2 Kɔrintioanɛ 8 - ONUGBÙ NYƐNYÃ VUVƆ

Ɛyɛmɛyɛyɔ Kemikpɛkpɛ

¹ Klɛ ɔtsɔ̃nɛ, badzya mɔ, bu pɛɛ sɛ tɛ nɔ ti kibui denɔ kɛdɔkukɔ gɛ Kpaya akɔ Makedonia busɔlɛha.

² Nɛ tɛfifekɛdi gbɛgbla gelee mɛ, balɛ samɛ eyuku agbɛgba klɛ balɛ kitsyui tsutsɔmɔ kɛ yuku dzi ɛɛyamyuyɔ.

³ Alasɛ ɛɖɔaɖɔ sɛ ba kɔɛdɔ gelee anasɛ gɛ ba bana, klɛ kɛ dɛ kɛna gɛ ba bana nɛ tsyɛ. Nɛ balɛ ishuahwɛ ba kɔ kɛdɔ,

⁴ be bisi gɛganɛ denɔ bulɔ kɔ sɛ bu kɔ alɛ dzyo tɛ bawa kɛxwɛ nɛ aplɛnɔ kɔ kpayabanɔ.

⁵ Klɛ ba dɛ bhɛtɛ anasɛ gɛ bu pɛɛ, pɔ ba yɛkɔ balɛ nahwɛshu eputɔnɔ akɔ Apalete klɛ nɛ kɛlɛede ba kɔ lɔ nɛ̀ Kpaya tɛpɛpɛɛ nu.

⁶ Kɛlɛso bu pɛɛ denɔ Tito ɔkɔ sɛ, gɛ ya eti putɔ abhɛtɛ nɛ kesikpɛkpɛ, tɛ avla mɛna ɛyamyuyɔ ebui bhɛbhɛ tanɛ beke nɛ wɔa pɛ mɛ.

⁷ Pɔ anasɛ gɛ buna nɛ kɛkanyaka mɛ—nɛ tɛyɛyɛkɛŋa mɛ, nɛ kaɖɔɖuɖɔ mɛ, nɛ kibuititi mɛ, nɛ kemi gbɛagba kpɛkpɛmɛ anɛ̀ wunɔ tɛdɛdɛmɛ nɛ lɔ—nɔ di sɛ wunɔnɔ tsyɛ nɔ na nɛ kɛdɔkukɔɛ nɛ mɛ kɔ kɛkukɔ.

⁸ Ɛtɛ kpɛ nɔ shã, pɔ ɛpɛɛ sɛ tɛ ifekedi wunɔ tɛdɛdɛmɛ nɛ anɔ gbɛagba sɛ tɛ ɛyɛkɔ sɔnɔ banɔ bhlatɔ tɛnɛna.

⁹ Alasɛ nɔ nyi bulɔ Apalete Yesu Kristo kɛdɔkukɔ, sɛ nɛlɛmɛ aba mɔ ehueyi, pɔ nɛ bulɔɛ tɔkpu ebe dzi kitsyutsyuikpɛ̃, so tɛ ganɔ yɛ butsyutsyuikpɛ̃ mɛ nɔ bɔ dzi ehueyilete.

¹⁰ Klɛ kɛnɛ kɛ nu mɛ tɛtsitsirenɔ de nɔ kɛgɛ nu kɛdzyɔgo kɔ nɔ nɛ kibui nɛ mɛ: Kɛgɔ nɛ gɛ bafla wunɔ dzi banɔ tɛtɔpu ganɛ sɛ tɛ nɔ kɔɛdɔ tite pɔ tsyɛ tɛpɛpɛɛ za sɛ tɛ nɔ bhɛtɛ lɛ.

¹¹ Ɔtsɔnɛ wu axwɛ nɛ nu, sɛ tɛ wunɔ tɛtɛtrɔ pɛpɛɛ sɛ tɛ nɔ bhɛtɛ lɛ kɛ basɔnɔ wunɔ kɛlɛ tɛbhɛbhɛtɛ beke, nɛ wunɔ bupu mɛ.

