Axwɛwɛwa 19 - ONUGBÙ NYƐNYÃ VUVƆ

Paolo Nɛ Efesos

¹ Nɛ kibe lɛ nɛ gɛ Apollosɛ aza Kɔrintio, Paolo xũ na da ga kɛmɛ mɛ kidzo klɛ ede ku Efeso. Ɛkɛlɛ nɛ atsyanɔ badɔkpasɛ teli

² klɛ ebisi ala sɛ, “Nɔ yɛkɛ Ɔfufɔɛ Dzyɔgo gɛ nɔ yɛkɛ kibui nɛa bha ɔŋa nɛ xã?” Be bu klɛ nu asɛ, “Owo, bu ka nu di tsyɛ sɛ Ɔfufɔɛ Dzyɔgo ɔlɛ.”

³ Klɛso Paolo ebisi asɛ, “Klɛ kide bunikpɛkpɛ nɔ yɛkɛ?” Be bu klɛ nu asɛ, “Yohanɛsɛ bunikpɛkpɛ lɔ yɛkɛ.”

⁴ Paolo aɖɔ sɛ, “Yohanɛsɛ bunikpɛkpɛ nɛ nu kitem tsyitsyina yɛ. Etsre banɔ na sɛ ba yɛkɛ agɛ yɛa ba nɛ yɛe de nɛa bha aŋa, yɛ enu Yesu.”

⁵ Gɛ be nu kana nɛ, ba kɔ la kpɛ buni nɛ akɔa lɛ nɛ Apalete Yesu kinyim.

⁶ Kibe lɛ gɛ Paolo atrɔ ahwɛ nɛ balɛa bha nɛ, Ɔfufɔɛ Dzyɔgo nɛ ɔba balɛa bha, klɛ baɖɔ kaɖɔ nɛ anɛkɛvuvɔ mɛ klɛ ba ɖɔ ebui tsyɛ elu.

⁷ Banyɛ ansɛ kɛfɔntɛabha balɛ aza ɔklɛ.

⁸ Paolo ebe tsoku oxogokɔvu nɛ mɛ klɛ aɖɔ kaɖɔ nɛ bugɛganɛ mɛ nɛ ɔkɛlɛ wele tɛata, atsya ebui mɛ ebu nɛ Kpaya bukusiɔŋakɔ nɛ shu.

⁹ Pɔ be teli be dzi banɔ gɛ ba dɛ kpɛ abhla kɔ kibui; ba dɛ dɛmɛ ayɛkɛ kibui klɛ nɛ anɔnyanɔ amɛ nɛɛ ba gba kɛdɔ ada klɛ Kidzo. Klɛso nɛ Paolo ashɛ̃ alɔa lɛ. Agbanɔ badɔkpasɛ nɛ aplɛnɔ ishu klɛ aga ebuim nɛ balɛ kiwinyɛwi nɛ kɛdɔ kɛkasɛvu nɛm nɛ Tirannus.

¹⁰ Kɛdɔ kɛkasɛ nɛ vɛ klɛa bha agɔ tabha nyɔɔ, sɛ tɛ Yuɖanɛ anɛ Grikanɛ nɛ gɛ balɛ Asia kɛdɔ nɛ mɛ tsyɛ be nu Apalete nɛ kibui.

¹¹ Kpaya abhɛtɛ ebui gɛ ebhuso anɔ dzyɔ gelee aganɔ Paolo kabha,

¹² gɛ la kɔ sɛ banɔ amɛavulɔ anɛ etemɛpɔtɛ gɛ hunɔ yɛ nɛ tsyɛ dzi kɛdɔ gɛ hunɔ banyɛnya ko pɛ balɛ banya na shɛ klɛ ɛfufɔɛkpã koeyi nɛ balɛm.

¹³ Yuɖanɛ teli gɛ ba ga fla sɛ ba kɛka ɛfufɔɛkpã ebu na pɛ sɛ tɛ be ze klu Apalete Yesu kinyi akpɛ ba gɛ ɛfufɔɛkpã tsri alɛa bha. Klɛ ba ɖɔ sɛ, “Nɛ Yesu nɛ gɛ yɛ kinyim Paolo aɖɔ Kpaya kibui, ɛtsre wɔ sɛ fla okoeyi.”

¹⁴ Seva gɛ enu Yuɖanɛ Kpayanɔ yɛeyialɛ tiegene teli bala wa kɛxwɛ lɛ.

