2 Timotio 2 - ONUGBÙ NYƐNYÃ VUVƆ

¹ Kɛlɛ wɔ, meyianyɛ, za gɛganɛɛ nɛ ɛyamyuyɔ nɛ gɛ kpasɛ Kristo Yesu mɛ.

² Klɛ ebui nɛ gɛ onu denɔ mɛ ɔkɔ gɛ ɛɖɔ nɛ be buimɔɖɔ gelee nɛ amɛ gɛ ba yɛkɔ akpɛ ahwɛ kɔ banɔ nɛ gɛ ba ba yɛkɛ balɛa bha ŋa, pɛ balɛ tsyɛ aba na kɔ banɔ gɔgɔɛ nɛ tɛkɛkasɛ.

³ Za gɛganɛɛ nɛ butɔ mɛ nɛ bulɔ ansɛ Kristo Yesu keyutugbani dzyɔgo.

⁴ Anɔ nɛ gɛ enu keyutugbani nɛ atɛ yɛkɔ yɛ shu akpɛ ɔmamɛanɛ nɛ ebui mɛ, apɛa sɛ tɛ eku yɛ keyutugbani akagbla nɛ awɔ̃.

⁵ Kana tsyɛ, onu gɛ anɔ teli enu anɔ gɛ awlãnkɛ ansɛ anɔ gɛ akpɛsi, atɛ yɛkɛ kabhaŋɛŋa kikutu gɛ odinu sɛ awlãnkɛ nɛ ɛshã nɛ gɛ be lu nɛ nu.

⁶ Ayadɛ nɔ nɛ gɛ awa kɛxwɛ gɛganɛɛ yɛ ebe dzi atutɔpu nɛ gɛ aba yɛkɛ buyamɛdɔ.

⁷ Tsodzi odi kibui nɛ gɛ ɛɖɔ, nɛ wɔ kɛtɔkpu mɛ, alasɛ Apalete nɛ aba kɔ sɛ onu ebuia nɛ petee mɛ.

⁸ Baka Yesu Kristoe bui, gɛ be feke ebu denɔ bekpu mɛ, gɛ ede Daviti oku nɛ mɛ. Kɛlɛ nu mɛ kibuidzyɔgo,

⁹ gɛ kɛlɛ shu so pɛ ɛɛtɔ ɔdɔnanɔ ɔkɛlɛ gɛ ba ba kpaka mɛ nɛ buɖɛ mɛ ansɛ anɔ gɛ ezi buzikpã. Pɔ ba dɛ kpaka Kpaya kibui.

¹⁰ Kɛlɛ so ɛdzrɔ nɛ kibuinyɛbui nu nɛ agɛ be kulu nɛ tɔkpu, sɛ tɛ balɛ tsyɛ ba mɔ tɛbubu nɛ gɛ kpasɛ Kristo Yesu mɛ, ɔplɛnɔ ɔfufɔɛ mɛ ishubhubhui.

¹¹ Kibui tili gɛ la ba yɛkɛ kɛlɛa bha ŋa nɛ nɛɛ sɛ: Onu gɛ butsi plɛnɔ yɛ, bu ba za nɛ ɛkpã plɛnɔ yɛ;

¹² onu gɛ bu dzrɔ nɛ kɛlɛ shu, bu ba ŋa kabha nɛ yɛ tsyɛ. Onu gɛ bu shɛ̃nahwɛ yɛ shu, yɛ tsyɛ aba shɛ̃nahwɛ bulɔ shu;

¹³ onu gɛ tɛyɛyɛkɛŋa ma bulɔ ahwɛ, yɛ aba za tɛyɛyɛkɛŋa mɛ, alasɛ yɛ atɛ ba na yɛ ishu nɛ shu shɛ̃nahwɛ.

Axwɛwa Gɛ Kpaya Atrɔahwɛ Yɛabha

¹⁴ Zɔ baka lɛ ebuia. Tsrenɔ balɛ nɛ Kpaya amɛ nɛ eblapɛpɛ denɔ ebuiɖɔɖuɖɔ shu; kedziŋɛŋa kanyaka ma kɛlɛ shu, klɛ bu zi ko kɛ ba zi dɔ nɛ bagɛ enu kɛlɛ nɛ shu.

