2 Kɔrintioanɛ 5 - ONUGBÙ NYƐNYÃ VUVƆ

Bulɔ Owũsise Tɛzɛza

¹ Ɔtsɔ̃nɛ bu nyi sɛ onugɛ kɛsukpɛa bha kagba nɛ mɛ gɛ bu kpasɛ ka yɛɛ, buvu lɛ bulɔ ahwɛ denɔ Kpaya kɔ, ɔfufɔɛ mɛ buvu nɛ owũsise, gɛ ganɛ anɔdzyrame ɛhwɛ ba yɛkɔ abhɔ bulɛ nɔ.

² Nɛlɛmɛ bu guhuũ, bu pɛɛ sɛ tɛ ba be nyumu owũsise mɛ zɛza kɔ lɔ,

³ alasɛ kɛbelɛlɛ gɛ ba da kɛpɔtɛ kɔ lɔ, ba tɛ bamɔ sɛ bu lɛ alagba.

⁴ Kɛlɛso kibelɛlɛ gɛ bulɛ kagba nɛ mɛ, bu ɖɔ huũ klɛ buhwa nɛ idzyi mɛ, alasɛ bu dɛ pɛɛ sɛ tɛ kɛpɔtɛ bule nɛ bulɔ shu pɔ tɛ ba bu da kɛpɔtɛ nɛ́ bulɔ ɔzakɔ nɛ owũsise, sɛ tɛ ɛkpã ba munɔ kɛdɔ gɛ kinu ishuidzya tsitsi.

⁵ Ɔtsɔ̃nɛ Kpaya ye bhɛtɛ lɔ kɔ kibui nɛ tututu klɛ akɔ lɔ Ɔfufɔɛ anasɛ kɛdɔluluesi, anɔede zɛza kɔ kɛ gɛ tɛ ba.

⁶ Kɛlɛso idzyi alɛ bulɔ ahwɛ kibenyɛbe klɛ bu nyi sɛ anasɛ gɛ bu lɛ bulɔɛ pi nɛ ishuidzya mɛ bu tsyina nɛ Apalete nɛede.

⁷ Bulɛ nɛ kpã nɛ tɛyɛyɛkɛŋa mɛ, ganɛ kɛdɔmumɔɛ mɛ.

⁸ Ɛɖɔ sɛ, idzyi lɛ bulɔ ahwɛ, klɛ bu ba pɛɛ sɛ tɛ bu koeyi nɛ ishuidzya nɛ mɛ klɛ tɛ bu daza kepi nɛ̀ Apalete.

⁹ So bu yɛkɔ trɔ bulɔ shu sɛ bu babhɛtɛ tɛ kiku yɛ awɔ̃, kɛbɛlɛmɛ sɛ kepi lɔ lɛ nɛ ishuidzya mɛ pɛnɔ bu koeyi nɛ lɛ mɛ.

¹⁰ Alasɛ bulɔ petee bu ba wɔ̃ɛ nɛ Kristo kebhuikuklu kegbu nɛ amɛ, sɛ tɛ anɔ kanyaka aba yɛkɛ kɛgɛ lɛ kɔ yɛ kibelɛlɛ nɛ gɛ aza ishuidzya mɛ, kɛbadzi kɛdzyɔgo pɛnɔ kizizi.

Terikpo Bhɛbhɛtɛ Kɛxwɛwɛwa

¹¹ Denɔ, kibelɛlɛ, bu nyi kɛdɔnɔ gɛ nu kɛfusisi nɛ Apalete nɛ shu, bu wlãnkɛ tɛ bu wɔɛ banɔ nu. Kɛdɔnɔ gɛ bu nu Kpaya enyi lɛ wee, klɛ idi kidzoenu sɛ nɔ nyi lɛ wee nɛ wunɔ shuimɛ.

¹² Butɛ wlãnkɛ kpɛ bulɔshu nɛ otugba kɔ nɔ bubhla, pɔ bu yɛ̀kɔ kidzoenɛ kɔ nɔ tɛ nɔ fekeshu nɛ bulɔ abha, sɛ tɛ nɔ bɔ na ishunubu kɔ bagɛ befeke shu nɛ ebui mumɔɛ mɛ dɛ agɛ alɛ idzyi nɛ mɛ.

¹³ Onugɛ bulɔ atɔkpu ama, Kpaya so gɛ kɛ lɛ, onugɛ bulɔɛ tɔkpuimɛ lɛ mɔmɔ, wunɔ kɛ lɛ kɔ.

¹⁴ Alasɛ Kristo tɛdɛdɛmɛnɔ nɛ ŋa lɔabha, alasɛ bu yɛkɛ lɛabhaŋa sɛ anɔ terikpo yɛ tsi nɛ banɔ gelee tɔkpu, klɛ nɛlɛso balɛ petee tsi.

¹⁵ Klɛ etsi nɛ bulɔ petee tɔkpu, sɛ ba gɛ alɛ ba ta za kɔ balɛnahwɛshu ko pɔ agɛ etsi nɛ balɛ tɔkpu, klɛ ba za nyɛmɛ yɛ tite tɔkpu.

¹⁶ Kɛlɛso denɔ ɔtsɔnɛ ɔvɛnɔ butɛ ka yɛkɔ anɔ bui denɔ kanɔanɛ mɛ dɔ didi wa kɛxwɛ nɔ. Kɛlɛlɛmɛ sɛ bu yɛkɔ Kristo nɛ kidzoɛ nɛabha, bu tɛ ka bhɛtɛ alɛlɛ.

¹⁷ Kɛlɛso, onugɛ anɔ teli alɛ Kristo mɛ, enu kɛdɔ bhɛbhɛtɛ vuvɔ, kɛkuku ba fla, kɛ vuvɔ nɛ ba!

¹⁸ Anɛ petee de Kpaya kɔ, yɛ abhɛtɛ terikpo nɛ lɔ aganɔ Kristo abha klɛ akɔ lɔ kɛxwɛwɛwa nɛ terikpobhɛbhɛtɛ shu,

¹⁹ sɛ Kpaya abhɛtɛ terikpo nɛ kanɔ kɔ yɛnahwɛ shu nɛ Kristo mɛ, ganɛ sɛ akla banɔ nɛ ebuizizi nɛ balɛ shu. Klɛ ayɛkɔ terikpobhɛbhɛtɛ ɔklasɔ nɛ akpɛ bulɔahwɛ.

²⁰ Kɛlɛso bu nu Kristo ɔzakɔanɔ kpɛkpɛ, anasɛ kɛlɛlɛmɛ sɛ Kpaya ábhɛtɛ yɛ dɔ bibisi ganɔ bulɔ abha. Bu kpɛ kɛtɔkpuesi kɔ nɔ ganɔ Kristo abha: Kɔlɔ bhɛtɛ terikpo nɛ Kpaya.

²¹ Kpaya abhɛtɛ anɔ gɛ buzizima yɛ shu tɛ edzi ezizi kɔ lɔ, sɛ tɛ nɛ yɛ mɛ bu badzi banɔnɛna kɔ Kpaya.