2 Kɔrintioanɛ 6 - ONUGBÙ NYƐNYÃ VUVƆ

¹ Anasɛ Kpaya baxwɛwa bu bisi denɔ nɛ wunɔ ahwɛ sɛ nɔ tɛ yɛkɛ Kpaya kɛdɔkukɔ nɛ kuã.

² Alasɛ aɖɔ sɛ, “Nɛ mɛ tɛpɛplɛnɔ kibe nɛ mɛ inu nɔɛ dɔ, klɛ nɛ tɛbhubhuiyɛkɛ kiwui nɛabha ɛplɛnɔ nɔ.” Itsre nɔ sɛ, ɔtsyɔnɛ ɔlɛ nu kibe kɔ Kpaya tɛ pɛplɛnɔ, ɔtsɔ̃nɛ ɔlɛ nu kiwui kɔ tɛbhubhuiyɛkɛ.

Paolo Butɔ Gɛ Amɔ

³ Budɛ bhuidzo kɔ anɔnyanɔ, sɛ tɛ bulɔ xwɛwuwa nɛ tɛ ba tɛ yɛkɛ bulɔabhaŋa.

⁴ Kɛlɛmaza, anasɛ Kpaya axwɛdɛ bu kpɛ bulɔnahwɛ nɛ otugba nɛ kidzonyɛdzo abha, nɛ butɔɛxwɛwuwa gbɛgbla, nɛ kibuipɛpɛɛ, bugɛganɛ mɛ kpãzɛza anɛ kibuitɛtrɔ anɔabha,

⁵ nɛ tɛtutuɛ mɛ, buvuzɛza anɛ kɛdɔziziogugu kpɛkpɛ, kɛxwɛ gɛganɛ wuwa, elishi tramadɔmadɔ anɛ̀ bubhɛdɛdɔ,

⁶ nɛ́ kɛdzyɔgoɛ, kibuiesinunu, tɛdudɔfɔɔ̃ anɛ̀ ɛyamyuyɔ, nɛ́ Ɔfufɔɛ Dzyɔgoe mɛ anɛ̀ tɛdɛdɛmɛnɔ dzyɔgo,

⁷ nɛ́ kɛgba kaɖɔɖuɖɔ anɛ̀ Kpaya kemi; nɛ̀ tɛzɛzamnɛna keyutɛtadɔ nɛ́ kɛŋa ɔhwɛ mɛ anɛ̀ nɛ kɛbhɛtɛkpɛ mɛ,

⁸ ganɔ kabhaŋɛŋa anɛ̀ kɛwɔɛ̃kpɛkpɛ, kizizi ɖɛɖɔ anɛ kɛdzyɔgo ɖuɖɔ, ba mɔ lɔ anasɛ itroelete, pɔ bu nu banɔ nɛ a,

⁹ kibuititi, pɔ ba mɔ lɔ anasɛ kibuimatimati, be tsi, pɔ bu lɛ nɛ ɛkpã, be tu, pɔ be te yi,

¹⁰ samemamɔ mamɔ, pɔ kibenyɛbe bu mɔ same, be tsyutsyukpɛ̃, pɔ bu mɔ ehoeyi gelee, kɛdɔmaza maza anɔ ahwɛ, pɔ kɛdɔnyɛdɔ lɛ anɔ ahwɛ.

¹¹ Bu yɛkɔ bulɔ shuimɛ ɖɔaɖɔ kɔ nɔ, Kɔrɛntianɛ, klɛ bu danɛ bulɔ idzyi kɔ nɔ wee.

¹² Bu tɛ shɛnahwɛ wunɔ tɛdɛdɛmɛnɔ shu lu, pɔ wunɔ shɛnahwɛ bulɔ yɛ shu lu.

¹³ Anasɛ kibui tsɛtsrakɛ dzyɔgo—ɛɖɔaɖɔ kɔ nɔ anasɛ mɛ yialɛ—wunɔ tsyɛ nɔ danɛ wunɔ idzyi mɛ.

Nɔ Tɛbhɛtɛ Terikpo Nɛ Bagɛ Badɛyɛkɛŋa

¹⁴ Nɔ tɛ bhɛtɛ terikpo nɛ bagɛ ba dɛ yɛkɛaŋa. Alasɛ kide tirikpo kɛlɛ lɛ tɛnɛnamzɛza anɛ kɛtɔkpu mɛ gɛganɛ ahwɛ? Ɔdɔgɔsɛ ketsukpɛkpɛ kalɛ aba za kifu nɛ̀ otumui shi?

¹⁵ Ɔdzyɛ ɖuweɖu ɔlɛ bɔza Kristo anɛ̀ Satana shi? Kide ayɛyɛkɛŋa nɛ̀ agɛ adɛ yɛkɛaŋa ba babhɛtɛ nɛ agulɔɛ shi?

¹⁶ Tɛnyɛnya ɖueɖu kɛlɛ lɛ Kpaya busɔlɛvu anɛ̀ obudi shu? Alasɛ bulɔ nu Kpaya lulu busɔlɛvu. Anasɛ gɛ Kpaya aɖɔ, “Ɛba za nɛ alɛ klɛ ɛba ga nɛ balɛ shi, klɛ ɛba dzi balɛ Kpaya, klɛ ba be dzi mɛ banɔ.”

¹⁷ “Kɛlɛso nɔ koeyi nɛ balɛ mɛ klɛ tɛ nɔ za ɔtɔ, Apalete nɛ yɛ aɖɔ. Nɔ tɛ hunɔ kɛdɔnyɛdɔ gɛ kɛlɛ shu di bhui, klɛ ɛba yɛkɛ nɔ.”

¹⁸ “Ɛba dzi Aka kɔ nɔ, klɛ wunɔ bɔdzi me beyianyɛ nɛ̀ mɛ beyiadzɛ, Apalete Kemielete yɛ ɖɔ.”