Axwɛwɛwa 25 - ONUGBÙ NYƐNYÃ VUVƆ

Kebhui Kuklu Nɛ Festusɛ Amɛ

¹ Nɛ ewi tata kede gɛ bɔda ku ɔklɛ kema nɛ mɛ, Festusɛ ede Sizeria ebe ku Yerusalem,

² nɛ ɔkɛlɛ gɛ kpayanɔ anɛ Yuɖanɛ otugba banɔ na ba wɛ̃ nɛ yɛ amɛ klɛ ba kla Paolo ebui nɛ gɛ bayɛkɔ nɛ yɛ shu nɛ elu yɛ amɛ.

³ Ba yɛkɔɛ lɛ gɛganɛ ebisi edenɔ Festusɛ anasɛ anɔ gɛ atrɔa lɛa bha sɛ tɛ bebu Paolo asɛsɛ Yerusalɛm, alasɛ baa bala kɔ kidzo bhuibhui kɔ yɛ sɛ tɛ be yi yɛ.

⁴ Festusɛ ebui lɛ bunu sɛ, “Paolo be vu yɛ elu Sizeria, klɛ mɛnahwɛ nɛ ɛba vɛ ɔkɛlɛ kpataa.

⁵ Kɔ wɔnɔ otugbanɔ nɛ teli avɛ nɛ mɛ tɛ ada ɖɔ ebui nɛ gɛ ba yɛkɔ nɛ anɔ nɛ shu nɛ ɔkɛlɛ, onu gɛ kɛ lɛ klɛ mɛ sɛ abhɛtɛ buzizi tuli.”

⁶ Nɛ kibe lɛ gɛ ezi ewi tɛɔsɔɛ ɔdɔgɔsɛ kɛfɔ nɛ balɛ, ezhi avɛ Sizeria, klɛ nɛ kiwi bhla nɛ mɛ edzu kebhui klɛ akɔ sɛ ba gbanɔ Paolo amɛna yɛ amɛ.

⁷ Gɛ Paolo awɛ̃ nɛɛ, Yuɖanɛ nɛ gɛ zhi ede Yerusalɛm nɛ be li kititi akana yɛ, klɛ be bu ebui tsutsɔmɔtsɔmɔ kpi gɛ ba yɛkɔ nɛ yɛ shu nɛ aɖɔ, gɛ balɛ nahwɛ nɛ ba dɛ na alɛ shu danɛ.

⁸ Ɛklɛ Paolo ebu shu nu asɛ: “Ɛdɛ bhɛtɛ buzizi kanyaka gɛ kɛ lɔ kititi nɛ Yuɖanɛ ɔshã shu ɔdɔgɔsɛ busɔlɛvu anɛ Kaɛzaro shu.”

⁹ Gɛ Festusɛ apɛa sɛ tɛ aplɛnɔ Yuɖanɛ nɛ so, ebisi Paolo asɛ, “Ɔpɛɔ sɛ tɛ owu ɔvɛ Yerusalɛm tɛ ɔdɔ za kebhui nɛ mamɛ nɛ ebuia nɛ gɛ ba yɛkɔ nɛ wɔ shu nɛ dza?”

¹⁰ Paolo ebu klɛ nu asɛ: “Ɔtsɔ̃ nɛɛ ili kititi nɛ Kaɛza kebhuim, gɛ alasɛ tɛ be klu kebhui nɛ mɛ. Ɛdɛ bhɛtɛ buzizi kanyaka vɛnɔ Yuɖanɛ nɔkɔ, anasɛ gɛ wɔnahwɛ onyi mɔɔmɔ.

¹¹ Pɔ, onu gɛ, kii dzi sɛ ɛŋɛpɔ tili gɛ ki bisi butsi kɔ mɛɛ, ɛdɛ gbe sɛ ɛtɛ ba tsi. Pɔ onu gɛ ebui nɛ gɛ Yuɖanɛ na yɛkɔ nɛ mɛ shu nɛ edzi itro, klɛ anɔnyanɔ adɛ mɔ kidzo sɛ ayɛkɔ mɛ akpɛ ahwɛ kɔa lɛ. Ibisi denɔ Kaɛza ahwɛ!”

¹² Gɛ Festusɛ ada ɖɔa ɖɔ nɛ yɛ beshishe nɛ beke, ebe bu aɖɔ asɛ: “Ɔbhɛtɛ tɛbibisi denɔ Kaɛza ahwɛ. Kaɛza kɔ ko ɔbɔ vɛ!”

Festusɛ Ada Nyɛna Ebui Nɛ Ekusi Agrippa

¹³ Nɛ ewi bhli telie de nɛ Ekusi Agrippa anɛ Bɛnis bede ku Sizeria sɛ tɛ bada sɛnɔ Festusɛ anɛ kɛtɔkpu kpɛkpɛesi kɔ yɛ.

¹⁴ Gɛ kinu sɛ be be zi ewi gelee nɛ ɔklɛ so, Festusɛ anyɛna Paolo kibui nɛ edi plɛnɔ ekusi. Asɛ: “Anyɛ teli alɛ ɔkɛ̃ gɛ Felikisi ashɛ̃nahwɛ elu anasɛ evuza ana.

