Axwɛwɛwa 23 - ONUGBÙ NYƐNYÃ VUVƆ

¹ Paolo edi bebhuiklu nɛ amɛ klɛ aɖɔ sɛ, “Madzyalɛ mɔ, ɛtɛ wa mɛ kɛxwɛ nɛ gɛ Kpaya atrɔ kɔ mɛ nɛ mɛ idzyi petee ɔbɔ tɔnɔ obo wi.”

² Nɛ klɛ shu nɛ Kpayanɔ Ananias nɛ etsre banɔ nɛ gɛ li kititi nɛ Paolo ɔbha na sɛ be hu yɛ kɛdɔ nɛ onugbu.

³ Ɔkɛlɛ Paolo aɖɔ sɛ, “Kpaya ebe hu wɔ tsyɛ kɛdɔ, wɔ anɔ kpã onu! Ozhedzi ɔkɛlɛ ɔso klu kebhui nɛm nɛ ɔshã nɛ nu, nɛ kibe lɛ mɛ gɛ wɔnahwɛ ɔtɛ da nɛ ɔshã nɛa bha pɛ ɔkɔ sɛ be hu mɛ kɛdɔ!”

⁴ Banɔ nɛ gɛ li kititi nɛ Paolo ɔbha na ɖɔ sɛ, “Kidzo ɖueɖu ɔmɔ sɛ tɛ ɔklua Kpayanɔ gbla?”

⁵ Paolo ebu klɛ nu asɛ, “Madzyalɛ mɔ, ɛdɛ mɔ sɛ enu Kpayanɔ gbla; alasɛ kɛ ŋlɔmɛ li sɛ: ‘Tɛ ɖɔ kaɖɔ kpã nɛ anɔ nɛ gɛ aŋa wɔnɔ kɔayɛ nɛa bha nɛ shu.’ ”

⁶ Ɔkɛlɛ nɛɛ Paolo, gɛ enyi asɛ banɔ nɛ teli benu Sarusianɛ klɛ bagɔgɔɛ nɛ enu Farisianɛ so nɛɛ, akpɛ onugbu klɛ eklu edenɔ Bebhuiklu nɛ mɛ asɛ, “Madzyalɛ mɔ, mɛ nɛ Farisieyi mɛ ɛnu, Farisieyi ya mɔ mɛ. Ili kititi kɔ kebhui kuklu nɛ mɛ alasɛ ɛyɛkɛ ŋa sɛ tɛ lɔlɔ lɛ nɛ butsie de.”

⁷ Gɛ aɖɔa na nɛɛ, ebla ebe tsoku Farisianɛ anɛ Sarusianɛ nɛ kisshi, gɛ kɛba kɔ sɛ oxogokɔ nɔ ba ma ku bɔpɛ tɔbha.

⁸ (Sarusianɛ nɛ na ba ɖɔ sɛ tɛnyɛnyɛmɛ denɔ butsi mɛ ma, klɛ kɛdɔnyɛdɔ ma gɛ nu kpaya baxwɛdɛ ɔdɔgɔsɛ ɛfufɔɛ, pɔ Farisianɛ nɛ xũa sɛ kɛdɔɛ lɛ nɛ petee lɛ.)

⁹ Ozikpkpɛ obo ku ɔkɛlɛ, klɛ ɛshadɔkasɛ nɛ teli gɛ nu Farisianɛ na ba lɔ kititi gɛganɛ nɛ kibui nɛ shu. Klɛ baa ɖɔ sɛ, “Blɔ bɔdɛ mɔ kɛdɔ nyɛdɔ lɛ zi nɛ anyɛa nɛ shu.” “Klɛ onu gɛ kidzi sɛ ɔfufɔɛ ɔdɔgɔsɛ Kpaya axwɛdɛ atɛ ɖɔ kaɖɔ etsre yɛ?”

¹⁰ Ozikpɛkpɛ nɛ ebe dzi ebla gɛganɛ gɛ akɔsɛ Kifu ba kpa Apalete nɛ ku sɛ ba ba tsywɛ Paolo akpɛ bɔpɛ pɛɛ pɛm. Apalete na kɔsɛ yɛ ovulo nɛ lɔ vɛ tɛ lɔ dɔ yɛkɛ Paolo nɛ banɔ nɛ ahwɛmɛ tɛgbɛgba tɛ ba yɛkɔɛ amɛna balɛ behudugbani bukagbla nɛm.

