Axwɛwɛwa 13 - ONUGBÙ NYƐNYÃ VUVƆ

Ba Yɛkɔ Banabas Anɛ Saolo Ashɛnɔ

¹ Nɛ Antiɔkɛ busɔlɛ mɛha nɛ mɛ batɔnu anɛ badɔkasɛ aza: Banabasɛ, Simeɔnɛ gɛ be klua yɛ sɛ Anɔtutu, Lusiusɛ gɛ ede Sirene, nɛ Manaɛn (edzi anɔ gɛ be he aplɛnɔ Heroɖesɛ gɛ edzi ekusi) nɛ Saolo.

² Nɛ kibe lɛ nɛm gɛ ba nya onugbu pɛ ba kpɛ kɛtɔkpuesi kɔ Kpaya nɛɛ, Ɔfufɔɛ Dzyɔgo nɛ ɔɖɔ sɛ, “No bu Banabasɛ anɛ Saolo olu kɔ kɛxwɛ nɛ so pɛ ɛklua lɛ.”

³ So nɛ balɛ onugbu nyɛnya anɛ kpayakuklu nɛede nɛɛ, ba trɔ ahwɛ nɛ balɛa bha klɛ ba kpɛ balɛ dzo kɔ kɛxwɛ.

Nɛ Siprɔsɛ

⁴ Gɛ Ɔfufɔɛ Dzyɔgo nɛ ɔsɛsɛ balɛ tɛabha nɛ balɛ kidzo gɛga nɛa bha, be zhi avɛ Seleusia klɛ ba da za keniabha denɔ ɔklɛ avɛ Siprɔsɛ.

⁵ Gɛ be de ku Salamisɛ, ba ɖɔ Kpaya kibui nɛ Yuɖanɛ ixogokɔevu nɛm. Yohanɛsɛ Marko aza ɔkɛlɛ ansɛ balɛ apɛplɛnɔa na.

⁶ Ba nyɔ akana bunimɛesukpa nɛ petee abha ɔdɔ nanɔ kibe lɛ gɛ bede ku Pafosɛ. Nɛ ɔkɛlɛ nɛɛ ba tsyanɔ Yuɖanɛ ehuini anɛ otro atɔnu teli gɛ yɛ kinyi nu sɛ Baa-Yesu,

⁷ gɛ edzi epupo kɔ, Sɛgiusɛ Paolo gɛ aŋa ɔkɛlɛa bha. Agɛ aŋa ɔkɛlɛa bha, gɛ enu ebuinyi teli, akpɛ odu asɛsɛ Banabasɛ nɛ Saolo sɛ ba ba alasɛ apɛa sɛ tɛ enu Kpaya kibui.

⁸ Pɔ ehuni Elimasɛ (alasɛ yɛ kinyi nɛesi nɛɛ lɛlɛ) alɔ kititi nɛ kɛlɛ shu klɛ abhɛtɛ sɛ tɛ ebu agɛ aŋa ɔklɛa bha nɛ awɔ̃hũ nɛ tɛyɛyɛkɛŋa nɛ shu.

⁹ Ɔkɛlɛ Saolo nɛ gɛ beke klu tsyɛ asɛ Paolo, gɛ eyuku nɛ Ɔfufɔɛ Dzyɔgo nɛɛ edi Elimasɛ nɛ amɛ kprarara klɛ aɖɔ asɛ,

¹⁰ “Wɔ, ɔfufɔɛkpã nɛ yɛeyi onu, klɛ ɔlɔ kititi nɛ kibui dzyɔgo kanyakaɛ di shu! Wɔ oyuku nɛ anɔ wɛwɛ edidedi anɛ kɛtɔkpum kpã. Klɛ so ɔtɛ bɔ zukɔlɔ Apalete nɛ edzo dzyɔgo nɛ bu tsyina?

¹¹ Ɔtsɔ̃ nɛɛ, Apalete nɛ ɔhwɛ ɔlɔ kititi nɛ wɔ shu. Obo pu awɔ̃hũ, klɛ ɔyɛkɔ nanɔ kibe tili ɔtɛɔ mɔ kiwi tɛ yɛyɛɛ.” Nɛ kɛbhɛtɛ tilim ko ɔmunɔ anɛ otumu ɔgblɔ dɔ nɛ yɛa mɛ, klɛ akpa kana, apɛɛ anɔ nɛ gɛ aba nyɛna yɛ aga nɔ.

