2 Petro 2 - ONUGBÙ NYƐNYÃ VUVƆ

Itro Badɔkasɛ Anɛ Balɛ Tɛyiyi

¹ Pɔ itro batɔnu tsyɛ baza banɔ nɛ shi, anasɛ gɛ itro badɔkasɛ ba baza wũnɔɛ mɛ. Ba ba ga tɛkpukpuimɛ amɛna butsi kɛdɔkɛkasɛ, kuratsyɛ ba ba dɛada nɛ́ Apalete nɛgɛ edzi alɛ—bamɛna butsi zia nɛ balɛ nahwɛ shu.

² Be gelee ba baza balɛ kɛwɛ̃ edzo nɛede klɛ ba bamɛna edzo kɛgbɛagba nɛ́ buzizi mɛ.

³ Nɛ balɛ kɛdɔ gbɛgbla pɛpɛɛ badɔkasɛ ba be zuru nɔ nɛ ebuifɛfatɛ gɛ ba bhɛtɛ. Balɛ kɛpɔŋɛŋa sɔmɛ balɛ shu kukuku, klɛ balɛ butsi tɛ dɔ tra.

⁴ Alasɛ onugɛ Kpaya adɛ yɛkɔ etsye yɛ baxwɛdɛ gɛ ba bhɛtɛ ebuikpã, pɔ asɛsɛ alɛ nɛ kifu mɛ, akpɛ alɛ buɖɛ nɛ otumu ozi mɛ tɛ ba be klu kebhui nɛ alɛ,

⁵ onugɛ adɛ yɛkɔ etsye kanɔ mɛ bekuku kibelɛlɛ gɛ amɛna buniyiyi nɛ́ banɔ nɛ gɛ be dinu kpayayɛ, pɔ akpɛ buka kana Noah, ebuidzyɔgo aɖɛɖɔ, nɛ̀ tɛegene gugɔɛ,

⁶ onugɛ ayɛ ɔmagbɛgbla Sodom anɛ Gomora ganɔ kɛfutɛtã gɛ be dzi butɔ, klɛ abhɛtɛ alɛ tɛmumɔlu kɔ kɛgɛ ba ba bhɛtɛ bagɛ be dinu kpayayɛ,

⁷ klɛ onugɛ ebhui Lɔt ayɛkɛ, anɔ dzyɔgo, gɛ adɛ mɔ same nɛ́ ɛkpã tutru gɛ banɔ gɛ bama ɔshãesi nɛ alɛ

⁸ (alasɛ anɔ dzyɔgo alɛlɛ, aza balɛ shi kiwuinyɛwui, gɛ yɛ kɛtɔwui dzyɔgo nɛ mɔ butɔ gɛganɛ ganɔ bagɛ bata bhɛtɛ atrɔ ɛshã nɛabha amɔ klɛ enu)—

⁹ onugɛ kana lɛ lɛ, kɛlɛalɛ Apalete enyi kana gɛ ebe bhui Kpaya banɔ denɔ tɛfifekedi mɛ klɛ tɛ anyɛna ebuikpã lete kɔ kebhui kuklu wui, kibelɛlɛ gɛ be tsiri balɛ batɔ tɛtɛta nɛabha.

¹⁰ Kɛnɛ kɛnu kɛbuigba kɔ nɛ bagɛ balɛ otumu mɛ dɔ pɛpɛɛ anɛ́ ebuizizi bhɛbhɛtɛ klɛ kabhaŋɛŋa kadɛ ba. Idzyititri anɛ̀ ishufifeke, banɔa be te sifu kɔ ishu bhubhui banɔ tɛkukula,

¹¹ baxwɛdɛ nɛ kuratsyɛ, nɛlɛmɛ sɛ ba gɛganɛadɛ klɛ balɛ kemi adɛ, ba dɛ mɛna tɛkukula ebui yɛyɛkɔ nɛ banɔ alɛlɛ nɛdi shu nɛ Apalete nɛ amɛ.