¹¹ Nɛ kɛlɛ elishi nɛ mɛ Apalete nɛ aza plɛnɔ Paolo klɛ etsrea sɛ, “Kpɛ kite! Anasɛ gɛ ɔtɛ ɖɔ denɔ mɛshu nɛ Yerusalɛm nɛ, kana ko alasɛ tɛ ɔɖɔ nɛ Rom tsyɛ.”

Tɛnyɛnya Nɛ Paolo Shu Kɔ Yɛ Tɛyiyi

¹² Nɛ keli zɛza mɛ Yuɖanɛ na ba nya aglɔ nɛ atabu kɛka sɛ batɛ ba wɛŋ buni, batɛ ba ŋa kɛdɔ ɔdɔ nanɔ kibe lɛ gɛ be be yi Paolo.

¹³ Banɔ na dɛ afɛtalɛ̃ gɛ aza onugbu nyɛnya nɛm.

¹⁴ Batɔnɔ Kpayanɔ gbla anɛ beshishe nɛ avɛ ada ɖɔ sɛ, “Blɔ bɔtɛ nya nɛ atabu kɛka sɛ bɔtɛ ŋa kɛdɔnyɛdɔ ɔdɔ nanɔ kibe lɛ gɛ bu yi Paolo.

¹⁵ Ɔtsɔ̃ nɛɛ, wɔnɔ nɛ Bebhuiklu no bisi sɛ Apalete nɛ agbanɛ Paolo amɛna tɛ abhɛtɛ ansɛ nɔ pɛɛ sɛ tɛ no nu yɛ ebui nɛm mɔɔ mɔ gɛ ba yɛkɔ nɛ yɛ shu. Blɔ nɛ bɔtɛ bala kɔ yɛ tɛyiyi flogo pɛ aba ba nanɛ wɔnɔ nɛ ɔkɛ̃.”

¹⁶ Pɔ gɛ Paolo yɛada yɛeyianyɛ nɛ nu balɛ tɛnyɛnya nɛ, atɔnɔ avɛ bukagbla nɛm klɛ ede tsre Paolo sɛ kana.

¹⁷ Ɛklɛ Paolo eklu behudugbani aka nɛ teli klɛ etsrea sɛ, “Gbanɔ anyɛnuvɔɛa nɛ ɔvɛnɔ wɔnɔ Apalete; evunɔ kibui tili asɛ etsre yɛ.”

¹⁸ Klɛ so nɛ agbanɔ yɛ avɛnɔ ovuloaka nɛ ɔkɔ. Axwɛdɛ nɛ aɖɔ tsre yɛa sɛ, “Paolo, gɛ enu evuza, yɛa sɛ ɛgbanɔ anyɛnuvɔɛa nɛ ɛmɛna wɔkɔ, alasɛ kibui tili lɛ yahwɛ gɛ asɛ etsre wɔ.”

¹⁹ Apalete nɛ anyɛna anyɛnuvɔɛ nɛ ɔhwɛ klɛ agbanɛ yɛ avɛnɔ kɛwã klɛ ebisi yɛa sɛ, “Kide gɛ lɛ wɔ ahwɛ gɛ ɔsɛ otsre mɛ?”

²⁰ Anyɛnuvɔɛ na sɛ, “Yuɖanɛ nɛ peteea ba dɛmɛa sɛ be be tsre wɔ tɛ ɔgbanɔ Paolo ɔmɛna Bebhuiklu nɛ amɛ kivu tɛ abhɛtɛ ansɛ be bisi yɛ ebui nɛ mɛ enu mɔɔ mɔ.

²¹ Tɛ dɛmɛ ɔkɔa lɛ ana, ba fla banɔ afɛtalɛ̃ gɛ be kpu eli kidzom kɔ yɛ. Ba tanɔ kɛdɔ asɛ be ke yi Paolo batɛ ba ŋa kɛdɔ, batɛ ba wɛ̃ buni. Balɛ tɛbɛbalam ɔtsɔtsiɔ̃, bepo wɔ tɛdɛdɛmɛ kɔa lɛ nɛ balɛ tɛbibisi nɛ nu.”