¹⁵ Kiwi nɛ tili nɛ, ɔfufɔɛkpã nɛ ɔbɔ dɛmɛ ɔkɔa lɛ ɔsɛ, “Yesu nɛ inyi yɛ, klɛ inyi kibui denɔ Paolo shu, pɔ wɔ nu ane?”

¹⁶ Klɛ anɔ nɛ gɛ yɛa bha ɔfufɔɛkpã nɛ otsri nɛ alɔ dɔ balɛa bha klɛ aŋa balɛ peteea bha. Anɔ nɛ etua lɛ tɛtutu gɛ kɛ kɔ sɛ be si ekoeyi nɛ bupa nɛ mɛ zholiaa anɛ dzyosu nɛ balɛ shu.

¹⁷ Gɛ Yuɖanɛ anɛ Grikanɛ nɛ ga lɛ Efesos nɛ be nu kibui nɛɛ, kifu kua lɛ, so nɛ Apalete Yesu kinyi ba ba kpɛ lɛ nɛ kabha.

¹⁸ Banɔ gelee gɛ baba yɛkɛ aŋa na ba danɛ ishum nɛ balɛ buzizi nɛshu ɔtsɔlɛ.

¹⁹ Banɔ tɛkpikpem tili gɛ be dzi behuini ga ba yalɛ balɛ ihui ɛkpɛtɛ nɛ aba pɔɛ nɛ ɔtɔ. Kɛdɔ nɛ gɛ ba pɔɛ nɛ kedziŋɛŋa ganɛ kɛbɔɛ nɛ kɛlɛbe nɛm. Kɔba lɛlɛ nɛ terikpo aba na kiwi zɛzɛ kɛxwɛ wɛwa kɛbhɛ.

²⁰ Ganɔ kidzoe nɛa bha nɛ Apalete nɛ kibui nɛ ba yɛkɛ kanɔ nɛm klɛ kishe nɛ kemi.

²¹ Nɛ anɛ nɛ petee tɛbɛba kede nɛɛ, Paolo aba trɔa sɛ aba shɛ avɛ Yerusalɛm aganɔ Makedonia anɛ Atsyaia. Klɛ aɖɔ sɛ, “Onu gɛ ɛda ku ɔklɛ nɛɛ, alasɛ tɛ ɛvɛ Roma tsyɛ.”

²² Akpɛ Timotio anɛ Erastusɛ gɛ enu yɛ bapɛplɛnɔ nɛ asɛsɛ Makedonia, nɛ kibe lɛ nɛ mɛ gɛ yɛ awɔ Asis kɛdɔ nɛm kibe dzidze bɔɛ.

Kɛdɔzizi Igugu Nɛ Efesos

²³ Nɛ kibe lɛ nɛm nɛ tɛtutɔtɔ tili baba denɔ Apalete nɛ Kidzo shu.

²⁴ Anyɛ teli gɛ be klua sɛ Demetriusɛ gɛ enu sɛkafufuadɔnɔ, klɛ aba yɛkɔ yɛ edzu sɛkafufu ibuidi bevu nɛ Artemisɛ ɔma nɛm klɛ kidi dzi kɛxwɛ bhli kɔ ba ga wa axwɛa lɛlɛ nɛdi.

²⁵ Ekulu banɔ nɛ exogo, aplɛnɔ baxwɛwa nɛ gɛ akpɛ ɔkɔ nɛ budzigɛga lɛlɛ nɛ di, klɛ asɛ: “Banyɛ mɔ, no nyi ɔsɛ bu mɔ kɔba mɔmɔ denɔ kɛxwɛ nɛ mɛ.

²⁶ Klɛ nɔ mɔ no nu kana gɛ anɔa nɛ gɛ enu Paolo atɛ wɛɛ klɛ etsyina banɔ gelee kɛtɔkpum nɛ ɔkɛ̃ nɛ Efesos ɔma nɛm ɔyɛkɔ kana Asia kɛdɔ nɛm petee. Aɖɔa sɛ nɛ bakpaya nɛ gɛ banɔ abhɔ nɛ ahwɛ be di nu bakpaya dzyɔgo nɛ kapɛnyapɛ mɛ.

²⁷ Ganɛ blɔ kedzi tɛzizi shu ko kifu lɛ, pɔ ɔyɛkɔ plɛnɔ nɛ obudidzɛ gbla Artemisɛ busɔlɛvu nɛ shu tsyɛ ba zi, klɛ nɛ obudidzɛ nɛ nahwɛ gɛ ba kpɛ kɛtɔkpue si kɔ nɛ Asia nɛ kanɔm petee ishubhubhui gbɛgbla nɛ ba xule.”