¹² Gɛ ekusi nɛ amɔ ebui nɛ gɛ aba kɛlɛm nɛɛ, ayɛkɛ aŋa, alasɛ kɛdɔkɛkasɛ denɔ Apalete nɛ shu nɛ abhɛtɛ yɛ bi.

Nɛ Pisidian Antiɔkɛ

¹³ Denɔ Pafos, Paolo anɛ yɛeshopoalɛ na za kenia bha ede ku Pɛga nɛ Pamfilia, ɔklɛ Yohanɛsɛ ashɛ̃ alɔa lɛ etsodzi avɛ Yerusalɛm.

¹⁴ Denɔ Pɛga ba shɛ avɛ Antiɔkɛ Pisidian. Nɛ kimuenewi nɛa bha nɛɛ be de tsoku oxogokɔvu nɛm ada za kesi.

¹⁵ Nɛ kibe lɛ gɛ bakla kɛdɔ edenɔ Ɔshã anɛ Batɔnu nɛ ɔkɔ bagɛ ba ŋɛabha nɛ oxogokɔvu nɛmɛ ne tsre Paolo anɛ yɛadzyalɛ nɛ odu aaɖɔ asɛ, “Badzya mɔ, onu kibui tili gɛ kɛ ba kpɛ anɔ nɛ otugba ba za wɔnɔ ahwɛ kɔ banɔ nɛɛ, tɛ nɔ ɖɔ.”

¹⁶ Gɛ Paolo alɔ kititi nɛɛ, ebu ɔhwɛ klɛ aɖɔ asɛ: “Izraɛlanɛ mɔ nɛ wɔnɔa gɛ odi nu Yuɖanɛ gɛ nɔ kpɛ kɛtɔkpuesi kɔ Kpaya, nɔ ta matɔ tɛ no nu!

¹⁷ Izraɛlanɛ Kpaya nɛ ebu bulɔ akalɛ, akɔ la mɔ otugbavɛvɛ nɛ balɛ Egibite zɛza nɛm, agbanɔ alɛ nɛ kemigbla ebu nɛ kesukpɛa lɛ nɛm,

¹⁸ agɔ afɛtalɛ̃ alɛ ayɛkɔa za balɛ ɛkpã nɛ nu nɛ ayakpam,

¹⁹ klɛ aŋa amadi tegenea bha nɛ Kanan klɛ ayɛkɛ balɛ busukpa nɛ akɔa lɛ ansɛ balɛ ɔŋakɔ.

²⁰ Aanɛ nɛ petee ayɛkɛ ansɛ agɔ kɛfɔɛfɔ talɛ̃ anɛ afeti. “Nɛ anɛ nɛede, Kpaya akɔa lɛ bagbɛgbanɔ ɔdɔ nanɔ atɔnu Samuɛl kibe.

²¹ Ɔkɛlɛ banɔ nɛ bisi sɛ akɔa lɛ ekusi, klɛ ayɛkɔ Saolo gɛ enu Kish yɛeyi akɔa lɛ, gɛ ede Bɛndzyamɛn kɛmadi nɛm, gɛ aŋa balɛa bha agɔ afɛtalɛ̃.

²² Gɛ atsɛ Saolo beke, ayɛkɔ Daviti abhɛtɛ balɛ ekusi. Aɖɔ edenɔ yɛ shu asɛ: ‘Ɛba mɔ Daviti Yesse yɛeyi, ansɛ anɔ gɛ alɛ mɛ idzyi shu, aba bhɛtɛ kɛdɔnyɛdɔ gɛ ɛba pɛ sɛ abhɛtɛ.’

²³ “Denɔ anyɛanɛ beyi mumɔm Kpaya ebu Yesu Ayɛyɛkɛkɔ nɛ akɔ Izraɛlanɛ, ansɛ gɛ atrɔ elu.

²⁴ Flogo tɛ Yesu aba ba nɛɛ, Yohanɛsɛ Enikpɛ aba ɖɔ kaɖɔ nɛ kitem tsyitsyina shu anɛ bunikpɛkpɛ kɔ Izraɛlanɛ nɛ petee.