¹⁵ Gɛ ɛvɛ Yerusalɛm nɛɛ, Yuɖanɛ kpayanɔ anɛ beshishe na yɛkɔ ebui nɛ yɛ shu klɛ be bisi asɛ be bu yɛ kɛpɔ.

¹⁶ “Itsrea lɛ sɛ kɛdɛ nu Romanɛ bugu sɛ ɔyɛkɔ anɔnyanɔ ɔkpɛ ahwɛ flogo tɛ aba tsyanɔ bagɛ ayɛkɔ kibui nɛ yɛ pɛ ba kɔ yɛ kidzo sɛ ebu ishunu nɛ agɛ ba yɛkɔ nɛ shu.

¹⁷ Gɛ be be ku ɔkɛ̃ nɛɛ, ɛdɛ wlãnkɛ kibui nɛ vɛnɔ kide, pɔ ɛkɔ sɛ kebhui kuklua na za klɛe li zɛza klɛ ɛkɔ sɛ ba ba gbanɔ anɔ nɛ amɛna.

¹⁸ Gɛ baga yɛkɔ kibui nɛ yɛ na lɔ sɛ tɛ baɖɔ kaɖɔ, ba dɛ ɖɔ ebuikpãnɔ nɛ gɛ alɛ mɛ idi kidzoenu sɛ alɛa bhɛtɛ pɛ ba ɖɔ.

¹⁹ Nɛ kɛlɛ ɔzakɔ nɛɛ, ebui teli gɛ ba wlãnkɛ nɛ yɛ denɔ balɛ nahwɛ busɔlɛ shu anɛ anyɛ tsitsi teli gɛ be klua sɛ Yesu gɛ Paolo evunɔ aɖɔ sɛ aka lɛ nɛ ɛkpã.

²⁰ Ɛba lɛla nɛ kana gɛ ɛba nyɔ ebuia nɛ mɛ; so nɛ eba bisi yɛ kana gɛ aba dɛmɛa sɛ aba vɛ Yerusalɛm tɛ be de klu ebuia nɛ kebhui nɛ yɛ dza.

²¹ Kibe lɛ gɛ Paolo abhɛtɛ tɛbibisi nɛ yɛ tɛshɛshɛ̃nahwɛ shu edenɔ Apalete nɛ ɔkɔ nɛɛ, ɛkɔ sɛ aza balɛ ahwɛmɛ ɔdɔ nanɔ kibe lɛ gɛ ɛba sɛsɛ yɛ nɛ Kaɛza ɔkɔ.”

²² Ɔkɛlɛ Agrippa etsre Festusɛ asɛ, “Ɛba pɛsɛ tɛ mɛ nahwɛ enu anya nɛ ebui.” Klɛ Festusɛ aɖɔ sɛ, “Kivu obo nu yɛ kaɖɔ.”

Paolo Aba Wɛ̃ Nɛ Agrippa Amɛ

²³ Klɛ kiwi bhla nɛ Agrippa anɛ Bɛnisɛ be be ku nɛ tɛkusi mɛ klɛ be tsoku buvu nɛm gɛ banɔ nɛ ba kpasɛ nɛ bakagbla anɛ ɔmagbla nɛm otugba banyɛ. Nɛ Festusɛ tɛbibisi nu, ba gbanɔ Paolo amɛna buvu nɛm.

²⁴ Festusɛ efeke onugbu aɖɔ sɛ: “Ekusigbla Agrippa, anɛ banɔ petee ga lɛ ɔkɛ̃ nɛ bulɔ, nɔ mɔ anya! Yuɖanɛ nɛ petee be bisi denɔ mɛ ahwɛmɛ nɛ Yerusalɛm anɛ Sizeria nɛ ɔkɛ̃, nɛ igugu kpɛkpɛa sɛ ede dzyenɔ gɛ aza ba za nɛ ɛkpã.

²⁵ Ɛga ebuim klɛ ɛmɔ sɛ adɛ bhɛtɛ kibui nyɛ bui gɛ dzyenɔ butsi, pɔ gɛ atɛ bhɛtɛ tɛbibisi sɛ ba shɛnahwɛ yɛ shu denɔ akagbla nɛ ɔkɔ nɛ Rom so ɛbhɛtɛ tɛtɛtrɔ sɛ ɛba yɛkɔ yɛ ɛsɛsɛ ɔkɛlɛ.

²⁶ Pɔ kibui nyɛ bui ma mɛ ahwɛ ana gɛ ɛba ŋlɔmɛ denɔ yɛ shu kɔ Roma Ekusigbla. Klɛ shu so pɛ ɛgbanɔ yɛ ɛmɛna wɔnɔ petee amɛ, ɔyɛkɔdɛ nɛ anɛ wɔ Ekusigbla Agrippa amɛ, sɛ tɛ ebuim nyunyɔ nɛ yɛ kede nɛ tɛ ɛba mɔ kibui tili nɛ yɛ shu ɛŋlɔmɛ.

²⁷ Alasɛ idi lɛ sɛ kɛ tɛ ba dzi kibui nɛna sɛ ɛyɛkɔ evuza ɛsɛsɛ kibui nyɛ bui mamɔɖɔ mamɔɖɔ gɛ lɔ kititi nɛ yɛ shu.”