¹⁵ Bhɛtɛ mɔmɔ tɛ ɔyɛkɔ wɔ shu ɔkɔ Kpaya ansɛ anɔ gɛ ba trɔ ahwɛ yɛabha, axwɛwa gɛ ama sɛ tɛ kɛwɛ̃ ku yɛ klɛ aanyɛna kibuigba nɛ mɔmɔ.

¹⁶ Tsuɔvɛ nɛ bagɛ tinyi Kpaya pɛ ba ɖɔ kɛlɛmɛa ɖɔ nɛ shu, alasɛ banɔ nɛ gɛ baa bhɛtɛ kana, be be dzi banɔ gɛ ba ma kpaya mɛ atrɔ.

¹⁷ Balɛ kɛdɔkɛkasɛ nɛ ba kɛka ansɛ dzyosu mɛ bunya. Balɛ mɛ ɔbɔ mɔ Himɛnaɛosanɛ nɛ Filetusanɛ,

¹⁸ gɛ ba tɛ nyɔ ashɛ alɔ kɛgba. Baa ɖɔa sɛ tɛnyɛnyɛmɛ denɔ bekpu mɛ nɛ tɛ ba lɛ mɛ, klɛ bee zi banɔ teli tɛyɛyɛkɛŋa.

¹⁹ Pɔ, Kpaya kesikpɛkpɛ nɛna nɛ keli gɛganɛɛ, gɛ ba da kɛlɛ adɛda nɛ gɛ ba ŋlɔmɛ atrɔ yɛabha sɛ: “Apalete nɛ enyi bagɛ be nu yayɛalɛ,” klɛ, “Anɔnyanɔ gɛ ebu Apalete nɛ nyi aɖɔ, alasɛ tɛ etsodzi nɛ kɛtɔkpu mɛ gɛganɛe de.”

²⁰ Nɛ bupagbla mɛ, ganɛ sɛkadzɛdzã anɛ efufu kɛdɔ ko kɛlɛ lɛ bulɛ mɛ, pɔ osi anɛ tisi dɔ tsyɛ lɛ; kitili lɛ kɔ bugbɛgbla klɛ kitili ma kɔ bugbɛgbla.

²¹ Onu gɛ anɔ teli eŋuse yɛ shu ebu nɛ kɛgɔgɔɛ nɛ mɛ, ebe dzi kɛxwɛwadɔ kɔ kibui gbɛgbla tɛbhɛbhɛtɛ, gɛ ba bhɛtɛ lɛ pɛ kɛlɛ shu bhui, gɛ kɛlɛ kɛxwɛwa mɛ kɔ Apalete klɛ ba bala kɛlɛ elu kɔ kɛxwɛ dzyɔgo kanyaka wɛwa nɔ.

²² Siɔlɔ buyansɔ̃ mɛ zɛza kɛdɔ tɛpɛpɛ, tɛ ɔkpatɔnɔ tɛzɛzam dzyɔgo, tɛyɛyɛkɛŋa, tɛɖuɖɔ anɛ ishuyuyɔ, ɔyɛkɔ plɛnɔ bagɛ be tsobunɔ Apalete denɔ idzyi dzyɔgo mɛ.

²³ Kibuinyɛbui tɛ za wɔahwɛ gɛ ɔbhɛtɛ nɛ bugã anɛ kibui matimati mɛ ebui wɛwlãnkɛ, alasɛ onyi sɛ la mɛna ebla.

²⁴ Klɛ ama sɛ tɛ Apalete nɛ yɛ axwɛwa apɛ ebla, yɛ alasɛ tɛ apɛ̃ ɛyam akɔ anɔnyanɔ, gɛ aba na kɛdɔ kasɛ, atɛ kpɛ obulo.

²⁵ Bagɛ ba ma yɛe de, adɔfɔɔ̃ tɛ ebu ebui mɛ akɔa lɛ, nɛ kidzoenu didi sɛ Kpaya aba kɔa lɛ kitem tsyitsyina gɛ ba gbanɔa lɛ vɛnɔ kɛgba nɛ tititi mɛ,

²⁶ klɛ sɛ tɛ ba ba kpa kibui ti klɛ le be si ashɛ nɛ ɔufɔɛkpã nɛ kɛgba shu, agɛ eti vua lɛ anya sɛ tɛ ba bhɛtɛ yɛ tɛpɛpɛɛ.