ Pɔ nɛ kɛlɛm sɛ tɛ behudugbani aka nɛ gɛ agbanɔ lɛ nɛ ata batɔ nɛ kibui nɛ gɛ Paolo aɖɔ nɛɛ, ada lɛ opupuelete anɛ agɛ ebu ɔlɛ nɛ kibuiɖuɖɔe de.

¹² Gɛ kenia bha ɔdzrɔkɔ nɛ ɔmɛtã kɔ bublɔɛbem so nɛɛ, banɔ gele aba trɔ ahwɛ asɛ ba ba vɛ kidzo gɛga nɛa bha, nɛ kidzoenu didi sɛ be be ti ku Foenisia nɛ bublɔ nɛm nɛ ɔkɛlɛ. Ɔkɛlɛ onu kenia bha ɔdzrɔkɔ nɛ Krete, gɛ ɔkɛlɛ obuamɛ ɔkpɛ ozhizhi kɛbɛtɛkpɛm nɛ owuwu kɛbɛtɛkpɛm.

Kɛlɛgɛganɛ Nɛ Aƒu Abha

¹³ Gɛ ozhizhilɛ bɔbɔɛ nɛ ba kpa fu nɛɛ, be di asɛ ba tɛ mɔ kɛgɛ la pɛɛ; so nɛɛ be feke opupuidzrɔdɔ klɛ la ga Krete aƒu nɛ tɔ.

¹⁴ Edi dze ko klɛ kɛlɛ gɛganɛ tili gɛ be kulu asɛ “owuwu kiwiɔyɛkɔɛlɛɛ,” ba fu ga bunishiesukpa nɛa bha petee.

¹⁵ Kɛlɛ nɛ ba vu keniabha opupu nɛ odzu klɛ ba dɛ na kɛlɛm tsoku; so bu kɔɛ lɛ dzo klɛ lɛ fu lɔ vɛnɔ.

¹⁶ Gɛ bu fla da ku okpukɔ nɛ bunishiesukpa bhli tieli gɛ be kulu asɛ Kauɖa nɛɛ, bu tɔ flogo pɛ bu mɔ kenia bha ɛkpãopupu toli ɔbɔ yɛkɛ kɔ lɔ.

¹⁷ Gɛ banɔ nɛ be he ɔlɛ akpɛ atrɔ keni nɛa bha nɛɛ, ba kpɛ ihui aganɔ opupugbla nɛesi sɛ tɛ lɛ nya ɔlɛ ovunɔ. Nɛ kifu sisi mɛ sɛ ba ba tɛ dɔ anyɛsɛ̃ nɛ Sitisɛ so nɛɛ, be zhinɔ opupuidzrɔdɔ klɛ bakɔ sɛ keniabha opupu nɛ ɔmɔ otugba vɛ.

¹⁸ Bu mɔ butɔ tsutsɔmɔ nɛ keniabha kɛlɛɛ nɛ ahwɛmɛ, gɛ kɛ kɔ sɛ nɛ keli zɛza nɛ mɛ bakpa etuku nɛ bu tɛ̃ kpɛ keni nɛm.

¹⁹ Nɛ kiwi tramɛ nɛa bha, be bu opupu nɛm axwɛwadɔ nɛ petee atɛ̃ nɛ balɛ nahwɛ ahwɛ.

²⁰ Gɛ kiwi ɔdɔgɔsɛ awɛ̃wɛ̃ tsyɛ ayulɔ wɛ̃ ewi gelee klɛ kɛlɛɛ gɛganɛ nɛ ka za tɛfufua bha so, bulɔ petee ba shɛnahwɛ kidzoenu didi kɔ ekpã zɛza.

²¹ Nɛ banɔ nɛ tɛzɛza anɛ kɛdɔ maŋamaŋa ewi gelee de, Paolo aba lɔ kititi nɛ balɛ amɛ klɛ aɖɔ sɛ: “Banyɛ mɔ, analo nɔ tɛ yɛkɛ mɛ kibui nɛ gɛ etsre nɔ sɛ nɔ tɛ yɛkɔ keniabha kidzo nɛ odenɔ Krete; analo nɔ gɛ tɔ bɔ kpɛ wɔnɔ shu nɛ kɛdɔzizi anɛ kɛdɔlɛla nɛ di mɛ.

