Axwɛwɛwa 17 - ONUGBÙ NYƐNYÃ VUVƆ

Nɛ Tɛsalonika

¹ Gɛ ba ga Amfipolis nɛ Apollonia ekoeyi, ba vɛ ede ku Tɛsalonika ɛklɛ gɛ Yuɖanɛ oxogokɔgbla toli ɔza.

² Ansɛ gɛ yɛ aabhɛtɛ xũii, Paolo ede tsoku oxogokɔvu nɛm, nɛ Kimuenewi tata bha klɛ ada ɖɔ kaɖɔ nɛ banɔ denɔ Kpayɛbui nɛ shu,

³ klɛ eebu kibuiesi aatrɔ kɛlɛa bha asɛ Kristo nɛɛ alasɛ tɛ aba mɔ butɔ tɛ anyɛmɛ edenɔ betsitsi nɛ kishi. Ɛklɛ Paolo aɖɔ sɛ, “Yesua nɛ gɛ yɛ kibui mɛ ɖɔ nɛ yɛenu Kristo.”

⁴ Yuɖanɛ teli gɛ kibui nɛ mɛ danɛ kɔa lɛ nɛ tsoku kɛlɛm aplɛnɔ Paolo anɛ Silasɛ, ansɛ gɛ Grikanɛ gelee gɛ benu banɔ gɛ besi Kpaya kifu nɛ tsyɛ ayɛkɛ kibui klɛ badzɛgbla gelee tsyɛ ba yɛkɛ kibui.

⁵ Pɔ Yuɖanɛ na yɛkɔ kawɔ̃kpɛ; so bede xogo banɔ kpã teli edenɔ budzi nɛ mɛ, klɛ ba bhɛtɛ banɔɛha klɛ ba kpa hunyahunya kpɛ nɛ ɔmagbla nɛ mɛ. Ba kpanisi avɛ ede tsoku Yasɔn bupa mɛ ada pɛ Paolo anɛ Silasɛ sɛ tɛ bevua lɛ avɛnɔ banɔɛza.

⁶ Pɔ gɛ ba dɛ mɔa lɛ nɛɛ, bede vu Yasɔn nɛ tɛgbɛgbam anɛ badzya teli ayɛkɔa lɛ avɛnɔ ɔmagbla nɛ mɛ banɔ shishe nɛ ogugu kpɛkpɛ sɛ: “Banɔa nɛ gɛ ba mɛna butɔ nɛ kanɔ nɛ mɛ petee atsya balɛ be yi ɔkɛ̃ tsyɛ ɔtsɔ̃ naa,

⁷ klɛ Yasɔn tsyɛ ayɛkɛa lɛ edzu yɛ bupa mɛ. Balɛ petee alɔ kititi nɛ Kaɛza Klaɛɖios ɛshã nɛ shu, klɛ baɖɔ sɛ ekusigbla bhlatɔ teli aka lɛ gɛ be klua sɛ Yesu.”

⁸ Gɛ ɔmagbla nɛ mɛ bekusi anɛ banɔɛza nɛ nua na nɛɛ balɛ petee be futsu.

⁹ Nɛ ɔkɛlɛ nɛɛ bakɔ sɛ Yasɔn anɛ banɔ nɛ gɛ bevu na kpɛ ahwɛ keplukpam klɛ ba shɛnahwɛ balɛ shu pɛ ba shɛ.

Nɛ Beria

¹⁰ Nɛ keli bibele nɛm ko, badzya nɛ bayɛkɔ Paolo anɛ Silas asɛsɛ Bɛrea. Nɛ balɛ ɔkɛlɛ tɛkuku mɛ, ba shɛ avɛ Yuɖanɛ oxogokɔvu nɛm.

¹¹ Ɔtsɔ̃ nɛɛ Bɛreanɛ na bhɛtɛ banɔ adɛ Tɛsalonianɛ, alasɛ balɛ nɛɛ bayɛkɛ Kpaya kibui nɛ awɔ̃ dzudzu mɛ klɛ ba nyɔ klɛ shu mɔɔ mɔ kiwinyɛwi sɛ tɛ bamɔ sɛ kibui nɛ gɛ Paolo aɖɔ nɛ nu kɛgba dza.

¹² Yuɖanɛ gelee ba yɛkɛ kibui nɛa bha ŋa, ansɛ gɛ Grikanɛ badzɛenigbla teli anɛ balɛ banyɛ gelee tsyɛ ayɛkɛ aŋa.

