Axwɛwɛwa 16 - ONUGBÙ NYƐNYÃ VUVƆ

Timotio Ada Ta Paolo Anɛ Silas

¹ Paolo ebe ku Dɛbi klɛ afla vɛ Listra, ɔkɛlɛ adɔkpasɛ teli gɛ be klua sɛ Timotio aza, yɛeni edzi Yuɖadzi teli gɛ ayɛkɛaŋa, pɔ yaka nɛ edzi Grikieyi teli.

² Ɔhamɛanɛ nɛ Listra anɛ Ikonio na ɖɔ kaɖɔ dzyɔgo nɛ yɛ shu.

³ Paolo apɛa sɛ tɛ agbanɔ Timotio evunɔ nɛ yɛ kidzo gɛga nɛm, so nɛ ebhui bunyɛnyɛ akɔɛ, alasɛ Yuɖanɛ nɛ ga lɛ kibe lɛlɛ ne nyia sɛ yaka nɛ enu Grikieyi.

⁴ Nɛ balɛ tɛnyunyɔ denɔ ɔma nɛm ɔvɛ ɔma nɛ mɛ nɛ, be bu ɛshã nɛ gɛ banɔkpɛkpɛ anɛ beshishe na bhɛtɛ nɛ Yerusalɛm sɛ tɛ ɛlɛa bha la bhɛtɛ na kasɛ banɔ.

⁵ Klɛso nɛ busɔlɛha nɛ ba gɛganɛ nɛ kabha yɛyɛkɛŋam klɛ lɛ she trɔ nɛ tikpikpem kiwi nyɛ wi.

Paolo Kɛdɔmumɔ Nɛ Makedoniaeyi Shu

⁶ Paolo anɛ yɛshopoalɛ na nyɔa ganɔ Frigia anɛ Galatia kɛdɔ nɛm pete, gɛ Ɔfufɔɛ Dzyɔgo nɛ ɔdɛ kɔa lɛ kidzo sɛ baɖɔ kibui nɛ Eshia kɛdɔ nɛm.

⁷ Gɛ be be ku Misia bubo nɛa bha, ba pɛa sɛ tɛ be tsoku Bithiana, pɔ Yesu Ɔfufɔɛ nɛ ɔdɛ kɔa lɛ kidzo.

⁸ So ba fla Misia klɛ be de zhi avɛ Troasɛ.

⁹ Nɛ elishi nɛ mɛ Paolo amɔ Makedonia anyɛ teli nɛ kɛdɔmumɔm gɛ eli kititi nɛ yɛa mɛ klɛ akɔ yɛ kɛtɔkpu sɛ, “Ba Makedonia tɛ ɔbɔ plɛnɔ lɔ.”

¹⁰ Gɛ Paolo amɔ kɛdɔ nɛ na beke, bu bala tsiɔ̃ kɔ Makedonia tɛ shɛshɛ vɛ, alasɛ bu yɛkɔ sɛ Kpaya eklu lɔ sɛ bu da ɖɔ kibui dzyɔgo nɛ tsrea lɛ.

Liɖia Kitem Tsyitsyina Nɛ Filipi

¹¹ Denɔ Troasɛ ko klɛ buyɛkɔ aƒu bha kidzo klɛ buyɛkɔ kenia bha opupu nɛ tɛdzyudzyɔm klɛ lɔ tsɔkɛ ku Samotras, klɛ nɛ kiwi bhla nɛ buda ku Nɛapolisɛ.

¹² Denɔ ɔkɛlɛ klɛ bu ga kidzo da ku Filipi, gɛ akpasɛ Romanɛe si klɛ enu ɔmagbla gɛ lo putɔ kɔ ɛma nɛ Makedonia kɛdɔ nɛm. Klɛ buza ɔkɛlɛ ewi gelee.

¹³ Nɛ Kimuenewi nɛa bha bu ga ɔmagbla nɛ kedunu nɛ koeyi vɛ keni nu tɔ, nɛ kɛtɔkpum sɛ bu ba mɔ ɔkɔ toli za klu Kpaya. Gɛ budzi ɔkɛlɛ nɛ bu kpa kaɖɔ ɖɔ tsre badzɛ nɛ gɛ xogo nɛ ɔkɛlɛ.

¹⁴ Bagɛ bala ta tɔ nɛ bulɔ nɛ teli enu adzɛ gɛ beklua sɛ Liɖia, gɛ aga apɔtɛ ŋɛŋaedzi kedzi alasɛ ehoeyi aza yɛahwɛ, klɛ ede Taɛtira ɔmagbla nɛm, klɛ enu anɔ gɛ akpɛ kɛtɔkpue si kɔ Kpaya. Apalete na danɛ yɛ idzyi akɔ sɛ tɛ evu Paolo kibui nɛ asɔlɛ.

