2 Tɛsolonianɛ 3 - ONUGBÙ NYƐNYÃ VUVƆ

Tɛbibisi Kɔ Kpayakuklu

¹ Gɔgɔɛ nɛɛ, Badzya mɔ, no kulukpaya nɛ bulɔɛ tɔkpu sɛ tɛ Apalete nɛ bui nɛ kaka zia tɛ ba kpɛ kutɔkuesi akɔɛ lɛ, ansɛ gɛ kɛ za nɛ nɔ.

² Klɛ tɛ no kulukpaya sɛ tɛ be bu lɔ edenɔ atɔkpum gɛganɛ anɛ banɔ tsutsɔmɔ nɛ ahwɛ, alasɛ ganɛ anɔnyanɔ ahwɛ ko tɛyɛyɛkɛŋa lɛ.

³ Pɔ Apalete nɛ alɛ tɛyɛyɛkɛŋam, klɛ aba kpɛ nɔ kemi klɛ aba kpɛ buka kana nɔ ebu denɔ ezizi nɛ ahwɛ mɛ.

⁴ Kabha yɛyɛkɛŋa lɛ bulɔa hwɛ nɛ Apalete nɛ mɛ sɛ nɔ bhɛtɛ klɛ nɔ bɔ vɛ kɛlɛa bha ɔzɔ bhɛtɛ ebui nɛ gɛ bu ɖɔ.

⁵ Kɔ Akagbla nɛ etsyina wɔnɔ idzyi nɛ akpɛ Kpaya anɔ ɖuɖɔ anɛ Kristo kanyɛtsitsi mɛ.

Tɛtsitsrenɔ Nɛ Buvɔ Shu

⁶ Nɛ Apalete Yesu Kristoe nyi mɛ, badzya mɔ, bu bisi denɔ wɔnɔ ahwɛ mɛ sɛ, no tsuɔvɛ nɛ adzyanyadzya gɛ avɔ nɛ ɔbha klɛ ata za nɛ ɛkpã nɛ kɛdɔkɛkasɛ nɛ gɛ nɔ yɛkɛ denɔ bulɔ ahwɛ nɛ nu.

⁷ Alasɛ wɔnɔ nahwɛ no nyi kana gɛ alasɛ tɛ nɔ za bulɔɛ lɛ nɛ gɛ bu lɛ nɛede. Bu dɛ kpɛ aye nɛ kibe lɛ nɛ gɛ bu za wɔnɔ bha,

⁸ ɔdɔgɔsɛ bu ŋa anɔ teli dɔ gɛ bu dɛ buya kɛlɛ bhɛ. Nɛ ɔtɔgɛga mɛɛ, bu wa kɛxwɛ elishi anɛ kemuze, bu za kɛxwɛwɛwa bha klɛ butɔ sɛ tɛ bu tɛ dzi kituku kɔ wɔnɔ mɛayɛ kanyaka.

⁹ Bu bhɛtɛ ana, ganɛ sɛ kidzo dɛ za sɛ tɛ bu mɔ tɛpɛplɛnɔɛ nɛɛ di, pɔ sɛ tɛ bu bhɛtɛ bulɔ shu tɛ bu dzi banɔ gɛ no bo diɔbhɛtɛ.

¹⁰ Alasɛ gɛ bu za nɔ bha tsyɛ, bu kɔ nɔ ɔshã nɛ sɛ: “Onu gɛ anɔ teli atɛ ba wa kɛxwɛ, atɛ ba ŋa kɛdɔ.”

¹¹ Bu nu sɛ banɔ teli nɛ wɔnɔ mɛ na kpɛ aye. Ba dɛ nyɛna kɛxwɛwɛwa mɛ evunɔ, ba kpasɛ axwɛ mɛ nɛ banɔ tibui ɖuɖɔ mɛ.

¹² Banɔa nɛɛ di nɛ lɔ tsre nɛ Apalete Yesu Kristoe nyi mɛ sɛ ba bhɛtɛ mɔmɔ tɛ ba mɔ balɛ kɛdɔ nɛ gɛ ba ba ŋa.

¹³ Klɛ wɔnɔ xũ, badzya mɔ, nɔ tɛ tɔ nɛ kibui dzyɔgo bhɛbhɛtɛ mɛ.

¹⁴ Onu gɛ anɔ teli adɛ ta batɔ nɛ bulɔɛ bui nɛ keplukpɛa nɛ mɛ, no vu anhũ teli di nɛ yɛ. Nɔ tɛ ga nɛ yɛ, sɛ tɛ kɛwɛ̃ kui.

¹⁵ Pɔ nɔ tɛ yɛkɔ yɛ ansɛ ganɛ wɔnɔ aɖɔyi, pɔ nɔ ka yɛ amɛ ansɛ adzya na.

Tɛsɛsɛnɔ Tili Di

¹⁶ Ɔtsɔ̃ nɛɛ, ishuyuyɔ Apalete nɛ nahwɛ akɔ nɔ ishuyuyɔ nɛ kibenyɛbe mɛ anɛ kidzonyɛdzoa bha. Apalete nɛ aza plɛnɔ nɔ petee.

¹⁷ Mɛ, Paolo, ɛŋlɔmɛ tɛsɛsɛnɔɛ nɛ mɛnahwɛ ɔhwɛ, gɛ kinu ɔtɔgɛga kibi nɛ mɛ buplukpa nɛ petee mɛ. Kana mɛ ɛŋlɔmɛ dɔ.

¹⁸ Bulɔ Apalete Yesu Kristo eshutukubui didi nɛ aza plɛnɔ wɔnɔ petee.