Axwɛwɛwa 11 - ONUGBÙ NYƐNYÃ VUVƆ

Petro Ebu Yɛ Tɛbhɛbhɛtɛ Nɛesi

¹ Banɔkpɛkpɛ anɛ balɛ adzyalɛ nɛ Yuɖia petee nu asɛ bagɛ edi nu Yuɖanɛ nɛ tsyɛ atɛ yɛkɛ Kpaya kibui.

² So gɛ Petro ede ku Yerusalɛm nɛɛ, bagɛ ba yɛkɛ bɔnyɛnyɛ bhuibhuia bha ŋa nɛ ba wlãnkɛ kibui nɛ yɛ

³ klɛ baɖɔ sɛ, “Ɔvɛ ba gɛ edi bhui bɔnyɛnyɛ nɛ bupa mɛ klɛ ɔdɔ ŋa kɛdɔ na lɛ.”

⁴ Petro akpɛe si ebu kɛbuinyɛbuie si akɔa lɛ mɔmɔ ansɛ gɛ kɛba kɛlɛ mɛ:

⁵ “Ɛza Yoppa ɔmagbla nɛm ɛklu Kpaya, klɛ ansɛ tram dza nɛ ɛmɔɛ dɔ. Ɛmɔ kɛdɔ tili ansɛ keplukpagbla gɛ be zhinɔ denɔ owũsise nɛ bupɛ tɔlɛ nɛm, klɛ kɛ ba zhidɔ ɛklɛ gɛ ɛza.

⁶ Gɛ ilu awɔ̃ di keplukpa nɛ mɛ nɛɛ ɛmɔ kesukpa bha baga bɔtsrukpɔ tɔlɛ, bagavuga, bagɛ aga nɛ ɛya bha, anɛ kɛlɛɛ mɛ buzhuɔɛ.

⁷ Klɛ mɛ nu oli tolim gɛ otsre mɛ ɔsɛ, ‘Petro, vu ɔlɔ. Yi tɛ ɔtã.’

⁸ “Ɛbu kɛlɛ nu sɛ, ‘Apalete! Ɛtɛ ba bhɛtɛ. Kɛdɔnyɛdɔ gɛ kɛ dɛ pɛ̃ ɔdɔgɔsɛ kɛlɛ shu di bhui nɛ ka ku mɛ onugbu mɛ di.’

⁹ “Kaɖɔ ne ze de owũsise nɛ eyi kana bu bhlabhla sɛ, Tɛ klu kɛdɔnyɛdɔ gɛ Kpaya abhɛtɛ nɔ sɛ kɛlɛ shu di bhui.’

¹⁰ Kibui nɛ ba kɛlɛm aba tata, klɛ kɛdɔ nɛ tsodzi shɛ vɛ owũsise.

¹¹ “Nɛ kibe lɛ nɛm tutuutu banɔ tɛata nɛ gɛ ba kpɛ denɔ Sizeria nɛ asɛsɛ mɛ na ba dzrɔ nɛ bupa nɛ mɛ gɛ ɛkpasɛ.

¹² Ɔfufɔɛ nɛ otsrem ɔsɛ iti yi kide nɛ banɔ nɛ kede zɛza shu. Badzya tiehloa nɛ tsyɛ avɛ plɛnɔ mɛ, klɛ bu tsoku anyɛ nɛ bupa mɛ.

¹³ Anyɛ nɛ etsre lɔ kana gɛ Kpaya axwɛdɛ teli aba wɛ̃ nɛ yɛ bupa mɛ klɛ aɖɔ sɛ, ‘Kpɛ anɔ nɛ Yoppa nɛ Simɔnɛ ɔkɔ gɛ be klua sɛ Petro.

¹⁴ Aba mɛna wɔ ɔklasɔ toli gɛ ganɔ ɔlɛa bha wɔ anɛ wɔ pamɛ elete nɛ petee nɔ bɔ mɔ tɛbubu.’

¹⁵ “Gɛ ɛkpɛ kaɖɔ nɛesi ko, Ɔfufɔɛ Dzyɔgo nɛ ɔba balɛa bha ansɛ gɛ lɔ ba lɔa bha nɛ kesi kpɛkpɛ.

¹⁶ Ko klɛ mɛ baka kibui nɛ gɛ Apalete nɛ aɖɔ asɛ: Yohanɛsɛ akpɛ buni akɔ anɔ nɛ buni, pɔ wɔnɔ ba ba kpɛ buni kɔ nɔ nɛ Ɔfufɔɛ Dzyɔgo.’