¹⁵ Kibe lɛ gɛ yɛɛnɛ yɛ bupa nɛ petee ba yɛkɛ bunikpɛkpɛ beke nɛɛ eklu lɔ avɛnɔ yɛ bupa mɛ. Ɔkɛlɛ aɖɔ asɛ, “Onu gɛ nɔ mɔ mɛ ansɛ anɔ gɛ ayɛkɛ Apalete nɛa bha aŋa nɛɛ,” “klɛ ba tɛ nɔ bɔ za mɛ ɔkɔ.”

Paolo Anɛ Silas Buvu Zɛza

¹⁶ Kiwi tili gɛ bu vɛ Kpaya oklu kɔ nɛɛ, bu tsyanɔ adzɛnuvɔɛ axwɛdɛ teli gɛ ɔfufɔɛ ɔza yɛ abha pɛ ayɛkɔ mɔ ebui gɛ aba ba nɛ kivum aɖɔ. Adzɛnuvɔɛ nɛ abhɛtɛ ehoeyi gelee kɔ yelete alɛ nɛ yɛ ebui mumɔɖɔ nɛm.

¹⁷ Adzɛnuvɔɛ anɛ aza Paolo anɛ bulɔ bagɔgɔɛ nɛe de nɛ igugu asɛ, “Banɔa nɛ benu Ɔɖɛɖamakɔ dɛ nɛ Kpaya anɛ baxwɛdɛ, gɛ ba kasɛ wɔ kidzo nɔɔ nɛ gɛ ɔbɔ ga pɛ bebe bu wɔ.”

¹⁸ Adzɛnuvɔɛ nɛ aza kibui nɛa bha ewi gelee. Gugɔɛ nɛɛ yɛ tɛbhɛbhɛtɛ ba kpɛ Paolo bunuhu ɔklɛ etsyina tɔ ɔfufɔɛ klɛ etrse ɔlɛ asɛ, “Nɛ Yesu Kristo kinyim nɛɛ ɛtsre wɔ sɛ koeyi ɔbɔ fla nɛ adzɛnɛvuɔɛ nɛm!” Nɛ kibelɛ nɛm ko klɛ ɔfufɔɛ nɛ ɔshɛnahwɛ adzɛnuvɔɛ nɛ shu.

¹⁹ Gɛ adzɛnuvɔɛ anɛ yɛ beshopo na mɔ sɛ balɛ ehoeyi bhɛbhɛtɛ kidzoenu nɛ fla nɛɛ, be vu Paolo anɛ Silasɛ klɛ be he alɛ avɛnɔ ɔklɛ gɛ baa dɛ kedzi sɛ tɛ ada mɔ bagɛ baŋɛabha naa mɛ.

²⁰ Ba yɛkɔa lɛ amɛna bebhuiklu nɛ amɛ klɛ baɖɔ asɛ, “Banɔa nɛ benu Yuɖanɛ, klɛ la ba yɛkɔ bulɔ ɔmagbla nɛ akpɛ bugbudu gbudum

²¹ ganɔ begu nɛ gɛ amɛ ɔshãm tɛyɛyɛkɔ kɔ bulɔ Romanɛ na sɛ buyɛkɛ ɔdɔgɔsɛ bubhɛtɛ alɛa bha.”

²² Banɔɛza nɛ tsyɛ tsoku aplɛnɔ nɛ kititi lulɔ nɛ Paolo anɛ Silas shu, klɛ bebhuiklu na kɔ igbe sɛ batsyuɛ bawi nɛ balɛ shu tɛ be tua lɛ.

²³ Kibe lɛ gɛ betua lɛ tsutsɔmɔ tsɔmɔ beke nɛɛ, ba yɛkɔa lɛ ada kpɛ buvu, klɛ bakɔ sɛ aga kpɛa lɛ buvu nɛ eze poa lɛ mɔmɔ.

²⁴ Gɛ epupo nɛ enua na nɛɛ, ada yɛkɔa lɛ akpɛ kishitibha okpukɔ nɛm klɛ akpɛa lɛ buɖɛ nɛ balɛ butsrukpɔ.

²⁵ Nɛ elishi kishitibha mɛ nɛɛ Paolo anɛ Silas ba za ɛdzɛ zhɛzha nɛ Kpaya kuklua bha, klɛ baga za buvu nɛ aplɛnɔa lɛ na za ta batɔ nɛ ebui nɛ gɛ ba za bhɛtɛ.

²⁶ Nɛ kɛ ba tilim ko kesukpahuhuwa gɛganɛɛ tieli ba gɛ ke shuku buvu nɛm gɛ ba kpasɛ nɛ bulɛ igu tsutsɔmɔ tsɔmɔ. Nɛ kɛba tilim ko buvu nɛ opupu nɔ danɛ vua, klɛ anɔnyanɔ buɖɛ nɛ bule nɛ yɛ butsrukpɔ.