²² Pɔ ɔtsɔ̃ nɛɛ etsre nɔ sɛ nɔ nyɛna wɔnɔ kemi kpɛkpɛ nɛm ovunɔ, alasɛ wɔnɔ mɛ anɔnyanɔ atɛ ba lɛla; keniabha opupu nɛ ko ɔlɛ obo zi.

²³ Kivu nɛ elishi nɛɛ axwɛdɛ kɔ Kpaya gɛ yɛ anɔ mɛ inu klɛ mɛ ɛdɛ kɛxwɛ kɔ nɛɛ, aza mɛ ɔbha

²⁴ klɛ aɖɔ sɛ, ‘Paolo, tɛ si kifu. Alasɛ tɛ ɔza kebhuim nɛ Kaɛza amɛ; klɛ Kpaya nɛ eshutukubui didi mɛ atɛ yɛkɔ banɔ nɛ petee gɛ wɔnɔ nɛ balɛ otsri keni nɛa bha ɔvɛ nɛ ɛkpã akpɛ wɔ ahwɛ.’

²⁵ So nɛɛ, banyɛ mɔ, nɔ nyɛna wɔnɔ kemikpɛkpɛ nɛm ovunɔ, alasɛ tɛyɛyɛkɛŋa lɛ mɛ ahwɛ nɛ Kpayam sɛ kɛ ba ba kɛlɛm ansɛ gɛ etsre mɛ.

²⁶ Kɛzɛ zɛɛ za lɛɛ za tsyɛ, alasɛ tɛ bɔ da dzrɔ nɛ kenimɛesukpa tieli abha.”

Keniabha Opupu Nɛ Tɛyɛyɛ

²⁷ Nɛ elishi lɔfɔ nɛ ɛlɛ̃ nɛa bha tsyɛ, kɛlɛ nɛ ka za bulɔ tɛfufu kana bha nɛ Adriatiki Aƒu nɛa bha, kibe lɛ gɛ ana ansɛ elishi kishitɛbha ana nɛɛ, bagɛ be bu opupu nɛ ti asɛ be bunɔ kesukpa.

²⁸ So ba tɛ̃ kedzyidzyi akpɛ keni nɛm klɛ ba mɔ sɛ keni nɛ mɛ dzu butsrukpɔ kɛfɔɛfɔ anɛ afɛtabha. Nɛ kibe bhlim nɛɛ ba za bhɛtɛ kedzyidzyi klɛ ba za mɔ asɛ kini nɛm tɛdzudzu nɛ lɛ butsrukpɔ afɛtezhita.

²⁹ Nɛ kifu sisim sɛ bu ba tɛ yalɛ aklãgbu so nɛɛ, ba wɔlɛ opupuidzrɔdɔ tɛlɛ̃ akpɛ buni nɛm klɛ be po sɛ tɛ keli aza.

³⁰ Tɛ bamɔ kisi so nɛɛ, bagɛ be bu opupu nɛ zhinɔ ɛkpãopupu nɛ atrɔ buni nɛ amɛ tɛ aza anasɛ opupuidzrɔdɔ tili le ze ti zhinɔ akpɛ keni nɛm nɛ opupu nɛesi.

³¹ Ɔkɛlɛ Paolo etsre behudugbani aka anɛ yɛ behudugbani nɛ asɛ, “Odinu sɛ banɔa nɛ ba za keniabha opupu nɛ mɛɛ, klɛ kidzoenu didi ma kɔ ɛkpã zɛza.”

³² Kɛlɛso nɛɛ behudugbani nɛ te ɛkpãopupu nɛ ohwi nɛ gɛ ɔnyɛna ɔlɛ aplɛnɔ ɔgbɛgbla nɛ apɔ klɛ lɔ wɔlɛ ɔshɛ.

