2 Petro 3 - ONUGBÙ NYƐNYÃ VUVƆ

Apalete Nɛ Kiwui

¹ Ɛbhɛya mumɔa, kanɛ kalɛ nu mɛ keplukpa bhla kɔ nɔ ɔtsyɔ. Ɛŋlɔmɛ edi tabha kɔ nɔ anasɛ kibui bɛbaka tɛ kɛhwanɛ nɔ kɔ kɛtɔkpu mɛ bhɛbhɛtɛ mɔmɔ.

² Ɛpɛɛ sɛ tɛ nɔ baka ebui nɛ gɛ batɔnu bhubhui naɖɔ bafla nɛ̀ ɛshã gɛ bulɔ Apalete anɛ̀ Ayɛyɛkɛkɔ aganɔ wunɔ banɔkpɛkpɛ nɛabha.

³ Oputɔ nɔ, kɛlɛsɛ tɛ nɔ nulɛesi sɛ nɛ ewui gugɔɛ nɛ mɛ bagɛ ba mɔɛ̃ anɔ ba ba za mɔɛ̃ banɔ klɛ ba ba za ga nɛ balɛ ebuikpã bhɛbhɛtɛ nɛabha.

⁴ Ba baɖɔ sɛ, “Yɛ ‘tɛbɛba’ gɛ aɖɔlu ɛlɛ xɔ̃? Denɔ kibelɛlɛ nɛ tsyɛ kɛgɛ bulɔ akalɛ nɛ tsi, kɛkanyaka vɛ labha anasɛ gɛ kɛza denɔ kanɔ nɛ kesikpɛkpɛ mɛ.”

⁵ Pɔ ɔfɔmɛ ba dzɛkɛ asɛ kibelɛlɛ nɛ ke ganɔ Kpaya kibui nɛabha owũsise ɔlɛ klɛ be bu kesukpa denɔ buni mɛ klɛ nɛ̀ buni.

⁶ Nɛ benia nɛabha tsyɛ kanɔ nɛ kibelɛlɛ beni nɛ yi agbɛgba klɛ kanɔ ne zi.

⁷ Nɛ kibui lɛlɛ nɛ ke ɔtsɔ̀nɛ owũsise anɛ kesukpa ba gɔ alɛ lu kɔ kifu, be lui lɛ kɔ kebhuikuklu kiwui nɛ̀ kɛlɛ tɛzizi kɔ banɔ nɛ gɛ ba dɛ yɛkɛ kpayabhaŋa.

⁸ Pɔ nɔ tɛdzɛkɛ kibui tirikpoe nɛ, ɛbhɛyalɛ mumɔa: Nɛ Apalete nɛ amɛ kiwui tirikpo kidzi anasɛ agɔ kɛkpãtrikpo, klɛ agɔ kɛkpãtrikpo kidzi anasɛ kiwui tirikpo.

⁹ Apalete ata gbɛede kɔ yɛ ebui bhɛbhɛtɛ gɛ aɖɔlu nɛ shu, anasɛ gɛ beteli nu kedegbɛgba nɛesi. Yɛ dzyi ayɔ nɛ wunɔ shu, ata pɛɛ sɛ anɔnyanɔ etsi, pɔ anɔnyanɔ aba tsyinaɛtemɛ.

¹⁰ Pɔ Apalete nɛ wui kɛba ba anasɛ ezi. Owũsise nɛ ɔbɔ lɛla nɛ ogugu dzyɛɛ, ɔlɛmɛ dɔnyɛdɔ kifu batã ezi lɛ, klɛ kesukpa klɛ kɛdɔnyɛdɔ nɛ kalɛmɛ kɛ tɛaza.

¹¹ Nɛ kibelɛlɛ gɛ kɛdɔnyɛdɔ bazi nɛ kɛ dzoe nɛabha, banɔ ɖuweɖu di nɔ bɔ dzi? Kɛlɛsɛ tɛ nɔ za nɛ ɛkpã tɛ ɛlɛ shu ibhui klɛ tɛ nɔ za kpayamɛ

¹² anasɛ gɛ nɔ di kidzoenu kɔ Kpaya wui klɛ nɔ pɛɛ sɛ tɛ kɛba zia. Kiwui lɛlɛ bamɛna owũsise ɔlɛ tɛzizi anɛ kifu tɛtã, klɛ ɔlɛ mɛ kɛdɔnyɛdɔ balolo nɛ buhuhu nɛ mɛ.

¹³ Pɔ tɛ buyɛkɛ yɛ kibuiɖuɖɔlu nɛ nu budi otugba kɔ owũsise vuvɔ anɛ kesukpa vuvɔ, bupa kɔ kɛdzyɔgo bhɛbhɛtɛ.

¹⁴ Kɛlɛso, ɔtsɔ̃ nɛ ɛbhɛya mumɔa, denɔ kibelɛlɛ gɛ no di otugba kɔ kibuinɛ, bhɛtɛ kɛkanyaka sɛ tɛ ba tɛmɔ ɔpɔɛzizi, tɛtsitsirenɔ nɛ tɛ nɔ za ishuyuyɔ mɛ nɛ yɛ.

¹⁵ Kɛza wɔɛtɔkpui mɛ sɛ bulɔ Apalete nɛ idzyiyuyɔ kɛlɛesi nu tɛyɛyɛkɛkɔ, anasɛ gɛ bulɔ adzya Paolo tsyɛ aŋlɔmɛ kɔ nɔ nɛ̀ kibuinyinyi gɛ Kpaya akɔ yɛ nɛ shu.

¹⁶ Aŋlɔmɛ nɛ kidzo lɛlɛ nɛabha nɛ yɛ buplukpa petee mɛ, bulɛ mɛ aɖɔ ebuianɛ akpɛ. Yɛ buplukpa nɛ mɛ ebui teli akpasɛ bu lɛ mɛ gɛ alɛesi nunu agɛganɛ, gɛ banɔ gɛ be ti nyi klɛ ba ta dzrɔ nɛ ɔkɔtrokpo nɛ bee zi akpɛ, anasɛ gɛ babhɛtɛ nɛ Kpayaplukpa bhlatɔ nɛ mɛ, kɔ balɛ nahwɛ tɛzizi.

¹⁷ Kɛlɛso, ɛbhɛya mumɔa, nɛ kɛbelɛlɛ nɛ gɛ nɔ tɛ ti kibuinɛ, nɔ zanawɔ̃ sɛ tɛ banɔ gɛ ba taa bhɛtɛ ɔshã abha na ba ga kitoa bha agbanɔ nɔ nɛ wɔnɔ ɔzakɔ dzyɔgo.

¹⁸ Pɔ nɔ she nɛ kɛdɔkukɔ nɛ̀ kibuititi mɛ nɛ bulɔ Apalete anɛ̀ Ayɛyɛkɛkɔ Yesu Kristo. Kɔ yɛ kɛlɛ nu tɛbhubhui denɔ ɔtsɔnɛ nɛ̀ mabeke! Tɛlɛbɛlɛm.