²² Behudugbani nɛ akagbla nɛ ashɛ̃nahwɛ anyɛnuvɔɛ nɛ shu, klɛ akpɛ yɛ ɔshã sɛ, “Tɛ tsre anɔnyanɔ sɛ ɔtɛ yɛkɔ balɛ tɛbibisi nɛ obo lu mamɛ.”

Be Bu Paolo Ayɛkɔ Asɛsɛ Sizeria

²³ Klɛ Apalete nɛ ebu yɛ banɔ shishe nɛ tɛabha, klɛ etsrea lɛ asɛ, “Nɔ bala kɔ behudugbani kɛfɔɛfɔ afɛtabha, sɔelete afɛtegene nɛ akpɛelete kɛfɔɛfɔ afɛtabha kɔ Sizeria tɛvɛvɛ elishia nɛ ɛɖɔ tizhitam.

²⁴ Bala basɔ teli ɔkɔ Paolo gɛ baba yɛkɔ yɛ avɛnɔ ada kpɛ ahwɛ kɔ Amaŋagbla Felikisi.”

²⁵ Aŋlɔmɛ keplukpa na nia sɛ:

²⁶ Klaudius Lisias, kɔ Amaŋagbla, Felikisi: Ɛsɛnɛ wɔ.

²⁷ Anyɛa nɛɛ, Yuɖanɛ nɛ balɛ vu yɛ klɛ ba pɛa sɛ tɛ beyi yɛ, pɔ nɛɛ ɛba nɛ blɔ nɛ mɛ behudugbani klɛ lɔ ba yɛkɛ yɛ nɛ balɛ ahwɛ, alasɛ ɛba nu sɛ Roma eyie nu.

²⁸ Ɛpɛ sɛ tɛ iti kɛdɔnɔ nɛ so gɛ be bhui yɛ nu, klɛso nɛɛ ɛyɛkɔ yɛ ɛmɛna balɛ Bebhuiklu.

²⁹ Ɛba mɔ sɛ ebui nɛ gɛ ba yɛkɔ nɛ yɛ shu nɛɛ ede balɛ ɛshã nɛ shu, pɔ nɛ kibuinyɛbui dɛ bu yɛ kɛpɔ gɛ bayɛkɔ nɛ yɛ shu pɛ kɛ ba kɔ sɛ be yi yɛ ɔdɔgɔsɛ ba kpɛ yɛ buvu.

³⁰ Kibe lɛ gɛ inu sɛ ba nya kɔ kititi lulɔ nɛ anyɛ nɛ shu nɛɛ, klɛ mɛ yɛkɔ yɛ ɛsɛsɛ wɔ kɛsɛsɛ tili. Ɛkɔ tsyɛ sɛ bagɛ ba yɛkɔ ebui nɛ yɛ shu nɛɛ, be bu yɛ buzizi nɛ akasɛ mɔɔ mɔ.

³¹ Klɛso behudugbani, nɛ igbe nɛ gɛ bakɔa lɛ nɛ nu, ba gbanɔ Paolo aganɔ elishi nɛm klɛ ba mɛna yɛ ebe kunɔ popopo nɛ Antipatris.

³² Kiwi bhla nɛɛ ba kɔ sɛ sɔelete na gbanɛ yɛ avɛnɔ, klɛ bagɔgɔɛ nɛ xũ nɛ tsodzi avɛ balɛ bukagbla nɛm.

³³ Gɛ sɔelete nɛ de ku Sizeria nɛɛ, ba shɛnahwɛ keplukpa nɛ shu akɔ amaŋagbla klɛ ba yɛkɔ Paolo tsyɛ akpɛ ahwɛ kɔ yɛ.

³⁴ Amaŋagbla na danɛ keplukpa nɛ akla klɛ ebisi asɛ Roma kapɛ ɖueɖum anɔ nɛ ede. Gɛ ebe ti sɛ ede Silisia nɛɛ,

³⁵ aɖɔ sɛ, “Ɛba nu wɔɛ bui onu gɛ bagɛ ayɛkɔ kibui nɛ wɔ nɛ be ku ɔkɛ̃ nɛ.” Klɛ akɔ sɛ ba yɛkɔ Paolo ada kpɛ tɛpupoe si nɛ Heroɖesgbla nɛ bupa mɛ.