2 Kɔrintioanɛ 4 - ONUGBÙ NYƐNYÃ VUVƆ

Ehoeyi Nɛ́ Butsukpu Mɛ

¹ Kɛlɛso ganɔ Kpaya eshutukubui didi belɛlɛ kɛxwɛwɛwa lɛlɛ nɛ lɛ bulɔ ahwɛ, idzyi edi koeyi nɛ bulɔɛ temɛ.

² Nɛlɛede bu shɛnahwɛ ebui kpukpu anɛ̀ kɛwɔɛ̃ edzo nɛ shu lu, bu tɛyɛkɔ anɔ wuwɔɛ ebui, ɔdɔgɔsɛ bu tsyina Kpaya bui. Kɛlɛmaza, ganɔ kɛgbɛagba kɛkasɛ wee bulɔnahwɛ bu trɔ ahwɛ kɔ anɔnyanɔ bui bhɛbhɛtɛ nɛ Kpaya amɛ.

³ Klɛ onugɛ bulɔ kibui dzyɔgo nɛ kpu tsyɛ, kikpu kɔ ba gɛ bà lɛla.

⁴ Kanɔanɛ mɛ kpaya nɛ epu aŋuhu kɔ bagɛ badɛ yɛkɛaŋa, so tɛ batɛ mɔ kibui dzyɔgo nɛ futɛtã gɛ kɛnu Kristo kabhaŋɛŋa gɛ alɛ Kpaya tɛzɛzɛmɛ.

⁵ Alasɛ bu tɛɖɔ kibui denɔ bulɔnahwɛ shu, pɔ Yesu Kristo anasɛ Apalete, klɛ bulɔnahwɛ anasɛ wunɔ axwɛdɛ nɛ Yesu tɔkpu.

⁶ Alasɛ Kpaya gɛ aɖɔ sɛ, “Kɔ kifu nɛ tã denɔ otumu mɛ,” bhɛtɛ yɛ fu tɛ kɛtã nɛ bulɔ idzyi mɛ tɛ kɛkɔ lɔ kifu buititi nɛ́ Kpaya kabhaŋɛŋa nɛ Kristo amɛ.

⁷ Pɔ ehoeyi butsukpu nɛ lɛ bulɔ ahwɛ gɛ bu ba tɛ yɛkɔ kasɛ sɛ, kemi gɛ kagɛganɛ adɛ petee kede Kpaya kɔ klɛ ganɛ bulɔ kɔ ke de.

⁸ Ba kpɛ lɔ tɔ nɛ kapɛ nyɛapɛ mɛ, pɔ ba dɛ yɛ lɔ, ba dɛ futsu lɔ, pɔ wunɔ dzyi atɛ yɛ,

⁹ ba kpɛlɔahwɛ, pɔ ba dɛ shɛ̃nahwɛ lɔ shu, be hu lɔesi, pɔ be di yi lɔ.

¹⁰ Kibenyɛbe bu kana nɛ bulɔ shuidzya mɛ Yesu butsi, sɛ tɛ be bu Yesu ɛkpã nɛ akasɛ nɛ bulɔ shuidzya mɛ.

¹¹ Alasɛ bulɔ gɛ bu lɛ nɛ ɛkpã kibenyɛbe bayɛkɔ lɔ akɔ butsi nɛ́ Yesu tɔkpu, sɛ tɛ yɛ kpã ba bukasɛ nɛ bulɔ ishuidzya tsitsi nɛ mɛ.

¹² So nɛɛ, butsi bu wa kɛxwɛ nɛ bulɔɛ mɛ, pɔ ɛkpã wɛxwɛ nɛ wunɔɛ mɛ.

¹³ Ba ŋlɔmɛ elu asɛ: “Ɛyɛkɛŋa, kɛlɛso ɛɖɔaɖɔ.” Nɛ tɛyɛyɛkɛŋa ɔfufɔɛ lɛlɛ nɛabha bulɔ tsyɛ bu yɛkɛŋa anɛ kɛlɛso bu ɖɔaɖɔ,

¹⁴ alasɛ bu nyi sɛ anɔ nɛ gɛ anyɛmɛ Apalete Yesu denɔ bekpui mɛ, aba nyɛmɛ bulɔ tsyɛ nɛ Yesu klɛ aba yɛkɔ lɔ nɛ wunɔ akɔ nɛ yɛ amɛ.

¹⁵ Anɛ petee lɛ nu wunɔ tɛpɛpɛ̃, se tɛ kɛdɔkukɔ gɛ kɛnanɛ lɔ gelee klɛ banɔ gelee ba bakɔ ahwɛhuhu be yukuagbɛgba kɔ Kpaya kabhaŋɛŋa.

¹⁶ Kɛlɛso bu tɛ bakɔ idzyi ekoeyi nɛ bulɔɛ te. Kɛlɛlɛmɛ sɛ ɔtɔ nɛ bu tsɔmɔ koeyi, pɔ nɛ́ kɛmɛnɛmɛ ba bhɛtɛ lɔ avuvɔ kiwui nyɛ wui.

¹⁷ Alasɛ bulɔ butɔ bumapu klɛ bu lɛ kplita gɛ kɛ ba mɛna lɔ kabhaŋɛŋa mabeke gɛ kɛlupudɛ alɛ petee.

¹⁸ Kɛlɛso budɛ yɛkɔ aŋuhu trɔ kɛdɔ nɛ gɛ kɛ wɔɛ̃, pɔ kɛ gɛ tɛ wɔɛ̃ nɛabha. Alasɛ kɛgɛ wɔɛ̃ kɛlɛ be dɛdze, pɔ kɛgɛ tɛɛ wɔɛ̃ kɛlɛ tɛ beke.