2 Kɔrintioanɛ 3 - ONUGBÙ NYƐNYÃ VUVƆ

¹ Bu zɛ tɛ kpɛ lɛesi kpɛ bulɔshu nɛabha? Pɛnɔ bu pɛɛ, anasɛ banɔ teli, gɛ kabhakpɛkpɛ keplukpa akɔnɔ, pɛnɔ denɔ wunɔ kɔ?

² Wunɔ nahwɛ wunɔ nu bulɔ keplukpa, ba ŋlɔmɛ atrɔ bulɔ idzyi abha, anɔnyanɔ enyi klɛ akla.

³ Nɔ kasɛ sɛ no nu keplukpa gɛ ke de Kristo ɔkɔ, kɛgɛ de koeyi nɛ bulɔ axwɛwuwa nɛ mɛ, gɛ ba dɛ ŋlɔmɛ lɛ nɛ kɛdɔŋuŋlɔmɛ buni pɔ nɛ ɛkpã Kpaya anɛ Ɔfufɔɛ, ganɛ kɛdɔ ŋuŋlɔmɛ kɛklãgbua bha pɔ Anɔdzyrame idzyia bha.

⁴ Tɛyɛyɛkɛŋa anasɛ kɛnɛ nɛɛ di kɛ nu bulɔɛyɛ ganɔ Kristo abha nɛ Kpaya mɛ.

⁵ Ganɛ sɛ bu na nɛ bulɔ nahwɛ shu mɛ gɛ bu bayɛkɛ kɛdɔtili kɔ bulɔnahwɛ, pɔ bulɔ tɛnɛna de Kpaya kɔ.

⁶ Abhɛtɛ lɔ buna anasɛ onugbunyɛnya vuvɔ baxwɛwa—ganɛ keplukpa pɔ Ɔfufɔɛ, alasɛ keplukpa ke yi anɔ, pɔ Ɔfufɔɛ lɔ kɔ ɛkpã.

Kabhaŋɛŋa Denɔ Onugbunyɛnya Vuvɔ Shu

⁷ Ɔtsyɔnɛ onugɛ kɛxwɛwɛwa gɛ kɛmɛna butsi, gɛ kɛdzi keplukpa baŋlɔmɛ atrɔ kɛklãgbu abha, kɛ ba nɛ̀ kabhaŋɛŋa, sɛ tɛ Izraɛlanɛ ba dɛna Mose amɛ di kplalala, alasɛ alɛ tɛtɛtã, le bhui,

⁸ kɛ ma lɛmɛ sɛ Ɔfufɔɛ xwɛwuwa ba kɔ kabhaŋɛŋa gelee tsyɛ dɛ?

⁹ Onugɛ kɛxwɛwɛwa nɛ gɛ kɛ bu banɔɛ pɔ nu kabhaŋɛŋa, kɛlɛ lɛ baza kabhaŋɛŋa gelee dɛ kɔ kɛxwɛwɛwa gɛ kɛmɛna kɛdzyɔgo bhɛbhɛtɛ!

¹⁰ Alasɛ kide kabhaŋɛŋa dzi gɛ kabhaŋɛŋa ma ɔtsyɔnɛ nɛ aglɔsusɔnɔ nɛ kabhaŋɛŋa nɛ gɛ kaba fla.

¹¹ Klɛ onugɛ kɛ gɛ xule koeyi nɛ ba nɛ kabhaŋɛŋa, kɛlɛ kabhaŋɛŋa gɛ ka ba za gelee ke be tri gelee dɛ!

¹² Kɛlɛso, gɛ kidzoe nɛ di lɛ bulɔ ahwɛ, bu lɛ nɛ̀ amɛgɛganɛ.

¹³ Bu tɛ dzi anasɛ Mose, gɛ ayɛkɔ kɛdɔ ada amɛ sɛ tɛ Izraɛlanɛ be ti di yɛ amɛ kplala kibelɛlɛ gɛ kifu tɛtã nɛ ni.

¹⁴ Pɔ balɛ amɛ dɔ otumu, alasɛ ɔdɔtɔnɔ obowui nɛabha kɛdɔ kukumu lɛlɛ nɛ wɔ kɛbelɛlɛ gɛ ba kla tɛnyɛnya kuku keplukpa. Kɛ dɛ tsɛ nɛ balɛ amɛ, alasɛ Kristo terikpo mɛzɛza la ba tsɛ lɛ bu.

¹⁵ Ɔdɔ tɔnɔ oboewui nɛabha tsyɛ kɛbe nɔ gɛ ba kla Mose Ɛshã keplukpa, kɛdɔ nɛ zɛ da balɛ idzyi.

¹⁶ Pɔ kibenɔ gɛ anɔ teli etsyina atɔ Apalete, ba ba danɛ kɛdɔ nɛ yɛamɛ.

¹⁷ Ɔtsɔnɛ Apalete yɛ nu Ɔfufɔɛ, klɛ ɔkɛlɛ gɛ Apalete Ɔfufɔɛ nɛ ɔlɛ, ɔkɛlɛ ishuahwɛ zɛza lɛ.

¹⁸ Klɛ bulɔ bagɛ amɛ dɛdadɔ ma bulɔ petee bu mɔ Apalete nɛ kabhaŋɛŋa bulɔ amɛ letsyina kpɛ yɛ tɛzɛzɛmɛ nɛ kabhaŋɛŋa gelee-vɛabha, gɛ kɛ de Apalete nɛ mɛ, gɛ yɛ nu Ɔfufɔɛ.