¹² Pɔ banɔa nɛ ba ɖɔ ebuisobui gɛ be dɛ nuliesi. Ba lɛ nu anasɛ bagavuga, bagɛ kɛtɔkpu mɛ ma, ba mɔ alɛ ko sɛ tɛ bevu klɛ be yi alɛ klɛ bedzi anasɛ baga gɛ balɛtsyɛ be tsi.

¹³ Ba be tsodzi abuya kɛbhɛ nɛ̀ butɔ kɔ butɔ ebui nɛ gɛ babhɛtɛ. Balɛ ɛkpãŋɛŋa kɛlɛ nu sɛ tɛ babhɛtɛ kibuinyɛbui nɛ kemuze gbadagbada. Be tuturu klɛ kɛwɛ̃ lɛ balɛ shu, be buakasɛ nɛ balɛ ɛkpãŋɛŋa kibelɛ gɛ ba ŋaɛdɔ nɛ nɔ.

¹⁴ Balɛ aŋɔhu yuku nɛ aglɔbui, ba dɛ zukɔlɔ ebuikpã bhɛbhɛtɛ, ba wɔɛ bagɛ bebotso akpɛ kɛgba mɛ, benyi kɛdɔ gbɛgbla pɛpɛɛ—ba ɖɔ kibuikpã akpɛ alɛ!

¹⁵ Ba shɛnahwɛ kidzo dzyudzyɔ nɛ shu klɛ ba lɛlaɛ dzo gɛ batɔnɔ Balaam Beor ye yi nɛ gɛ adɛmɛnɔ kɛtɔkpu mɛ gɛganɛ kɔbaɛ dzo.

¹⁶ Pɔ ba kpa yɛ kɔ ebuikpã bhɛbhɛtɛ nɛ kitukuaga gɛ ataɖɔaɖɔ—gɛ aɖɔaɖɔ nɛ anɔdzyrame olimɛ klɛ adzrɔnɔ atɔnu nɛ kegugu.

¹⁷ Banɔa nɛ be nu kizi gɛ buni ma kɛlɛ mɛ klɛ be nu ɔmunɔ gɛ kɛlɛɛ fu. Otumu tutuɔdɛ ba bala lu kɔ alɛ.

¹⁸ Alasɛ ba lɛ nɛ onugbu kpɛkpa, ishufifeke buɖɔ klɛ, ba pɛɛ kɔ aglɔbui bhɛbhɛtɛ anɛ anɔdzyrame ɛkpãzizi zɛza, ba tɔɛgba kɔ banɔ gɛ bakpɛesi sɛ tɛ be koeyi nɛ bagɛ ba lɛ ebuikpã nɛ mɛ.

¹⁹ Ba ɖɔ ishuahwɛ zɛza lu kɔalɛ kibelɛlɛ gɛ balɛnahwɛ benu bedzidzi nɛ́ ɛkpãzizi zɛza mɛ— alasɛ anɔ enu edzidzi kɔ kɛdɔnyɛdɔ gɛ kɛsã yɛ.

²⁰ Onugɛ be sikoyi nɛ kanɔɛmɛ ebuikpã nɛ mɛ gɛ be ti bulɔ Apalete nɛ̀ Ebhubhuiayɛkɛ Yesu Kristo klɛ ba za vu alɛ anya nɛ lɛ mɛ klɛ baŋa balɛabha, be ziadɛ nɛ kibe gugɔɛ nɛ gɛ ba za nɛ kesikpɛkpɛ.

²¹ Kɛ tapɛ̃ kɔalɛdɛ gɛ be di ti kɛdzo kɔ kɛdzyɔgo bhɛbhɛtɛ, dɛ sɛ tɛ be ti lɛ klɛ tɛ be tsyina kede akpɛ ɛshã bhubhui nɛ gɛ bakpɛ kɔ alɛ.

²² Nɛ balɛ kapɛ mɛ akpalɛ nɛ nu ebui gbɛagba: “Kakudzɔgɛ tsodzi avɛ ada ŋa kalɛ oyukuku,” klɛ “Ahɛ gɛ bewlunɔ etsodzi avɛ ada wũsɔ aputɔ mɛ.”