¹² Alasɛ onugɛ tɛpɛpɛɛ lɛ ɔkɛlɛ, ba ba yɛkɛ kɛkukɔ anɛ kɛgɛ lɛ yɛahwɛ nɛ nu, ganɛ kɛ gɛ ma yahwɛ nɛ shu.

¹³ Bulɔ tɛpɛpɛɛ dɛ nu sɛ babhlatɔ yɛ kɛ zhiesi nɛ kibelɛlɛ nɛ gɛ wunɔ yɛ nɛ trɔ wunɔ abha gɛganɛ, pɔ sɛ tɛ kɛba dzi sɔsɔɛ.

¹⁴ Nɛ kibe nɛ mɛ wunɔ dɔ gelee bana nɔ bɔ kɔ kɛgɛ ba pɛɛ, sɛ nɛ kibe bhlatɔ balɛ dɔ gelee bana ba bakɔ kɛgɛ nɔ pɛɛ. Ɔkɛlɛ kɛ ba dzi sɔsɔɛ,

¹⁵ anasɛ gɛ baŋlɔmɛ lu: “Anɔ nɛ gɛ exogo kɛdɔ gelee elu kɛdɔ gelee tɛza yɛ ahwɛ, klɛ agɛ exogo kɛdɔ bhliyi elu anɛ kɛdɔ bhliyi ko kɛlɛza yɛ ahwɛ.”

Ba Sɛsɛ Tito Nɛ Korɛnto

¹⁶ Ɛhu Kpaya ahwɛ, agɛ akpɛ nɛ Tito idzyi mɛ kɛdɔ nɛ tututu gɛ kɛ lɛ mɛ ahwɛ kɔ nɔ.

¹⁷ Alasɛ anɛ sɛ Tito adɛmɛ ayɛkɛ bulɔ tɛbibisi nɛ ko, pɔ aba wɔnɔ kɔ nɛ kemikpɛkpɛ anɛ̀ yɛ nahwɛ tɛtɛtrɔ.

¹⁸ Klɛ bu sɛsɛ yɛ adzya plɛnɔ yɛ agɛ busɔlɛha petee bakpɛ yɛ nyi nɛabha kɔ kibui dzyɔgo nɛ tɛɖɛɖɔ.

¹⁹ Kɛgɛ ka lɛ, busɔlɛha nɛ bui yɛ sɛ atɔnɛ lɔ kɔ bugu kukɔ gɛ bu wa axwɛ sɛ tɛ bu yɛ kɔ kpɛ Apalete nahwɛ nɛ́ nyi nɛabha klɛ tɛ bu kasɛ sɛ bu pɛɛ sɛ tɛ bu plɛnɔ.

²⁰ Bɔ pɛɛ sɛ kɛpɔbubu dinyɛdi tɛza kidzo nɛabha gɛ buga gɛ bukɔ kɛdɔ gbɛgblaɛ nɛ.

²¹ Alasɛ bu yɛkɔ trɔ shu sɛ bu bhɛtɛ kɛgɛ nu kɛdzyɔgo, ganɛ Apalete yɛ amɛ ko pɔ tsyɛ nɛ banɔ amɛ.

²² Ɔplɛnɔɛ kɛlɛlɛ, bu sɛsɛ bulɔ adzya nɛ alɛ agɛ akasɛ lɔ nɛ edzo gelee mɛ sɛ awɛxwɛ nɛ kemi, klɛ ɔtsɔnɛ kuratsyɛ kɛ dɛ alasɛ nɛ yɛ tɛyɛyɛkɛŋa gbɛgbla nɛ wunɔɛ mɛ.

²³ Tito xũnɛ, enu mɛ abhla klɛ nɛ mɛ axwɛwa nɛ wunɔɛ shi, bulɔ adzyalɛ nɛ xũ, bala lɛ basɔlɛsɔlɛɔha nɛ nu klɛ be nu kabhakpɛkpɛ kɔ Kristo.

²⁴ Kɛlɛso nɔ kasɛ banɔ anɛ wunɔ anɔ tɛdɛdɛmɛ bui klɛ kibui nɔ nɛ so gɛ kɛ kɔ bulɔ ishufifeke nɛ wunɔ mɛ sɛ tɛ busɔlɛha ba mɔ lɛ.