¹⁷ So onu gɛ Kpaya atɛ kɔalɛ kɛdɔnɔ nɛ gɛ akɔ lɔ bulɔa gɛ yɛkɛ Apalete Yesu Kristo nɛa bha ŋa, anedi mɛ dzi gɛ ɛba bhɛtɛ kɛtɔkpum sɛ ɛba na kititi lɔ nɛ Kpaya shu?”

¹⁸ Gɛ be nua na nɛ, kibuinyɛbui daa za balɛ ahwɛ ɔyɛkɔ dɛ sɛ tɛ ba kpɛ Kpaya nɛa bha, nɛ tɛ ɖuɖɔ sɛ, “Klɛ so, Kpaya atrɔ ahwɛ bagɛ be di nu Yuɖanɛ nɛ tsyɛ kitem tsyitsyina nɛa bha nɛ kanɔa nɛ mɛ.”

Busɔlɛɔha Nɛ Antiɔkɛ

¹⁹ Ɔtsɔ̃ nɛɛ bagɛ balɛ mɛ lakpɛ ozi nɛ Stefano tɛkpɛkpa tɔnɔ nɛ mɛ na ga kidzo avɛ ede ku Foenisia, Siprɔsɛ anɛ Antiɔkɛ, klɛ ba ɖɔ kibui nɛ etsre Yuɖa nɛ nɛ ko.

²⁰ Pɔ nɛ banɔ nɛ teli gɛ bede Siprɔsɛ Sirene, na shɛ vɛ Antiɔk klɛ bada kpa kaɖɔ ɖɔ tsre Grikianɛ nɛ tsyɛ, edenɔ Apalete Yesu kibui dzyɔgo nɛ shu.

²¹ Apalete nɛ ɔhwɛ ɔza plɛnɔa lɛ, klɛ banɔ nɛ tikpikpe gblam ayɛkɛ aŋa klɛ be tsyina tɔ Apalete.

²² Busɔlɛ ɔha nɛ Yerusalɛm obo nu kibui, klɛ ba kpɛ Banabas asɛsɛ Antiɔkɛ.

²³ Gɛ ede ku ɔkɛlɛ amɔ Kpaya ɛyamyuyɔ nɛ kɛdɔbhɛbhɛtɛ nɛ ɔkɛlɛ, klɛ so amɔ same klɛ akpɛa lɛ petee bugɛganɛ sɛ ba za kɛgbam nɛ Apalete anɛ balɛ idzyi petee.

²⁴ Edzi anɔ dzyɔgo, gɛ eyuku nɛ Ɔfufɔɛ Dzyɔgo nɛ tɛyɛyɛkɛŋa, klɛ ba gbanɔ banɔ nɛ tikpikpe gbla tilim amɛna Apalete.

²⁵ Ɔkɛlɛ Banabas ashɛ̃ avɛ Tasus sɛ tɛ ada pɛ Saul,

²⁶ klɛ gɛ amɔɛ nɛɛ, agbanɛ yɛ amɛna Antiɔkɛ. So nɛ kɛgɔ zɛzɛ petee mɛ Banabas nɛ Saul ba tsya nɛ busɔlɛɔha nɛ mɛ klɛ bakasɛ banɔɛ dɔ nɛ tikpikpem. Badɔkpasɛ nɛ, Antiɔkɛ be bhusoa lɛ kulu sɛ Kristoanɛ.

²⁷ Nɛ kibe lɛ nɛ mɛ nɛ batɔnu teli ba lɔ denɔ Yerusalɛm avɛ Antiɔkɛ.

²⁸ Balɛ ɔmayɛ teli, gɛ be klu asɛ Agabus nɛ alɔ klɛ ganɔ Ɔfufɔɛ mɛ, aɖɔ elua sɛ bubhɛ tsutsɔmɔ tuli badɔ gɛ buba yɛkɛ Roma kanɔ nɛm petee. (Kibui nɛ bɛlɛm nɛ Klauɖius bukusi ŋabe.)

²⁹ Badɔkpasɛ, akanyaka nɛ yɛ tɛzɛzam nu, na trɔ sɛ ba ba kɔ balɛ adzyalɛ nɛ ga lɛ Yuɖia nɛ tɛpɛplɛnɔ.

³⁰ Ba bhɛtɛ lɛ ana, klɛ baa sɛsɛ beshishe nɛ kɛdɔkukɔ ganɔ Banabasɛ anɛ Saolo abha.