2 Timotio 1 - ONUGBÙ NYƐNYÃ VUVƆ

¹ Paolo, gɛ enu Kristo Yesu anɔkpɛkpɛ ganɔ Kpaya tɛpɛpɛ mɛ, anɛ ɛkpã nɛ bui gɛ Kristo Yesu aɖɔ elu nɛ nu,

² Kɔ Timotio, meyianyɛ mumɔa: Ɛyamyuyɔ, eshutukubuididi anɛ ishuyuyɔ gɛ de Aka Kpaya anɛ Kristo Yesu bulɔ Apalete ɔkɔ.

Kemikpɛkpɛ Kɔ Tɛyɛyɛkɛŋam Zɛza

³ Ihu Kpaya nɛ gɛ yɛ mɛ wa kɛxwɛ kɔ nɛ ahwɛ, ansɛ gɛ makashihealɛ nɛ ba bhɛtɛ, nɛ idzyim dɛdanɛ mɛ, ansɛ gɛ ɛbaka wɔɛbui nɛ mɛ kpayakuklum elishi nɛ kemuze.

⁴ Gɛ ɛbaka wɔ iyuyo nɛ bui, ɛpɛɛ sɛ tɛ ɛmɔ nɔ, sɛ tɛ iyuku nɛ same.

⁵ Ba tɛ bakam nɛ tɛyɛyɛkɛŋa gɛganɛ nɛ gɛ lɛ wɔ ahwɛ nɛ shu, gɛ ɛlɛ di ɛlɛ za wenishishe Loisɛ anɛ weni Yunisi ahwɛ putɔnɔ, klɛ ɛyɛkɛŋa sɛ, ɛlɛ kpasɛ wɔ tsyɛ mɛ ɔtsɔ̃.

⁶ Gɛ kɛlɛ ana so ɛbaka wɔ sɛ tɛ oduku Kpaya kɛdɔkukɔ kifu nɛ ɔkpɛ, gɛ kɛ kpasɛ wɔm ganɔ mɛ ahwɛ tɛtɛtrɔ wɔa bha nɛ mɛ.

⁷ Alasɛ Kpaya adɛ kɔ lɔ kifusisi ɔfufɔɛ, pɔ kemi ɔfufɔɛ, tɛɖuɖɔ anɛ ishuabhaŋɛŋa.

⁸ So nɛɛ, tɛ si kɛwɛ̃ nɛ kibuimumɔɖɔ denɔ bulɔ Apalete nɛ shu, ɔdɔgɔsɛ osi kɛwɛ̃ nɛ mɛ yɛ evuza nɛ shu. Pɔ plɛnɔ mɛ nɛ kibuidzyɔgo anɛ butɔ nɛ mɛ, ganɔ Kpaya kemi mɛ,

⁹ gɛ ebu lɔ kɔ ɛkpã klɛ ekulu lɔ amɛna akɔ ɛkpã dzyɔgo—ganɛ sɛ kɛdɔnyɛdɔ gɛ bu bhɛtɛ so pɔ nɛ yɛnahwɛ tɛtutrɔ nɛ ɛyamyuyɔ nɛ shu so. Ɛyamyuyɔ nɛɛ ba kɔ lɔ ɛlɛ nɛ Kristo Yesu mɛ flogo pɛ kibe nɛ ba kpɛesi,

¹⁰ pɔ ɔtsɔ̃, be be bu kɛlɛ akasɛ ganɔ Ayɛyɛkɛkɔlɔ, Kristo Yesu tɛwɛ̃wɛ̃ nɛ mɛ, gɛ ebe zi butsi klɛ ayɛkɔ ɛkpã anɛ matsimatsi amɛna ɔtɔ ganɔ kibuidzyɔgo nɛ mɛ.

¹¹ Klɛ nɛ kibuidzyɔgoe nɛ shu be bu mɛ ansɛ otugbanɔ anɛ anɔkpɛkpɛ anɛ adɔkasɛ.

¹² Kɛlɛ so pɛ ɛɛtɔ ansɛ gɛ ɛlɛ. Tsyɛ kɛwɛ̃ tɛɛ ku mɛ, alasɛ inyi aanɔ nɛa bha gɛ ɛyɛkɛŋa, klɛ kixui mɛ sɛ aba na kɛgɛ ɛyɛkɔ kpɛ yɛahwɛ nɛ bunyɛna kɔ kiwi lɛlɛ.

¹³ Kɛgɛ onu denɔ mɛ ɔkɔ, nyɛna kɛlɛ ovunɔ ansɛ kidzoenu kɔ kɛdɔdzyɔgo kɛkasɛ, nɛ tɛyɛyɛkɛŋa anɛ tɛɖuɖɔ nɛ Yesu Kristo mɛ.

¹⁴ Nyɛna kɛdɔbɛbala dzyɔgo nɛ gɛ bayɛkɔ akpɛ wɔahwɛ nɛ gɛganɛɛ, tɛ opoe lɛ ganɔ Ɔfufɔɛ Dzyɔgo nɛ gɛ ɔkpasɛ bulɔ mɛ nɛ tɛpɛplɛnɔ mɛ.

¹⁵ Onyi sɛ anɔnyanɔ nɛ Asia kɛdɔ nɛ mɛ na tɛ shɛ alɔ mɛ, ɔyɛkɔ plɛnɔ Fidzyelusɛ anɛ Hɛmodzyenesɛ.

¹⁶ Kɔ Apalete nɛ edi Onesiforusɛ anɛ yɛ bupa nɛ eshutukubui, alasɛ akpɛ mɛ same ebe gelee klɛ mɛ buɖɛ nɛ mɛ gɛ ɛkpasɛ nɛ tɛɛ ku yɛ kɛwɛ̃.

¹⁷ Nɛ kɛlɛ nɛ maza kɛlɛ mɛ, gɛ aza Roma, apɛ mɛ gɛganɛɛ ɔdɔnanɔ kibe lɛ gɛ aba mɔ mɛ.

¹⁸ Kɔ Apalete nɛ atrɔ ahwɛ sɛ tɛ amɔ eshutukubui didi edenɔ Apalete nɛ ɔkɔ nɛ kiwi lɛlɛ nɛa bha! Onyi mɔmɔ edzo tashɛ̃ nɔɔ nɛa bha gɛ aplɛnɔ mɛ nɛ Efesosɛ.