2 Timotio 4 - ONUGBÙ NYƐNYÃ VUVƆ

¹ Nɛ Kpaya anɛ Kristo Yesu amɛ, bagɛ ebe kulu kebhui nɛ belulu anɛ betsitsi, klɛ nɛ yɛ tɛwɛwɛ̃ anɛ yɛ bukusiɔŋakɔ nɛ mɛ, ɛyɛkɔ ebuia nɛ kpɛ wɔahwɛ sɛ:

² Ɖɔ Kibui; bala kɔ ebe nɛ gɛ aba nɛ ebe nɛ mɛ tɛ kukuei; dzyɔanɔ, tsrenɛ anɔ tɛ ɔkpɛ anɔ kemi—nɛ tɛdudɔfɔ̃ piim anɛ awɔ̃lulu nɛ kɛdɔkɛkasɛ mɛ.

³ Alasɛ kibe nɛ baa ba gɛ banɔ atɛa nyɛna kɛdɔkɛkasɛ dzyɔgo mɛ evunɔ. Nɛ kɛlɛ ɔzakɔ, sɛ tɛ asɔnɔ balɛ nahwɛ tɛpɛpɛɛ, ba ba gbanɔ badɔkasɛ gelee akana balɛ shu sɛ tɛ be nu ebui nɛ gɛ bala tɔ nɛ gɛ awɛ̃sɛ alɛ nɛ apɛa sɛ tɛ be nu.

⁴ Be be tsyina balɛ atɔ nɛ ashɛnɔ nɛ kɛgba nɛ shu klɛ le be tsyina atɔ balɛ begu.

⁵ Pɔ wɔ, nyɛna ishu nɛ ebuinyɛbui di mɛ, za gɛganɛɛ nɛ butɔ́ mɛ, wa kɛxwɛ ansɛ anɔ gɛ akaka kibui, wa wɔ axwɛ nɛ petee gɛ ba kɔ wɔ nɛ Kpayɛxwɛ nɛ mɛ.

⁶ Alasɛ ba tɛ yɛkɔ mɛ akɔ balɛ ansɛ gɛ ba balɛ bulue si, klɛ mɛ kibe nɛ tɛ na kɔ tɛshɛshɛ.

⁷ Ɛtɛ gɔnɛ ibue dzyɔgo, iti si odu nɛ beke, ɛtɛ nyɛna tɛyɛyɛkɛŋa nɛ mɛ vunɔ.

⁸ Ɔtsɔ̃ nɛɛ tɛzɛzamnɛna kikutu nɛ lɛ kɛdɔ ɔbalakɔ kɔ mɛ, gɛ Apalete, ebhuiklu nɛna, nɛ aba yɛkɔ akɔ mɛ nɛ kiwi lɛ nɛa bha—klɛ ganɛ kɔ mɛ tite, pɔ kɔ banɔ nɛ petee gɛ bee di kidzoenu kɔ yɛ tɛwɛ̃wɛ̃ nɛ tsyɛ.

Anɔnahwɛ Ebuiɖuɖɔ

⁹ Bhɛtɛ kɛgɛ ɔbɔ na bhɛtɛ dɛ tɛ ɔna nɛmɛ kplitaa,

¹⁰ alasɛ Dimasɛ, gɛ aɖɔ kanɔa nɛ mɛ so, eti tu alɔ mɛ klɛ ashɛ avɛ Tesalonika. Krɛsinsɛ atɛ shɛ avɛ Galatia, klɛ Titusɛ avɛ Dalmatia.

¹¹ Luka tite yɛ aka lɛ plɛnɔ mɛ. Mɔ Marko tɛ ɔgbanɛ yɛ ɔplɛnɔ shu ɔmɛna, alasɛ aplɛnɔ mɛ nɛ mɛ kɛxwɛwa nɛ mɛ.

¹² Ɛtɛ kpɛ Tiashikosɛ sɛsɛ Efesosɛ.

¹³ Kibe lɛ gɛ ɔɔba, yɛkɔ awidzidze nɛ gɛ ɛshɛnahwɛ lu Kapusɛ ɔbha nɛ Troasɛ nɛ ɔmɛna, nɛ mɛ buzaplukpa kɛkɛɛlɛ, ɔyɛkɔdɛ agaeplukpa gɛ kalɛa bha la ŋlɔmɛ dɔ.

¹⁴ Alɛksanda ɔɖaxwɛawɛwa nɛ ezi kɛdɔ gelee nɛ mɛ shu. Apalete nɛ aba buya kɛbhɛ akɔɛ nɛ kɛgɛ abhɛtɛ nɛ tɔkpu.

¹⁵ Wɔ tsyɛ luawɔ̃ nɛ yɛ shu, alasɛ alɔɛ titi gɛganɛɛ nɛ bulɔ kibui nɛ shu.

¹⁶ Nɛ mɛ tɛwɛwlãnkɛ tutɔpu nɛ mɛ, anɔnyanɔ adɛ ba plɛnɔ mɛ, pɔ anɔnyanɔ ashɛ alɔ mɛ. Ba tɛ nyɛna kɛlɛ evunɔ kɔa lɛ.

¹⁷ Pɔ Apalete nɛ aza plɛnɔ mɛ, klɛ akpɛ mɛ bugɛganɛ, sɛ tɛ ganɛ mɛa bha tɛ kibui nɛ kibu kasɛ petee klɛ bagɛ ba dɛ yɛkɛaŋa nɛ petee be nui lɛ. Klɛ be bu mɛ nɛ adzyata onugbu mɛ.

¹⁸ Apalete nɛ ebe bu mɛ nɛ kititilulɔ tsutsɔmɔ kanyakaɛ di mɛ klɛ aba gbanɔ mɛ amɛna fuflɔ̃fuflɔ̃ aba kpɛ yɛ owũsise bukusɔŋakɔ nɛ mɛ. Ishubhubhui lɛ kɔ yɛ denɔ ɔtsɔ nɛ ɔyɛkɔ vɛnɔ. Tɛlɛbɛlɛm.

Tɛsɛsɛnɔ Gɔgɔɛ

¹⁹ Sɛnɔ Prisila anɛ Akuila anɛ Osifɔrusɛ bupa petee.

²⁰ Erastusɛ aza Kɔrintio, klɛ ɛshɛ lɔ Trofimusɛ lu Miletusɛ alasɛ anya.

²¹ Bhɛtɛ kɛgɛ ɔbɔ bhɛtɛ dɛ tɛ oku ɔkɛ̃ flogo tɛ bublɔɛ be bana. Eubulusɛ asɛnɛ wɔ, klɛ kana Pudɛnsɛ tsyɛ, Linusɛ, Klauɖia anɛ badzya nɛ petee.

²² Apalete nɛ aza plɛnɔ wɔ ɔfufɔɛ. Ɛyamyuyɔ za plɛnɔ wɔ.