¹³ Kibe lɛ nɛ gɛ Yuɖanɛ nɛ ga lɛ Tesalonika nɛ benu asɛ kana Paolo ada ɖɔ Kpaya kibui nɛ Bɛrea nɛɛ, batɔnɔ avɛ ɔklɛ tsyɛ, klɛ bada kpɛ banɔɛza nɛ bunuhu anɛ puipui.

¹⁴ Nɛ kɛbhɛtɛ tili ko ɔhamɛanɛ na yɛkɔ Paolo asɛsɛ aƒu nɛ shu, pɔ Silas anɛ Timotio xũ na wɔ Bɛrea.

¹⁵ Banyɛ nɛ ga gbanɔ Paolo nɛ ayɛkɔ yɛ amɛna Atɛns klɛ bayɛkɔ ɔsɔ avɛnɔ kɔ Silas anɛ Timotio sɛ ba ba tɔnɔ yɛ Paolo zɛa nɛ kibe nyɛbem gɛ kidzo za.

Nɛ Atɛns

¹⁶ Nɛ kibe lɛm gɛ Paolo edzi epo alɛ nɛ Atɛns nɛ, kɛtrɔ yɛa bha sɛ nɛ amɔ sɛ ɔmagbla nɛm oyuku nɛ ibuidi kpɛkpa.

¹⁷ Klɛ so nɛ aza ɖɔ kaɖɔ nɛ Yuɖanɛ anɛ Grikanɛ gɛ esi Kpaya kifu nɛ oxogokɔvu nɛm anɛ budzim banɔ kiwinyɛwi nɛ banɔ nɛ gɛ bala ba ɛklɛ.

¹⁸ Epikuirianɛ anɛ Stoikanɛ bebuiti teli ba kpa kibui wlɔ̃akɛ nɛ yɛ. Beteli ebisi asɛ, “Kide anuvɔaɖɔ anɔa nɛ apɛa sɛ tɛ aɖɔ?” Banɔ bhlatɔ teli tsyɛa kpɛ onugbu nɛ klɛ mɛ asɛ, “Edzi ansɛ awlɔ̃akɛ amadi bhlatɔ mɛ ibuidi kɛtɔkpu.” Ba ɖɔ kana alasɛ Paolo aza ɖɔ kaɖɔ edenɔ kibui dzyɔgo nɛ Yesu anɛ yɛ tɛlulɔ denɔ butsi mɛ nɛ shu.

¹⁹ Klɛ ba gbanɛ yɛ klɛ ba yɛkɔ yɛ amɛna ɔma banɔshishe nɛ kɛtɔkpu ɔtsyakɔ, ɛklɛ be tsre yɛa sɛ, “Kɔ lɔ ti kɛdɔnɔ nɛ gɛ kibui vuvɔ nɔ nɛ gɛ ɔkasɛ nɛ nu?

²⁰ Ɔmɛna ebui yiyinɔ anɔ teli gɛ ɔɖɔ kpɛ bulɔ batɔm, klɛ bupɛ sɛ tɛ bu ti kɛdɔnɔ nɛ gɛ le nu.”

²¹ (Atɛnianɛ anɛ befu nɛ petee gɛ ba za ɛklɛ nɛ zi balɛ kibe nɛ petee nɛ kɛdɔ nyɛdɔ mabhɛtɛ mabhɛtɛm pɔ ebui vuvɔ nɛ gɛ ekoeyi nɛ ko ba tatɔ nɔ pɛ ba ɖɔ alɛ shui bui.)

²² Ɔkɛlɛ Paolo alɔ kititi nɛ ɔma manɔshishe nɛ shi nɛ balɛ kɛtɔkpu ɔtsyakɔ klɛ aɖɔ sɛ, “Atɛnianɛ mɔ! Ɛmɔ sɛ nɛ kidzo nyɛdzoa bha nɛɛ no nu banɔ gɛ nɔ nyɛna ɔfufɔɛbui mɛ ovunɔ.

²³ Alasɛ gɛ ɛkana anɛ mɛ awɔ̃hũ vuvu nɛ kɛdɔnɔ nɛ gɛ nɔ kpɛ kɛtɔkpuesi kɔ nɛɛ, ɛmɔ wɔnɔ busɔlɛvu mɛ osubha tolia bha gɛ ba ŋlɔmɛ asɛ: kɔ kpaya gɛ anɔnyanɔ etinyi. Ɔtsɔ̃ nɛɛ Kpaya nɛ gɛ no ti nyi nɛɛ pɛ nɔ kpɛ kɛtɔkpuesi kɔ yɛ kibui mɛ ba ɖɔ tsre nɔ.

