2 Tɛsolonianɛ 1 - ONUGBÙ NYƐNYÃ VUVƆ

¹ Paolo, Silasɛ anɛ Timotio, kɔ Tesalonikanɛ busɔlɛɔha anɛ Kpaya bulɔ anɛ Apalete Yesu Kristo mɛ:

² Eshutukubuididi nɛ ishuyuyɔ kɔ nɔ denɔ Kpaya Aka anɛ Apalete Yesu Kristo ɔkɔ.

Ahwɛhuhu Anɛ Kpayakuklu

³ Alasɛ kibenyɛbe tɛ bu zɛ hu Kpaya ahwɛ nɛ wɔnɔɛ tɔkpu, badzya mɔ, klɛ kana kɛ lɛ, alasɛ wɔnɔ tɛyɛyɛkɛŋa nɛ kii she trɔ, klɛ tɛɖuɖɔ nɛ gɛ lɛ anɔnyanɔa hwɛ kɔ yɛɔhayɛ nɛɛ she trɔ.

⁴ Kɛlɛ so, nɛ Kpaya busɔlɛha nɛɛ shi bu feke shu nɛ wɔnɔɛ kɛxwɛ gɛganɛ wɛwa anɛ tɛyɛyɛkɛŋa nɛ gɛ lɛ nɔ ahwɛ nɛ tɛkpɛkpatɔnɔ anɛ tɛfifekedi nɛ mɛ gɛ nɔɔ ga.

⁵ Ebuianɛ petee enu tɛmumɔɖɔ sɛ Kpaya kebhuikuklu nɛ kana, klɛ nɛ kɛlɛ shu so ba ba kla nɔ sɛ nɔ na kɔ Kpaya bukusiɔŋakɔ, gɛ bulɛ shu nɔɔ tɔ.

⁶ Kpaya ana: Aba buya butɔɛbhɛ akɔ bagɛ ba kpɛ nɔ tɔ

⁷ klɛ aba kɔ wɔnɔagɛ nɔ tɔ nɛ bumuene, klɛ kɔ bulɔ tsyɛ. Kibui nɛ ba ba kɛlɛ mɛ nɛ kibe lɛ gɛ be be bu Apalete Yesu nɛ akasɛ denɔ kifu ɔlɛklɛmɛ nɛ mɛ nɛ owũsise ɔplɛnɔ yɛ kpaya baxwɛdɛ gɛganɛ.

⁸ Aba tɛta butɔ akɔ bagɛ eti nyi Kpaya pɛ ba taa tatɔ nɛ bulɔ Apalete Yesu kibuidzyɔgo.

⁹ Ba ba tɛta butɔ akɔa lɛ nɛ butsyrɔ gɛ tɛ ba beke klɛ be be bua lɛ akpɛ kide nɛ ɔkɛlɛ gɛ Apalete nɛ alɛ nɛ yɛ kemi bukusi nɛ mɛ

¹⁰ nɛ kiwi nɛa bha gɛ aba ba sɛ tɛ ba kpɛ yɛ same nɛ yɛ banɔ dzyɔgo nɛ mɛ klɛ aba bhɛtɛ kibi nɛ bagɛ ba tɛ yɛkɛ aŋa nɛɛ shi. Wɔnɔ tsyɛ ɔbɔ za kɛlɛ mɛ, alasɛ nɔ yɛkɛ bulɔ kibuimɔɖɔ nɛa bha ɔŋa.

¹¹ Nɛ kibui nɛɛ di nɛ kɛtɔkpu mɛɛ, bu tsri lɛa bha bu kulukpaya nɛ wɔnɔɛ tɔkpu, sɛ tɛ bulɔ Kpaya nɛ aba kla nɔ sɛ nɔ na kɔ yɛ tɛkuklu, klɛ tɛ ganɔ yɛ kemi nɛ mɛ aba bhɛtɛ kɛkanyaka gɛ nu kɛdzyɔgo kɔ nɔ anɛ kɛkanyaka gɛ wɔnɔ tɛyɛyɛkɛŋa nɛ ba bisi.

¹² Bu kulukpaya sɛ tɛ bulɔ Apalete Yesu kinyi nɛ shu danɛ nɛ nɔ mɛ, klɛ wɔnɔ tsyɛ nɛ yɛ mɛ, nɛ bulɔ Kpaya anɛ Apalete Yesu Kristo eshutukubui didi nɛ nu.