2 Timotio 3 - ONUGBÙ NYƐNYÃ VUVƆ

Kpayam Mazamaza Nɛ Ewi Gɔgɔɛ Nɛ Mɛ

¹ Pɔ kpɛ kibui nɛɛ xawũ, ebe tsutsɔmɔ aba ba nɛ ewi gɔgɔɛ nɛ mɛ.

² Banɔ ebe ku ishu awɔ̃, banɔ gɛ aɖɔ ehoeyi ishufifeke, ishuawɔ̃ kuku, kɛdɔkukula, butɔ matamata nɛ balɛ beni anɛ balɛ aka lɛ, ahwɛ mahumahu, ishumabhui mabhui,

³ anɔ maɖɔmaɖɔ, kibui mayɛkɔ tsye, anɔshu zizi, ishuabha maŋamaŋa, balɛ kɔ kɛdɔzizi, ba dɛ pɛɛ kɛdzyɔgo,

⁴ ba lɛ kanya, be sieku, ishuawɔ̃ kuku, ba ɖɔ samem zɛza ɔyɛkɔdɛ Kpaya tɛɖuɖɔ,

⁵ kpaya mɛ zɛza tili di lɛ balɛ ahwɛ pɔ ba dɛ kɔɛ dzo sɛ kɛ za kemi nɛ balɛ mɛ. Kɛdɔnyɛdɔ tɛ za wɔnɔ ahwɛ gɛ nɔ bɔ bhɛtɛ nɛ banɔa lɛlɛ.

⁶ Balɛ enu banɔa lɛlɛ nɛɛdi gɛ ba ŋa balɛ kidzo ansɛ asɔ̃ etsoku banɔa bapa mɛ klɛ la ŋa badzɛ nɛ gɛ ama kemi nɛa bha, gɛ be yuku nɛ buzizi klɛ butsutsɔmɔ kɛdɔpɛpɛ kanyaka di wãnya lɛ ɔvɛnɔ ɔkɛ̃ nɛ ɔmɛna ɔkɛ̃,

⁷ kibenyɛbe ba kpasɛ kɛdɔ pɔ ba taa kpɛ kɛgba nɛ kɛxawũ.

⁸ Anasɛ gɛ Yanɛsɛ anɛ Yambrɛsɛ ba lɔ kititi nɛ Mose shu, kana tsyɛ banɔa nɛ balɔ kititi nɛ kɛgba nɛ shu—be nu banɔ gɛ atɔkpu mɛ adɛ na kɔa lɛ, gɛ, nɛ tɛyɛyɛkɛŋa nɛ nu, be ti bua lɛ atɛ̃.

⁹ Pɔ be ti be ku odzidzekɔ fanɔ alasɛ, nɛ banɔa lɛ nɛ kapɛ mɛ, balɛ butsutsɔmɔ nɛ mɛ ba danɛ kɔ anɔnyanɔ.

Paolo Kibuigɔgɔɛ Kɔ Timotio

¹⁰ Pɔ wɔ xũ, onyi kibuinyɛbui di odenɔ mɛ kɛdɔkɛkasɛ nɛ shu, mɛ ɛkpã zɛza, mɛ kɛdɔnɔ nɛ so, tɛyɛyɛkɛŋa, tɛdudɔfɔɔ̃, tɛɖuɖɔ, kanyɛtsitsi,

¹¹ tɛkpɛkpatɔnɔ, batɔ—ebui nɛɛ di gɛ aba mɛa bha nɛ Antiɔkɛ, Ikonio anɛ Listra, tɛkpɛkpatɔnɔ nɛ nu gɛ ɛza. Tsyɛ pɛ Apalete nɛ ebu mɛ nɛ alɛ nɛ petee mɛ.

¹² Nɛ kɛgbɛagba mɛ, anɔnyanɔɛ di gɛ apɛa sɛ tɛ aza kpaya tɛzɛzam nɛ Kristo Yesu mɛ ba ba kpatɔnɔ yɛ,

¹³ nɛ kibe lɛ mɛ gɛ banɔ tsutsɔmɔ anɛ bagɛ ba wɛanɔ na ba lɔ denɔ butsutsɔmɔ mɛ avɛ butsutsɔmɔ dɛa na nɛ mɛ, aza wɛanɔ klɛ la ba za wɛalɛ tsyɛ.

¹⁴ Pɔ wɔ xũ, za kɛgɛ ɔkpasɛ nɛe de pɛ kɛ tɛ ku wɔ awɔ̃, alasɛ onyi banɔ nɛ ɔkɔ gɛ ɔkpasɛ lɛ odenɔ,

¹⁵ klɛ ansɛ kana gɛ denɔ wɔ kɛnuvɔbe pɛ onyi Kpayɛbui buplukpa mɛ ebui gɛ alɛ shu bhui, gɛ ana wɔ bhɛtɛ pɛ onyibui kɔ tɛbubu ganɔ tɛyɛyɛkɛŋa nɛ Kristo Yesu mɛ.

¹⁶ Kpayaplukpa nɛ mɛ ebui nɛ petee enu Kpaya—ɔfufɔɛ gɛ okoeyi klɛ lɔ bɔ gɛ ba ba yɛkɔ akasɛ kɛdɔ nɔ, amɛkɛka, anɔdzyudzyɔ anɛ tɛgbɛgbanɔ nɛ tɛzɛzanɛnam,

¹⁷ sɛ tɛ Kpayanɔ kɛxwɛwadɔ kanyaka za yɛahwɛ kɔ kɛxwɛ dzyɔgo kanyaka.