2 Yohanɛsɛ 1 - ONUGBÙ NYƐNYÃ VUVƆ

¹ Kibui nɛ de Eshishe nɔ kɔ, Kɔ Adzɛ kuklu anɛ̀ yɛ beyi, gɛ ɛdɛmɛnɔ nɛ́ kɛgbɛagba mɛ—klɛ ganɛ mɛ tite, pɔ bulɔ petee gɛ bu nyi kɛgbɛagba—

² alasɛ kɛgbɛagba, gɛ kɛ lɛ bulɔ mɛ klɛ kɛ ba za bulɔ ɔbha ɔyɛkɔ vɛnɔ,

³ Kɛdɔkukɔ, eshutukubui anɛ̀ ishuyuyɔ denɔ Kpaya Aka anɛ̀ Yesu Kristo, Aka nɛ ye Yi aba za bulɔ bha nɛ́ kibui gbɛagba anɛ̀ tɛdɛdɛmɛnɔ.

⁴ Kɛ kɔ mɛ same gbɛgbla sɛ tɛ ɛmɔ wunɔe yialɛ tɛli gɛ ba ga nɛ kibui gbɛagba mɛ, anasɛ gɛ Aka nɛ akpɛ lɔ ɔshã.

⁵ Klɛ ɔtsɔnɛ, kebite mumɔa, ɛtɛ ŋlɔmɛ ɔshã vuvɔ kɔ wɔ pɔ lɔ dɛ za denɔ kesikpɛkpɛ. Ibisi sɛ bu dɛmɛnɔ nɛ ɔhaglɔ.

⁶ Klɛ kɛnɛ kɛlɛ nu tɛdɛdɛmɛnɔ: sɛ bu ga nɛ́ batɔtɛtɛ kɔ yɛ ɛshã. Anasɛ gɛ nɔ nu denɔ kesikpɛkpɛ, yɛ ɔshã ɔlɛ nu sɛ nɔ ga nɛ̀ tɛdɛdɛmɛnɔ.

⁷ Banɔ awuwɔɛ gelee, gɛ ba dɛdɛmɛ atrɔ Yesu Kristo anasɛ gɛ aba nɛ ishuidzya mɛ, ba tɛ koeyi ɛtsoku kanɔ nɛ mɛ. Anɔ alɛ nɛdi enu agɛ awɔɛ anɔ anɛ̀ otrokristo.

⁸ No di shuabha sɛ nɔ dɛ lɛla kɛdɔ nɛ gɛ nɔ waɛxwɛ kɔ, pɔ sɛ tɛ ba buya kɛbhɛ nɛna kɔ nɔ.

⁹ Anɔnyanɔ gɛ esi afla vɛ otugba klɛ ata za Kristo kɛdɔkɛkasɛ nɛede adɛ yɛkɛ Kpaya, ánɔ nɛgɛ aza kɛdɔkɛkasɛ nɛabha ayɛkɛ balɛ tɛabha Aka anɛ Eyi.

¹⁰ Onugɛ anɔ teli aba wɔ kɔ klɛ adɛ mɛna nɔ kɛdɔkɛkasɛ nɛ, nɔ tɛ yɛkɛ yɛ akpɛ wɔnɔ bupa mɛ ɔdɔgɔsɛ nɔ kɔ yɛ wola.

¹¹ Anɔnyanɔ gɛ ayɛkɛ yɛ aplɛnɔ yɛ ayɛkɛ kɛtɔkpu mɛ gɛganɛ kɛxwɛ awa.

¹² Ebui gelee alɛ gɛ ɛba ŋlɔmɛ kɔ nɔ, pɔ ɛdɛ pɛɛ sɛ tɛ ɛwa keplukpa tɛŋuŋlɔmɛ buni shuɛxwɛ. Kɛlɛ mazɛlɛ mɛ, ɛpɛɛ sɛ tɛ ɛba nɔ kɔ tɛ ɛɖɔaɖɔ nɛ nɔ amɛ nɛ amɛ, sɛ tɛ bulɔ same nɛ ana.

¹³ Wɔnɔa ada nɛ gɛ be kulu nɛ yɛ yialɛ ba sɛnɛ nɔ asɛsɛ.