²⁵ Kibe lɛ gɛ Yohanɛsɛ awa yɛ kɛxwɛ nɛ beke nɛɛ, aɖɔ sɛ: ‘Anee wɔnɔ atɔkpu nɛm aɖɔa sɛ yɛ mɛ nu? Anɛ mɛ nu yalɛlɛ. Owo, pɔ aba ba nɛ mɛede, yɛ butsrukpɔɛklɔ ohui tsyɛ edɛ na kɔ bulɛ tɛbublue.’

²⁶ “Badzya mɔ, Abraham yɛeyia lɛ mɔ, ganɛ wɔnɔa gɛ odinu Yuɖanɛ pɛ no si Kpaya kifu, blɔ so pɛ ba sɛsɛ anɔbubu kibui.

²⁷ Yerusalɛmanɛ anɛ balɛ bekusi na dɛ mɔ Yesu edzyesi, pɔ nɛ kibe lɛ gɛ bee bu yɛ atɛ̃ɛ nɛɛ, baa bhɛtɛ atrɔ ebui nɛ gɛ batɔnu na ɖɔ pɛ baa kla kibenyɛbe nɛ Kimuenewi nɛa bha.

²⁸ Kɛza na sɛ ba dɛ mɔ ɔtsre odzukɔ kanyaka kɔ butsipɔ bubu yɛ, pɔ be bisi edenɔ Pilato ahwɛ sɛ akɔ le yi yɛ.

²⁹ Gɛ ba bhɛtɛ yɛ ebui nɛ petee gɛ ba ŋulɔmɛ elu nɛ yɛ shu beke, be zhinɔ yɛ edenɔ osi nɛ shu klɛ ba yɛkɔ yɛ ede lu odzrem.

³⁰ Pɔ Kpaya efeke yɛ ebu nɛ betsitsi nɛ shi,

³¹ klɛ nɛ ewi geleem nɛɛ bagɛ ba ga nɛ yɛ edenɔ Galelia avɛnɔ Yerusalɛm na mɔɛ. Balɛ nu baga mɔ aplɛnɔ nɛ akɔ blɔkɔayɛ.

³² “Bu tsre nɔ kibui dzyɔgo nɛ sɛ: Kɛdɔnɔ nɛ gɛ Kpaya aɖɔa sɛ aba bhɛtɛ kɔ blɔa ka lɛ nɛɛ,

³³ atɛ bhɛtɛ lɛ akɔ lɔa gɛ nu balɛ yialɛ, ganɔ Yesu tɛfifeke wunɔm. Anasɛ gɛ kɛŋlɔ̃mɛ li nɛ Ɔdzɛeplukpa bhla nɛm sɛ: “ ‘Wɔ onu mɛeyi, obo nɛɛ idzi wɔ Aka.

³⁴ Kana gɛ kɛ lɛ lɛm sɛ Kpaya efeke yɛ ebu nɛ betsitsi nɛ shi, pɛ atɛ ba tsɔmɔ nɛɛ, ba ɖɔɛ lɛ nɛ ebuia nɛm asɛ: “ ‘Ɛba kɔ nɔ tɛyuyula nɛ gɛ ɛlɛ shu bhui gɛ baɖɔ tsre Daviti kokoko.’

³⁵ So ba ɖɔɛ lɛ nɛ ɔkɔ toli tsyɛ asɛ: “ ‘Ɔtɛ bɔ kɔ sɛ wɔ Anɔ gɛ yɛ shu Bhui nɛ amɔ tɛtsutsɔmɔ.’

³⁶ “Alasɛ gɛ Daviti atɛ wa Kpaya kɛxwɛ nɛ yɛ nahwɛ kibe nɛɛ, gɛ aba vɛ tram nɛɛ, ba vubɔ yɛ nɛ yakalɛ ɔbha klɛ yɛ anɔosi nɛ ɔtsɔmɔ.

³⁷ Pɔ anɔ nɛ gɛ Kpaya efekebu nɛ betsitsi nɛ shi nɛ yɛa dɛ mɔ tɛtsutsɔmɔ.

³⁸ “Kɛlɛso nɛɛ, madzyalɛ mɔ, ɛpɛ sɛ tɛ no ti sɛ ganɔ Yesua bha la ɖɔ buzizi tɛyɛyɛkɔ tsye bui etsre nɔ.

³⁹ Ganɔ yɛa bha nɛ anɔnyanɔ gɛ ayɛkɛ aŋa nɛɛ ba bhɛtɛ yɛ ana ganɔ kidzonyɛdzoa bha gɛ nɔ tɔ na nɛ Mose ɔshã nɛ nu flogo.