²⁸ Gɛ be nua na nɛ, ba mɔ oblo zizi anɛ igugu kpɛkpɛ sɛ: “Artemisɛ nɛ Efesosɛ ɔgbɛgbla oo!”

²⁹ Edidze ko ɔmagbla nɛ mɛ oyuku nɛ igugu kpɛkpɛ. Edi dze klɛ be vu Gaiusɛ anɛ Aristatsyusɛ, gɛ nu Paolo yɛ beshopo denɔ Makedonia, klɛ be si eku buwɔfu ɔwɔkɔgbla ansɛ anɔ terikpo.

³⁰ Paolo apɛa sɛ tɛ awɛ̃ nɛ banɔɛza nɛ amɛ, pɔ badɔkpasɛ na dɛ kɔ yɛ kidzo.

³¹ Otugba banɔ nɛ teli tsyɛ nɛ kɛma lɛlɛ nɛm gɛ benu Paolo yɛ ɔbhɛa lɛ na kla yɛ ɔsɔ aakɔ yɛ kɛtɔkpu sɛ atɛ pɛɛ sɛsɛ asɛ etsoku buwɔfuvu nɛm.

³² Banɔ oxogokɔ nɛ petee obo futsu: Beteli bakpɛ kibui trikpo igugu, beteli kɛbhlatɔ. Banɔ gelee be ti nyi kibui nɔ nɛ so pɛ beli ɔkɛlɛ.

³³ Yuɖanɛ nɛ tii Alɛxanda akpɛ otugba, klɛ banɔɛza nɛ tili kpɛ ogugu klɛ be tsre yɛ kibui nɔ nɛ gɛ aba ɖɔ. Klɛ Akasɛ alɛ ahwɛ sɛ badɔfɔɔ̃ akɔɛ tɛ awɛlakɛshu nɛ banɔ nɛ amɛ.

³⁴ Pɔ gɛ bamɔ sɛ anɔ nɛ enu Yuɖaeyi nɛɛ, balɛ petee ba kpɛ igugu nɛ ketsu mɛ ɔkɔ nanɔ ɛɖatɛta tɛbha sɛ: “Artemisɛ nɛ Efesosɛ ɔgbɛgbla oo!”

³⁵ Ɔmagbla nɛ otugbanɔ nɛ ebe vu banɔɛza nɛ ibue klɛ aɖɔsɛ: “Efesosanɛ mɔ, sɛ kanɔ petee kenyia sɛ Efesos ɔmagla ɔlɛ di Artemisɛ busɔlɛvu anɛ bulɛ tɛzɛza nɛm gɛ wɔlɛ denɔ owũsise nɛa bha?

³⁶ Klɛso nɛ, nɛ kibe lɛm gɛ ba tɛ ba na ebuia nɛ otro kɔ nɛɛ, alasɛ tɛ nɔ dɔ sɛ̃ɛ tɛ nɔ tɛ nawɔ̃ ɔbhɛtɛ kibuinyɛbui.

³⁷ Nɔ gbanɔ banɔa nɛ ɔmɛna ɔkɛ̃ nɛ kibe lɛ gɛ beke zru lɔ busɔlɛvu ɔdɔgɔsɛ ba tɛ ɖɔ kibusobui kanyaka nɛ bulɔ obudidzɛ nɛ shu.

³⁸ Nɛ klɛ shu so, onu gɛ Demetrius anɛ yɛ baxwɛwa na bhɛtɛ buzizi nɛ anɔ teli shu, bubhuioklukɔ nɛ danɛ dzi klɛ bagɛ ba ŋa ɔma nɛabha na lɛ. Ba ba na kibui yɛkɔ nɛ anɔ shu.

³⁹ Onu gɛ kibui tili kɛka lɛ gɛ nɔ pɛɛ sɛ tɛ no bu oyinɔ nɛɛ, alasɛ tɛ ba nyɛna lɛ edi nɛ ɔshã oxogokɔ.

⁴⁰ Ansɛ gɛ kidzi nɛɛ, bu kpasɛ kifum sɛ ba ba yɛkɔ kibui nɛ bulɔ shu nɛ buhunya hunya akpɛ obo nɛ ebui nɛ so. Nɛ kibui nɛ mɛ bu tɛ ba na ishunu bu, alasɛ kibuinyɛbui ma gɛ bu ba yɛkɔ kasɛ sɛ klɛso pɛ bu bhɛtɛ buzizi nɛ.”

⁴¹ Nɛ kibui nɛede nɛ akpɛ ɔzakɔ nɛ dzo.