²⁴ “Kpaya nɛ gɛ abhɛtɛ kanɔ nɛ kɛdɔ nyɛdɔ gɛ kpasɛ kalɛ mɛ nɛɛ yɛ enu owũsise anɛ kesukpɛa nɛ Apalete, klɛ yɛ nɛɛ, ata za busɔlɛevu nɛ gɛ ba bhɔ nɛ ahwɛ nɛm.

²⁵ Klɛ yɛ nɛɛ anɔdzyrame ahwɛ ataa bhɛtɛ yɛ bui, ansɛ kɛdɔ gɛ kɛdɔ tilɛ kɛ zhã yɛ dza, alasɛ yɛ nɛahwɛ nɛɛ yaa kɔ anɔdzyrame kanyaka ɛkpã nɛ ɔfufɔɛ anɛ kanɔ mɛ kɛdɔnyɛdɔɛ di.

²⁶ Denɔ anɔ terikpo mɛ klɛ abhɛtɛ banɔ anɛ balɛ ɛma nyɛma, sɛ tɛ ba yɛkɛ kesukpa nɛa bha petee; klɛ yɛ atrɔ ebe nɛm akɔa lɛ anɛ ɛzakɔ nɔ nɛ tutu gɛ alasɛ tɛ ba za.

²⁷ Kpaya abhɛtɛ kana sɛ tɛ banɔdzyrame ba pɛɛ yɛ, tɛ ba ba tɔnɔ yɛ, tɛ ba mɔ yɛ, kɛnya lɛ klɛ mɛ sɛ adɛ vɛ odzidzekɔ nɛ blɔmɛayɛ nyɔmayɛ ɔbha pɔ.

²⁸ Ansɛ gɛ wɔnɔ badzɛfatɛ nɛ teli atɛ ɖɔa sɛ nɛɛ, ‘Alasɛ yɛm bulɛ pɛ buu ga fla pɛ buu mɔ bulɔ ɛkpãzɛza. Bunu kɛdɔ gɛ takoeyi nɛ yɛm.’

²⁹ “Klɛso nɛɛ gɛ bunu kɛdɔ gɛ takoeyi denɔ Kpaya mɛ nɛɛ, kɛ ma sɛ tɛ bu bhɛtɛ kɛtɔkpum sɛ ɔfufɔɛ gɛ obhui mɛ anɔ nɛ edzi ansɛ sɛkadzɛdzã ɔdɔgɔsɛ sɛkafufu nɛ kɛklãgbu—kɛdɔ gɛ anɔdzyrame abhɛtɛ nɛ yɛ ahwɛ anɛ kibui titi.

³⁰ Nɛ atiti mɛ Kpaya ada awɔ̃hũ akpɛ kibui mati mati lɛlɛ nɛ di, pɔ ɔtsɔ̃ nɛɛ akɔ ɔshã sɛ banɔ nyanɔ nɛ ɔkɔnyɔkɔ be tsyinɛtem.

³¹ Alasɛ atɛ trɔ kiwi nɔ nɛ gɛ ebe klu kebhui nɛ kanɔ nɛ kɛgbam ganɔ anɔ nɛ gɛ eti bu nɛa bha. Atɛ trɔ kɛklãgbu nɛ ebuia nɛa bha kɔ banɔ nyanɔ ganɔ yɛ tɛfifeke denɔ butsi mɛ.”

³² Gɛ be nu tɛlɛlɔ denɔ butsi mɛ bui nɛɛ, balɛ beteli amuɔɛ, pɔ beteli asɛ, “Bu pɛ sɛ tɛ bu fla nu kibui nɛ mɛ denɔ wɔ kɔ nɛ klɛ de mɛ.”

³³ Nɛ kibui lɛ nɛ shu Paolo ashɛ̃ alɔ Beshishe nɛ ɛklɛ.

³⁴ Banɔ kɛbɔɛ gɛ bayɛkɛ kibui nɛa bha aŋa ne dzi banɔ gɛ aza Paolo ede. Balɛ mɛayɛ teli edzi Dionisius, gɛ enu beshishe ɔha nɛ mɛayɛ teli, ɔyɛkɔ plɛnɔ adzɛ teli gɛ be klua sɛ Damaris, anɛ bagɔgɔɛ nɛ teli.