⁴⁰ Di mɔɔ sɛ tɛ kɛgɛ batɔnu na ɖɔ nɛ tɛ bhɛtɛ wɔ:

⁴¹ “ ‘Di, wɔnɔa gɛ ɔmɔɛ anɔ, kɛ ba bhɛtɛ wɔnɔɛ bi klɛ no bo tsi, alasɛ ɛba bhɛtɛ kibui tili nɛ wɔnɔɛ be nɛm gɛ nɔ tɛ bɔ yɛkɛ ɔŋa, onu gɛ anɔ teli etsre nɔ tsyɛ.’

⁴² Gɛ Paolo anɛ Banabasɛ ba shɛ nɛ oxogokɔvu nɛ mɛɛ, banɔ nɛ eklua lɛ asɛ ba fla ba aba ɖɔa ɖɔ adɛa na edenɔ ebuia nɛ shu nɛ Kimuenewi nɛ gɛ kaa ba nɛa bha.

⁴³ Gɛ be hle busɔlɛha nɛ beke, Yuɖanɛ gelee anɛ bagɛ tsyina etsoku Yuɖaɔha nɛm na za Paolo anɛ Banabasɛ ede, gɛ ba za ɖɔ kaɖɔ nɛ balɛ klɛ be tsrea lɛ asɛ ba vɛ kɛlɛa bha nɛ Kpaya ɛyamyuyɔ nɛm.

⁴⁴ Nɛ Kimuenewi nɛ gɛ zɛ ba nɛa bha, banɔ nɛ petee kule nɛ ɔmagbla nɛm ebe xogo sɛ tɛ be nu Apalete nɛ kibui.

⁴⁵ Gɛ Yuɖanɛ na mɔ banɔɛza nɛɛ, be yuku nɛ kawɔ̃kpɛ klɛ ba kpa anɔ kukula ebui ɖɔ nɛ ebui nɛ gɛ Paolo aaɖɔ shu.

⁴⁶ Ɔkɛlɛ Paolo anɛ Banabasɛ ebu etsrea lɛ nɛ kifu masimasim asɛ: “Alasɛ tɛ bu ɖɔ Kpaya kibui nɛ tsre nɔ putɔnɔ. Gɛ no ti gbe lɛ klɛ nɔ dɛ mɔ nɔ shu sɛ nɔ na kɔ ɛkpã mabeke mabeke nɛɛ, ɔtsɔ̃ nɛɛ bu tsyina tɔ bagɛ edi nu Yuɖanɛ.

⁴⁷ Alasɛ kana Apalete nɛ atrɔ kɔ lɔ sɛ bu bhɛtɛ: “ ‘Ɛtɛ bhɛtɛ nɔ kanɛgbɛ kɔ bagɛ edi nu Yuɖanɛ, sɛ tɛ nɔ bɔ mɛna tɛyɛyɛkɔ ɔdɔ nanɔ kesukpa nɛ ibekekɔ.’

⁴⁸ Gɛ bagɛ edi nu Yuɖanɛ ne nu kibui nɛɛ, ba mɔ same klɛ ba yɛkɛ Apalete nɛ bui, klɛ bagɛ balɛ petee be klua kɔ ɛkpã mabeke mabeke na yɛkɛaŋa.

⁴⁹ Apalete nɛ kibui nɛ yɛkɛ kɛmadi nɛa pɛalɛ nɛm petee.

⁵⁰ Pɔ Yuɖanɛ nɛ zi batɔm akɔ badzɛ nɛ gɛ avɛ otugba nɛ banyɛ nɛ ga lɛ otugba kɔ banɔ nɛ ɔmagbla nɛm. Ba kɔ sɛ ba kpatɔnɔ Paolo anɛ Banabasɛ, klɛ ba kɛka lɛ ebu nɛ balɛ kibe.

⁵¹ So nɛɛ be xule butsresi nɛ elu ɔklɛ tɛ kɛ kasɛ ansɛ ba dɛ yɛkɛ balɛ tɛbhɛbhɛtɛ klɛ ba shɛ̃ avɛ Ikonio.

⁵² Klɛ badɔkpasɛ nɛ yuku nɛ same anɛ Ɔfufɔɛ Dzyɔgo.