²⁷ Gɛ epupo nɛ gɛ akpɛa lɛ nɛ buvu nɛ anyɛmɛ pɛ amɔ sɛ buvu nɛ danɛ dzi nɛɛ, etso yɛ ɛhɛ nɛ ebu nɛ kɛklɔm sɛ tɛ eyi yɛshu alasɛ ebu sɛ ba gɛ ba kpɛ buvu be ti si ashɛ̃.

²⁸ Pɔ Paolo amɔɛ klɛ akpɛ ozi nɛa bha sɛ, “Tɛ zi ishu! Bulɔ pete li ɔkɛ!”

²⁹ Agɛ akpɛa lɛ buvu nɛ kulu asɛ ba kɔ yɛ kifu, klɛ esi ede tu klɛ ada wɔlɛ adɔ nɛ Paolo anɛ Silas otugba nɛ tɛ shushuku gbagbagbam.

³⁰ Ɔkɛlɛ eklua lɛ ebu eyinɔ klɛ ebisi asɛ, “Bapalete mɔ, klɛ mɛ ba bhɛtɛ pɛ eba mɔ ɛkpã?”

³¹ Be bu klɛ nu etsre yɛ asɛ, “Yɛkɛ Apalete Yesua bha ɔŋa, klɛm ɔbɔ mɔ ɛkpã—wɔnɔ nɛ wɔ pa nɛ wɔeyia lɛ nɛ petee.”

³² Ɔkɛlɛ Paolo anɛ Silas ba ɖɔ Kpaya kibui nɛ etsre anyɛ anɛ bupa mɛ nɛ petee.

³³ Nɛ elishia lɛlɛ nɛ mɛ anyɛ nɛ gɛ akpɛa lɛ buvu pɛ eepoa lɛ nɛ agbanɔ Paolo anɛ Silas klɛ ada bɔ balɛ apɔ na kɔa lɛ; ganɔ klɛ mɛ nɛɛ anyɛ nɛ yɛ bupa nɛ petee ba yɛkɛ bunikpɛkpɛ.

³⁴ Agɛ akpɛa lɛ buvu na gbanɔa lɛ amɛna yɛ bupa mɛ klɛ aba trɔ kɛŋɛŋa ɔkplɔ̃ akɔa lɛ; anyɛ nɛ ebe yuku nɛ samɛ alasɛ yɛ nɛ yɛeyialɛ nɛ petee aba yɛkɛ Kpaya bha aŋa.

³⁵ Kibe lɛ gɛ keli nɛ kaza, bebhuiklu na kpɛ balɛ baxwɛwa nɛ asɛsɛ agɛ akpɛ banɔ ne vu sɛ: “Shɛnahwɛ bagɛ ba kpɛ buvu nɛ shu.”

³⁶ Anɔ nɛ gɛ akpɛa lɛ buvu nɛ etsre Paolo asɛ, “Bebhuiklu na kpɛ odu asɛsɛ sɛ ba shɛnahwɛ Silas anɛ wɔ shu. Ɔtsɔ̃ nɛɛ nɔ bɔ naa shɛ so, nɔ vɛ nɛ ishu yuyɔm.”

³⁷ Pɔ Paolo aɖɔ tsre baxwɛwa nɛ asɛ: “Be tu lɔ nɛ ɔtɔ kebhui maklumaklu nɛ bulɔ, gɛ kɛlɛ klɛm sɛ bu nu Romanɛ flogo, klɛ ba yɛkɔ lɔ atɛ̃ akpɛ buvu. Klɛ ɔtsɔ̃ nɛɛ kide so pɛ ba pɛɛ sɛ tɛ ba kɛka lɔ ebu kɛdzyɛɛ nɛ ɔma nɛm tɛ anɔ eti nu? Owo! Kɔ balɛ nahwɛ aba tɛ ba ba gbanɔ lɔ ebu eyinɔ.”

³⁸ Balɛ baxwɛwa na vɛ ede tsre bebhuiklu nɛ kana, klɛ gɛ benu asɛ Paolo anɛ Silas benu Romanɛ nɛɛ, kishukua lɛ.

³⁹ Nɛ kɛlɛ mɛ, ba ba klɛ la ba yɔa lɛ idzyi klɛ balɛ nahwɛ agbanɔ lɛ ebu nɛ buvu, klɛ be bisi edenɔ balɛ ahwɛmɛ sɛ be koeyi nɛ ɔmagbla nɛm.

⁴⁰ Nɛ Paolo anɛ Silas buvu kukoeyi nɛe de ba shɛ avɛ Liɖia bupa mɛ, ɛklɛ bada tsyanɔ balɛ ɔha mɛanɛ klɛ bakpɛa lɛ kemi klɛ ba shɛ.