³³ Flogo tɛ olizatɔ ɔbɔ na nɛɛ Paolo etsre anɔnyanɔ sɛ aŋa kɛdɔ. Aɖɔ asɛ, “Nɛ ewi lɔfɔntalɛ̃ nɛ gɛ aba fla nɛ mɛ nɛɛ,” “nɔ za kifu sisim klɛ nɔ za nɛ kɛdɔ maŋamaŋa, nɔ kɔ ŋa kɛdɔnyɛdɔ.

³⁴ Ɔtsɔ̃ nɛɛ ɛpɛ sɛ tɛ nɔ ŋa kɛdɔ tili. Kɛlɛ sɛ tɛ nɔ za nɛ ɛkpã. Wɔnɔ mɛayɛ kanyaka kɛtɔkpu tɛka tirikpo tsyɛ tɛ ba wɔlɛ nɛ yɛ adam.”

³⁵ Gɛ aɖɔ kibui nɛ beke nɛɛ, akpɛ ahwɛ ayɛkɔ boɖoboɖo teli klɛ ehu Kpaya ahwɛ nɛ balɛ petee amɛ. Klɛ aya klɛ akpa tã.

³⁶ Kemi ke kua lɛ peteem klɛ ba ŋa kɛdɔ tili balɛnahwɛ.

³⁷ Nɛ tɛxuxogo mɛ bu za banɔ kɛfɔɛfɔ edi tabha anɛ aftegene nɛ tɛehlo (276) nɛ keniabha opupu nɛ mɛ.

³⁸ Gɛ anɔnyanɔ aŋa kɛdɔ kana gɛ apɛɛ nɛɛ, ba yɛkɔ agɔnɛ kituku gɔgɔɛ nɛ atɛ̃a kpɛ aƒu nɛm tɛ opupu nɛ ɔza fukaa.

³⁹ Gɛ kanɔm ebhui nɛɛ, ba dɛ mɔ kesukpa nɛɛ mɔɔ, pɔ ba mɔ anyɛsɛ̃ ogbigbe toli asɛsɛ, ɔkɛlɛ ba ba trɔ asɛ tɛ ba da dzrɔ nɛ keniabha opupu onu gɛ baa ba na.

⁴⁰ Gɛ ba pɔ opupuidzrɔdɔ nɛ akpɛ keni nɛ mɛ, klɛ be bule ihui nɛ gɛ nyɛna kɛdɔ nɛ gɛ dzyɔ kidzo nɛ evunɔ. Klɛ ba sɔ kɛlɛpɔtɛ nɛ avɛnɔ opupu nɛ otugba sɛ tɛ kɛlɛɛ nɛ fua lɛ vɛnɔ ɔdzrɔkɔ.

⁴¹ Pɔ opupu nɛ ɔvɛ ɔdɔ yalɛ anyɛsɛ̃ovu klɛ lɔ vubɔ. Otugba nɛ ɔvubɔ, klɛ lɔ tɛ bɔ na ga, kɛlɛɛ nɛ fu hu ɔlɛ otugba klɛ ɔyɛ kpɛ bɔpɛ pɛɛ pɛm petee.

⁴² Behudugbani na trɔ sɛ tɛ be yi bevuza nɛ ga za opupu nɛ mɛ sɛ tɛ akanyaka eti de esi ashɛ̃.

⁴³ Pɔ balɛ akagbla nɛ apɛa sɛ tɛ ebu Paolo ɛkpã so nɛɛ adɛ dɛmɛ atrɔ tɛtutrɔɛ lɛ niabha kɔa lɛ. Akɔ sɛ tɛ balɛ aga ba na de nɛ betsoku keni nɛm eputɔnɔ tɛ be de ku obgigbe nɛa bha.

⁴⁴ Banɔ gɔgɔɛ nɛɛ kɛ ba lɛ sɛ tɛ ba za busupɛ bupɛpɛɛpɛ ɔdɔgɔsɛ opupu yɛyɛ nɛa bha ede ku ɔkɛlɛ. Ganɔ kidzoe nɛa bha anɔnyanɔ atsɔkɛ nɛ ɛkpã zɛzam.